Deleita riba e Palabranan di Cristu
Deleita riba e palabranan di Cristu por sosodé na kualkier momentu i na kualkier okashon, si nos prepará nos kurasonnan.
Nos Tata Selestial stima nos. El a proveé un plan perfekto pa nos por disfrutá di Su bendishonnan. Den e bida aki, nos tur ta invitá pa bin na Cristu i risibí e evangelio restourá di JesuCristo pa medio di boutismo, risbí e don di Espiritu Sanmtu, i fielmente biba e evangelio. Nefi a desikribí nos kompromiso pa wòrdu boutisá i drenta e “kaminda stret i smal,” i wòrdu rekordá pa kontinuá “pusha pa dilanti ku un konstansia den Cristu, E pamfleta … deleitando den e palabra di Cristu, i perseverá te na final,” p’asina risibí tur e bendishonnan ku Tata Selestial tin wardá pa nos. (2 Nefi 31:19–20).
Nefi ta sigui rekordá nos ku si nos “deleita riba e palabranan di Kristu,” nan “no bisa [nos] tur kos ku [nos] mester hasi”(2 Nefi 32:3) i ku nos lo wòrdu empoderá pa surpasá tur “flechánan di kandela di e atversario”(1 Nefi 15:24).
Kiko ta Deleita?
Tempu mi tabata yòn, mi tabata pensa ku deleita ta simplemente tin un kuminda grandi aros, sushi i sòus di soya. Mi sa awor ku deleitá bèrdadero ta mas ku disfrutá di un kuminda delisioso. Ta un eksperiensia di goso, nutri, selebrashon, kompartí, ekspresá amor na famianan i sernan kerí, komuniká nos gratitut na Dios, i konstruí relashonnan miéntras disfrutando kuminda abundante i inkreiblemente dushi. Mi ta kere ora nos ta deleita riba e palabranan di Cristu, nos mester ta pensando riba e mesun tipo di eksperiensia. Deleitando riba e skrituranan no ta solamente lesa nan. E mester trese nos goso berdadero i konstruí nos relashon ku e Salbador.
Esaki ta klaramente siñá den e Buki di Mormon. Kòrda e soño di Lehi kaminda e ta mira e palu “kual su fruta [ta] deseabel pa hasi bo felis.” E fruta ta e amor di Dios, i manera Lehi a purba e fruta, “e tabata … dushi, mas ku tur kos ku [e] la yega di purba.” E “la yena [su] alma ku un goso grandi” i ta algu ku e ker a kompartí ku su famia (1 Nefi 8:10–12).
Ora nos ta deleita, kasi sigur nos lo haña tambe ku e kantidat òf e tipo di kuminda ku nos tin no ta importa si nos kurason ta yená ku gratitut. Lehi su famia a biba riba karni kuru den desierto, pero Nefi a deskribí nan tribulashonnan difísil, bisando “Grandi tabata nos bendishonnan di Señor” ku “nos hende muhénan … tabata fuerte” i nan por a duna lus “sin murmurá” (1 Nefi 17:1–2).
Deleita tin biaha ta involukrá eksperimentá i purba. Alma ta papia di un bon simia ku ta wòrdu planta den nos kurason. Ora nos eksperimentá ku n’e, nos lo realisáku e simia ta kuminsá “di bira delisioso” (wak Alma 32:28–33).
Deleitando riba e Palabranan di Cristu
E bendishon di deleita riba e palabranan di Cristu ta poderoso i ta kambia bida. Tin tres [di nan] en partikular ku mi ke invitá boso pa apliká den boso bida.
Promé e palabranan di Cristu por yuda nos “oumentá [nos] kapasidat pa risibí revelashon” (Russell M. Nelson, “Revelation for the Church, Revelation for Our Lives,” Liahona, May 2018, 96) I guia nos sigur dor di nos bida. Alma ta siña ku e palabranan di Cristu tin “e gran tendensia di hiba e hendenan na hasi e loke [ta] korekto”, i ku nan ta mas poderoso ku kualke kos ku “e spada” por logra (Alma 31:5). Miéntras mi tabata buska e sabiduria di Dios den atendé ku mi propio desafionan, semper, ora mi a purba e “virtut di e palabra di Dios,” (Alma 31:5) mi a sinti inspirá i kapas pa tuma desishonnan sabí, surpasá tentashonnan, i bendishoná mi bida ku mas fé den Cristu i amor pa esnan ku ta rondona mi. Nos profeta, Russell M. Nelson, a siña nos ku “den e dianan ku ta bini, lo no ta posibel pa sobreviví spiritualmente sin guia, direkshon, konsuelo, i influensia konstante di e Espiritu Santu” (“Revelation for the Church, Revelation for Our Lives,” 96). Revelashonnan nesesario lo bin ora nos ta purba e “virtut di e palabra,” i e palabra ei lo bira mas poderoso ku kualke kos ku nos por purba imaginá.
Di Dos, ora nos ta lucha ku nos propio identidat i falta di outo estima, e “palabranan plasentero di Dios” (Jacob 2:8) den e eskrituranan lo yuda nos sa ken nos ta bèrdaderamente i duna nos forsa mas ayá di nos mes. Rekonosiendo mi identidat komo yu di Dios tabata un di e momentunan mas dushi ku mi a yega di eksperensiá. Den mi komienso di adolesensia, mi no tabata konosé nada tokante e enseñansanan di e Salbador. Ora mi a lesa e Tèstament Nobo pa promé biaha, e palabranan di Cristu bèrdaderamente a kura mi alma heridá. Mi a realisá ku mi no tabata mi so i ku mi ta un yu di Dios. Miéntras mi ta rekonosé mi bèrdadero identidat dilanti di Dios, mi a realisá mi potensial infinito pa medio di Cristu Su Ekspiashon.
Enos tambe a kompartí su eksperiensia personal di iluminashon ku ta bin dor di kontemplá e palabranan di Cristu. Miéntras Enos tabata kontemplá e palabranan ku su tata a siñ’é tokante “bida eterno, i e goso di e Santunan, [baha] profundo den [su kurason],” i su alma “hambrá; i [el] a kai dilanti di [su] Kreadó … den orashon poderoso” (Enos 1:3–4). Den e orashon ei e la bin konosé e Salbador i siña ku nos tin gran balor, nos ta stimá i por wòrdu pordoná pa nos fayonan, i ta bèrdadero yunan di Dios.
Di tres, nos por alsa e bida di otronan pa medio di e palabranan di Cristu. Meskos ku Enos ta tin su propio tempu i luga kaminda e palabranan di Cristu a toka su kurason, Señor lo hasi Su parti pa toka e kurasonnan di esnan ku nos ke kompartí e evangelio. Hopi di nos por sinti deskurashá ora nos trata na invitá un hende pa skucha e evangelio pasó nos resultado deseá no a sigui. Sin importa di e resultado, Señor ta invitá nos pa habri nos boka i komparti e mensahe di evangelio ku otronan.
Dos aña pasa, Señor a toka mi kerido mama su kurason, ku a yude disidí pa risibí e ordenansanan di boutismo. Mi a warda pa e dia ei tuma lugá kasi 35 aña. Pa e por a tuma e desishon ei, hopi miembro di Iglesia bèrdaderamente a ministrá na dj’e manera Cristu lo a hasi. Un djadumingu, e la sinti ku e mester bai iglesia. E la sigui e susuro ei. Miéntras el a sinta na e promé rei i warda pa e servisio di sakramento kuminsá, e mucha hòmber di kuater aña a para su dilanti e mir’e. El a kumindá e mucha ku un sonrisa. E mucha chikitu a bandoná su presensia abruptamente i bai bèk na su propio asiento, ku tabata na e otro banda di e rei kaminda mi mama tabata sintá. E mucha a kue algu for di su asiento i bin bèk i duna mi mama un buki di himno i bai bèk na su asiento. Mi mama a ripará ku un buki di himnario tabata poné na kada salta un asiento den e kapia. E por a kue unu fasilmente for di e stul banda di dje. Sinembargo, el a wòrdu impreshoná dor di e mucha su inosensia i akto amabel, ku el a siña na kas i na iglesia. Tabata un momentu hopi tierno p’e. E ta tin un impreshon fuerte ku Dios tabata invitando e pa bin i sigui e Salbador. El a sinti ku e mester wòrdu boutisá. E mucha chikitu aki no a buska rekonosimentu pa loke el a hasi, pero simplemente el a hasi su bèst pa biba e palabra di Dios i pa stima su prohimo. Su amabilidat a krea un kambio importante den e kurason di mi mama.
E palabranan di Cristu lo toka su kurason profundamente i habri e wowonan di esnan ku ainda no ta mir’E. Riba e kaminda pa Emmaus, dos disípulo tabata kana ku Jesus. Nan tabata tristu i no por a komprondé ku e Salbador a triunfá [riba] morto. Den nan doló, nan no a rekonosé ku ta e Cristu bibiente tabata kana ku nan. Ounke Jesus “a eksponé na nan den tur e skrituranan e kosnan konserniente di Su mes,” ainda nan no a rekonose E komo nan Salbador resusitá te ora nan a sinta i parti pan ku n’E. Nan “wowonan” a habri. Manera nos - òf nos amigunan, sosionan, i bisiñanan —ta deleita i parti pan ku n’E, nos wowonan di komprondimentu lo habri. Ora e disípulonan na Emmaus a reflekshoná riba nan tempu ku e Salbador resusitá, nan a bisa ku nan kurasonnan tabata kima den kan mientras E tabata habri e skrituranan pa nan (wak Lukas 24:27–32). Esaki ta bèrdat pa nos tur.
Konklushon
Den konklushon, mi ta duna mi testimonio ku deleita riba e palabranan di Cristu por sosodé na kualkier momentu i na kualkier okashon, si nos prepará nos kurasonnan pa risibí nan. Deleita riba e palabranan di Cristu lo trese revelashonnan ku ta mantené nos bida, reafirmá nos bèrdadero identitat i balor dilanti di Dios komo Su yu, i guia nos amigunan na Cristu den bida sempiterno. Laga mi termina resonando e invitashon di Nefi ora e la bisa: “Bo mester bai dilanti ku firmesa den Cristu, teniendo un fulgor perfekto di speransa, i un amor pa Dios pa tur hende. Di manera ku, si boso pusha dilanti, alimentando boso ku e palabra di Cristu, i perseverá te na fin, ata ki, asina e Tata ta bisa: boso lo tin bida eterno” (2 Nefi 31:20). Den e nòmber di JesuCristu, amèn.