Jesus Christ Bibe’azdiilii T’áá Áhwééjį́ Nihíká Anál’wo’
Jesus Christ yiniidlánígíí binahjį’ nihidziilgo ba’ííníidlí áko t’áá ákwííjį́ bina’nitin bik’eh honiil’į́.
Shik’is dóó Shilahkéí ayóó’ánhííníshníinii, díí éí Jesus Christ Bisodizin yá Naazínígíí át’é. Ayóó baa hózhǫ́ Jesus Christ Bisodizin bá nsiidzíigo bee yáhiijéé’ígíí. Baa ahééh nisin President Russell M. Nelson díí Bóhólníihii Bisodízin hazhó’ó t’áá bí bizhi’ bee deínóshí nihiłninę́ę áko béédeilniih díí éí t’áá bí biSodizin at’é dóó bina’nitin bik’ehgo bikéé’ yiikah.
President Nelson díí yee nihich’į’ haadzíí’: “Bich’į’ yoołkááł, deidiiltsééł aláhdi ádaat’ei Yisda’iiníiłii bibee adziilii nahasdzáán bikáá’góó t’ahdoo yiiltséhígíí. … Lą’ígóó bá adahodooníiłgo íidoolííł, bik’idahojidlíidoo, dóó da’oodlą́nígíí alílee adaat’ei bee bá ádahodoonííł.”1
She’asdzáá, Renee bił tádishaashgóó ła’ aláadi bee nihik’ihojidlíhígí, éí Jesus yá naazinígíí bitah tádiitaashgo bił yá’ádaat’ééh. Nihił dahalne’ łeh, ła’ bąąh ádahasdiidígíí, básóondiilzįįh, dóó ła’ naasdeikááhgo bá baa nihił hózhǫ́ǫ łeh. Yisda’iiníiłii dayoodlą́ągo yik’ehdahółínígí lą’ígo yik’idajidlíigo dóó alílee adaat’ei bee bá ádayooliiłígo nihił beehózin. Nihił bééhózin ła diné bich’į’ ndahwiis’náá’ígí, t’áá íyisí ti’dahooznii’ígíí.
Boliviadi ła’ asdzání báhastíín bits’ą́ą́’ ádin Bóhólníihii yá naalnishgo áko Yisda’iiníiłii bibee adziilii bee yéego bik’ihojidlíigo nihił beehózin.2 Argentinadi Yisda’iiníiłii bibee adziilii naalnishgo yiiltsą́ ła’ asdzání t’ah ánii naagháago bijáád kǫ’ na’ałbąąsii bik’ich’élwod, béésh bee hane’í naat’áhí da’ni’įįhii ła’beini’įhgo biniinaa áhóhóót’įįd.3 Bizhé’é t’áá sáhí ba’áhalyą́ągo, dóó t’áá bí t’éí yinahjį’ bidziilgo ntsíkees doo jooba’ii t’áá íyisí atíbiilaaígí bits’ą́ą́ doo. Hooghan nahaz’ą́ą́doo biyi’ yiiltsą́ keyah Chiledi 2022 yę́ędą́ą́’ naakijį́ hadzihgo Késhmish adooleełjį’ dahodiiltłah yę́ędą́ą́ ałtsoh bighan dóó t’áá áłtsoní bii’ siláhígí bits’ą́ą́’ adahideezk’ą́ą́’.4 Nííl’į́į́’ ałdo’ ła’ ałts’ásht’áazhgo yik’ee ti’hooznii’ áádoo ła’ t’áadoo át’éhígóó atí’da’bi’dil’íigo ati’daadzaah.
Ha’át’íísh éí yee dabidziilgo bich’į’ndahwiinánígíí yiyi’góó ch’éhékááh? Ha’át’íísh éí binahjį be’adziilii doo nihe’ ádiihda doo azhą́ doo bííníígahda niidzindi?
Shił bééhózingo éí Jesus Christ yiniidlą́ągo ba’ííníidlíígo t’áá ákwííjį́ bina’nitin bik’eh honiill’į́įgo bee nihidziildo.
Jacob Diyin God yáhalne’ii kót’ao na’neeztą́ą́’, “Dóó t’áá ałtso binéé’ deididoots’į́łígíí yisdéidoonił biniiyé nahasdzáán yikáa’jį’ níyá, jó áko, t’áá ałtso nihookáá’ dine’é, hastiin dóó asdzání t’áá áła, Adam ba’áłchíní danilínígíí, yá ti’hooznii’.”5
Łahda, Jesus Christ yiniidlą́ągo bikéé’ yiidáłgo doo bííníigahda niidzin łeh, t’áá íyisí doo nihił bíígha da yileeh. Łahda shį́į́h íiniidzin łeh Christ bikéé yiidáłígíí ayóo nantł’ah bich’į’ nihidziil doogo, i’iil’ínígíí bee, doo nihił hahodít’éégo, dóó t’áá íyisí t’áá ałtsoh bi’oh dihidiniidleehgo. Áko díí diné baa hashne’ígíí bits’ą́dóó íhoołą́’ígí éí Jesus Christ bina’nitin bee yisda’iildeíhii deiniidlą́ągo bik’ehgo dahinii’náago bee danhidziilgo bikéé’ deíníikááhdo. Łahda shį́į́h íiniidzin łeh, “She’iina’ hasht’eishłaago inda Jesus bikéé’ yisháałdo,” ákondi jó Jesus éí bikéé’ndiidááł áko nihí ka’adoolwoł nihe’iina’ nihá hasht’eidoodlííł.
Jesus baa hiikáhígí éí doo nihe’iina’ hadaałt’éhígíí biniinaa da. Nda’iyiilzíihígíí binyé Jesus baahiikááh dóó binahjį’ “hadaałtéego ádanhile’.”6
Haashyit’ao éí nihe’oodlą’ bee niildzééłgo bee hahodoolzhish? Shí éí abínígo she’oodlą’ kót’ao bee naashnish łeh: Ch’enásdzi’dóó, t’áadoo shibéésh bee hane’í biyi’ diníshį́’í, sońdiszįįh. Sodizin t’áadoo nantłaaí t’áá k’éházdoní ndi. Áádoo Diyin God dóó Bóhólníihii bizaad neinishtah. Díígi atao shika’analwo’ t’áá damóo na’oodleeł bik’eh Diyin God bił aha’dinisht’anígíí bááh dóó tó dinísingo nashdį́įgo kóní “tʼáá áłahjįʼ niYe’ yéédaalniih dooleeł.”7 T’áá ákwííjį́ bee haahálzhish sóondisziih dóó Diyin God dóó Bóhólníihii bizaad neinishtah, binahjį’ “Yisdá’iiníiłii bénáshnii” shibéésh bee hane’í bii’diníshį́į́’go. “Yisdá’iiníiłii bénáshniihdo” shich’į’nahwii’náago dóó doo aaníinii shídadigohgo, Jesus ak’ehdidlínígi át’ao ádeeshłííł nisin.
“Bóhólníihii bénáshniihgo,” t’áá íyisí ádaana’ooshkąąh doo, she’iina’ łahgo ándeeshdlííł nisin łeh. Bits’ą́ą́ dóó shidziilgo bee bił aha’dinisht’ą́, dóó Ii’sizį́ Diyinii shíká análwo’ “dóó bibee nahazʼáanii [shaa] yiizláhígíí bikʼehgo hinishnáa dooleeł; áko biʼIiʼSizíinii tʼáá áłahjįʼ [shił] hólǫ́ǫ dooleeł.”8 Díí éí shika’analwo’go nohoníyáajį’ bee ha’ííníshní.9 Doodai’ i’íí’ą́ąjį’ ałdo’ bííghah! Łada Bóhólníihii doo bénáshniihgo e’eááh ndi, t’áá ákǫ́ǫ́ shił hólǫ́ǫ łeh, ayoo’áshó’níigo dóó shił halne’ łeh t’áá áko shiłníigo, yiskao bináádíníítah níigo.
Doo éí t’áá áłahjį’ béé deilniih da ndi, nihiZhé’é Ya’ąąshdi Hólóoníí doo nihaayoonééhgo nihé nálniih łeh.
Ntsíikeesígíí łahda bee na’ayiilzííhgo Diyin God bił aha’diniit’ánígíí, doodai’ bił ádehaideidzíí’yę́ę, binahjį’ nihich’į’ asłáado niidzin łeh: Bik’eh honishį́įgo, áko éí Bí áádę́ę́’go shich’ą́ą́h naagháago baadahadzidii doo shaandoot’įįł da niidzinígíí doo ákót’éeda. Diyin God bich’į béeso nááhániihígí bich’į’ nehashłéego éí naanish doo shits’ą́ą́’ ádoodiił da doodai’ shighan doo adididook’ą́łda niidzingo doo ákót’ée da. Jó áko t’áádoo lé’ hihá ádooníłígí neíníídlíigo doo niha’ánééhgo, Bóhólníihii doo bich’į’ nihił hózhǫ́ǫ́go ábidii’níiłeh, “Doísh bee sha’áhalą́ąda ei shíí doołhxelígíí?”10
Diyin God bił aha’diniit’ánígíí doo t’óó saad t’éiyá da; éí bineilnishgo nihe’iina’ łahgo íilįįh. Diyin God bił aha’dinisht’ánígíí binahjį’ dadiyinii shaayiilé, Jesus Christ bibee’adziil bee shidziil, éí bee she’iina’ łahgo ádzaa, doo baa ndidoot’ááł da ádaat’ei baa náhidishaah, nantł’ah ndi. Jesus Christ bee deilniihígí t’áá áłahjį’ bee shidziil; bee shidziilgo “bibee haz’áanii [shei]níláhígí bee.”12 Binahjį’ sháhózhǫ́, shił hózhǫ́ǫgo, k’é bee hózhǫ́ǫgo áhwíínsin,13 ahinaazhdiiltłi’ígíí t’áágaad, áko Diyin God ałtsé íínsin.
Łahda t’áá íyisíí nihił honeezgaigo doodai’ ayóó’ííníí’ninígíí ła’ bił honezgaigo doo bííníigahgo, Jesus Christ béneilniihgo bikéé’ yiidáałgo neezgaiyę́ę bííníigahgo nihá íidoolííł, nihijei bidziilgo íidoolííł, neezgaiyę́ę nahjį’ nihá íidoolííł. Díí Bóhólníinii be’adziilii binahjį’ azhé’é doo yíyooghada nahalindi bitsi’ bijáád k’ékalgo yik’ee ti’hoonííhgo ayóó’áyó’níigo ya’áhalyáánt’éé’.
Ya’iishjááshchilí yiziłyę́ędą́ą́’ biyi’ Elder Soares Argentinadi hotaagháago Flavia bik’i ch’í’ílwodyę́ę neidííłkid, áádoo áníílá, “T’óó báhádzidígí át’ao shich’į’ nahwiis’náá’, bik’ee ti’hooshníihgo, sháháchi’ ńt’éé’, dóó yinisdziih ńt’éé’ [díí áshi’diilyáagí biniinaa]. Áko t’áá shí’ídił na’ídishkid kódishníigo, ’ha’át’íish binyé?’ doo éí kódishníida ’shí éí ha’át’íí biniinaa?’ … Díí kót’ao áshį́įgo binahjį’ Bóhólíihii dóó t’áá haiída ayoo baantsískees. … Bóhólíihii doo bits’ą́ąjį’ kónisht’éeda, t’áá’awołíbee bąąh dahsítį́.”15
Naat’áanii President Nelson na’neeztąą’ kóníigo: Dyin God bił ahazh’deet’áago éí yá’ąąshdę́ę́’ adziil át’é—éí adziil binahjį’ nihidziilgo doo nihik’eh didoodleeł da nihich’į́’ nahwii’náan ndi, doo azahnihidínoo’ah da, dóó nihijéí neezgaígíí bich’į’ nihidziil doo. … Ákogo, Bóhólníihii yił ahada’deest’áago yik’ehdahół’ínígíí bił dahodeesyeel.”16 Díígí át’éhígíí yiiłtsą́ bił dahodeesyeel dóó bił sih dahasingo, asdzání bahastiin bits’ą́ą́’ ádin yę́ę azhą́ yáhásááhgo t’áá áhwi bijei neezgai ndi.
New Testament biyi’doo Jesus dóó Bikéé’ naazíinii tsinaa’eeł bił yi’ołgo baa hane’:
“Nít’éé’ ayóó át’éego deeyol, áádóó tó náádadiidáhígíí tsinaa’eeł biih yilk’oołgo tsinaa’eeł k’adę́ę tó bii’ hadibin. …
“Jesus t’éí akéédę́ę́’ … tsii’ááł bikáa’gi ajiłhosh: áádóó hódahooł’aahii ch’éédahasidgo ádahodííniid, Na’nitiní, da’ tó nihidooghą́łígíísh doo ni’diił’áa da?
“Áko ch’éédzídzidgo níyol dzideeztehgo tó ábijiní, Áhodiilzééh, hasht’edít’eeh. …
“Áko Jesus áhodííniid, Ha’át’íishą’ biniyé nídaałdzid? Da’ t’ahdii nidiísh doo da’iinohdlą́ą da?”17
Díí hane’ ayóo shił yá’átééh. Bóhólníihii’ísh bikéé’naakaiígí beda’oodlą’ yee níyol ni’kwídeidoolííł bó’níín nt’ee’? Da’ níyolísh ni’kwídeidoolííł? Iiná ayóó’át’éego níyol nahalingo Jesus Christ yiiniidlą́ągo t’eiyá bee nihił hosyéeldo, binahjį’ doo nihidooghááłda jó tsin naa’eeł biyi’ Bił honiidlǫ́.
Díígiá’t’ao kéyah Chiledi hooghan ndahaz’ą́ą́goo bitait’aashgo be’oodlą’ dabidziilgo yiiltsą́. Bighan ałtso adahideez’k’ą́ą’; t’áá ałtsoní bee ádaasdiid. Ákondi dabighan yę́ęgo biłtádiikáahgo bąąh ádahóót’įįdígí yee nihił dahalne’go ga’, díí ni’ bikáá’ nsiidzinígíí ayóo hodiyingo haz’ą́ nił ndahalin nt’éé’. Ła’ asdzání léi’ she’asdzáá ahyiłníílá, “Nhííghan bííghahgo hooghan dadéek’ąąhgo, íiniizį́į́’ nihído’ nihighan adidook’ą́ą́ł, áko t’áá ałtsoh niheehólónígí adididook’ą́ą́ł. Doo t’áá íyisí shiłyéé da nt’éé’, t’áadoo bee nóólninígóó shił hasyéél nt’éé. Haashį́į́h yit’ao éí, t’áá altsoní T’ÁÁ ÁKO doo niizį́į́’.” Diyin God Bił aha’diniit’ánígíí bee nihidziil dóó bee hats’ííd yínííł bits’ą́ąjį’.
Baa ahééhnisin Renee bił baa ákoniizį́į́’ Sodizin t’áá íyisíí yikéé’ naazinígíí bitait’aashgo, yéigo da’oodlą́, bidziilgo ntsídaakees, dóó yá’át’éehii yidadiilkaal. Díí hane’ bik’ee ajeiidaneezgaiígí dóó bik’ee doo hózhǫ́ǫdaígí doo baa dahodiits’a’da t’áá áltso hane’ dahólóógo. Ak’inaaziní doo bik’i ndahas’nilda bik’ee nák’eeshto’ dadeezna’ígí dóó sodizin dadiit’a’ígíí ti’dahooníigo ádaadinígí bá doodai’ na’iiłnáago ałts’ásht’ázhígí; t’áadoo baa dahóóne’ da ndaaldzidígí, yínííł danlínáa, dóó dadeez’nihgo yił ádaat’éhígí Jesus Christ dóó Be’iina’ yee na’nídláahígī dayoodlánígí ahéhee’. Díí dine nihił dahoolne’ígíí binahjį’ she’oodlą’ biziilgo noosééł, dóó t’áá íyisíí shijei biyi’dóó bee baa ahééhnisin.
Díí t’áá aaníí shił bééhózin Jesus Christ Bisodizin bá Hooghan át’é. Shił bééhózin Yisdá’iiníiłii Bibee adziilii yee nhik’ijidlíidoógíí nihiba’ hast’e’ ádólzin, t’áá ákwiijį́ Bikéé’ yiidááłgo. Jesus Christ bízhi’ binahjį’, amen.