Shik’is dóó Shilahké Christ Deiniidlánígíí
Diyin k’ehgo ił hódlónígíí nihii’ naazláa doo áádóó ał’ąąh át’áo Diyin yee nihik’ijosdli’ígíí baa ahééh daniidzin doo.
Shik’is dóó shiláhkéí, dííjį́ ts’ídá baa hózhǫ́ǫgo ahąąh ánihi’diilyaa. T’áá ániiltso éiyá Diyin Bi’Ii’sizíinii dóó Bi’ayóó’ó’óní danihi’diisnáá’ díí éí Diyin bándaal’a’í yee nihich’į’ hadahaasdzíí’. Baa ahééh nisin díí akéedi hadíídzih shi’dooniidígíí. Diyin biIi’sizíinii nihił hólǫ́ǫ doo t’áá ánííltso Diyin baa dahwii’niih doo Christ bee ła’ niidlį́įgo.
Diyin Yá Yałti’í, Russell M. Nelson, kódííniid: “Sodizin báhooghan t’ááłá’í góne’ yah ánéikahígíí ak’eehodi’niih nahjį’ kódaohłééh. T’áá shǫǫdí Diyin God ba’áłchíní t’áá ałtso nihił danilį́.”1 T’áá nahasdzáán nahwiis’ą́ą́dę́ę́’ oodlání daniidlínígíí, díí diyin yá yáłti’í bik’eh dahoniil’į́į doo éí binahjį’ Yisdá’iiníiłii bisodizin báhooghan bidziilgo ádeiníilzin doo.
Jesus Christ bina’nitin éí ání t’áá ła’í niidzínígo éí nihiZhé’é dóó nihimá yá’ąąshdi bił kéédahoniit’į́į́ ńt’ę́ę́’ ba’áłchíní niidlǫ́ǫ ayóó’ánihi’dóóníí ńt’ę́ę́’2 díí t’ah doo nahasdzáán bikáá niidááhyę́ędą́ą́’. Jesus Christ bina’nitin na’nitingo éí t’áá áníiltso Diyin God át’éhígí át’ao biniilt’éh.3 Áádóó ałdó’ Christ ání nihizhé’é Diyin God t’áá bíneelt’éego ánihi’diilyaa; éí bąą, Bidááhdóó t’áá łá’í niidlį́,4 háálá Bí “nihokáá’ dine’é niidlínígíí t’ááłá’í nihidił nihitaazlį́.”5 Biniinaa, diyingo ánihi’diilyaa, niidlínígíí, dóó binahjį’ ániit’ée dooleełígíí, háálá éí “t’ááłá’í Diyin God dóó t’ááłá’í nihiZhé’é hólǫ́, éí t’áá ałtsojį’ bóhólnííh, dóó éí bąąh [t’áá áłtso] bee ła’ niidlį́.”6
Christ bikéé’ siidzínígíí, nihe’oodlą’ bidziilgo ádeiyíníilzin doo, áádóó nihik’is dóó nihilahkéí, ayóó’ó’óni bee ahéstł’ǫ́ǫgo ádeyíníilzin doo nihijéí bee t’ááłá’í niidlį́į doo, azhą́ shį́į́ ał’ąą ániit’ée ndi, binahjį’ ádił ídlį́ nihiyi’ hólǫ́ǫ doo.7
Shą́ą́’ Christ kót’éego na’neezt’ą́ą́’ níyáhę́ędą́ą́’ Nephi bidine’é yitahgóó ákót’áo naakidi neeznádiin nááhai?
“Dóó kót’áo diné t’áá íyisí bił dahózhǫ́ǫ ńt’ę́ę́’ ńléí Diyin God diné haidiilaa dóó wóshdę́ę́. …
“Doo éí Laman dine’é hólǫ́ǫ da ńt’ę́ę́’, dóó ał’ąą dine’é doo hólǫ́ǫ da ńt’ę́ę́’; ákondi t’ááłá’í dine’é danilį́į ńt’ę́ę́’, Christ ba’áłchíní, dóó Diyin God bił haz’ą́ądi yah ánáhidookahígíí daazlį́į́’.
“Dóó dooládó’ bik’idahojisdli da!”8
President Nelson konhó’níigo kónáádoo’niid: “Ánihiilaiígíí anihiłní Diyin God ba’áłchíní bik’ijį’ ak’ee’adi’niihígíí yóó ada’hidooh’aah. Ła’ dóóne’í bik’ee dinohniihígíí baa ádaa ńda’oohkąąh! … T’áá nihí siidzį́įgi éí Diyin God ba’áłchíní bich’į’ ániit’ée dooleełígíí baa siiti’ doo.”9 Díí t’áá aaníí át’é, nihokáá’ dine’é sezį́įgi bich’į’ siiti’ doo.10
Hodiyingo Diyin God bił da’ahííníitą’ígíí binahjį’ Ba’áłchíní niidlí, diyin yił ałch’į’ yáłti’ii binahjį’ áhooníłígíí President Nelson ání náá ákóne’ ałkéé’ ádees’eezígíí éí na’nízhoozhí nahalingo diné bee ak’eediniih bichą́ą́h adootł’į́łígíí doo bits’ą́ądi kóniit’ée da dooleeł.11 Ákondi, Ephesians biyi’dóó Paul ání, díí éí nihił bééhózin doo, t’áá ałtsojį’ a’ohgo ádanoht’ée le’, niha’át’e’ ádaadin le’, áádóó nízaadgóó hada’íínółní.12
Łahgo Jewish rabbi bahane’go ání ła’ diné dóó bik’is ndilt’éego binááł e’e’aah. Ła’ na’ádéíłkidgo ání, “Haaléit’áo tł’ééhonaa’éí ałtso doo dóó ániidígíí hanáá’doot’ááł?”
Ńt’ę́ę́’ ła ání, “Ha’a’aahjigo jidééz’į́į́’go dibé doo tł’ízí nahalin da doo.”
Ńt’ę́ę́’ ła’ígíí haadzíí’go ání, “Yá’ąąsh bąąhjį’ jidéez’į́į́’go haidíígí olive sikaadígí át’é dóó fig tsin sikaadígí doo aheełt’éegóó hołbééhózingo.”
Rabbi nilínígíí t’áá ákót’éego nináádéídééłkid. T’áá nízaadgóó yaa nitsézkeez, áádóó haadzíí’go kóní, “Ńléí ha’a’aahjigo jidí’įįhgo asdzání éí doodago hastiin binii’ jiiłtséehgo áádóó ájíniih, ‘Ei shilah át’é; ei shik’is át’é.’”13
Shik’is nohłíinii, t’áá aaníí shił bééhózin ániidíí haiłkááh biyi’ jidí’įįhgo diné ła’ łah át’éego náájiníł’įįh nihokáá’ dine’é sezį́įgi bich’į’ siiti’ doo dóó t’áá aaníí hak’is dóó halah Christ nilíigo baa nitsízdíkos.
Jesus kwe’é nahasdzáán bikáa’gi na’neezt’ą́ą́’yę́ędą́ą́’, diné Yitaagháago díí yee na’neeztą́ą́’ “nizhónígo yá’át’éehii yee naashnish”,14 wóshdę́ę́’ shaa hoohkááh dóó Shi yá’át’ééhii ák’idadooht’aah yiłníigo, da’níłts’ą́ądę́ę́’ ndaakai, be’iina deiyíłt’éehígíí, éí doodago bibee’ó’ól’įįłígíí doo bóhółníígo. Yitahgóó na’neezt’ą́ą́’, yá sodilzingo, dóó t’áá ałtsóní yaa jooba’go yíká’eelwod, azhą́ shį́į́ łah át’áo dabidi’níl’į́į ndi, baa da’oodloh ndi, éí doodago nahjį’ kódabidil’į́į ndi. T’áadoo ła’ nahjį’ kwíyiilaa da t’áá ałtso áheełt’éego áyóó’áyó’níí ńt’ę́ę́’, háálá éí t’áá ałtso t’áá ła’í’doo hajííjéé’go nihaa ntsékees ńt’ę́é’, dóó t’ááłá’ígíí dahaZhé’égo.15
Díí łahgo ahóhóót’įįd Yisdá’iiníiłii Galileegóó yigááłgo, t’áá ákónéehii Samaria góne’ ch’íníyá.16 Áádóó’ Jesus Jacob bi tó hajiileeh hoolyéedi neezdáago hanáál’yį́į́’. Áadi jizdáago, asdzáán léí’ Samaritan nilį́įgo níyá dóó bitó ásaa’ haidééłbin binyé. T’áá ałtsóní Bił bééhózingo, Jesus bich’į’ haadzíí’go, ání, “Éí ła’ nits’ą́ą́’ yishdlą́.”17
Jew dine’é nilíigo díí asdzáá Samaritan nilínígíí yich’į’ haadzíí’go yiyaa hodeeshxiz, áádóó ání, “Haaléit’éego, Jew dine’é nílį́įgo, tó ła’ shaaníkaah shidíníniid, Samaria asdzání nishłį́įgo áshidiní? háálá Jew dine’é éí doo Samaritan dine’é yił ałch’ih daonį́į da.”18
Ákondi Jesus, Samaritan dóó Jew dine’é doo yá’át’ééhgo ałhaa ńtsédaakeesgo áda’ál’ínée nahjį’ kóyiilaa, ákondi asdzání ayóó’áyó’nínígíí biniinaa yíká’alwod, binahjį’ nizhónígo yaa ntsédeezkééz—háálá éí, Bí íiyisíí Messiah nilínígíí, éí t’áá ałtsoní nilínígíí yaa hodoolnih dóó éí nídoodáłígíí yiba’ át’é.19 Díí hajooba’go áhóót’įįdígíí bidiisnáá’go biniinaa kintahgóó nídiilwod dóó diné yee yił hoolne’, kóníigo, “Díí hanii éí doo Christ át’į́į da?”20
Díí t’áá íiyisíí shił baa hajooba’í diné atí’dabi’dilínígíí, dóó baa oodlohígíí, éí doodago doo yá’át’éehgo baa ntsáhákeesígíí, háálá díí biniinaa ádíshínígíí, éí t’áá shí sézį́įgi díí háásid, díí diné shinááł ti’dahooznii’ diné doo yá’át’ééhgóó ntsédaakeesígíí ádabííł’įįdígíí biniinaa. Díí doo yá’át’ééhgo áda’ałínígíí ałdó’ shił baa hajooba’í háálá éí doo hazhó’í ntsédaakees da, doo nízaadgóó da’oo’į́į da, dóó bijéí danitł’iz háálá éí diné yá’át’éehgo dahiinánígíí bik’eh di’doodleeł nahalingo yaa ntsédaakees. Diné yá’át’éehgo yaa ntsídookosígíí bił ndantł’ah háálá éí Diyin God ba’áłchíní danilínígíí doo ákót’áo dayoo’íi da.
Hodeeyáádą́ą́’ dóó hóshdę́ę́’ Diyin yił ałch’į’ yáłti’ii díí dííshjį́į́góó doo yá’át’éehgo ádahooníłígíí deiyiiłtsą́, dóó ńléí Yisdá’iiníiłii Christ Nínáádoodáłíjį’.21 Díí ał’ąą dine’é daniidlínígíí, dóó Wáashiindoonk’ehgo ntsáhákees, dóó nihe’iina’ łah át’éhígíí biniinaa díí k’ad nahasdzáán bikáá’ kééhoniit’ínígíí ałts’ánihósin. Díí ał’ąą ádaniit’éhígíí biniinaa nihinítsékees dóó ádeit’įįłígíí éí diné kót’áo nííl’į́įgo yikéé’dahidiikááh. Díí biniinaa, doo nihá nanitł’ah da diné nííl’į́įgo bintsékees, dóó áát’įįłígíí, dóó saad yee yáłti’ígíí dóó ał’ąą dine’é daniidlį́įgo ał’ąą át’éego kéédahoniit’ínígíí dóó nihee ó’ool’įįł doo aheełt’éhígíí biniinaa doo yá’át’éehgo ałhaa ntsííkees, dóó doo ałhídadínéelnáa da. Díí doo yá’át’ééhgo ałhaa ntsííkeesígíí biniinaa doo ałká’anéilwo’ da, ádaadziiniidlį́, doo ałk’ida’diit’įįh da, łe’ daniidzin, díí éí ats’íísk’ehgo ániit’é,22 áko éí biniinaa Christ bibee ó’ool’įįł doo biniilt’ée da. Díí ániiht’éhígíí doo nihá yá’át’ééh da háálá éí Christ Yikéé’ Sizíinii doo ákódaat’į́į da.23 T’áá aaníí, sheik’s dóó shilahkéí ayóó’anhííníshníinii, díígi’ át’áo oolch’į́į́d dóó doo yá’át’ééhgo ahaa ntsáhákeesígíí Christ Yá Naazínígíí yitahgóó doo bá haz’ą́ą da.
Diyin bił ałhada’diniit’ánígíí, t’áá nihí siidzį́įgi éí díígi’ át’áo aká’adiilwoł Yisdá’iinííłii nihiníł’ínígíí át’áo ał’ąą ániit’éhígíí nahjį’ kódadiil’nííł24 dóó aheełt’éego áda’iil’įįłígíí bik’ehgo ániit’ée doo—díí át’áo éíya diyin biniilt’ée doo k’é bił naazti’i’go. Áádoo ałdo’, bił kééhwiit’íínii laanaa íinízinígí íiniidzin doo, hajooba’ íinízinígí, yaa yínííł nízinígíí, dóó daneezgaigo bił daniigai doo. Díí t’áá áłtso Diyin God ba’áłchíní niidlínígíí bikéé’ yiidááł, t’áá ałheniilt’é doo ha’át’íi da bee ayóó ániit’ée da dóó binahjį’ daniilzééł. T’áá ałhidaniilt’éego yiikah doo, k’é bił naazti’go, dóó Diyin God dóó t’áá ałtso nihokáá’ dine’é ayóó’ó’óní nihijéí bii’ naazláago bił deiyínííkááh doo— Abraham Lincoln kóníigo haadzíí’, “oolchį́į́d bąąh ádingo; diné t’áá ałtsojį’ ayóó’ájó’níi dooleeł.”25
Łahdiiísh baa ntsíníkééz Diyin bighan ntsaa biyi’ góne’ diné t’áá aheełt’éego éé’ naazhjéé’ígíí? Diyin bighan ntsaagóóne’ t’áá łá’ígíí biniyé ałnánéíkah éí éíyá nihiDiyin bidááhdóó hodíyink’ehgo hadaniilt’ée doo. Nihi’éé’ łigaigo bee hadadíníit’éego, t’áá áníiltso éí Diyin Bóhólníihii t’áá Bí ba’áłchíní daniidlínígíí dóó Christ bits’ą́ą́dóó honiidlónígíí bił yah adiikah.26 Díí baa ahééh niidzin t’áá aheełt’éego, Diyin bił ahada’diniit’ą́, dóó hódahgo Diyin bibee haz’áanii bá dahodíníilzingo bik’eh dahoniil’į́į doo, dóó t’áá aheełt’éego hool’áágóó Diyin nihik’ihojidoodliił. T’áá ła’ bee niidlį́įgo, łah át’éego t’áadoo le’é nííl’į́į́ łeh, Diyin God ba’áłchíní niidlínígíí ał’ąą ádaniit’ée ndi baa ahééh daniidzin.
T’áá ániidgo Brazildóó naat’áanii danilínígíí Brasília Brazil Temple góne’ bił hadiishkai. Brazil binaat’aanii naaki góne’ dahsidáhígíí, diné łigaigo éé’naazhjé’ígíí baa nísíit’įįd temple góne’í. Díí diné łigaigo éé’ naazhjé’ígíí biniinaa át’éhígíí bee bił hweeshne’, jó áko t’áá ániiltso Diyin God bedaniilt’é, azhą́ shį́į́ ła’ kéyah nahaz’ą́ą́góó naat’áanii danilį́į ndi doodaii’ ał’ąą sodizin báhooghangóó yá naazínígíí azhą́ ákót’ée ndi nihiZhé’é Yá’ąąshdi hólónii éí doo t’áá sahdii aniit’éego nihaa ntsékees da há’álá t’ááłá’í ba’áłchíní niidlį́.
Iguaçú Tooh shádi’ááhjigo nílínígíí Brazil góne’í t’ááłá’í tó nteelígíí biih yílį́ éí díí binahjį’ nizhónígo tó adadaazlį éí Iguaçú Falls bee béého’dílzin—díí kót’áo Diyin God haidiilaa, éí díí kéyah t’áá nahwiiz’ą́ą́déé’ bee béého’dílzin. Áko díí tooh ntsaago nílínígíí lą’ígóó binahjį’ tó adadaazlį́. Hane’ bee ak’idiit’įįhii binahjį’, díí tó adadaazlínígíí éí Diyin God bighan haz’ą́ądóó ba’áłchíní daniidlínígíí bee daniil’į́ díí kwe’é nahasdzáán bikáa’gi, díí binahjį’ diyin bits’ą́ą́dóó yiidáłígíí bee ahídíníit’į́, dóó bits’ą́ą́dóó diyink’ehgo k’é da’ahidii’ní. Haa’ílá díí binahjį’, t’ááłá’í niidzínígo nihidó’ tó nahalingo ałtsá daniidlį́, díí biniinaa ał’ąągo ntsédeikees. Azhą́ shį́į́ kóniit’ée ndi, Diyin ba’áłchíní daniidlínígíí Christ binahjį’ náás yiidááł doo, t’áadoo diyin baa yii’nééhgóó, t’áá díí biniinaa ał’ąą ádaniit’é kéédahoniit’į́įgi.27
Shik’is dóó shilahkéí ayóó anihíínishníinii, nihijéí dóó nihíni’ yiit’ihígíí binahjį’ ntsííkees doo dóó t’áá aaníinii át’éhígíí aheełt’éego Diyin God binahjį’ ániit’ée doo, t’áá ałtso yee nihik’ihojídlíhígíí diyink’ehgo binahjį’ t’áá ahełt’éego hool’áago nihá ahóót’i’go áyósin. Háałá díí binahjį’ diyingo ii’sizį́k’eh baa nihił daházhǫ́ǫ kéédahwiit’į́į doo t’áá ał’ąąh át’áo aa halyéí nihaa dahasyáhígíí nihił danilį́į doo. Díí be’iilyaago t’éiyá, éí t’áá aaníí ánihidishní tó nílínígíí bedaniilt’ée doo, Iguaçú Falls nahalingo, doo diyin baa deidiyii’nah da binahjį’ nihéé ho’dílzinígíí, “Christ ba’áłchíní, dóó Diyin God bił haz’ánídóó yiidáłígíí.”28
T’áá aaníí ánihidishní tooh nílínígíí nahalingo kwe’é nahasdzáán bikáá’ yiidááłgo, hayoołkááł ániidígíí éí adinídíínígíí bik’ehgo nizhónígo nihił ch’éda’didoodlał, áko binahjį’ nihik’ihojídlíi doo, Diyin God Ba’áłchíní danidlį́įgo ał’ąą át’éego ánihiilaa.29 Nihí Bíla’ dadiidleeł ákót’éego díí bee Bíká’adiilwoł ádaadasiiti’go dóó ádił ídlį́ binahjį’ Diyin ba’áłchíní bee ndadíníitį́į́ł. Diyin God t’áá aaníí hiiná! Jesus éí nahasdzáán bi Yisdá’iiníiłii nilį́. Dííshjį́į́góó éí President Nelson Diyin God yá yáłti’ii nilį́. Díí t’áá aaníí át’éego bee haasdzíí’ Jesus Christ bízhi’ dílzinígíí binahjį’, amen.