Lezzjonijiet Divini tat-Trobbija

Mill-Presbiteru Valeri V. Cordón

Tas-Sebgħin

Il-ġenituri jidħlu fi sħubija ma’ Missierhom fis-Smewwiet biex jiggwidaw lill-maħbubin uliedhom lura lejn is-sema.

Qatt żammejt tarbija tat-twelid f’idejk? Hemm dawl li joħroġ minn kull tarbija tat-twelid, li jġib rabta speċjali ta’ mħabba li tista’ timla l-qlub tal-ġenituri tagħhom bil-ferħ.¹ Awtur Messikan kiteb, “Tgħallimt li meta tarbija tat-twelid tagħfas għall-ewwel darba is-suba’ ta’ missierha b’idha ċkejkna, hi tkun marbuta għal dejjem miegħu.”²

It-trobbija hija waħda mill-esperjenzi l-aktar straordinarji tal-ħajja. Il-ġenituri jidħlu fi sħubija ma’ Missierhom tas-Smewwiet biex jiggwidaw lill-maħbubin uliedhom lura lejn is-sema.³ Illum nixtieq naqsam xi lezzjonijiet dwar it-trobbija li nsibu fl-Iskrittura u li ġew mgħallma mill-profeti ħajjin biex jgħinuna nħallu wirt għat-trobbija.

Tlugħ għall-Għolja tal-Kultura tal-Evanġelju

Irridu nitilgħu f’art ogħla tal-kultura tal-evanġelju mal-familji tagħna. l-President Russell M. Nelson iddikjara: “Il-familji jistħoqqilhom gwida mis-sema. Il-ġenituri ma jistgħux jagħtu pariri adegwati lit-tfal mill-esperjenzi, biża’, jew simpatija personali.”⁴

Għalkemm l-isfond kulturali tagħna, l-istili ta’ trobbija, u l-esperjenzi personali tagħna jistgħu jkunu ta’ valur, dawn l-abbiltajiet mhumiex biżżejjed biex jgħinu lil uliedna jirritornaw lejn is-sema. Għandna bżonn aċċess għal “sett ta’ valuri u … prattiċi“ aktar elevati,⁵kultura taʼ mħabba u taʼ aspettattivi, fejn aħna ninteraġixxu maʼ wliedna “b’mod qaddis u ogħla.”⁶ Il-President Dallin H. Oaks iddeskriva l-kultura tal-evanġelju bħala “mod distintiv ta’ ħajja, sett ta’ valuri u aspettattivi u prattiċi. … Din il-kultura tal-evanġelju ġejja mill-pjan tas-salvazzjoni, il-kmandamenti ta’ Alla, u t-tagħlim ta’… profeti ħajjin. Tiggwidana fil-mod kif inrabbu l-familji tagħna u kif ngħixu l-ħajja individwali tagħna.”⁷

Ġesù Kristu huwa u jinsab fiċ-ċentru ta’ din il-kultura tal-evanġelju. Li naddotaw il-kultura tal-evanġelju fil-familji tagħna hija kruċjali biex jinħoloq ambjent fertili fejn iż-żerriegħa tal-fidi tista’ tiffjorixxi. Biex nitilgħu dan il-livell ogħla, il-President Oaks stedinna “biex nħallu kull tradizzjoni jew prattika personali jew tal-familja li tmur kontra t-tagħlim tal-Knisja ta’ Ġesù Kristu.”⁸ Ġenituri, li nibqgħu lura min-naħa tagħna biex nistabbilixxu l-kultura tal-evanġelju tista’ tippermetti lill-avversarju jistabbilixxi saqajh fi djarna jew, agħar minn hekk, fil-qlub ta’ wliedna.

Hekk kif nagħżlu biex l-kultura tal-evanġelju tkun l-kultura predominanti fil-familja tagħna, imbagħad bil-forza qawwija tal-Ispirtu s-Santu,⁹, l-istili, it-tradizzjonijiet u l-prattiki attwali tagħna ta’ trobbija se jiġu mgħarbla, idrittati, irfinuti, u msaħħa.

Agħmel id-Dar iċ-Ċentru tat-Tagħlim tal-Evanġelju.

Il-President Russell M. Nelson għallem li d-dar għandha tkun “iċ-ċentru tat-tagħlim tal-Evanġelju.”¹⁰ L-iskop tat-tagħlim tal-evanġelju huwa li “jsaħħaħ il-konverżjoni tagħna lejn il-Missier fis-Smewwiet u Ġesù Kristu u jgħinna nsiru iktar bħalhom.”¹¹ Ejja nikkunsidraw tliet responsabbiltajiet kruċjali għat-trobbija deskritta mill-profeti u l-appostli li jistgħu jgħinuna nistabbilixxu kultura tal-evanġelju ogħla fi djarna.

L-ewwel: Għallem b’mod Ħieles

Missierna fis-Smewwiet għallem lil Adam dwar Ġesù Kristu u d-duttrina Tiegħu. Hu għallmu “biex jgħallem dawn l-affarijiet b’mod ħieles lil uliedu.”¹² Fi kliem ieħor, Missierna fis-Smewwiet għallem lil Adam biex jgħallem dawn l-affarijiet b’mod ħieles, ġeneruż, u mingħajr trażżin.¹³ L-Iskrittura tgħidilna li “Adam u Eva bierku isem Alla, u wrew il-ħwejjeġ kollha lil uliedhom irġiel u lil uliedhom nisa.”¹⁴

Ngħallmu lil uliedna b’mod ġeneruż meta nqattgħu ħin sinifikanti magħhom. Ngħallmu mingħajr restrizzjonijiet meta niddiskutu suġġetti sensittivi bħall-ħin quddiem l-iskrin, billi nużaw riżorsi li l-Knisja għamlet disponibbli.¹⁵ Aħna ngħallmu b’mod liberali meta nistudjaw l-Iskrittura mat-tfal tagħna bl-użu ta’ Come, Follow Me u nħallu lill-Ispirtu jkun l-għalliem tagħna.

It-tieni: Dixxipulat Mudell

Fil-ktieb ta’ Ġwanni, naqraw li meta diversi Lhud staqsew lis-Salvatur dwar l-imġieba Tiegħu, Ġesù uriehom il-mudell Tiegħu, Missieru. Għallem, ”L-iben ebda ħaġa ma jista’ jagħmel minn rajh jekk ma jarax lil Missieru jagħmilha; għax il-ħwejjeġ li jagħmel il-Missier, jagħmilhom l-Iben ukoll, bħalu.”¹⁶ Ġenituri, ta’ xiex għandna nkunu mudelli għal uliedna? Dixxipulat.

Bħala ġenituri, nistgħu ngħallmu l-importanza li npoġġu lil Alla l-ewwel meta niddiskutu l-ewwel kmandament, nimudellaw dan meta nwarrbu d-distrazzjonijiet tad-dinja u nżommu Jum il-Mulej qaddis kull ġimgħa. Nistgħu ngħallmu l-importanza tal-patti tat-tempju meta nitkellmu dwar id-duttrina taż-żwieġ ċelestjali, iżda nkunu mudell tiegħu meta nonoraw il-patti tagħna, billi nittrattaw lill-konjuġi tagħna b’dinjità.

It-tielet: Stieden biex Naġixxu

Il-fidi f’Ġesù Kristu għandha tkun il-qalba tat-testimonjanzi ta’ wliedna, u dawn għandhom jaslu għand kull wild permezz ta’ rivelazzjoni individwali. Biex ngħinu lil uliedna jikbru fix-xhieda tagħhom, inħeġġuhom jużaw l-volontà tagħhom biex jagħżlu dak li hu tajjeb¹⁸ u nippreparawhom għal ħajjithom kollha fit-triq tal-patt ta’ Alla¹⁹

Ikun għaqli li nħeġġu lil uliedna biex jaċċettaw l-istedina tal-President Nelson biex jieħdu f’idejhom ix-xhieda tiegħu jew tagħha ta’ Ġesù Kristu u l-evanġelju Tiegħu—biex jaħdmu għaliha, jrawmuha ħalli tikber, jgħajxuha bil-verità, u biex ma jiġux mniġġsa b’filosofiji foloz ta’ rġiel u nisa li ma jemmnux.²⁰

Trobbija Ġusta u Intenzjonata

L-intenzjonijiet divini ta’ Missierna fis-Smewwiet bħala ġenitur ġew magħrufa f’rivelazzjoni mogħtija lil Mosè: “Għax ara, din hi l-ħidma u l-glorja tiegħi—li nwettqu l-immortalità u l-ħajja eterna tal-bniedem.”²¹ Il-President Nelson żied jgħid, “Alla se jagħmel dak kollu li jista’, ħlief li jmur kontra l-volontà tiegħek, biex jgħinek ma titlifx l-akbar barkiet fl-eternità kollha.”²²

Bħala ġenituri, aħna l-aġenti ta’ Alla fil-kura ta’ wliedna.²³ Irridu nagħmlu dak kollu li nistgħu biex noħolqu ambjent fejn uliedna jkunu jistgħu jħossu l-influwenza divina Tiegħu.

Missierna fis-Smewwiet qatt ma ried li bħala ġenituri aħna irridu biss noqogħdu mal-ġenb bħala spettaturi, naraw il-ħajja spiritwali ta’ wliedna tiżvolġi quddiemna. Ħa nispjega din l-idea ta’ trobbija intenzjonata b’esperjenza personali tiegħi. Meta kont qed nattendi l-Primarja f’fergħa żgħira fil-Gwatemala, il-ġenituri tiegħi bdew jgħallmuni dwar il-valur tal-barka patrijarkali. Ommi ħadet il-ħin biex taqsam l-esperjenza tagħha meta rċeviet il-barka patrijarkali tagħha. Għallmitni d-duttrina relatata mal-barka patrijarkali, u xehdet dwar il-barkiet imwiegħda. It-trobbija intenzjonata tagħha ispiratni biex ikolli x-xewqa li nirċievi l-barka patrijarkali tiegħi.

Meta kelli 12-il sena, il-ġenituri tiegħi għenuni fit-tfittxija tiegħi għal patrijarka. Dan kien meħtieġ għax ma kienx hemm patrijarka fid-distrett fejn konna noqogħdu. Ivvjaġġajt għand il-patrijarka li kien f’wited 156 kilometru (97 mil) ’l bogħod. Niftakar sew meta l-patrijarka poġġa jdejh fuq rasi biex iberikni. B’konferma spiritwali qawwija kont naf, bla dubju, li Missieri fis-Smewwiet kien jafni.

Għal tifel ta’ 12-il sena minn villaġġ żgħira, dan kien ifisser kollox għalija. Qalbi daret lejn Missieri fis-Smewwiet dak in-nhar minħabba t-trobbija intenzjonata ta’ ommi u missieri, u se nibqa’ grat lejhom.

Sister Joy D. Jones, eks President Ġenerali tal-Primarja, għallmet: “Ma nistgħux nistennew li l-konverżjoni sempliċement isseħħ lil uliedna. Il-konverżjoni b’kumbinazzjoni mhijiex prinċipju tal-evanġelju ta’ Ġesù Kristu.”²⁴ L-imħabba tagħna u l-istediniet ispirati jistgħu jagħmlu differenza fil-mod kif it-tfal tagħna jużaw l-volontà tagħhom. Il-President Nelson enfasizza, “L-ebda xogħol ieħor ma jittraxxendi dak ta’ trobbija ġusta u intenzjonata!”²⁵

Konklużjoni

Ġenituri, din id-dinja hija mimlija filosofiji, kulturi, u ideat li jattiraw l-attenzjoni tat-tfal tagħna. Il-bini kbir u spazjuż jirreklama s-sħubija tiegħu kuljum billi juża l-aktar mezzi tal-midja attwali. “Imma fid-don ta’ Ibnu,” għallem il-profeta Moroni, “Alla ħejja triq iktar perfetta.”²⁶

Hekk kif aħna nissieħbu ma’ Alla permezz ta’ patti u nsiru l-aġenti Tiegħu fil-kura ta’ wliedna, Hu se jqaddes l-intenzjonijiet tagħna, jispira t-tagħlim tagħna, u jsaħħah l-istediniet tagħna sabiex “uliedna jkunu jafu lejn liema sors għandhom iħarsu għall-maħfra ta’ dnubiethom.”²⁷ F’isem Ġesù Kristu, ammen.