Kòrda Kiko ta Mas Importante
Loke ta mas importante ta nos relashonan ku Tata Selestial i Su Yu Stimá, nos famianan, i nos próhimo, i permitiendo e Spiritu di Señor guia nos.
Ora nos kòrda e wikènt aki e Salbador Su entrada triunfal na Yerusalèm djis promé ku Su sakrifisio ekspiatorio, mi ta kòrda Su palabranan di speransa i konsuelo: “Mi ta e resurekshon, i e bida; esun ku kere den mi, maske ku el a muri, tòg e lo biba.”1
Mi ta stim’E. Mi ta ker’E. Mi ta testifiká ku E ta e Resurekshon i e Bida.
E testimonio aki a konsolá i fortalesé mi durante e lastu kuater aña i mei for di dia ku mi kasá, Barbara, a fayesé. Mi ta sinti su falta.
Hopi biaha, mi tabata reflekshoná riba nos matrimonio eterno i nos bida huntu.
Anteriormente mi a kompartí kon mi a konosé Barbara pa promé biaha i kon e eksperensia ei a siña mi pa usa e abilidat di “hasi seguimentu” ku mi a [bin] siña riba mi mishon. Mi mester a hasi seguimentu hopi lihé ku ne despues ku nos a konosé otro pa promé biaha pasó e tabata bunita, popular, i tabatin un kalènder sosial hopi okupá. Mi tabata enamorá for di komienso pasó por a aserk’é i e tabata amabel. Mi tabata atmirá su bondat. Mi a sinti ku e ku mi tabata pertenesé na otro. E tabata parse asina simpel den mi mente.
Barbara i ami a kuminsá sali ku otro, i nos relashon a kuminsá krese, pero e no tabata sigur ku matrimonio ku mi tabata korekto p’e.
E no tabata sufisiente ku ami tabata sa, Barbara mester a haña sa pa su mes. Mi tabata sa ku si nos a pasa tempu den ayuno i orashon tokante e asuntu aki, Barbara por risibí un konfirmashon di shelu.
Nos a pasa un fin di siman sin sali p’asina nos por a yuna i resa indivualmente pa sa pa nos mes. Afortunadamente pa mi, el a risibí e mesun konfirmashon ku ami a haña. Sobra, manera nan ta bisa, ta historia.
Ora Barbara a fayesé, nos yunan a pone riba su plachi di graf diferente lèsnan ku Barbara tabata ke pa nan kòrda. Un di e lèsnan ei ta “loke ta mas importante ta loke ta dura mas.”
Awe mi lo kompartí di mi kurason algun sentimentu i pensamentu di loke ta mas importante.
Promé, un relashon ku nos Tata Selestial i Su Yu, JesuCristo, ta mas importante. E relashon aki ta mas importante awor i den eternidat.
Di dos,relashon familiar ta entre e kosnan ku ta mas importante.
Durante mi ministerio, mi a bishitá hopi persona i famia impaktá pa desasternan natural devastador. Hopi a pèrdè nan kas, tabatin hamber, i miedu. Nan tabatin mester di asistensia médiko, alimento, i refugio.
Tambe nan tabatin mester di nan famia.
Mi ta rekonosé ku algun kisas no tin e bendishonnan di un famia serkano, p’esei mi ta inkluí famianan mas leu, amigunan, i asta famianan di bario komo “famia.” E relashonnan ei ta esensial pa salú emoshonal i físiko.
E relashonnan aki tambe por ofresé amor, goso, felisidat, i un sentido di pèrtenesé.
Nutri e relashonnan importante aki ta un eskoho. Un eskoho pa ta parti do un famia ta rekerí kompromiso, amor, pasenshi, komunikashon, i pordon.2 Lo por tin tempu kaminda nos tin desakuerdo ku un otro persona, pero nos por hasi asina sin ta desagradabel. Ora di namorá i den matrimonio, nos no ta enamorá òf pèrdè interes manera ku ta ophetonan ku ta wòrdu mové riba un bòrchi di ahedres. Nos ta skohe pa stima i sostené otro. Nos ta hasi meskos den otro relashonnan familiar i ku amigunan ku ta manera famia pa nos.
E proklamashon di famia ta deklará ku “e plan divino di felisidat ta abilitá relashonnan familiar pa wòrdu perpetuá mas ayá di e tumba. Ordenansanan sagrado i kombenionan disponibel den tèmpelnan santu ta hasi posibel pa nos por bolbe den e presensia di Dios i pa famianan por ta uní eternamente.”3
Un otro kos ku ta di mas importansha ta sigui e susuronan di e Spiritu den nos relashonnan di mas importante i den nos esfuersonan pa stima nos próhimo manera nos mes, inkluyendo den nos ministerio privá i públiko. Mi a siña e lès aki tempran den mi bida miéntras mi tabata sirbiendo un mishon.
Lat un anochi frui ku sneu den invierno, mi tabata saliendo for di e ofisina di mi obispu ora mi a haña un impreshon fuerte pa bishitá un viuda di edat di e bario. M’a tira un bista riba mi oloshi—tabata 10:00 di anochi. Mi a rasoná ku e tabata demasiado lat pa hasi e tipo di bishita ei. I ademas, sneu tabata kai. Mi a disidí di bishitá e kerida hermana mainta tempran na lugá di strob’é na un ora asina lat. M’a kore bai kas i a bai drumi pero a keda bòltu den kama henter e anochi pasó e Spiritu tabata mové mi.
Tempran e siguiente mainta, mi a kora bai stret na e kas di e viuda. Su yu muhé a habri e porta i yorando a bisa, “O, obispu, danki pa bin. Mama a fayesé dos ora pasá”—Mi tabata kibrá. Nunka lo mi lubidá e sentimentu den mi kurason. Mi a yora. Ken mas ku e kerida viuda aki tabata meresé di por tabatin su obispu tene su man, konsol’é, i kisas dun’é un bendishn final? Mi a pèrdè e oportunidat ei pasó mi a rasoná kontra di e susuro fuerte di e Espíritu.4
Rumannan, hombres jovenes, mujeres jovenes, i muchanan di Primaria, mi ta testifiká ku siguiendo e susuro di e Espíritu ta un di e kosnan ku ta mas importante di tur nos relashonnan.
Finalmente den e wikènt di djadumingu di Rama aki, mi ta testifiká ku ta kombertí na Señor, dunando testimonio di djE, i sirbiendo E tambe ta entre e kosnan di mas importante.
Fe den JesuCristo ta e e fundamento pa nos testimonionan. Un testimonio ta un testigu òf un konfirmashon di bèrdat eterno imprimí den nos kurason individual i nos alma dor di e Spiritu Santu. Un testimonio di JesuCristo, nasé di i fortalesé pa e Espíritu, ta kambia bidanan—e ta kambia e manera ku nos ta pensa i kon nos ta biba. Un testimonio ta yuda nos bira ku kara pa nos Tata Selestial i Su Yu divino.
Alma a siña nos:
“Ata’ki, mi ta testifiká na boso ku mi sa ku e kosnan aki di kual mi a papia ta bèrdat. I kon bosonan ta suponé ku mi sa di nan sertesa?
“Ata‘ki, mi ta bisa boso nan ta duná na konosé na mi pa medio di e Spiritu Santu di Dios. Ata‘ki, mi a yuna i hasi orashon hopi dia pa mi por sa e kosnan aki pa mi mes. I awor mi sa pa mi mes ku nan ta berdat; pasó Señor Dios a manifestá esakinan na mi dor di e Spiritu Santu.”5
Tin un testimonio so no ta sufisiente. Segun nos kombershon na JesuCristo ta krese, naturalmente nos ke testifiká di djE—Su bondat, amor, i amabilidat.
Hopi biaha den nos reunionnan di testimonio riba e djadumingu di ayuno, nos ta tende e frase “mi ta gradisí” i “mi stima” mas ku nos ta tende e frase “mi sa” i “mi ta kere.“
Mi ta invitá boso pa kompartí boso testimonio di JesuCristo nas biaha. Kompartí boso testimonio di kiko bo sa i kere, kiko bo ta sinti, no solamente di kiko bo ta gradisí p’e. Testifiká di bo propio eksperiensianan di yega na sa i stima e Salbador, di biba Su enseñansanan, i di Su poder pa redimí i abilitá den bo bida. Ora bo duna testimonio di loke bo sa, kere, i sinti, e Spiritu Santu lo konfirmá e bèrdat na esnan ku sinseramente skucha bo testimonio. Nan lo hasi esaki pasó nan a mira bo bira e siguidó pasífiko di JesuCristo. Nan lo sa kiko ta nifiká di ta Su disípulo. Tambe nan lo sinti algu ku nan no lo a yega di sinti anteriormente. Un testimonio puru ta bin di un kurason kambiá i por wòrdu kargá pa e Spiritu Santu den e kurasonnan di otronan ku ta habrí pa risibié.
Esnan ku sinti algu komo un resiltado di bo testimonio e ora ei por puntra Señor den orashon pa konfirmá e bèrdat di bo testimonio. E ora ei nan por sa pa nan mes.
Rumannan, mi ta tèstifiká i duna testimonio na boso ku mi sa ku JesuCristo ta e Salbador i Redentor di mundu. E ta bibu. E ta e YU di Dios resusitá, i esaki ta su Iglesia, dirigí pa Su profeta i apòstelnan. Mi ta roga ku un dia ora mi pasa pa e siguiente mundu, mi por por hasi esei ku mi testimonio kimando fuerte.
Den mi ministerio, mi a siña ku loke ta mas importante ta nos relashonan ku Tata Selestial i Su Yu Stimá, nos famianan, i nos próhimo, i permitiendo e Spiritu di Señor guia nos den e relashonnan ei p’asina nos por testifiká di e kosnan ku ta mas importante i ku ta dura mas largu. Den e nòmber di JesuCristo, amèn.