Cristu: E Lus Ku ta Bria den Skuridat
Si boso ta sinti ku e faro iluminá di boso testimonio ta pagando i e skuridat ta drentando, tuma kurashi. Warda boso promesanan na Dios.
Mi ofisina den Edifisio di Sosiedat di Sokoro tin un bista perfekto di e Tèmpel di Salt Lake. Tur anochi, ku presishon di un oloshi, e lusnan di pafó di tèmpel ta sende ku skuridat di atardi. E tèmpel ta un lus di guia konstante djis pafó di mi bentana.
Un anochi febrüari ku a pasa, mi ofisina a keda eksepshonalmente skur ora solo a baha. Ora mi a mira pafó di bentana, e tèmpel tabata skur. E lusnan no a wòrdu sendé. Mi a sinti mi hopi tristu. Mi no por a mira e torennan di e tèmpel ku pa añanan mi tabata mira tur anochi.
MIrando e skuridat kaminda mi a spera pa mira lus ma kòrdá mi ku un di e nesesidatnan fundamental ku nos tin pa por krese ta pa keda konektá na nos fuente di lus—JesuCristu. E ta e fuente di nos poder, e Lus i Bida di e Mundu. Sin un konekshon fuerte ku n’E, nos ta kuminsá muri spiritualmente. Sabiendo esei, Satanas ta buska pa probechá e preshonnan mundano ku nos tur ta eksperensiá. E ta traha pa paga nos lus, kibra e konekshon, kòrta tur suministro di koriente, lagando nos so den e skuridat. E preshonnan aki ta kondishonnan komun den mortalidat, pero Satanas ta traha duru pa isolá nos i bisa nos ku nos ta e úniko ku ta eksperensiá nan.
Algun di Nos Ta Paralisá ku Tristesa.
Ora tragedia ataká nos, ora bida ta hasi tantu dolor ku nos no por hala rosea, ora nos haña sla manera e hòmber riba kaminda pa Jérico i lagá manera morto, Jesus ta bini i ta basha zeta den nos heridanan, e ta lanta nos ku ternura, ta hiba nos na un posada, i ta sòru pa nos. Na esnan di nos ku ta tristu, E ta bias: “Lo mi aliviá e kárganan ku ta wòrdu poné riba boso skouder, ku asta boso no lo lo sinti nan riba boso lomba, …pa bo por sa ku seguridat ku ami, Señor Dios, ta yuda Mi pueblo den nan aflikshonnan.” Cristu ta kura heridanan.
Algun di Nos Ta Solamente Asina Kansá.
Èlder Jeffrey R. Holland a bisa:”No ta nesesario pa nos kore mas duru ku nos forsa . … Pero [apesar di] esaki, mi sa ku… hopi di boso ta kore [masha], masha duru i ku [e]energia i suministro emoshonal tin biaha ta registrá kasi bashí.” Ora espektativanan ta oprimí nos, nos por dal un paso patras i puntra Tata Selestial kiko tin ku laga lòs. Parti di nos eksperensia di bida ta pa siña kiko no tin ku hasi. Pero asta asina, tin biaha bida por kansa bo.. Jesus a sigurá nod, “Bini serka mi, tur ku ta kansá i kargá, i ami lo duna boso sosiegu.”
Cristu ta dispuesto pa djòin nos den e yugo i trèk pa aliviá nos karganan. Cristu ta sosiegu.
Algun di Nos ta Sinti ku Nos No ta Pas [den] e Fòrma Tradishonal.
Pa vários motibu, nos no ta sinti nos aseptá òf aseptabel. E Tèstamènt Nobo ta mustra e esfuersonan grandi ku Jesus a hasi na alkansá tur sorto di hende: leprosonan, kobradónan di impuesto, muchanan, galileonan, prostitutanan,suplikantenan, muhernan, paganonan, pekadornan, samaritanonan, viudanan, fariseonan,centirionnan romano, aldulteronan, esnan impuro pa ritual. Den kasi tur historia, E ta sali na alkanse di un persona ku tradishonalmente no tabata wòrdu aseptá den sosiedat.
Lukas 19 tta konta e historia di e hefe di e kobradó di impuesto na Jerico yamá Zakeo. El a subi un palu pa mira Jesus kana pasa. Zakeo tabata traha pa e gobièrnu Romano i tabata wòrdu mirá komo korupto i pekador. Jesus a mir’é ariba den e palu i a yam’é, bisando, “Zakeo, hasi lihé,i baha, awe mi mester keda serka bo. ” I ora Jesus a mira e bondat di Zakeo su kurason i e kosnan ku el a hasi pa otronan, El a aseptá su ofrenda, bisando, “Awe salbashon a bishitá e kas aki, [pasó] e tambe ta yu di Abraham.”
Ku ternura Cristu a bisa e Nefitanan, “Mi no a manda pa ningun di boso bai.” Pedro a haña e realisashon importante den Echonan 10 ora el a deklará, “Dios a mustra mi ku mi no mester konsiderá niun hende indigno òf impuro.” Ta un rekisito sin kambio di disípulonan Cristian i Santunan di Delaster dianan pa mustra amor berdadero un na otro. Jesus ta ekstendé e mesun tipo di invitashon na nos ku El a hasi na Zakeo, “Tende, mi ta pará na porta i mi ta bati: si {bo] tende mi stèm, i habri porta, lo mi drenta serka [bo], i lo mi sinta kome ku [bo], i [abo] ku mi.” Cristu ta mira nos den nos palu.
Algun di nos ta preokupá ku preguntanan.
No hopi aña pasá mi tabata emoshonalmente preokupá ku preguntanan ku mi no por a haña kontesta pe. Tempran riba un djasabra mainta mi tabatin un soño kòrtiku. Den e soño mi por a mira un miradó, i mi a komprondé ku mi mester a bai para den dje. E tabatin sinku bog den sirkulo aden, pero e bentananan tabata di piedra. Mi a keha den e soño, i no ker a drenta den pasó e tabata kloustrofóbiko.r. Despues e pensamentu a bini na mi mente ku e ruman di Jared ku pasenshi a dirti piedra den glas transparente. Glas ta piedra ku a pasa den un estado di kambio. Ora Señor a mishi ku e piedranan pa e ruman di Jared, nan a bria ku lus den e barkunan sukú. Diripiente mi tabata yená ku un deseo pa ta den e miradó aki mas ku niun otro lugá. E tabata e lugá mes—e úniko lugá—pa di bèrdat. mi “mira.” E preguntanan ku tabata preokupá mi no a bai, pero mas briante den mi mente tabata e pregunta despues ku mi a lanta: “Kon lo bo oumentá bo fe, meskos ku e ruman di Jared, p’asina bo piedranan por kambia den lus?”
Nos serebre mortal ta trahá pa buska komprendementu i nifikashon den poko tempu. Mi no sa tur e motibunan di kon e velo riba mortalidat ta asina diki. Esaki no ta e estado den no desaroyo eterno kaminda nos tin tur e kontestanan. E ta e estado kaminda nos ta desaroyá nos siguransa (òf tin biaha nos speransa) den e evidensia di kosnan ku [nos] no por mira. Siguransa ta bini den maneranan ku no semper ta fásil pa analisá , pero tin lus den nos skuridat. Jesus a bisa, “Ami ta e lus, i e bida, i e bèrdat di e mundu.” Pa esnan ku ta buska bèrdat, e por parse promé di ta e lugá skur i smal ku bentana di piedra. Pero ku pasenshi i preguntanan sinsero, Jesus por transformá nos bentananan di piedra di glas pa lus. Cristu ta e lus pa mira.
Algun di Nos Ta Sinti ku Nunka Nos lo No ta Sufisientemente Bon.
E kolorante köra di e Tèstamènt Bieu no tabata solamente kolorido pero tambe duradero, loke ta nifiká ku su kolo bibu ta drenta den e i lo no blikia ni maske kuantu biaha el a wòrdu labá. Satanas ta usa e metáfora aki pa pone nos sinti imperdonabel: tela blanku manchá ku kòrá nunka no por bira blanku atrobe. Pero Jesus a deklará, “Mi manera [ta] mas haltu ku boso manera,” i e milager di Su grasia ta lokual ora nos arepentí di nos pikánan, Su sanger kòrá ta bolbe nos na puresa. No ta lógiko, pero tòg e ta bèrdat.
Potrèt di iStock.com/iinwibisono
“Ounke boso pikánan ta kòrá manera sanger, nan lo bira blanku manera lechi; ounke nan ta kòrá manera kandela, nan lo bira blanku manera lana puru.” Señor a bisa enfátikamente: esun “ku arepentí di … piká, lo wòrdu pordoná, i Ami, Señor, lo no kòrda nan mas.” Di otro manera: Bini, laga nos rasoná ku otro. Bo a kometé erornan; tur ta kai chikí. Bini na mi i arepentí. Lo mi no kòrda e piká mas. Boso por ta kura atrobe. Mi tin trabou pa boso hasi. Cristu ta hasí lana blanku.
Pero kual ta e pasonan práktiko? Kua ta e yabi pa konektá di nobo na e poder di JesuCristu ora nos ta duda? Presidente Russell M. Nelson a bisa masha simpel: “E yabi ta pa hasi i warda kombenionan sagrado. … E no ta un kaminda kompliká.” Hasi Cristu e sentro di boso bida.
Si boso ta sinti ku e faro iluminá di boso testimonio ta pagando i e skuridat ta drentando, tuma kurashi. Warda boso promesanan na Dios. Hasi boso preguntanan. Ku pasenshi dirti piedra pa bira glas. Bira na JesuCristu, ku ainda ta stima boso.
Jesus a bisa: “Mi ta e lus ku [ta] bria den skuridat, i e skuridat no ta komprondé.” Esei kermen [ku] no ta importá kon duru e purba, e skuridat no por paga e lus aki. Nunka. Boso por konfia ku Su lus lo tei pa boso.
Nos, òf hende ku nos ta stima, por ta temporalmente den skuridat. Den e kaso di e Tèmpel di Salt Lake, e manager di instalashon, Hermano Val White, a haña un yamada kasi inmediatamente. Hende a nota. Kiko tabata falta e lusnan di tèmpel? Promé, e staf a bai personalmente na kada panel eléktriko den tèmpel i manualmente a sende e lusnan atrobe. Despues nan a remplasá e baterianan den e suministro di koriente i a tèst nan pa haña sa kiko a faya.
Ta difísil pa bo mes sende e lusnan. Nos mester di amigunan. Nos mester di otro. Meskos ku staf di fasilidatnan di tèmpel, nos por yuda otro dor di presentá en persona, rekargá nos baterianan spiritual, drecha lokual a bai robes.
os lus individual por ta manera in solo pera na e palu [di pasku] Pero ainda nos ta bria ku nos lus chikitu, i nos tur huntu, meskos ku e témpel di Salt Lake den tempu di Pasku, [por] atraé miones di hende na e di tèmpel i na Señor. Mihó di tur, manera Presidente Nelson a animá, nos por trese e Salbador Su lus na nos mes i na e personanan importante pa nos dor di e akto simpel di warda nos kombenionan. Den diferente manera, Señor ta rekompensá e akto fiel ku poder i ku goso.
Mi ta testifiká ku boso ta stimá. Señor sa kon duru boso ta purbando. Boso ta hasiendo progreso. Sigui bai. E ta mira tur boso sakrifisionan skondí i ta konta nan pa boso bienestar i na bienestar di tur ku boso stima. Boso trabou no ta por nada. Boso no ta boso so. Su nòmber, Emmanuel, ta nifiká”Dios ku nos.” E ta sigur ku boso.
Dal algun paso mas riba e kaminda di kombenio, hasta ora ta muchu skur pa mira hopi leu. E lusnan lo sende atrobe. Mi ta testifiká di e bèrdat di Jesus Su palabranan, i nan ta yená ku lus; “Yega serka mi i ami lo yega serka boso; buska mi ku diligensia i boso lo haña mi; puntra, i boso lo risibí ;bati, i lo habri pa boso.” Den e nòmber di JesuCristu, amèn.