Konfia e Doktrina di Cristo
Ora ku nos konstruí nos kasnan riba e fundeshi di e relashon di kombenio ku Cristo, nos ta konfia e doktrina di Cristo.
Ku e wowonan di mi mente, mi ta mira Nefi e profeta ansiano na su lèsenar, e plachinan di oro plamá su dilanti, su pèn ku punta fini den man.
Nefi tabata den e proseso pa finalisá su delaster grabashon riba e registro. El a skirbi, “i awor, mi kerido rumannan, Mi ta finalisá mi palabranan.”1 Pero djis despues, e Spiritu a urgi Nefi pa regresá na su registronan i skirbi un mensahe final. Bou di influensia poderoso di e Spiritu Santu, e gran profeta a bolbe kue su pèn ku punta fini den man i a skirbi, “Asina anto, loke … mi a skirbi ta sufisiente pa mi, ku eksepshon di algun … mi mester papia tokante e doktrina di Cristo”2
Kon eternamenteagradesí nos ta pa e “poko palabranan” aki3 i pa e Spiritu ku a inspirá Nefi pa skirbi nan. Nefi su manera di relatá e doktrina di Cristo ta un tesoro pa esnan ku tin e komo un delisia. E ta kontené un vishon di e Salbador su boutismo4 i e bos di e Yu, invitando tur pa siguiE 5i “hasi e kosnan kual [nos] a mira [E] hasi.”6 E ta kontené Nefi su testimonio di ku esnan ku arepentí sinseramente di nan pikánan ku fe den Cristo i sigui e Salbador den e awanan di boutismo lo “risibí e Spiritu Santu; si, e boutismo di kandela i di e Spiritu Santu.”7 Tambe nos ta skucha e bos di e Tata dunando testimonio: “Si, e palabranan di [Esun} ku mi Stima ta bèrdat i fiel. Esun ku perseverá te na fin, esei lo wòrdu salbá.”8
Presidente Russell M. Nelson un a enfatisá e importansia singular di e doktrina di Cristo durante remarkenan na lidernan di mishon nobo ku a wòrdu yamá: “Mas ku tur otro kos, nos kier pa nos mishoneronan … tin e doktrina di Cristo grabá den nan kurasonnan—ankrá … den e manteka di nan wesunan.”9
Prdicad Mi Evangelio ta resumí sinku elemento importante di e doktrina di Cristo. E propósito di e “obra mishonal” ta resumí sinku elemento importante di e doktrina di Cristo: “[Nos] ta invitá otronan pa bini na Cristo dor di yuda nan risibí e evangelio restorá dor di fe den JesuCristo i Su Ekspiashon, arepentimentu, boutismo, risibí e don di Spiritu Santu, i perseverá te final.”10
Pero e importansia di e doktrina di Cristo no ta solamente pa mishoneronan! I e ta muchu mas profundo ku djis un ripitishon resumí di su sinku elementonan klave. E ta e labarká ei di e evangelio. E ta e gran plan pa bida eterno.
Rumannan, si nos ta pa aseptá Presidente Nelson su invitashon pa tin e doktrina di Cristo ankrá den e manteka di noswesunan, nos mester profundisá nos kombershon na Señor dor di studia, orashon, biba fiel, i arepentimentu kontinuo. Nos mester invitá e Spiritu Santu pa graba e doktrina di Cristo den e “tablanan di karni di [nos] kurason[nan]”11 asina profundo i asina permanente manera e tabata grabá dor di Nefi riba e planchanan di oro.
Òktober ku a pasa, Presidente Nelson a puntra, “Kiko ta nifiká vense e mundu?” Entre otro, El a bisa, “E ta nifiká konfia e doktrina di Cristo mas ku e filosofianan di hende.”12
E palabra konfiansa ta wòrdu definí komo un “konfiansa sigur riba e karakter, kapasidat, forsa, òf e bèrdat di un hende òf algu.”13 E hende ei ta JesuCristo i e algu ei ta Su doktrina.
Pues di ki manera konfia intenshonalmente den e doktrina di Cristo por kambia nos manera di biba nos bida?
Si nos konfia den e doktrina di Cristo, nos lo konfia Cristo sufisiente pa biba di akuerdo ku kada un di Su palabranan.14 Nos lo hasi un estudio di bida largu di JesuCristo,15 Su ministerio, Su enseñansanan, i Su Ekspiashon infinito, inkluyendo Su Resurekshon glorioso. Nos lo studia Su promesanan i e kondishonnan riba kual e promesanan ei ta wòrdu duná.16 Segun nos ta studia, nos lo wòrdu yena ku un amor mas grandi pa Señor.
Si nos konfiae doktrina di Cristo, nos lo aserká na nos Tata Selestial tur dia den orashon humilde i sekreto, kaminda nos por ekspresá gratitut pa e don di Su Yu i pa tur nos bendishonnan.17 Nos por hasi orashon pa e komapnia di e Spiritu Santu ku ta revelá,18 resa pa alineá nos boluntat ku esun di djE,19 respa pa reflekshoná riba nos kombenionan i renobá nos kompromiso pa warda nan.20 Nos por hasi orashon pa sostené i ekspresá amor pa nos profetanan, vidente i reveladónan;21 resa pa e poder ku ta limpia di pordon;22 i resa pa e forsa pa resistí tentashon.23 Mi ta invitá boso pa hasi orashon un prioridat den boso bida, buskando kada dia pa mehorá bo komunikashon ku Dios.
Si nos ta konfiae doktrina di Cristo, nos lo pone un banda e kosnan briante di mundu pa nos por enfoká riba e Redentor di mundu.24 Nos lo limitá òf eliminá tempu dediká riba media sosial; weganan di internèt; entretenimentunan ku ta malgastá, eksesivo, òf no apropiá; e tentashon di e mundu aki su tesoronan i banidatnan; i kualkier otro aktividatnan ku ta duna espasio pa tradishonnan i filosofianan falsu di hende. Ta den Cristo so nos ta haña bèrdat i kumplimentu duradero.
Arepentimentu sinsero25 lo bira un parti yen di goso26 di nos bida—tantu pa wòrdu pordoná di piká i pa kambia den imágen di Cristo.37 Arepentimentu ku fe den Cristo ta duna nos akseso na e Ekspiashon di Cristo. Presidente Dallin H. Oaks a siña ku ora e Salbador pordoná, E “ta hasi mas ku limpia [nos] di piká. El a duna [nos] forsa nobo tambe.”28 Kada un di nos tin mester di e forsa pa warda mandamentunan di Dios pa kumpli ku e propósito eterno di nos bida.
Den Jeus i den Su doktrina, nos ta haña forsa. El a bisa, “Di bèrdat, di bèrdat, Mi ta bisa boso, ku esaki ta mi doktrinai esun ku konstruí riba esakilo konstruí riba mi baranka, i e portanan di fièrnu lo no prevalesé kontra nan.”29
Nos ta mira e promesa aki keda kumplí den bida di hendenan fiel. Tabata un poko mas ku un aña pasa ku mi tabata tin e privilegio di konose Travis i Kacie. Nan a kasa na sivil na 2007. E tempu ei Travis no tabata un miembro di Iglesia. Kacie, ounke a wòrdu kriá den un hogar aktivo di Santunan di Delaster Dianan, a apartá for di su kerensia den su periodo di hóben i a desviá for di su fundeshi.
Na 2018, Travis a konosé e misioneronan, i a wòrdu batisá na 2019. Travis a bira un mishonero pa Kacie, kual tambe a eksperensia un kombershon di kambio di bida. Nan a seya den tèmpel 9 di sèptèmber 2020. Mas o ménos dos aña despues di su boutismo Travis a wòrdu yama pa sirbi den e obispado.
Travis tin un enfermedat straño ku kontinuamente ta forma gruponan di tumor den su órganonan interno. El a hasi hopi operashon pa saka e tumornan ku ta bini bèk, pero e enfermedat ta inkurabel. Algun aña pasa, na Traves a wòrdy duná ménos di 10 aña pa biba.
Kacie tin retinitis pigmentosa, un malesa genétiko straño ku ta kousa ku e área di bista ta bira smal na un manera inkambiabel te ora sieguedat kompletu kuminsá.
Kacie a papia ku mi di su futuro. El a antisipá e momentu, no muchu leu, ora ku e bira viuda,siegu, sin sosten finansiero, i lo keda su so pará pa kria kuater yu ku ta kresiendo. Mi a puntra Kacie kon e lo atendé un futuro asina desolá. El a hari pasífikamente i bisa. “Nunka ántes mi tabata asina felis òf tabata tin asina tantu speransa den mi bida. Nos ta tene na e promesanan ku nos a risibí den tèmpel.”
Travis ta e obispo awor. Dos luna pasá e tabatin un otro operashon grandi. Pero e ta optimista i pasífiko. Kacie su bista a empeorá. Awor e tin un kachó ku ta duna guia i no por kore outo mas. Pero e ta satisfecho, kriando su yunan i sirbiendo komo konsehera den e presidensia di Mujeres Jovenes.
Travis i Kacie ta konstruyendo nan kas riba e baranka. Travis i Kacie a konfia e doktrina di Cristo i e promesa ku Dios “lo konsagrá [nan] aflikshonnan pa [nan] probecho.”30 Den Dios Su plan perfekto, sufri ku fe den Cristo ta pegá na nos bira perfekto den Cristo.31 Manera e hòmber sabi den e parábola ku a konstruí su kas riba un baranka,32ora ku áwaseru a kuminsá kai i inundashonnan a kuminsá i e bientu tabata supla i tabata dal kontra e kas ku Travis i Kacie ta konstruyendo, e lo no kai, pasó el a wòrdu fundá riba un baranka.33
Jesus no a papia di e posibilidat di áwaseru i inundashon i bientu den nos bida; El a papia di e seguridat ku lo bai tin tormentonan. E variabel den e parábola aki no ta si lo bin tormentanan pero kon nos a reakshoná riba Su invitashon amoroso pa tantu skucha komo hasi loke El a siña.34 No tin otro manera pa sobrebibí.
Ora ku nos konstruí nos kasnan riba e fundeshi di e relashon di kombenio ku Cristo, nos ta konfia e doktrina di Cristo i ora nos bini ba djE, nos tin Su promesa di bida eterno. Hendenan ku ta konfia e doktrina di Cristota pusha pa dilanti ku firmesa den Cristo i perserverá te na fin. No tin otro manera pa wòrdu salbá den e reino di shelu.35
Mi ta duna mi testimonio personal di e realidat di JesuCristo bibu, i resusitá. Mi ta testifiká ku Dios a stima mundu asina tantu ku El a manda Su Yu pa redimí nos di piká36 i sana nos di tristesa.37 Mi ta testifiká ku El a yama un profeta di Dios den nos tempu, hasta Presidente Russell M. Nelson, pa medio di kual E ta papia i guia nos.
Ku henter mi kurason, mi ta invitá boso pa konfia e doktrina di Cristo, i edifiká boso bida riba e barabka di e Redentor. Nunka e lo fayá bo. Den e nòmber di JesuCristo, amèn.