Nithennew bir-Rigal tal-Imfietaħ tas-Saċerdozju

Mill-President Russell M. Nelson

Il-President tal-Knisja ta’ Ġesù Kristu tal-Qaddisin tal-Aħħar Żmien

L-imfietaħ tas-saċerdozju jiggvernaw kif is-saċerdozju ta’ Alla jista’ jintuża biex iġib fis-seħħ l-għanijiet tal-Mulej u jbierek lil dawk kollha li jaċċettaw l-evanġelju rrestawrat.

Għeżież ħuti, illum huwa jum storiku għall-President Dallin H. Oaks u għalija. Kien sewwasew 40 sena ilu, nhar is-7 ta’ April, 1984 li aħna ġejna sostnuti għall-Kworum tat-Tnax-il Appostlu.¹ Aħna ilna nithennew f’kull konferenza ġenerali minn dakinhar, fosthom din. Aħna għal darb’oħra ġejna mberkin b’abbundanza sagra tal-Ispirtu. Nittama li intom tistudjaw ripetutament il-messaġġi ta’ din il-konferenza fix-xhur li ġejjin.

Meta twelidt jien,² kien hemm sitt tempji jiffunzjonaw fil-Knisja—wieħed f’St. George, Logan, Manti, u l-Belt ta’ Salt Lake, Utah; kif ukoll f’Cardston, Alberta, l-Kanada; u f’Laie, il-Ħawajj. Żewġ tempji li kien hemm qabel kienu qed jiffunzjonaw għal ftit żmien ġewwa Kirtland, Ohio, u Nauvoo, Illinois. Hekk kif il-Knisja bħala grupp resqet lejn il-punent, il-Qaddisin ġew imġiegħla jħallu warajhom dawk iż-żewġ tempji.

It-Tempju ta’ Nauvoo inqered meta xi ħadd tah in-nar. Huwa reġa’ nbena u mbagħad ġie ddedikat mill-President Gordon B. Hinckley.³ It-Tempju ta’ Kirtland ġie profanat mill-għedewwa tal-Knisja. Aktar tard it-Tempju ta’ Kirtland spiċċa f’idejn il-Community of Christ, li issa ilu għandha għal diversi snin.

Ix-xahar li għadda, aħna ħabbarna li Il-Knisja ta’ Ġesù Kristu tal-Qaddisin tal-Aħħar Żmien xtrat it-Tempju ta’ Kirtland, flimkien ma’ diversi siti storiċi u sinifikanti ġewwa Nauvoo. Aħna napprezzaw immens id-diskussjonijiet kordjali u ta’ benefiċċju għaż-żewġ naħat li kellna mal-mexxejja tal-Community of Christ li wasslu għal dan il-qbil.

It-Tempju ta’ Kirtland għandu sinifikat mhux tas-soltu fir-Restawrazzjoni tal-evanġelju ta’ Ġesù Kristu. Bosta avvenimenti li seħħew fih kienu ilhom jiġu mħabbra eluf ta’ snin u kienu essenzjali għall-Knisja rrestawrata tal-Mulej biex iġġib fis-seħħ il-missjoni tagħha tal-aħħar żmien.

L-aktar ġrajja importanti fost dawn il-ġrajjiet seħħet nhar il-Ħadd, 3 ta’ April, 1836.⁴ Dakinhar, Joseph Smith u Oliver Cowdery esperjenzaw għadd ta’ dehriet meraviljużi. L-ewwel deher il-Mulej Ġesù Kristu. Il-Profeta kiteb li għajnejn is-Salvatur “kienu qishom fjamma nar; ix-xagħar ta’ rasu kien abjad bħas-silġ verġni; il-dehra ta’ wiċċu kienet tiddi aktar mid-dija tax-xemx; u leħnu kien jixbah il-ħoss tat-tgargir tal-ilmijiet qawwija.”⁵

Waqt dik iż-żjara, il-Mulej afferma l-identità tiegħu. Huwa qal, “Jiena l-ewwel u l-aħħar, jiena dak li ngħix, jiena dak li ġie maqtul; jiena l-avukat tagħkom mal-Missier.”⁶

Ġesù Kristu mbagħad iddikjara li Huwa aċċetta t-tempju bħala id-dar tiegħu house u għamel din il-wegħda tal-għaġeb: “Jien se nuri lili nnifsi fil-ħniena lill-poplu tiegħi f’din id-dar.”⁷

Din il-wegħda sinifikanti tapplika llum għal kull tempju ddedikat. Nistedinkom biex tixtarru dwa xi tfisser il-wegħda tal-Mulej għalikom personalment.

Wara d-dehra tas-Salvatur, deher Mosè. Mosè ta lil Joseph Smith l-imfietaħ tal-ġabra ta’ Iżrael u r-ritorn tal-għaxar tribujiet.⁸

Meta ntemment din id-dehra, “deher Elijas, u ħalla f’idejn Joseph d-dispensazzjoni tal-evanġelju ta’ Abraham”.⁹

Imbagħad deher Elija l-profeta. Id-dehra tiegħu ġabet fis-seħħ il-wegħda ta’ Malakija li qabel it-Tieni Miġja, il-Mulej se jibgħat lil Elija biex “idawwar qalb il-missirijiet lejn uliedhom u qalb l-ulied lejn missirijiethom.”¹⁰ Elija ta l-imfietaħ tal-qawwa tas-siġill lil Joseph Smith.¹¹

Is-sinifikat ta’ dawn l-imfietaħ li nġabu lura fid-dinja minn tliet messaġġiera mis-smewwiet taħt id-direzzjoni tal-Mulej ma nistgħux nenfasizzawh biżżejjed. L-imfietaħ tas-saċerdozju jikkonstitwixxu l-awtorità u l-qawwa tal-presidenza. L-imfietaħ tas-saċerdozju jiggvernaw kif is-saċerdozju ta’ Alla jista’ jintuża biex iġib fis-seħħ l-għanijiet tal-Mulej u jbierek lil dawk kollha li jaċċettaw l-evanġelju rrestawrat ta’ Ġesù Kristu.

Importanti ninnotaw li qabel l-organizzazzjoni tal-Knisja, il-messaġġiera mis-smewwiet taw is-Saċerdozju ta’ Aron u ta’ Melkisedek lill-Profeta Joseph u tawh l-imfietaħ taż-żewġ saċerdozji.¹² Dawn l-imfietaħ taw lil Joseph Smith l-awtorità li jorganizza l-Knisja fl-1830.¹³

Imbagħad fit-Tempju ta’ Kirtland fl-1836, l-għotja ta’ dawn l-imfietaħ addizzjonali tas-saċerdozju—jiġifieri, l-imfietaħ tal-ġabra ta’ Iżrael, l-imfietaħ tal-evanġelju ta’ Abraham, u l-imfietaħ tal-qawwa tas-siġill—kienet mill-aktar essenzjali. Dawn l-imfietaħ awtorizzaw lil Joseph Smith li seta’—u lill-President kollha tal-Knisja tal-Mulej li ġew warajh—jiġbor flimkien lil Iżrael fuq iż-żewġ naħat tal-velu, ibierek lill-ulied kollha tal-patt bil-barkiet ta’ Abraham, ipoġġi siġill li jirratifika fuq l-ordinanzi u l-patti tas-saċerdozju, u jissiġilla l-familji għal dejjem. Il-qawwa ta’ dawn l-imfietaħ tas-saċerdozju hija infinita u mill-isbaħ.

Ikkunsidraw kemm kienet tkun differenti il-ħajja tagħkom li kieku l-imfietaħ tas-saċerdozju ma ġewx irrestawrati fid-dinja.¹⁴ Mingħajr l-imfietaħ tas-saċerdozju, intom ma kontux tkunu tistgħu tiġu ddotati bil-qawwa ta’ Alla.¹⁵ Mingħajr l-imfietaħ tas-saċerdozju, il-Knisja setgħet isservi biss bħala organizzazzjoni ta’ tagħlim u umanitarja u xejn aktar. Mingħajr l-imfietaħ tas-saċerdozju, ħadd minna ma kien ikollu aċċess għall-ordinanzi u l-patti essenzjali li jorbtuna mal-maħbubin tagħna għal dejjem u jagħtuna ċ-ċans li eventwalment ngħixu ma’ Alla.

L-imfietaħ tas-saċerdozju jiddistingwu l-Knisja ta’ Ġesù Kristu tal-Qaddisin tal-Aħħar Żmien minn xi organizzazzjoni oħra fid-dinja. Ħafna organizzazzjonijiet oħra jistgħu u fil-fatt itejbu l-ħajja tagħkom f’din il-ħajja mortali. Iżda l-ebda organizzazzjoni ma tista’ u ma se tinfluwenza ħajjitkom wara l-mewt.¹⁶

L-imfietaħ tas-saċerdozju jagħtuna l-awtorità li nestendu l-barkiet kollha mwiegħda lil Abraham lil kull raġel u mara li jħarsu l-patti tagħhom. Il-ħidma tat-tempju tagħmel dawn il-barkiet eskwiżiti disponibbli għall-ulied kollha ta’ Alla, irrispettivament fejn jew meta għexu, jew fejn jinsabu jgħixu bħalissa. Ejjew nithennew li l-imfietaħ tas-saċerdozju jinsabu għal darb’oħra fid-dinja!

Nistedinkom tikkunsidraw bir-reqqa dawn it-tliet dikjarazzjonijiet li ġejjin:

Il-ġabra ta’ Iżrael hija evidenza li Alla jħobb lil uliedu kollha ma’ kullimkien.
L-evanġelju ta’ Abraham huwa evidenza oħra li Alla jħobb lil uliedu kollha ma’ kullimkien. Huwa jistieden lil kulħadd biex jersaq lejn—“iswed jew abjad, ilsir jew ħieles, maskil jew femminil; … kulħadd l-istess għal Alla.”¹⁷
Il-qawwa tas-siġill hija evidenza divina ta’ kemm Alla jħobb lil uliedu kollha ma’ kullimkien u jrid li kull wieħed u waħda minnhom jerġgħu lura għandu.

L-imfietaħ tas-saċerdozju rrestawrati permezz tal-Profeta Joseph Smith jagħmluha possibbli biex kull raġel u mara li jħarsu l-patti jgawdu ċerti privileġġi spiritwali personali u inkredibbli. Hawn ukoll hawn ħafna x’nitgħallmu mill-istorja sagra tat-Tempju ta’ Kirtland.

It-talba dedikatorja li Joseph Smith talab fit-Tempju ta’ Kirtland hiija lezzjoni dwar kif it-tempju jqawwi spiritwalment lilkom u lili biex niffaċċjaw l-isfidi tal-ħajja f’dawn l-aħħar żminijiet. Inħeġġiġkom biex tistudjaw dik it-talba kif insibuha f’ Duttrina u Patti sezzjoni 109. Dik it-talba dedikatorja, li ngħatat permezz ta’ rivelazzjoni, tgħallimna li t-tempju huwa “dar ta’ talb, dar ta’ sawm, dar ta’ fidi, dar ta’ tagħlim, dar ta’ glorja, dar ta’ ordni, dar ta’ Alla.”¹⁸

Din il-lista ta’ kwalitajiet hija ferm aktar minn deskrizzjoni ta’ tempju. Hija wegħda dwar x’jiġri lil dawk li jservu u jqimu fid-dar tal-Mulej. Huma jistgħu jistennew li jirċievu tweġiba għal talbhom, rivelazzjoni personali, aktar fidi, abbiltà, u faraġ, għarfien akbar u qawwa akbar.

Il-ħin li tqattgħu fit-tempju jgħinkom taħsbu b’mod ċelestjali u tagħrfu min intom verament, x’tistgħu ssiru, u t-tip ta’ ħajja li jista’ jkollkom għal dejjem. Il-qima regolari fit-tempju ttejjeb il-mod kif tħarsu lejhom infuskom u kif issibu postkom fil-pjan meraviljuż ta’ Alla. Jiena nwegħidkom dan.

Aħna ġejna mwiegħda wkoll li fit-tempju aħna nistgħu “nirċievu milja tal-Ispirtu s-Santu.”¹⁹ Immaġinaw xi tfisser dik il-wegħda f’termini ta’ li jkollkom is-smewwiet miftuħin jekk intom tfittxu bis-serjetà l-verità eterna.

Aħna ġejna mgħallma li dawk kollha li jqimu fit-tempju jkollhom il-qawwa ta’ Alla u l-anġli “jieħdu ħsiebhom.”²⁰ Kemm tħossukom tikbru fil-kunfidenza li tkunu tafu li, bħala nisa u rġiel iddotati bil-qawwa ta’ Alla, m’għandkomx għalfejn tiffaċċjaw din il-ħajja weħidkom? Kemm timtlew bil-kuraġġ li tkunu tafu li l-anġli verament se jkunu lesti biex jgħinukom?

Finalment, aħna ġejna mwiegħda li “l-ebda kombinazzjoni ta’ ħażen” mhi sejra tirrenja fuq dawk li jqimu fid-dar tal-Mulej.²¹

Li nifhmu l-privileġġi spiritwali li jsiru possibbli fit-tempju huwa importanti ferm għalina llum.

Għeżież ħuti, din hi l-wegħda tiegħi. Xejn ma jgħinkom aktar biex tibqgħu żżommu sod mal-bastun tal-ħadid²² milli tqimu regolarment fit-tempju kif jippermettu ċ-ċirkustanzi tagħkom. Xejn ma jipproteġikom aktar hekk kif tħabbtu wiċċkom maċ-ċpar tad-dlam tad-dinja. Xejn ma jsaħħaħ aktar it-testimonjanza tagħkom tal-Mulej Ġesù Kristu u l-Espjazzjoni tiegħu jew jgħinkom tifhmu aktar, il-pjan meraviljuż ta’ Alla. Xejn ma jikkalma l-ispirtu tagħkom aktar f’mumenti diffiċli. Xejn ma jiftaħ is-smewwiet aktar. Xejn!

It-tempju huwa l-bieb li jwassalna għall-akbar barkiet li Alla għandu lest għal kull wieħed u waħda minna, għax it-tempju huwa l-uniku post fid-dinja fejn nistgħu nirċievu l-barkiet kollha mwiegħda lil Abraham.²³ Huwa għalhekk li aħna qed nagħmlu dak kollu li nistgħu, taħt id-direzzjoni tal-Mulej, biex il-barkiet tat-tempju jkunu aktar aċċessibbli għall-membri tal-Knisja. B’hekk, aħna bi pjaċir se nħabbru li qed nippjanaw li nibnu tempju ġdid f’kull wieħed minn dawn il-15-il post:

Uturoa, Poleżja Franċiża
Chihuahua, il-Messiku
Florianópolis, il-Brażil
Rosario, l-Arġentina
Edinburgh, l-Iskozja
Brisbane, Awstralja Reġjun tas-Sud
Victoria, British Columbia
Yuma, Arizona
Houston, Texas Reġjun tas-Sud
Des Moines, Iowa
Cincinnati, Ohio
Honolulu, Il-Ħawaj
Ġordan tal-Punent, Utah
Leħi, Utah
Maracaibo, il-Venezwela

Għeżież ħuti, jiena nixhed li din hija Il-Knisja ta’ Ġesù Kristu tal-Qaddisin tal-Aħħar Żmien. Hu jinsab imexxiha. Aħna d-dixxipli tiegħu.

Ejjew nithennew minħabba r-restawrazzjoni tal-imfietaħ tas-saċerdozju li għamluha possibbli għalikom u għalija li ngawdu kull barka spiritwali li aħna lesti u denji li nirċievu. Jiena nixhed dan fl-isem sagru ta’ Ġesù Kristu, ammen.