Enfoká riba Cristo

Pa Hermano Milton Camargo

Promé Konsehero den e Presidensia General di e Eskuela Dominikal

Señor JesuCristo ta e solushon na nos problemanan, pero promé nos mester alsa nos bista i hisa nos bista pa wak E.

Mi tata tabata konta mi, “No enfoka asina intenso riba bo problemanan ku bo no ta mira e solushon.”

Mi ta testifiká ku Señor JesuCristo ta e solushon na hasta nos problemanan mas difiísil. Spesifikamente, El a surpasá kuater problema ku kada un di nos ta enfrentá i ku nos niun no por solushoná riba nos mes:

E promé ta e morto físiko. Nos por purba na demorá esaki òf ignor’é, pero nos no por surpas’é riba nos mes. JesuCristo, sinembargo, a surpasá morto pa nos, i komo konsekuensia, nos tur lo wòrdu resusitá un dia.¹
E di dos problema ta inkluí e tribulashonnan, eksperiensianan difísil, tristesa, doló, i inhustisia di e mundu. JesuCristo a surpasa tur esakinan. Pa esnan ku ta esforsá pa siguiE, algun diaE lo “seka tur lagrima” i lo drecha e kosnan atrobe.² Miéntras tantu, E por fortalesé nos pa pasa dor di nos tribulashonnan ku konfiansa, bon animo, i pas.³
E di tres problema ta morto spiritualdor di piká. JesuCristo a surpasá e problema aki dor di tuma riba Su mes “e kastigu di nos pas.”⁴ Pa motibu di su sakrifisio ekspiatorio, nos por wòrdu liberá for di e konsekuensianan di nos pikánan si nos tin fe den e Salbador, arepentí sinseramente, akseptá e kombenionan ku Tata ta ofresé nos pa medio di ordenansanan esensial manera boutismo, i perseverá te na final.⁵
E di kuater problema ta nos naturalesa limitá i imperfekto. JesuCristo tin e solushon pa e problema aki tambe. E no ta solamente kita nos erornan i hasi nos inosente atrobe. E por obra “un kambio potente den … nos kurason, pa nos no tin ningun disposishon mas pa hasi maldat, pero pa hasi bon kontinuamente.”⁶ Nos por wòrdu perfekshoná pa medio di e grasia di Cristo i un dia bira manera E.⁷

Afortunadamente, hopi biaha nos ta konsentrá asina tantu riba nos propio problemanan ku nos ta pèrdè enfoke riba e solushon, nos Salbador JesuCristo. Kon nos por evitá eror aki? Mi ta kere e kontesta ta sinta den e kombenionan ku nos ta wòrdu invitá pa hasi ku nE i nos Tata den Shelu.

Enfokando riba JesuCristo pa medio di Kombenionan

Nos kombenionan ta yuda nos enfoká nos atenshon, nos pensamentu, i nos akshon riba Cristo. Ora nos ta “tene na e kombenionan ku [nos a] hasi,” nos por mas fasilmente identifika “e kosnan di e mundu aki” ku nos mester “pone un banda” i “e kosnan di un [mundu] mihó” ku nos mester buska diligentemente.⁸

Esei ta loke e hendenan di Ammon a hasi den e Buki di Mormon. Ora nan a siña di JesuCristo i kuminsá na enfoká nan bida riba djE, nan a rekonosé ku nan mester dera nan armanan di guera i bira perfektamente honesto i “distinguí pa nan entusiasmo pa ku Dios.”⁹

Warda kombenio ta hiba nos na buska loke sea ku ta invitá e influensia di e Spíritu i rechasá loke sea ku ta aleh’é—““pasobra nos sa ku si nos por ta digno di e presensia di e Espírritu Santu, nos por ta tambe digno di biba den e presensia di Tata Selestial i Su Yu, JesuCristo.”¹⁰ Esaki por nifiká ku nos lo tin di kambia nos vokabulario, usando palabranan mas amabel. E por nifiká tambe remplasá kustumbernan ku ta spiritualmente ménos saludabel ku kustumbernan ku ta fortalesé nos relashon ku Señor, manera orashon diario i estudio di skritura, individualmente i ku nos famia.

Presidente Russel M. Nelson a bisa ku “kada persona ku hasi kombenio den pílanan boutismal i den tèmpel—i warda nan—tin mas akseso na e poder di JesuCristo. …

“E premio pa warda e kombenionan ku Dios ta un poder selestial—poder ku ta fortalesé nos pa wanta tur tribulashon, tentashon, i angustia mihó.”¹¹

Renobando nos kombenionan durante e Santa Sena tur djadumingu ta un gran oportunidat pa eksaminá nos mes¹² i nfoká di nobo nos bida riba JesuCristo. Dor di partisipá di e Santa Sena, nos ta deklará ku nos “lo kòrdé semper.”¹³ E palabra semper ta asina signifikante. E ta ekstendé e influensia di e Salbador den kada parti di nos bida. Nos no ta kòrd’E solamente den iglesia òf durante nos orashon di mainta òf solamente ora nos ta den problema i nos mester di algu.

Si, tin biaha nos ta wòrdu distraí. Nos ta lubidá. Nos ta pèrdè nos enfoke. Pero renobando nos kombenionan ta nifiká ku nos ke kòrda e Salbador semper, ku nos lo purba hasi esaki durante siman, i ku nos lo komprometé di nobo i enfoká di nobo riba djE atrobe na e mesa di Santa Sena otro siman.

Enfokando riba JesuCristo den Nos Hogarnan

Klaramente, enfokando riba JesuCristo mester ta mas ku un aktividat na iglesia riba djadumingu. Ora Presidente Nelson a introdusí Ven, Siguemei den 2018, el a bisa, “Ta tempu pa un un Iglesia sentrá riba e hogar.”¹⁴ El a bisa ku nos mester “transformá [nos] hogar den un sanktuario di fe” i “un sentro di kompartí e evangelio.” I el a hasi kuater promesa maravioso na nos si nos kumpli.¹⁵

E promé promesa: “Boso dia di reposo lo ta bèrdaderamente un delisia.” E lo bira un dia kaminda nos por bin mas serka di nos Salbador. Manera un hóbensita di Peru a bisa, “E dia di Señor ta e dia kaminda mi ta haña mas kontesta di Señor.”

Segundo promesa “Boso yunan lo ta ansioso pa siña i pa bibá e enseñansanan di e Salbador.” Pa e motibu aki, “nos ta papia di Cristo, nos ta regosihá den Cristo, nos ta prediká di Cristo, … asina nos yunan por sa na kua fuente nan mester buska pa e remishon di nan pikánan.”¹⁶

Nos ta hasi esaki pa asina un dia, ora nos yu bai trabou òf bai subi e serunan òf bai jag bestia den e mondinan, manera Enos a hasi, e por kòrda loke nos a siña nan tokante di Cristo i tokante di e goso di biba e evangelio. I ken sa? Kisas esaki lo bira e dia ora ku finalmente e lo sinti e hamber spiritual ku ta hib’é na JesuCristo pa e por skucha e bos di Señor bisand’é, “Bo pikánan a wòrdu pordoná, i lo bo wòrdu bendishoná.”¹⁷

E di tres promesa: “E influensia di e atversario den bo bida i den bo hogar lo desminuí.” Dikon? Pasobra mas nos enfoká riba JesuCristo, mas e piká ta pèrdè su atrakshon.¹⁸ Ora nos hogarnan ta yená ku e lus di e Salbador, tin menos lugá pa e skuridat di e atversario.

E di kuater promesa: “Kambionan den nos famia lo ta dramatiko i sostenibel.” Dikon? Pasobra e kambio ku JesuCristo ta trese ta “un kambio potente.”¹⁹ E ta kambia nos propio naturalesa; nos ta bira “kriaturanan nobo.”²⁰ Gradualmente nos ta bira mas manera e Salbador, yená ku Su amor puru pa tur Dios Su yunan.

Ken lo no ke e promesanan aki kumplí den ann bida i den nan famia? Kiko nos tin ku hasi pa optené nan? E kontesta ta pa transformá nos hogar den e sanktuario di fe i un sentro pa enseñansa di e evangelio. I kon nos ta hasi esaki? Dor di enfoká riba Tata Selestial i JesuCristo, hasiendo nan e sentro di nos bida familiar, e influensia mas importante den nos hogar.

Mi por sugerí pa bo kuminsá dor di hasi e palabra di Cristo, manera ta pará den skrituranan,un parti di bo bida diario? No tin un formula preskribí pa un estudio perfekto di skritura. E por ta sinku òf dies minüt kada dia—òf mas si bo por. E por ta un kapitulo òf algun versikulo kada dia. Algun famia ta preferá na studia mainta promé ku nan sali bai skol òf trabou. Otronan ta preferá lesa anochi promé ku bai drumi. Algun pareha hóben a konta mi ku nan ta studia individualmente na kaminda pa trabou i despues kompartí nan pensamentunan ku otro via di teksto, asina nan komentario i interkambio ta registrá.

Ven, Sigueme ta provée hopi sugerensia pa aktividatnan i rekursonan ku por yuda individualnan i famianan siña e prinsipionan di evangelio for di e skrituranan. E videonan di Beibel i e Buki di Mormon por ta hèrmèntnan balioso pa hasi e skrituranan mas aksesibel na bo famia. Híbennan i muchanan hopi biaha ta inspirá pa relátonan memorabel di e skrituranan. E relátonan aki, i e prinsipionan di evangelio ku nan ta siña, lo keda ku bo yunan, manera amigunan di konfiansa, ora nan mester di bon ehèmpel di servisio, virtut, obediensia, pasenshi, perseveransha, revelashon personal, karidat, humildat, i fe den JesuCristo. Despues di tempu, bo konsistensia den deleitá den e palabra di Dios lo yuda bo yunan krese mas serka di e Salbador. Nan lo bin konos’E manera nunka ántes.

Señor JesuCristo ta bibu awe. E por ta un presensia aktivo i diario den nos bida. E ta e solushon na nos problemanan, pero promé nos mester alsa nos bista i hisa nos bista pa wak E. El a bisa, “Mira na ami den kada pensamentu; no duda, no tin miedu.”²¹ Ora nos ta enfoká riba djE i nos Tata den Shelu, hasi i warda kombenionan ku Nan, i hasi Nan e influensia di mas importante den nos hogar i nos famia, nos lo bira e tipo di hende ku Presidente Nelson ta mira den vishon: “Un pueblo ku ta kapas, i digni di risibí Señor ora e bin bèk, un pueblo ku ya a skohe JesuCristo riba e mundu dekaí aki, un pueblo ku a regosihá den nan albedrio pa biba e pei mas elevá, santifiká di JesuCristo.”²² Den e nòmber di JesuCristo, amèn.