JesuCristo Ta e Fortalesa di Mayornan

Pa Elder Dieter F. Uchtdorf

Di e Quorum di e Diesdos Apòstelnan

Yuda bo yunan konstruí fe den JesuCristo, stima Su evangelio i Su Iglesia, pa prepará pa un bida largu di eskóhonan rekto.

Un biaha tabatin, un tata ku tabata na punto di bai sali pa un anochi di reunion di obispado. Su yu muhé di kuater aña a para dilanti di dje, ku su piyama bistí teniendo un kopia di e Relatonan di Buki di Mormon den su man.

“Dikon bo tin ku bai un reunion?” el a puntra.

“Pasobra mi ta un konsehero den e obispado,” el a kontestá.

“Pero bo ta mi tata!” su yu muhé a protestá.

El a bai na rudia su dilanti. “Kurason,” el a bisa, “mi sa ku bo ke pa mi lesa p’abo i yuda bo bai drumi, pero awe nochi mi mester yuda e obispo.”

E yu a kontest’é, “E obispo no tin un tata pa yude bai drumi?”

Nos ta eternamente gradesí pa e kantidat grandi di miembronan ku ta sirbi diligentemente den e Iglesia di JesuCristo kada dia. Bo sakrifisio ta bèrdaderamente sagrado.

Pero manera e mucha muhé aki ta parse di komprondé, tin algu mesun sagrado—algu ku no por remplasá—tokante un mayor nutri un mucha. E ta reflekshoná e patronchi di shelu.¹ Nos Tata den Shelu, nos Mayor Divino, sigur ta regosihá ora Su yunan ta wòrdu siñá i nutrí dor di nan mayornan na tera.²

Mayornan, danki pa tur loke bo ta hasiendo pa lanta boso yunan. I yunan, danki pa tur kos ku bo ta hasiendo pa lanta bo mayornan, pasobra manera kada mayor sa, hopi bia nos ta siña mesun tantu for di nos yunan tokante, fe, speransa, i karidat ku nan ta siña for di nos!³

Mayornan Tin un Deber Sagrado

Bo a yega di pensa riba e rísiko tremendo ku nos Tata den Shelu ta tuma kada bia E manda un yu na tera? Esakinan ta Su yunan spiritual. Nan tin potensial ilimitá. Nan ta destiná na bira sernan glorioso di bondat, grasia, i bèrdat. I asina mes nan ta bin na tera kompletamente sin defensa, kasi sin por hasi nada ku ta solamente yora pa yudansa. E memoria di nan tempu den Dios su presensia ta wòrdu tapá dor di un velo, huntu ku e konosementu di ken nan ta bèrdaderamente i ken nan por bira. Nan ta forma nan entendimentu di bida, amor, Dios, i Su plan basá riba loke nan ta opservá for di hendenan rondó di nan—spesialmente nan mayornan, ken, honestamente, ainda ta purbando na desifrá kosnan nan mes.

Dios a duna mayornan e “deber sagrado pa kria nan yunan den amor i rektitut, pa proveé pa nan nesesidatnan físiko i spiritual, pa siña nan stima i sirbi otro, i pa … warda e mandamentunan di Dios.”⁴

Esei ta sufisiente pa mantené e mihó mayornan lantá anochi.

Mi mensahe na tur mayor ta esaki:

E Señor stima boso.

E ta ku boso.

E ta para banda di boso.

E ta boso fortalesa den guia boso yunan pa hasi eskohonan rekto.

Akseptá e privilegio di responsabilidat ku kurashi i alegria. No delegá e fuente di bendishon selestial na ningun otro hende. Den e malchi di e balornan i prinsipionan di evangelilo, boso ta esnan pa guia boso yu den e detayenan di bida diario. Yuda bo yunan konstruí fe den JesuCristo, stima Su evangelio i Su Iglesia, pa prepará pa un bida hinte di eskóhonan rekto. De hecho, esei ta Dios su plan pa mayornan.

Satanas lo oponé bo, distraí bo, i trata na deskurashá bo.

Pero kada yu a risibí e Lus di Cristo komo un liña direkto pa shelu. I e Salbador lo yuda bo, guia bo, i enkurashá bo. Buska Su yudansa. Puntra Señor!

Meskos ku JesuCristo ta e fortalesa di hubentut, JesuCristo tambe ta e fortalesa di mayornan.

E ta Magnifiká Amor

Tin bia nos por puntra nos mes si otro hende ta mihó kalifiká pa guia i siña nos yunan. Pero no ta importá kon inadekuá bo por sinti, bo tin algu ku ta kalifiká bo unikamente: bo amor pa bo yu.

E amor di un mayor pa e mucha ta un di e forsanan mas fuerte den e universo. E ta un di e poko kosnan riba e mundu aki ku por ta bèrdaderamente eterno.

Awor, kisas bo ta sinti ku bo relashon ku bo yu no ta ideal. Esei ta unda e poder di e Salbador ta bin aden. E ta sana e enfermo, i E por sana relashonnan. E ta multipliká pan i piská, i E por multipliká e amor i goso den bo hogar.

Bo amor pa bo yunan ta krea un ambiente riku pa siña bèrdat i krea fe. Hasi di bo hogar un kas di orashon, enseñansa, i fe; un kas di eksperiensianan alegre, un lugá di pertenesé; un kas di Dios.⁵ I “hasi orashon na e Tata ku tur e energia di kurason, pa [bo] por ta yená ku [Su] amor, kual el a [deramá] riba … siguidónan di su Yu, JesuCristo.”⁶

E ta Maginifiká Esfuersonan Chikitu i Simpel

Un otro forsa ku bo tin, komo mayor, ta e oportunidat pa influensia konstante i tur dia. Amistatnan, maestronan, i medio sosial ta bin i bai. Pero bo por ta e influensia mas konstante i sigur den bo yu su bida.

Bo esfuersonan por mustra chikitu kompará ku e bosnan haltu ku bo yun ta skucha den e mundu. Tin bia e por sinti ku bo no ta logrando mashá. Pero kòrda ku “pa medio di kosnan chikitu Señor por hasi kosnan grandi.”⁷ Un nochi di hogar, un kombersashon di evangelio, òf un bon ehèmpel kisas lo no kambia bo yu su bida den un momentu, mesun tantu ku un gota di awaseru por kousa un mata pa krese mesora. Pero e konsistensia di kosnan chikitu i simpel, dia tras di dia, ta nutri bo yunan mas mihó ku un inundashon di bes en kuando.⁸

Esei ta Señor su manera. E ta papia ku bo i bo yu ku un bos apasibel, no ku un bos di trueno.⁹ El a kura Naaman no pa medio di “algun kos grandi” pero pa medio di un simpel akto di baña ripití.¹⁰ E yunan di Israel a disfrutá di e bankete di sloke den e desierto, pero loke a mantené nan na bida tabata e milager chikitu i simpel di mana—nan pan di kada dia.¹¹

Rumannan, pan di kada dia ta mihó prepará i sirbí na kas. Fe i testimonio ta mihó nutrí den maneranan normal i natural, un mordé kada bia, den momentunan chikitu i simpel, den e fluho konstante di bida diario.¹²

Kada momentu ta un momentu di enseñansa. Kada palabra i akshon por ta un guia pa tuma desishon.¹³

Kisas lo bo no mira e efekto inmediato di bo esfuersonan. Pero no entregá. “Tur kos ta bin sosodé den su tempu,” Señor ta bisa. “Pues, no kansa den hasi bon, pasobra [boso] ta poniendo e fundeshi pa un gran obra.”¹⁴ Kua obra lo por ta mas grandi ku yuda Señor su yunan presioso siña ken nan ta bèrdaderamente i konstruí nan fe den JesuCristo, Su evangelio, i Su Iglesia? JesuCristo lo bendishoná i magnifiká bo esfuersonan konsistente.

E ta Duna Revelashon

Un otro manera poderoso ku Señor ta apoyá mayornan ta pa medio di e don di revelashon personal. Dios ta ansioso pa drama Su Espíritu pa pa guia mayornan.

Ora bo ta den orashon i sensibel na e Spiritu, E lo atvertí bo di e peligernan skondí.¹⁵ E lo revelá bo yunan su donnan, nan fortalesa, i preokupashonnan skondí.¹⁶ Dios lo yuda bo wak bo yunan manera E ta mira nan—mas ayá di nan apariensia eksterno i den nan kurason.¹⁷

Ku Dios su yuansa, bo por siña pa konosé bo yunan den un manera puru i selestial. Mi ta invitá bo pa akseptá Dios su oferta pa guia bo famia pa medio di revelashon personal. Buska Su guia den bo orashonnan.¹⁸

Un Kambio Potente

Kisas e yudansa di mas importante ku JesuCristo ta ofresé na mayornan ta e “kambio poderoso” di kurason.¹⁹ E ta un milager ku kada un di nos mester.

Pa un momentu, imaginá e situashon aki; Bo ta na iglesia, skuchando un diskurso tokante famianan. E diskursante ta papia di un hogar perfekto i un famia ainda mas perfekto. Kasánan nunka ta diskutí. Yunan ta stòp di lesa nan skrituranan solamente ora ta tempu pa hasi tarea di skol. I e músika di “Amad a Otros”²⁰ ta toka den fondo. Promé ku e diskursante yega na e parti kaminda tur hende ta uni kontentu huntu pa limpia e baño, abo ta pensando kaba, “Mi famia ta sin speransa.”

Kerido rumannan, trankil! Tur hende den e kongregashon ta pensando e mesun kos! E echo ta, kada mayor ta preokupá ku nan no ta bon sufisiente.

Fortunadamente, tin fuentenan divino pa yuda mayornan: E ta JesuCristo. E ta e fuente di e poderoso kambio di kurason ei.

Ora bo bo habri bo kurason pa e Salbador i Su enseñansanan, E lo mustra bo bo debilidatnan. Si bo konfia JesuCristo ku un kurason humilde, E lo hasi kosnan debil bira fuerte.²¹ E ta e Dios di milager.

Esei ta nifiká ku abo i bo famia lo ta perfekto? No. Pero lo bo bira mihó. Pa medio di e Salbador su grasia, tiki tiki, lo bo desaroyá mas di e atributonan ku mayornan mester: amor pa Dios i Su yunan, pasenshi, sin egoismo, i ku kurashi pa tuma desishonnan korekto

JesuCristo ta Ofresé Apoyo pa medio di Su Iglesia

E esfuerso pa konstruí fe den JesuCristo ta sentrá riba e hogar, enfoká riba e individuo. I e ta apoyá dor di Iglesia. Aparte di provée skrituranan sagrado i palabranan di e profetanan, e Salbador su Iglesia ta ofresé vários rekurso pa yuda mayornan i yunan hasi eskohonan rekto.

• For the Strength of Youth: A Guide for Making Choices no ta duna boun lista di kuki hasi i kiko no. E ta siña bèrdatnan eterno ipa yuda tuma desishon sentrá riba e bida i enseñansanan di JesuCristo. Lesé ku bo yunan. Laga nan papia tokante di dje. Yuda nan pa nan por tine bèrdatnan eterno i divino aki guia nan desishonnan.²²

• Konferensianan di Hubentut tambe ta otro rekurso maravioso. Mi ta spera kada hóben lo asistí. Mi ta invitá tur hóben adulto soltero pa uni na e konferensianan aki komo mèntòr i konsultor. Mi ta invitá mayornan pa konstruí riba e oportunidat spiritual ku nan hubentut ta bin kas kuné for di e konferensianan aki.

• Muchanan i hubentut den E Iglesia di JesuCristo di e Santunan di Delaster dianan tin maestronan, lidernan, i mèntòrnan. Hopi biaha bo ta drenta den un persona hóben su bida na un momentu krusial i apoyá fe i testimonio. Algun di boso ta adultonan soltero. Algun nunka no ta tin yu di nan mes. Bo servisio alegre na Dios su yunan ta sagrado den bista di Dios.²³

Nunka Entregá riba e Milager

Mi kerido rumannan, mi kerido rumannan, konstruí fe den un mucha ta algu manera yuda un flor krese. Bo no por rèk na e stam pa hasié mas haltu. Bo no por habri e kònòpi pa e flor krese mas lihé. I bo no por neglishá e flor i spera ku e lo krese òf floria spontaneamente.

Loke bo por i mester hasi pa e generashon ku ta lantando ta provée un tera riku, nutriente, ku akseso na awa selestial fluyente. Kita yerba malu i kada kos ku ta blòkia rayonan di solo. Krea e mihó kondishon posibel pa kresementu. Ku pasenshi permití e generashon kresiente pa hasi eskóhonan inspirá, i laga Dios obra Su milager. E resultado lo ta mas bunita i mas impaktante i mas gososo ku kualke kos ku bo por logra djis riba bo mes.

Den Tata Selestial su plan, relashonnan familiar ta destiná di ta eterno. Esaki ta dikon, komo mayornan, bo no mester entregá nunka, hasta si bo no ta orguyoso di kon kosnan a sosodé den pasado.

Ku JesuCristo, e Sanadó Maestro, semper lo por tin un komienso nobo; E semper ta duna speransa.

JesuCristo ta e fortalesa pa famianan.

JesuCristo ta e fortalesa pa hubentut.

JesuCristo ta e fortalesa pa mayornan.

Di esaki mi ta duna testimonio den e nòmber di JesuCristo, amèn.

Notanan

1. ““Hinká den kasi tur mayor ta e deseo di siña nan yunan virtutnan moral. Esaki ta parti di e milager di ata Selestial su plan. E ke pa Su yunan bin na tera, siguiendo e patronchi eterno di famia ku ta eksistí den shelu. Famianan ta e unidat organisá básiko di e reino eterno, i asina E ke pa nan tambe ta e unidat básiko riba tera. Ounke famianan terenal ta leu for di perfekto, nan ta duna Dios su yunan e mihó chèns di bin na mundu ku e úniko amor na tera ku ta yega sera di loke nos a sinti den shelu—amor di mayornan. Famianan tambe ta e mihó manera pa preservá i pasa virtutnan moral i prinsipionan bèrdadero ku kasi sigur lo hiba nos bèk den Dios su presensia” (Henry B. Eyring,“Gathering the Family of God,” Liahona, mei 2017, 20).

2. Dimes, nos sa ku Dios su boluntat no ta semper kumplí “na tera, manera e ta den shelu” (Mateo 6:10). Paternidat mortal sigur no por kompará ku Dios su ideal. Sigur E ta mira esei. E mester ta yora riba tur doló i kurason kibrá den relashonnan familiar. I asina mes, E no a entregá riba famia. I E lo no hasie, pasobra Dios tin un plan glorioso pa e destino eterno di Su yunan. I den sentro di e plan aki ta e famia.

3. Wak Mateo 18:1–5; Mosia 3:19.

4. “E Famia: Un Proklamashon na Mundu,” ChurchofJesusChrist.org; wak tambe Doctrina y Convenios 68:25–28.

5. Wak “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; wak tambe Doctrina y Convenios 109:8.

6. Moroni 7:48.

7. 1 Nefi 16:29; wak tambe Alma 37:6–7.

8. Wak “Learning at Home Consists of Small, Simple, Consistent Efforts,” Teaching in the Savior’s Way, 31. Presidente David O. McKay a siña: “No laga nos pensa ku, pa motibu ku algun [kos] … ta parse chikitu i insignifikante, [ku] nan no ta importante. Bida, despues di tur kos, ta kreá di kosnan chikitu. Nos bida, nos ser, físikamente, ta traha di palpitonan chikitu di kurason. Laga e kurason chikitu ei stòp di palpitá, i e bida den e mundu aki ta para. E gran solo ta un forsa poderoso den e universo, pero nos ta risibí e bendishonnan di [su] rayonan pasobra nan ta bin na nos den pilánan chikitu, kual, tumá tiki tiki, ta yena henter e mundu ku lus di solo. E anochi skur ta plasentero dor di e briyo di loke ta parse streanan chikitu; i asina e bèrdadero bida Cristian ta kreá dor di aktonan Cristian chikitu hasí kada ora, kada minüt, den e hogar.” (Teachings of Presidents of the Church: David O. McKay [2003], 219).

9. Wak Helaman 5:30.

10. Wak 2 Reinan 5:9–14.

11. Wak Eksodo 16.

12. Wak “Preparing Your Children for a Lifetime on God’s Covenant Path,” Come, Follow Me—For Individuals and Families: New Testament 2023, appendix (digital only).

13. Wak “Learning at Home Can Be Planned but Also Spontaneous,” Teaching in the Savior’s Way, 31; 1 Peter 3:15.

14. Doctrina y Convenios 64:32–33.

15. Wak Mateo 2:13.

16. Wak Alma 40:1; 41:1; 42:1.

17. Wak 1 Samuel 16:7.

18. Wak 1 Nefi 15:8.

19. Alma 5:13.

20. Wak “Amad A Otros” Himno, no 203.

21. Wak Eter 12:27

22. “Den kaso di yunan, e responsabilidat di duna guia moral ta sintá riba e mayornan. Nan sa e disposishon, entendimentu, i inteligensia di kada mucha. Mayornan ta pasa henter nan bida buskando pa establesé i mantené bon komunikashon ku kada un di nan yunan. Nan ta den e mihó posishon pa tuma e desishon moral mas grandi komo e bienestar di nan yunan” (James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 54).

23. Dos otro rekurso ku ta bale la pena menshoná: E vershon digital di e rekurso di e aña aki Bin, Sigui mi rekurson ta inkluí un sekshon titulá “Preparing Your Children for a Lifetime on God’s Covenant Path.” E ta sugerí ideanan simpel i sentrá riba hogar pa yuda muchanan prepará pa boutismo i otro kombenionan i ordenansanan. I e mas resien revisá Teaching in the Savior’s Way tin un sekshon titulá “Home and Family” ku ta deskribí e prinsipionan di enseñansanan Cristian ku ta apliká den hogar (wak páginanan 30-31).