Buska Sabiduria dor di e Spiritu

Dor di Elder Mathias Held

Di e Setentanan

Nos mester siña pa diferenshá bèrdat no solamente por medio di nos fakultat rashonal, pero tambe dor di e bòs ketu i simpel di e Spiritu.

Rumannan stimá, Señor, a bisa nos hopi biaha pa “buska siñansa dor di studio i tambe dor di fe. Nos por risibi lus i komprondementu no solamente dor di e rasonamentu lógiko di nos mente pero tambe dor di e guía i inspirashon di e Spiritu Santu.

E fuente adishonal aki di sabiduria no tabata semper parti di mi bida.

Mi kasá stimá Irene, i ami a bira parti di Iglesia 31 aña pasá ora ku nos tabata resién kasá. Nos tur dos a krese na Colombia, pero un par di luna despues di nos kasamentu, nos mester a bai biba na Alemania pa motibu di mi trabou. Nos tabata hopi yòn i tabatin gran speransa i ekspektativa; e tabata un tempu sumanmente eksitante i felis pa nos.

Sigun mi tabata enfoká riba mi karera, Irene tabata sinti manera ku nos lo ta bai risibí un mesahe di shelu, sin sa kon òf ki ora e mesahe aki lo yega. Asina ta ku el a kuminsa laga tur sorto di bendedó di kas-pa-kas drenta nos ka,. [bendedó di] ensiklopédia, di aspirador, di bùki di kushiná, di aparatonan pa kushina i kosnan asina, semper wardando riba e mensahe úniko.

Un anochi el a konta mi ku dos yònkuman bistí na flus a bati na nos pòrta i ku ela sinti un impreshon hopi klaro i distinto pa laga nan drenta. Nan a bisa ku nan tabata ke papia tokante Dios pero ku nan lo bai bin bèk ora ku mi tambe tabata na kas. Portá ku esaki tabata e mensahe antisipá?

Nan a kuminsa bishitá nos, i ku nan guía nos a lesa den skritura i a bin kompronde e importasha krusial di JesuCristu komo nos Salbador i Redentor. Hopi lihé nos a bin duel ku nos a wòrdu boutisá na beibi, loke no tabata un kombenio ku nos a hasi konsientemente. No opstante, pa wòrdu boutisá atrobe lo nifiká ku nos lo bai bira miembro di e Iglesia nobo aki, asina ta ku na promé lugá nos mester a realmente komprondé tur kos tokante di dje.

Pero kon nos por sa si loke e mishoneronan tabata konta nos tokante di e Bùki di Mormon, over di José Smith, i tokante di e plan di salbashon tabata en realidat bèrdat? Awèl, nos a kompronde dor di e palabranan di Señor ku nos lo por “sa por medio de nan fruto.” Asina ta ku na un manera sístematiko, nos a kuminsa eksaminá e Iglesia dor di buska e frutonan ei ku e fakultat di nos mente rashonal. Kiko nos a mira? Awèl, nos a mira:

Hendenan amabel i felís i famíanan ku tabata kompronde ku nos ta suponé di sinti goso den e bida aki i no solamente sufrimentu i misèria.
Un Iglesia ku no tin lídernan ku ta wòrdu pagá, pero ku tin miembronan ku ta aseptá asignashonnan i responsabilidatnan.
Un Iglesia kaminda JesuCristu i famíanan ta e sentro di tur kos. Kaminda miembronan ta yuna un biaha pa luna i ta hasi donashon pa yuda esnan ku ta den nesesidat, Kaminda kustumbernan sano ta wòrdu enkurashá, siñando nos pa apstené di substanshanan dañiño.

Tambe:

Nos a gusta e émfasis ku tabata tin riba kresementu personal, edukashon, traha duru i outosufisiensia.
Nos a siña tokante e programa humanitario remarkabel.
I nos tabata inpreshoná dor di e konfereshanan general, ku nan músika maravioso i e prinsípionan spiritual profundu ku tabata wòrdu kompartí einan.

Mirando tur e kosnan aki, nos no por a haña ningun falta den Iglesia. Al kontrario, nos a gusta tur kos ku nos a mira masha hopi mes. No opstante, ainda nos no por a tuma e desishon pa wòrdu boutisá pasó nos tabata ker sa tur kos promé ku nos hasi esaki.

Pero, asta den nos indesishon, Señor tabata preparando nos ku pasenshi, E tabata formando nos, i E tabata yudando nos pa deskubrí ku nos lo mester siña pa diserní bèrdat, no solamente por medio di nos fakultat rashonal, pero tambe dor di e bòs ketu i simpel, ku ta konekta espeshalmente ku nos kurason.

E bòs ei i e sentimentu ku a resultá for di esei a bini un anochi, despues di un 10 luna ku nos tabata siñando di e evangelio. Ora ku nos tabata lesando Mosiah 18,: “Si boso tin deseo di … hiba karganan di otro, … i konsolá esnan ku tin mester di konsuelo, … si esaki ta e deseo di boso kurason, kiko boso tin kontra di wòrdu boutisá den e nòmber di Señor …?

E versíkulo ei for di e Buki di Mormon a drenta nos kurason i alma, i nos a sinti i tabata sá ku no tabatin ningun rason pa no wòrdu boutisá. Nos a realisá nos mes ku e deseonan ku ta wòrdu menshoná den e versíkulonan aki tambe tabata e deseo di nos kurason i ku e kosnan ei tabata e kosnan ku enrealidat ta konta. Nan tabata mas importante ku kompronde tur kos pasó nos tabata sa sufisiente kaba. Semper nos a konfia den e influensha di un Tata Selestial amoroso i nos tabata konfía ku E lo sigui guía nos.

Asina ta ku e mesun día ei, nos a apuntá un dia pa nos boutismo, i pronto nos a wòrdu boutisá, finalmente!

Kiko nos a siña di e eksperensha aki?

Na promé lugá, nos a siña ku nos por konfía henteramente den un Tata Selestial ku ta stima nos, ku ta konstantemente purbando pa yuda nos bira e persona ku E sa ku nos por bira. E bèrdat profundo di Su palabranan a wòrdu konfirmá ora ku Ela bisa: “ Lo mi duna e yunan di hòmber liña tras di liña, regla riba regla, un tiki aki i un tiki aya; i bendishoná ta esnan ku ta tende mi reglanan … pasó nan lo haña sabiduria; pasó na esnan ku ta risibí lo mi duna mas.”

Na di dos lugá, nos a siña ku huntu ku nos fakultat rashonal, un otro aspekto pa gana konosimentu por duna nos guía i komprondementu. Ta e bòs ketu i chikí di Su Spiritu konektando ku nos kurason i tambe ku nos mente.

Tambe lo mi ke kompará e prinsípio aki ku nos kapasidat visual. Nos Tata ku ta na shelu a duna nos no solamente unu, pero dos wowo físiko. Nos por mira adekuadamente ku solamente un wowo, pero e otro wowo ta dunan nos un otro perspektivo. Ora ku tur dos perspektivo ta poné huntu den nos seleber, nan ta produsí un imágen tri-dimenshonal di loke ta rondó di nos.

Asina tambe, nos a wòrdu duná dos fuente di informashon, por medio di nos kapasidatnan físiko i spiritual. Nos mente ta produsí un perspektivo dor di nos sensashonnan físiko i por medio di nos rason. Pero por medio di e don di e Spiritu Santu, e Tata tambe a duna nos un di dos perspektivo, ku en realidat ta esun di mas importante i berdadero, pasó e ta bini direktamente for di Dje. Pero, ya komo e susuronan di e Spiritu ta hopi biaha asina sutil, hopi hende no ta konsiente di e fuente adishonal aki.

Ora ku e dos perspektivonan aki wòrdu kombiná den nos alma, un potrèt kompletu ta mustra nos e realidat di kosnan manera nan ta di bèrdat. En echo, dor di e perspektivo adishonal di e Spiritu Santu, sierto “realidatnan” mustrá eksklusivamente dor di nos komprenshon mental, por wòrdu eksponé komo gañoso òf simplemente malu. Kòrda e palabranan di Moroni: “Dor di e poder di e Spiritu Santu boso por sa e bèrdat di tur kos.”

Den mi 31 aña komo miembro di Iglesia, mi a eksperenshá hopi biaha ku si nos ta solamente konfia riba nos fakultat rashonal i a ninga òf neglishá e komprenshon spiritual ku nos por risibí por medio di e susuronan di e Spiritu Santu, ta manera nos ta biba nos bida ku solamente un wowo. Pero, papiando figurativamente, en realidat nos a wòrdu duná dos wowo. Solamente e kombinashon di tur dos bista por duna nos e potrèt kompletu i berdadero, di tantu bèrdatnan i tur kos ku nos ta eksperenshá den nos bida, komo e komprenshon kompletu i profundo di nos identidat i propósito komo yunan di un Tata Selestial bibiente.

Mi ta kòrda loke Presidente Russell M. Nelson a siña nos un aña pasá ora ku ela bisa ku “den díanan ku ta bini, lo no ta posibel pa sobrebibí spiritualmente sin e guía, direkshon, konsolashon i influensha konstante di e Spiritu Santu.”

Mi a bin sa ku sertanía absoluto ku:

Nos tin un Tata na Shelu amoroso , nos tur a palabrá pa bini na mundu komo parti di un plan divino.
Ku Jesus ta e Cristu; E ta bibu i e ta mi Salbador i Redentor.
Mi sa ku José, un hòben humilde, a wòrdu yamá pa bira un profeta outorisá ku a inisiá e despensashon di kumplimentu di tur tempu, ku tur su yabinan, poder, i outoridat di e santu saserdosio di Dios.
Mi sa ku e Bùki di Mormon ta un di dos testimonio di JesuCristu i ku famíanan ta pa nan keda huntu pa semper.
I mi sa ku nos Señor JesuCristu, ta guía esaki, Su Iglesia restourá, por medio di nos profeta bibiente, Presidente Russell M. . Nelson, awendía.

Esaki i hopi otro bèrdatnan presioso a bin bira prinsípionan esenshal spiritual di loke Dios ta yudando mi pa bira. I mi no por warda riba e siñanasanan nobo ku E ke pa ami—i boso—risibi sigun nos ta pasa dor di e bida maraviyoso aki i “siña … por medio di studio i tambe por medio di fe.”

Mi sa ku e kosnan aki ta bèrdat i ta tèstifiká di nan den e nòmber di JesuCristu, amèn