Nunka Laga un Oportunidat Pasa pa Testifiká di Cristo
E berdadero goso ta den nos boluntat di bin mas serka di Cristo i testifiká pa nos mes.
Awe ta hasi nët sinku aña, [ku] nos a hisa nos mannan pa sostené nos profeta stimá, Presidente Russell M. Nelson, komo Presidente di E Iglesia di JesuCristo di e Santunan di e Delaster Dianan―e portabos di Señor pa e temporada remarkabel di kresementu i revelashon. Pa medio di dje, nos a risibí inkontabel invitashonnan i a wòrdu primití bendishonnan glorioso si nos lo enfoká nos bidanan riba nos Salbador, JesuCristo.
Na dos mil diesun, miéntras mi tabata sirbiendo ku mi kasá komo lidernan mishonal na e bunita Curitiba, Brazil, mi telefón a rin durante un reunion. Pura pa but’é na silensio, mi a ripará ku e yamada tabata di mi tata. Lihé mi a sali for di e reunion pa kontestá: “Kon ta bai, Tata!”
Inesperá, su bos tabata yená ku emoshon: “Kon ta bai, Bonnie. Mi mester bisa bo algu. Mi a wòrdu diagnostiká ku ALS.”
Mi mente tabata yen di konfushon, “Warda! Kiko ta ALS?”
Mi tata ya tabata splikando, “Mi mente lo keda alerta tanten ku mi kurpa poko poko lo paga.”
Mi a sinti ku henter mi mundu tabata kambia ora mi a kuminsá lucha ku e implikashonnan di e notisia doloroso aki. Pero riba e dia inolbidabèl ei, tabata su delaster frase ku a haña un lugá permanente den mi kurason. Mi tata stimá a bisa ku urgensia, “Bonnie, Nunka laga un Opportunidat pasa pa testifiká di Cristo.”
Mi a reflekshoná i hasi orashon tokante e konseho di mi Tata. Regularmente mi a puntra mi mes si mi sa kompletamente kiko kermen nunka laga un Opportunidat pasa pa testifiká di JesuCristo.
Manera boso, okashonalmente mi a lanta riba e promé djadumingu di eluna i duna un testimonio di Cristo. Hopi biaha mi a testifiká di e bèrdatnan di evangelio komo parti di un lès. Mi a siña ku kurashi e bèrdat i deklará e divinidat di Cristo komo mishonero.
Sinembargo e súplika aki mi a sintié mas personal! Tabata parse ku e tabata bisa, Bonnie, no laga e mundu superá bo! Keda fiel na bo kombenionan ku e Salbador. Buska pa eksperimentá Su bendishonnan tur dia, i pa ta dispuesto pa testifiká pa medio di e Spiritu Santu di Su poder i presensia den bo bida!”
Nos ta biba den un mundu kaí, ku distraishonnan ku ta persuadí nos wowonan i kurasonnan pa bai abou na lugá di bai ariba na shelu. Meskos ku e Nefitanan den 3 Nefi 11, nos mester di JesuCristo. Bo por imaginá bo mes einan, den hopi hende ku a eksperensiá hopi kaos i destrukshon? Kon lo e tabata di tende e invitashon personal di Señor?
“Lanta i bini dilanti serka Mi, ku boso por hinka boso man den mi kustia, i tambe ku boso por fula e markanan di e klabunan den mi man i na mi pia, ku boso por sa ku Ami ta … e Dios di henter mundu, i ku a wòrdu matá pa e pikanan di e mundu.
“I …e multitut a bai dilanti …un pa un …i a wak ku nan wowonan i a mishi ku nan mannan, i a haña sa …i a duna testimonio pa nan mes;”1
E Nefitanat aki ansiosamente a bai dilanti pa pusha nan mannan den Su banda i mishi ku e markanan di e klabunan den Su mannan i pianan, asina nan por testifiká pa nan mes ku esaki tabata e Cristo. Di mes manera, hopi hende fiel ku nos a studia den e Teètamènt Nobo e aña aki a warda ansioso e benida di Cristo. Despues nan a sali for di nan fèlt, bankonan di trabou, i mesanan di kome i a sigui E, a pusha E, bini na bòshi riba djE, i sinta ku E. Nos ta asina ansioso pa testifiká pa nos mes manera e multitutnan den e skrituranan? E bendishonnan ku nos ta buska ta ménos nesesario ku [esun] di nan?
Ora Cristo a bishitá e Nefitanan fisikamente na nan tèmpel, Su invitashon no tabata pa para na un distansia i wak na djE, pero pa mishi kunE, pa sinti pa nan mes e realidat di e Salbador di e humanidat. Kon nos por hala serka sufisiente pa gana un testimonio personal di JesuCristo? Esaki por ta parti di kiko mi tata tabata purba di siñá mi. Ounke nos lo no disfrutá e mesun proksimidat manera esnan ku a kana ku Cristo durante Su ministerio riba tera, pa medio di e Spiritu Santu nos por eksperensiá Su poder tur dia! Mes tantu kuomo nos mester!
E mujeres Jovenes rònt mundu a siñá mi masha hopi tokante buska Cristo i haña tur dia testimonio personan di sjE. Lagami kompartí e sabiduria di dos di nan:
Livvy a wak e konferensia general henter su bida. Efektivamente, na su kas nan tradishonalmente ta wak tur e sinku seshon komo famia. Den pasado, e konferensia pa Livvy tabata nifiká sinta pinta sin pone atenshon òf okashonalmente tira un kabes sin deseá esaki. Pero e delaster konferensia general di òktober tabata diferente. El a bira personal.
E biaha aki, Livvy a disidí di bira un partisipante aktivo. El a buta e notifikashonnan di su telefòn na silensio i a tuma nota di e impreshonnan di e Spiritu. E tabata sorprendí ora e tabata sinti kosnan spesifiko ku Dios tabata ke pa e skucha i hasi. E desishon aki a hasi un diferenshia den su bida kasi mesora.
Dianan despues su amigunan a invit’é na un pelikula ku no ta apropiá. El a reflekshoná, “Mi a sinti e palabaranan i spiritu di e konferensia a bini bèk den mi kurason, i mi a skucha mi mes rechasá nan invitashon.” E tambe tabata tin e kurashi di komparti su testimonio di e Salbador den su bario.
Despues di e susesonan aki el a bisa, “E kos inkreibel ta, ora mi a skucha mi mes testifiká ku Jesus ta e Cristo, mi a sinti e Spiritu Santu konfirmá esaki atrobe pa ami.”
Livvy no a bula manera un piedra riba e superfisio di e fin di siman di konferensia; e a sambuyá, mente i spiritu, i a haña e Salbador ei.
I despues, ta Maddy. Ora su famia a stòp di bin iglesia, Maddy tabata konfundí i no tabata sa eksaktamente kiko e tin ku hasi. El a realisá ku algu importante tabata perdí. I ainsa ta ku edat di diestres aña, Maddy a kuminsá bai iglesia su so. Ounke ta su so tabata algun biaha difísil i inkómodo, e tabata sa ku e por a haña e Salbador na iglesia i e tabata deseá di ta kaminda E tabata. El a bisa, “Den iglesia mi alma ta sinti manera e ta na kas.”
Maddy a tene su mes na e echo ku su famia a wòrdu seyá huntu pa eternidat. El a kuminsa trese su rumannan hòmbèr chiki ku ne na iglesia i studia e skrituranan ku nan na kas. Eventualmente su mama a kuminsá bini ku nan. Maddy a bisa su mama di su deseo di sirbi un mishon i a puntra su mama si e por ta kla pa bai tèmpel ku ne.
Awe Maddy ta na MTC.[Papiamentu: Sentro di Kapasitashon Mishonal] E ta sirbiendo. E ta testifikando di Cristo. Su ehèmpel a yuda guia ambos mayornan bai bèk na e tèmpel i bai bèk na Cristo.
Manera Livvy i Maddy, ora nos skohe pa buska Cristo, e Spiritu lo testifiká di djE den hopi situashon diferente. E testimonionan di e Spiritu ta sosodé ora nos yuná, hasi orashon, warda, i sigui bai dilanti. Nos serkania ku Cristo ta krese pa medio di adorashon frekuentemente den e tèmpel, arepentí tur dia, studia e skritura, bai iglesia i seminario, reflekshoná riba nos bendishonnan patriarkal, risibi ordenansanan dignamente, i honra e konvenionan sagrado. Tur esaki ta invitá e Spiritu pa iluminá nos mente, i nan lo trese pas i protekshon. Pero nos ta honranan komo oportunidatnan sagrado pa testifiká di Cristo?
Mi a asistí na e tèmpell hopi biaha, pero ora mi adorá den e kas di Señor, e ta kambia mi. Tin biaha durante di ayuno, mi ta haña mi mes simplemente pasando hambèr, pero otro biaha, mi ta deleitá den e Spiritu ku propósito. Tin biaha mi tabata gruña den djente orashonnan ku ta repetitivo i di rutinario, pero mi tambe a bin anhelosamente pa risibí konsultá pa risibi konseho di Señor pa medio di orashon.
Tin poder den hasi e kustumbernan aki ménos manera un lista di tarea i mas komo un testimonio. E proseso lo ta gradual pero e lo krese ku un partisipashon diario, aktivo i eksperiensianan yená ku propósuto ku Cristo. Ora nos aktuá kontinuamente riba Su enseñansa, nos ta gana un testimonio di djE; nos ta traha un relashon ku nE i ku nos Tata Selestial. Nos ta kuminsá bira manera Nan.
E atversario ta krea hopi zonido ku e por ta difísil pa skucha e bos di Señor. Nos mundu, nos desafionan, nos sirkunstansianan lo no bira mas ketu, pero nos por i tin ku pasa hamber i set despues di e kosnan di Cristo pa “skucha E” ku klaridat.2 Nos kier krea un memoria muskular di disipulado i testimonio ku lo trese enfoke na nos konfiansa den nos Salbador kada dia.
Mi tata a bai sosegá diesun aña pasá, pero su palabranan ta bibu den mi. “Bonnie,nunka laga un Opportunidat pasa pa testifiká di Cristo.” Mi ta invitá boso pa uni ku mi i aseptá su invitashon. Buska di Cristo tur kaminda―mi ta primiti boso ku E tei!3 E berdadero goso ta den nos boluntat di bin mas serka di Cristo i testifiká pa nos mes.
Nos sa ku den e delaster dianan, “tur rudia lo dobla, i tur lenga lo profesá” u Jesus ta e Cristo.4k. Mi ta pidi pa e testimonio aki lo bira un eksperiensia normal i natural pa nos awor— ku nos por tuma kada oportunidat pa testifiká ku alegria: JesuCristo ta bibu!
O, kuantu mi ta stimE. Kuan gradesido nos ta pa Su Ekspiashon infinito, ku a “hasi bida eterno un posibilidat i inmortalidat un realidat pa [nos] tur.”5 Mi ta testifiká di nos Salbador Su bondat i gran gloria na Su nòmbèr sagrado, asta JesuCristo, amèn.