Tataekinan te Euangkerio n Rau
Iai tibwangara ae tabu bwa ti na tataekina korakoran ao ana rau Iesu Kristo nakoia aomata ake a kan ongora.
Tariu ao mwaneu aika kam tangiraki, ti butimwaai ngkami nakon te maungatabu ni kabuta! I a kaman kakantangingaa te bong aei ma te nano ni kariaria. I tataro ibukimi ni katoa bong. I tataro naba bwa e na riki te maungatabu aei bwa te tai ni kamarurunga tamneira ngaira ni kabane.
Mai imwiin te maungatabu ae nako, e teimatoa n iai te kangaanga n te aonaaba. Te buti n aoraki n te aonaaba ae e bon rooti naba maiura. Ao ngkai e a taonaki te aonaaba n te itabaraara are e a karokoa te maaku ae korakora iaoia mirion mwaane, aine, ao ataei aika akea aia bure.
A kaman nora ara bong burabeti, bwa e na iai te buaka ao rongorongon te buaka ao e na mangaongao te aonaaba.1 Ngaira taan iriira Iesu Kristo, ti bubuti nakoia mataniwi n aaba bwa a na karekea te bonnano n taobaraa aia kangaanga. Ti kaoiia aomata n tabo nako bwa a na tataro ibukiia ake a kainnano, ni karaoa are a konaa ni buokiia ake a rotaki, ao n ukora ana buoka te Uea ni katoki itabaraara aika korakora.
Tariu ao mwaaneu, ana euangkerio Iesu Kristo e tuai rang kainanoaki ngkoa nakon riki te bong aei. Te kauntaeka ao te buaka, a kaitarai ana reirei ma ana koaua te Tia Kamaiu. I tangira te Uea Iesu Kristo ao ni kakoauaa bwa Ana euangkerio bon ti ngaia te kawai ni karekea te rau. Ana euangkerio bon te euangkerio n rau.2
Ana euangkerio bon ti te kaeka ngkana e a mwaiti n te aonaaba ae a taonaki n te maaku.3 Aio e a kamatoa riki ae ti riai ni ienikuri n iriira ana kaetieti te Uea are e anga nakoia ana reirei bwa a na “nako … n aba ni kabane, n tataekina te euangkerio nakoia kaain aonaaba ni kabaneia.”4 Bon tibwangara ae tabu bwa ti na tataekina korakoran ao ana rau Iesu Kristo nakoia aomata ake a kan ongora ao ni kan karimoaa te Atua inanon maiuia.
Aomata ake a atia ni karaoi berita ma te Atua atia ni berita bwa a na tabeakiniia tabeman ao ni beku ibukiia ake a kainano. Ti kona ni kaota te onimaki iroun te Atua ao n tauraoi n tainako n kaeka nakoia ake a titiraniniira ibukin te “kantaninga ae mena i [nanora].”5 Iai tibwangara ae kakaawaki ni ikoikotaia Iteraera.
N te bong aei I kamatoa n taekinna bwa e a tia n tua te Uea bwa a riai ataeimwane ni kabane ni katauraoi ao ni mwananga ni mitinare. Ataeinimwaane aika kaain te Ekaretia, bon tabeia n te nakoanibonga te mwakuri ni mitinarei. E a tia ni baireaki ami tai n roko n te aonaaba ike e a ikoikotaki iai tibun Iteraera. Ngkana ko mitinare, ko kakoroa nanon tibwangam n ikoikotaia tibun Iteraera!
Ngkami ataeinaine ake kam tau man konamaki, e tamaroa te mwakuri ni mitinare, ma e bon nakoimi, baireana. Ti tangiriia mitinare n aiine ao ti butimwaiia ma nanora ni koaua. E korakora naba ae kam anga nakon te mwakuri aei! Tataro bwa ko na ataia ngkana te Uea e tangiria bwa ko na mitinare, ao te Tamnei ae Raoiroi, e na kaeka nako nanom ao am iango.
Raoraou aika kairake, kam kakawaki iroun te Uea. E a tia ni baireia bwa e na karuoko n te tai aei ni buoka ikotakiia Iteraera. Am babaire n nako n te mition, bwa tao te mition are ko rereireiia aomata ke te mition ni ibuobuoki, e na kakabwaiako ma aomata riki tabeman. Ti butimwaiia naba taanga aika ikawai bwa a na beku ngkana e angaraoi. Bon akea kabotauan aia mwakuri.
Ni kabane mitinare, a reirei ao ni kaota aia koaua iaon te Tia Kamaiu. Baika a karooa te maiu n tamnei n te aonaaba e a kabatiaa riki kainnanoan otan Iesu Kristo nakon riki are mai imwaaina. E riai bwa e na reke aia tai aomata n ongora ana euangkerio Iesu Kristo ae kaokaki. E riai bwa aomata a na ataa te tabo ae kuneaki iai te kantaninga ao te rau are e “[riaon] atatai ni kabane.”6
E na riki te maungatabu aei bwa te tai n rau ao ni kanuai tamneimi. Ko na ukora kairan kawaim i nanon taian tetere aikai, bon au tataro n aran Iesu Kristo ae tabu, amen.