Hosana na e Dios Altisimo

Dor di Elder Ronald A. Rasband

Di e Quorum di e Diesdos Apòstelnan

JesuCristo su entrada triunfante den Jerusalem i e eventonan di e siman ku a sigui ta ehèmpel di doktrina ku nos por sigui apliká den nos bida awendia.

Awe, manera a keda bisa, nos ta uni ku Cristiannan rònt mundu pa honrá JesuCristo riba e Djadumingu di Rama aki. Kasi 2000 aña pasa Djadumingu di Rama a marka e komienso di e delaster siman di e ministerio mortal di JesuCristo. E tabata e siman di mas importante den historia di humanidat.

Loke a kuminsá ku e proklamashon di Jesus komo e Mesias primintí den su entrada triunfante den Jerusalem a terminá ku Su krusifikashon i Resurekshon.¹ Pa diseño divino, Su sakrifisio dekspiatorio a konkluí Su ministerio mortal, hasiendo e posibel pa nos biba ku nos Tata Selestial pa eternidat.

Skrituranan ta bisa nos ku e siman a kuminsá ku multitut para na e portanan di e siudat pa wak “Jesus e profeta di Nazaret di Galilea.”² Nan “a kue ramanan di palu di palma i a sali pa top’E, i grita: Hosana: Bendishoná ta e rei di Israel ku ta bin den e nòmber di Señor.”³

E historiao bíbliko ei di tantu tempu pasá ta kòrda mi di tabata riba un asignashon di Iglesia na Takoradi, Ghana. Di un manera remarkabel, Mi tabata aya riba Djadumingu di Rama.

Mi mester a dividí e estaka di Takoradi Ghana pa krea e estaka di Mpintsin Ghana. Awendia, tin mas di 100.000 miembro di Iglesia na Ghana.⁴ (Nos ta yama bonbini na Ga Mantse, Su Mahestat Rei Nii Tackie Teiko Tsuru II of Accra, Ghana, ku ta huntu ku nos awe.) Reuniendo ku e Santunan, mi a sinti nan amor profundo i deboshon na Señor. Mi a ekspresá mi gran amor pa nan i ku e Presidente di e Iglesia ta stima nan. Mi a referí na e palabranan di e Salbador registrá dor di Juan: “Pa nos stima un na otro, manera ami a stima boso.”⁵ Nan a mir’é komo e “Konferensia di mi stima bo”⁶

Elder Rasband dunando man na Takoradi, Ghana.

Miéntras mi tabata wak di un banda pa otro e fila di e rumannan kerí aki i nan famianan den e kapia, mi por a mira den nan kara un brio di e testimonio i fe den JesuCristo. Mi a sinti nan deseo pa wòrdu konta komo parti di Su Iglesia di ku ta yega hopi leu. I ora ku e koro a kanta, nan kanta manera angelnan.

Meskos ku riba djadumingu di rama di e tempu aya, esakinan tabata disípulonan di JesuCristo reuní pa duna tributo na E manera esnan para na e portanan di Yerusalèm, ku ramanan den nan mannan, sklamando, “Hosana … : Bendishoná ta esun ku ta bini den e nòmber di Señor.”⁷

Asta e parokianonan di un iglesia den serkania tabata honra e djadumingu di Rama. Ora mi tabata papia for di púlpito, mi a nota pafó di e bentana ku nan tabata kana ku alegria den kaya wayando palmanan den nan man, ta paresé hopi esnan riba e potrèt aki. E tabata un bista ku lo mi no lubidá nunka mas—nos tur alabando e Rei di reinan riba e dia ei.

Presidente Russell M. Nelson a animá nos pa hasi e djadumingu di Rama “santu di bèrdat dor di rekordá, no solamente e palmanan ku tabata wòrdu waya pa honra e entrada di Jesus, pero pa rekordá e palmanan di Su mannan.” Despues, Presidente Nelson a referí na Isaias, kende “a papia di e Salbador su promesanan, “nunka lo mi lubidá bo, ”ku e palabranan aki: “Mir’aki, Mi tin bo graba den e palma di mi mannan.’”⁸

Señor sa na promé man ku mortalidat ta difísil. Su heridanan ta rekordá nos ku El a “baha abou … tur kos”⁹ pa E por yuda nos ora ku nos ta sufri i pa ta nos ehèmpel pa “sigui riba e kaminda,”¹⁰ Su kaminda, ku “Dios lo ta ku [nos] pa siglo di siglonan.”¹¹

Djadumingu di Rama no tabata solamente un evento, un otro página den historia ku un fecha, ora, i lugá. JesuCristo su entrada triunfante den Jerusalem i e eventonan di e siman ku a sigui ta ehèmpel di doktrina ku nos por sigui apliká den nos bida awendia.

Laga nos wak algun di e doktrina eterno ku ta borda durante Su ministerio konkluyendo na Jerusalem.

Promé, profesia. Por ehèmpel, profeta Zakarias di Tèstamènt Bieu a profetisá di JesuCristo su entrada triunfante den Jerusalem, hasta deskribiendo ku El lo kana riba un buriku.¹² Jesus a predesí Su Resurekshon miéntras e tabata prepará su entrada den e siudat, bisando:

“At’aki, nos ta subi bai na Jerusalem; i e Yu di hende lo wòrdu entrega na a e chef di e saserdotenan i na e eksribonan, i nan lo konden’é na morto.

“I nan lo entreg’é na e Gentilnan nan pa hasi chèrchi, i pa sut’é, i krusifik’é: i e di tres dia el lo resusitá atrobe.”¹³

Di dos, e kompania di e Spiritu Santu. Jose Smith a siña, “Niun hende por sa ku Jesus ta e Señor, si no ta pa e Spiritu Santu.”¹⁴ E salbador a primintí su disípulonan¹⁵ na e último sena¹⁶ den e kamber te ariba,¹⁷ “Lo mi no laga boso sin konsuelo ”¹⁸ Nan lo no ta nan so pa sigui karga e bèrdatnan di e evangelio pa dilanti pero lo tin don perfekshoná di e Spiritu Santu pa guia nan. “Pas Mi ta laga ku boso, Mi pas Mi ta duna boso,” El a primintí; “Ami no ta duna manera e mundu ta duna boso.”¹⁹ Ku e don di e Spiritu Santu nos tin e mesun siguridat ei—ku nos “por tin su Spiritu semper huntu ku [nos]”²⁰i “pa e poder di e Spiritu Santu [nos] por sa e bèrdat di tur kosnan.”²¹

Di tres, disípulado Disípulado berdadero ta un kompromiso sin falta, obediensia na leinan eterno, i amor di Dios, promé ku tur kos. Nada di tambaliá. E multitut ku a duna tributo ku palmanan a salud’É kome e Mesias. Esei ta eksaktamente loke E tabata. Nan a wòrdu atraé na E, Su milagernan, i Su enseñansanan. Pero e adulashon no a dura largu pa hopi. Algun ku promé tabata grita, “Hosana”²² a kambia hopi lihe i grita, “Krusifik’É.”²³

Di kuater, e Ekspiashon di JesuCristo.²⁴ Den Su último dianan, siguiendo, e Djadumingu di Rama, El a hiba Su Ekspiashon remarkabel, for di e agonia di Getsemani te na e chèrchamentu di su huisio, Su tortura na e krus, i Su entiero den un graf fia. Pero e no a kaba ei nan. Ku e mahestat di Su yamada komo e Redentor di tur Su Tata Selestial su yunan, tres dia despues El a sali for di e graf ei, resusitá,²⁵ manera El a profetisá.

Nos ta kontinuamente agradesí pa e Ekspiashon inkomparabel di JesuCristo? Nos ta sinti su poder purifikadó, awor aki mes? Esei ta e pa kiko JesuCristo, e Outor i Finalisadó di nos Salbashon, a bai Yerusalèm, pa salba nos tur. E palabranan den Alma ta toka un kuèrdè sensibel :“Si bo a eksperensia un kambio di kurason, i si bo a sinti pa kanta e kantika di amor redimido, lo mi puntra, bo por sinti asina awor aki?”²⁶ Di bèrdat mi por bisa, e koro na Takoradi e Djadumingu di Rama ei a kanta “e kantika di amor redimido.”

E último siman fatal di Su bida di ministerio mortal, JesuCristo a duna e parabol di e dies bírgennan.²⁷ E tabata siña di Su regreso na esnan prepará pa risibiÉ, no ku palmanan den nan mannan pero ku e lus di e evangelio den nan. El a usa e imágen di lampinan sende i kimando, ku èkstra zeta pa lanta e vlam, komo un deskripshon di e boluntat pa biba Su kamindanan, brasa Su bèrdatnan, i kompartí Su lus.

Boso sa e historia. E dies bírgennan ta representá e miembronan di Iglesia, i e brùidegòm ta representá JesuCristo.

E dies bírgennan a kue nan lampinan i “a sali pa bai kontra e brùidegòm”²⁸ Sinku di nan tabata sabí, prepará ku zeta den nan lampinan i un tiki di reserva i sinku tabata bobo, lampinan skur sin zeta den reserva. Ora e yamada a bini, “Mir’aki, e bruidegòm ta bini; sali i risibié,”²⁹ e sinkunan ku tabata “sabí i [a] risibí e bèrdat, i [a] tuma e Spiritu Santu komo nan guia”³⁰ tabata kla pa “nan rei i nan legisladó,”³¹ ku “Su gloria [lo tabata] riba nan.”³² E otro sinkunan tabata loko loko tratando na haña zeta. Pero tabata muchu lat. E proseshon a sigui bai sin nan. Ora ku nan a bati i roga pa drenta, Señor a respondé, Mi no konosé boso.”³³

Kon nos lo a sinti si E bisa nos, “Mi no konosé bo!”

Nos, meskos ku e bírgennan, tin lampinan; pero nos tin zeta? Mi tin miedu ku tin algun ku yuda nan mes ku simplemente un bòter di zeta delegá, muchu okupá ku preshonnan mundano pa prepará adekuadamente. Zeta ta bin for di kere i aktua di akuerdo ku profesia i e palabranan di profetanan bibu, partikularmente di Presidente Nelson, su konseheronan, i e Diesdos Apòstelnan. Zeta ta yena nos alma, ora ku nos skucha i sinti e Spiritu Santu i aktua riba di guia divino. Zeta ta basha den nos kurason ora ku nos eskohonan ta demostra ku nos stima Señor i nos stima loke E ta stima. Zeta ta bin for di arepentimentu i buska e sanashon di e Ekspiashon di JesuCristo.

Si bo ta buskando pa yena loke algun ta yama “un lista di kosnan pa hasi,” esaki te: yena bo hèmber ku zeta den e forma di e awa bibu di JesuCristo,³⁴ kual ta un representashon di Su bida i enseñansanan. Kontrario, marka un lugá leu òf un evento espektakular nunka lo laga bo alma sinti su mes kompletu òf satisfecho; biba e doktrina siña dor di Jesucristo lo hasié. Mi a menshoná ehèmpelnan anteriormente: brasa e profesia i enseñansanan profétiko, aktua riba impreshonnan di e Spiritu Santu, bira un disípulo di bèrdat, i buska e poder sanadó di nos Salbador su Ekspiashon. E lista di kosnan skibi lo hiba bo un kaminda ku bo kier bai—bai bek na bo Tata den Shelu.

E Djadumingu di Palma na Takoradi tabata un eksperensia hopi speshal pa mi paso mi a kompartié ku un kongregashon di rumannan fiel. Asina e tabata den kontinentenan i islanan rònt mundu. Mi kurason i alma, manera di boso, ta anhelá pa grita, “Hosana pa e Dios Altisimo.”³⁵

Aunke awe nos no ta para na e portanan di Jerusalem ku palmanan den nos mannan, e tempu lo yega manera a wòrdu profetisá den Revelashon, “un gran multitut, kual niun hende por konta, di tur nashonnan, i tribunan, pueblonan, i lenganan, [lo para] dilanti e trono, i dilanti e Lamchi, bisti ku paña blanku, i ku palmanan den nan man.”³⁶

Mi ta laga ku boso mi bendishon komo un Apòstel di JesuCristu pa boso lucha diligentemente pa biba rekto i ta entre esnan, kual ku palma den nan man, lo anunsiá e Yu di Dios, e gran Redentor di nos tur. Den e nòmber di JesuCristo, amèn.