Niha’áłchíní Náás Nootʼį́łígíí Bá
Díí ts’ídá nizhónígo oodlą’, doodago niheiyílyáago bee ééhániihígíí, a’oh danohłį́įgo k’ídanohtį́į́h łago. Bidziilígíí nílį́į dooleeł.
T’áá díkwíí nááhaiyę́ędą́ą́’, Lima, Perudi kééhasht’į́įgo, Bóhólníihii bá naashá South America Northwest Areadi, ts’ídá nizhónígo ahoodzaaígíí ła’ bee nihił hashne’.
Damóojį’ lą’í naanish áshłaago hooghangóó nááshdááłgo kóhoodzaa. Chidí naat’a’í ńdinibįįhígi naaltsoos ałtso hadiishłaago, ła’ taxi neiłbąąsii ayóó baa áhwiinít’į́į lei’ shiba’ bił az’į́. Bichidí bich’į’ bił ní’áázh, dóó t’áadoo ííts’a’ígo háádeeshyį́h nisingo akéédę́ę́’ dah nídá. T’áh doo nízaadgóó nihił e’elyeedgóó, na’ałbąąsí yá naalnishígíí bich’į hoolne’, taxi doo éídíígíí yiih yilwod da bi’dooniid. Nááná ła’ chidí shá hasht’e’niilbą́ą́z ńt’ę́é’ lei’, áko yá naalnishí éí chidí naat’a’í ńdinibįįhídi bił ńdíít’ash bi’doo’niid áko chidí ła’ígíí biih deeshwoł biniyé. T’áá bíighah, t’áá nihił oolwoł doo bidííniid. T’áadoo díkwíida dah alzhin ni’ilkeedí doo ííts’a’ígo nihił oolwoł, áádóó bii’adéest’į́į́’ yii’ deezį́įgo shiníł’į́ dóó nashídéíłkid, “Ni éí Gáamali nílį́, ya’?”
Jó, éí yee nashídéíłkidgo, t’áá ííts’a’ígo dah sídáhę́ę t’áá íídą́ą́’ doo ákót’ee da dooleeł niizį́į́’. Na’ádíkid yee nashídídóołkiłígíí baa ntsídiikeez.
Omar jolyéi lá, hwe’asdzáá eí Maria Teresa wolyé, áádóó ha’áłchíní éí naaki—Carolina, dį́į́’ts’áadah binááhai, áádóó Rodrigo, éí neeznáá binááhai. T’ah ashkii yázhí nilį́įgo Omar Sodizinjí atah nilį́į ńt’ę́ę́’. Yił háájé’ígíí ayóó sodizingóó yił ałnánákah ńt’ę́ę́’, ákondi ha’ágii shį́į́ hoolzhishgo, bimá dóó bizhé’é sodizin yits’ání’áázh. Ashdla’áadah binááhaigo Omar t’áadoo sodizinjí yah ánáádzáa da. Áko k’ad éí dízdiin binááhai.
Ts’ídá ákwe’é taxi biih yishwodígíí éí doo iisésiihgo baa ákoniizį́į́’. Doo éí t’óó ákóhoonííłgo áhodzaa da! Ásht’ínígíí bee bił hweeshne’ dóó Bóhólníihii ashííł’a’ígíí biniinaa bitaxi biih yishwod háálá Diyin Bisodizinjí nídoodááłgo bíká ání lá.
Bimá dóó bizhé’é yił Sodizingóó áłnánákahyę́ędą́ą́’ baa yéilti’. T’áa hoohghangi-áłah-nádleehgo, dóó Áłchíní sin ła’ yee dahataałę́ę nizhónígo yénálnii’. Áádóó sin “Diyin God Be’awéé’ Nishłį́” yee hóótáál.1
Haa’ígi bighan, bibéésh hane’í binomboo yee shił hoolne’, éí bibishop bee bił hodeeshnihgo yee lą́ asłį́į́’, sodizindi néindzáago haadeet’áo da shí áadi naadeeshááł bidííniid. Ałk’į’dą́ą́’ ádahóót’įįdę́ę ałtso baa yéilti’, áádóó hooghanjį’ nánísdzá, bídó’ naanishgóó anáádzá.
T’ah doo nízaadgóó nahalzhííshgóó bibishop shich’į’ hoolne’, Omar éí Dámóogo sodizinjí nihił yah anádááh dííniid. Áádi deeshááł bidííniid. T’ah ńt’ę́ę́ éí Damóo, Omar biye’ yił ní’áázh. Bich’ooní dóó bitsi’ éí t’áadoo ní’áázh da. Díkwíí shį́į́ ńdeizidgo, bibishop shich’į’ nááhoolne’, t’ah ńt’ę́ę́’ Omar bich’ooní dóó t’áá áłah bitsi’ tó yee yi’niisį́į́’, nihaa díínááł shidííniid. Díí éí Damóogo Sodizindi Ii’ Sizį́ Diyinii baa dahasyáago eelkidígíí át’é.
T’áá éí Damóo, Omar dóó ba’áłchíní ábidíínííd, t’ááłá’í nááhaigo, hasht’e’ádadoołyaago, Lima Templedi na’áłchíní bił ahool’áágóó ahił dahonohłǫ́ǫgo éí o’ool’įįłígíí nihá ádeesłííł. Díí t’ááłá’í naahaigo, eelkid.
Ha’át’íísh biniyé díí áhóót’įįdígíí bee nihił hashne’? Biniyéhígíí naakigo bee nihił hashne’.
Áłtséhígíí éí, diné yá’ádaat’éehii ha’át’íísh biniinaa Jesus Christ bina’nitin ninályáhígíí dóó biSodizin yits’ádahaaskai. Naaki góne’ígíí, éí dííjį́įdi ha’át’íí biniinaa diné diyingo yił ahada’deest’ánígíí doo t’áá íiyisíí yikéé’ deiyíkááh da. T’áá áłah hane’ bii’, náasdi ba’áłchínígíí bee bik’idahojidooliiłyę́ę doodaii’ baa dadeit’ánée yidahidiiłt’ééh.
Shik’is Omar Peruvian nilį́ ádzaaígíí át’áo, yá’át’ééhgo sodizin atah danilíyę́ę diyingo ákéé’ deiyíkááhyę́ę yits’ádahaaskai. Nabídééłkid, ha’átíí lá biniinaa Sodizinjį’ nánooht’áázh, ńt’éé’ ání shí dóó shich’ooní éí niha’áłchíní t’áá aaníí bił hózhǫ́ǫ doo Jesus Christ bina’nitin yikéé’ deiyíkáahgo niidzį́į́’. Ba’áłchíní yaa ntsékeesgo sodizinjí atah nát’áázh.
T’óó baa yínííł hasin łeh diné yá’ádaat’éehii Sodizinjí atah danilínée yits’áhákááhgo, éí bimá dóó bizhé’é doodaii’ bimásání dóó bicheii dóó dabinálí da t’óó honíshgháníjį’ Sodizin ni’ kódeiyiił’įįhgo. Éí kódaat’įįhgo da bada’áłchíní náás noot’į́łígíí ahool’áágóó yidahidiiłt’ééh!
Ba’áłchíní náás noot’įłígíí Jesus Christ bina’nitin bits’áádóó aa áháyą́ dóó ak’ihojídlí bee dahodooleełyę́ę yits’ą́ą́ nahjį’ kóyiił’įįh. Ákondi aláahdi baa yínííł hasinígíí éí, ahool’áágóó ba’áłchíní yíł kéénádahat’į́į dooleełyę́ę yidahodiiłt’ih. Ła’ kót’áo é’iilaaígíí biniinaa náásgóó ániid háánoot’áanii yidahodiiłt’ih. Oodlą’ bee ooldahyę́ę k’ínídláád.
Ákot’ée ndi, nihił béédahózin, t’áá ha’át’ííshį́į́ k’índládígíí éí Jesus Christ nihá hashteidoodlííł. Díí biniinaa, President Russell M. Nelson nánihookąąhgo kóní: “K’ad, díí diyink’ehgo oodááł bits’ééníyáago, shijéí bee ha’ííníshłį́įgo ánhidishní t’ááshǫǫdí hóshdę́ę́’ nihaa nándááh. T’áá ha’át’íí shį́į́ ni’diił’á, doodaii’ nich’į’ nahwiiłná, Diyin Bóhólníihii biSodizinjí, biyi’ ni ná haz’ą́ągo hólǫ́. Ni dóó na’áłchíní náás nootʼį́łígíí bá k’ad diyink’ehgo oodááłjí néíndzaago bee nihik’idahojidoodliił.2
K’ad, éí naakigóne’ nihił ch’ídeesh’ááł dishnínée baa hadeesdzih, dííjį́ kǫ́ǫ́ nihił honohłónígíí doo t’áá íiyisíí diyink’ehgo deiyínóhkáhígíí. Adą́ą́dą́ą́’ baa nisoyáhę́ę éí dííshjį́ bidééti’, áko dííshjį́ áda’oołaahígíí éí náásdi ádahodooníłígií ałdó’ bídééti’ áádóó náásdi niha’áłchíní dadooleełígíí ałdó’ bídadééti’.
Naat’áanii Dallin H. Oaks kóníigo na’neeztą́ą́’:
“Jesus Christ bina’nitin bee yisdá’iildéehii ninályáhígíí éí náásdí ádahodooníłígíí t’áá baa nihił hasihgo baa ntsédeikeesgo áyósin. … Éí dííjį́ baa ndiidáłígíí náásgoó nihoolóós dooígíí yee nanihinitin.
Bits’ą́ą́jí éí, t’áá ánííltso nihił béédahózin ła’ diné t’áá dííjį́ígíí t’éiyá yaa ntsídaakees: dííjį́ béeso ałtso choidool’įįł, t’áá dííjį́ baa nił hózhǫ́ǫgo ádíílííł, áádóó náásgóóígíí éí t’áadoo baa ntsídaahkeesí.
K’ad ndahwiit’áago, díí bee na’ádíílkid doo, ‘Díísh éí háágóó nihidoolóós?2 Dííjį́ bindahwiit’áhígíísh k’ad dóó hool’áágóó ił hózhǫ́ yaa nihidoolóós, éí doodago daats’í yínííł dóó chah yiih nihidoolóós?
Ła’ shį́į́ kót’áo ntsédaakees, “Doo yee’ t’áá Damóo na’ádleehgo sodizinjį’ ałnáádeikah da doo,” doodago “Diyin bibééso éí yá’át’ééh hodeeshzhiizhgo índa ndahiilyée doo,” doodaii’ “Díí k’ad baa náhát’ínígíí doo Sodizin yilą́ąjį’ naazínígíí bee bikéé’ sézį́į da dooleeł.”
“Ákondi,” kódaaníi łeh, “Sodizin éí t’áá aaníí át’é, áádóó Jesus Christ bina’nitin éí ts’ídá doo baa dáádidiikah da.”
Díígi’ át’áo ntsédaakeesígíí éí doo yaa ákodanízin da doo yá’át’ééhgo bits’ą́ą́dóó ádahooníłígíí áko díí “tó sizílígo” ajitahgo eí hwe’iina’ dóó ániid háánoot’áanígíí be’iina’ bee bohozhdidoołt’ih. Amá dóó azhé’é nilínígíí shį́į́ t’ah sodizinjí atah yah anát’ash doo, akóndi ba’áłchíní éí yóó’ahidookahgo ts’ídá baa hasti’—díí k’ad iináhígíí biyi’ dóó hool’áágóó ákot’ée doo.
Celestial haz’áadi ba’áłchíní doo yił yah dahidookahígíí, Éí Diyin Bóhólníihii kót’áo yaa haadzíí’, “Díí éí Jesus doo bidziilgo yikéé’ naazínígíí ádaat’į́; ákohgo, Diyin God bił haz’ą́ądi doo nahat’á ch’ah bee bik’ihodoonih da.”4 Da’ díí’ísh éí t’áá nihí doodaii’ niha’áłchíní bá daniidzin? Da’ yéego nihidziilgo akéé’ ndasiidzį́į doo doo éí tó sizílígi nahalingo t’áá a’oh áníílzin doo éí t’áá nihí ádá dóó ániid háánoot’ánígíí áłdó’ bá?
Naat’áanii M. Russell Ballard ałdó’ t’áá éí yąąh bíní’go kódííniid:
“Ła’ Christ nihííł’aad yę́ę dóó índa yiniidlánée t’ahdii nihił nidanitł’a. … Ła’ akéé’ naazíinii Sodizin bibee haz’áanii dóó bína’nitin yik’i da’didootįį́į́łgo bá ndanitłah. Ła’ nahdę́ę́’ ádahóót’įįdyę́ę éí doodaii’ nahdę́ę́’ dóó k’ad alą́ąjį’ naazínígíí nida’iisí’ígíí bida’diił’á. …
“… Sodizinjí atah danilínígíí dóó Bóhólníihii naat’áanii yik’idadiilnii’ígíí ’doo bikéé’ yiishááł da doo nininzį́į́’go éí nízaadgóó ádihodidííłtih éí k’ad doo hazhó’í yitį́į da.”5
Éí la’ bee ééhániih baa yínííł hweendzinígíí náás yit’ihgo ájidoolííł—dóó díí éí há’át’íí biniyé ákót’ée doo? T’áá ha’át’íí shį́į́ át’ée ndi, ániid háánoot’ánígíí díí ii’sizíiniik’ehgo doo yá’át’ééhgo ó’oolyaaígíí doo t’óó bits’ą́ą́jigo dah didiikáh da.
Shik’is dóó shilahkéí, díí naakigo hane’ nihił ch’íní’ánígíí ła’ k’ad bii’ wohááłgo, t’ááshǫǫdí ohníłígíí łah át’áo baa ntsídadidoohkos. Díí iiná binahat’a’ hólónígíí nihił béédahózin. Hool’áágóó niha’áłchíní bíł dahonidlǫ́ǫ dooígíí t’áá íídą́ą́’ nihił béédahózin. Áko ha’át’íísh éí biniyé bąąh dahwidooł’aał? Díí ts’ídá nizhónígo oodlą’, doodago niheiyílyáago bee ééhániihígíí, a’oh danohłį́įgo k’ídanohtį́į́h łago. Bidziilígíí nílį́į dooleeł. K’ad naa hoolzhiizh, dóó Diyin Bóhólníihii éí níká’adoolwoł.
Shijéí bitł’ááhdéé’, díí baa tsídííkos, náás díní’į́į́ dóó naniłkaah “díísh éí háágóne’ bee ahóóti’” áádóó, íiyisíí nidzingo, ni’ániid háánoot’ánígíí bá nidziilgo yínáłí góne’ígíí łah át’áo ádíílííł. Jesus Christ bízhi’ binahjį’, amen.