Fidili sat-Tmiem

Minn Sister Andrea Muñoz Spannaus

It-Tieni Kunsillier fil-Presidenza Ġenerali tat-Tfajliet

Bil-qawwa ta’ idu, intom tkunu tistgħu tegħlbu lil kull Gulija li jidher f’ħajjitkom.

Għeżież ħbieb żgħażagħ, illum nixtieq ikellimkom direttament—lilkom iż-żgħażagħ tal-Knisja.

Ilna sena minn meta ġiet imsejħa l-Presidenza Ġenerali tagħna tal-Tfajliet. Kemm ġraw affaijiet f’din l-aħħar sena!

Aħna ltqajna ma ħafna minnkom u studjajna t-tagħlim ta’ Ġesù Kristu flimkien. Aħna kantajna l-għanjiet, għamilna ħbieb ġodda, u servejna magħkom fil-komunitajiet. Aħna ssaħħaħna meta smajna t-testimonjanzi tagħkom waqt il-konferenzi taż-żgħażagħ u l-avvenimenti dinjin. U tajna qima flimkien fid-dar tal-Mulej.

Kull darba, aħna qsamna messaġġ minn Sidna Ġesù Kristu. Illejla mhux se tkun differenti; jien għandi messaġġ għalikom, iż-żgħażagħ tal-Knisja ta’ Ġesù Kristu.

Il-Mistoqsijiet il-Kbar

Qatt ħsibtu kif tistgħu tkunu fidili lejn Alla waqt li tgħixu f’dinja ta’ dnub? Minfejn iġġibu l-qawwa li timxu ’l quddiem u tkomplu tagħmlu t-tajjeb? Kif tistgħu tesperjenzaw il-vera hena?

Naħseb li l-esperjenza ta’ David u Gulija¹ tista’ tgħinkom.

David u Gulija

Fit-Testment il-Qadim, l-armata tal-Filistin kienet tinsab f’battalja mal-Iżraelin, u kull filgħodu u kull filgħaxija, ġgant Filistin jismu Gulija kien jisfida lill-Iżraelin għall-ġlied.

Fost il-poplu Iżraelit kien jgħix wieħed jismu David, ragħaj żagħżugħ ta’ statura ferm iżgħar minn Gulija iżda b’fidi ġganteska f’Ġesù Kristu! David offra li jiġġilidlu. Anke s-Sultan ipprova jipperswadih biex ma jagħmilx dan, iżda David għażel li jafda f’Ġesù Kristu.

Qabel, David kien iġġieled iljun, u ors ukoll. Mill-esperjenza tiegħu, hu kien jaf li Alla kien ipproteġieh u ħarġu rebbieħ. Għal David, il- kawża ta’ Alla kienet l-aktar kawża importanti. Għalhekk, kollu fidi f’Alla li ma kienx se jabbandunah, huwa ġabar ħames ġebliet lixxi, ħa f’idejh l-iżbandola tiegħu, u mar jiffaċċja lill-ġgant.

L-iskrittura tgħidilna li l-ewwel ġebla li xeħet David laqtet lil Gulija f’moħħu, u qatlitu.²

Infittxu t-Tweġiba

Għalkemm David uża biss ġebla waħda biex joqtol lil Gulija, huwa mar preparat b’ħamsa. B’ħamsa! Dan iwassalni biex naħseb dwar kif jien nista’ nħejji lili nnifsi biex niffaċċja d-dinja.

Xi ngħidu jekk kull ġebla ta’ David tirrappreżenta xi qawwa li aħna neħtieġu biex noħorġu rebbieħa f’ħajjitna? Kieku xi jkunu dawn il-ħames ġebliet? Jiena ħsibt dwar dawn il-possibiltajiet:

Il-ġebla ta’ mħabbti lejn Alla.
Il-ġebla tal- fidi tiegħi fis-Salvatur tagħna, Ġesù Kristu.
Il-ġebla tal- għarfien tal-vera identità tiegħi.
Il-ġebla tal- indiema tiegħi ta’ kuljum.
Il-ġebla tal- aċċess tiegħi għall-qawwa ta’ Alla.

Ejjew nitkellmu dwar kif aħna mberkin permezz ta’ dawn il-qawwiet.

L-ewwel, il-ġebla ta’ mħabbti lejn Alla. Li nħobbu lil Alla huwa l-akbar kmandament.³ Il-gwida Għas-Sodizza taż-Żgħażagħ tgħallimna: “Alla jħobbkom. Huwa missierkom. L-imħabba perfetta tiegħu tista’ tispirakom biex tħobbuh. Meta l-imħabba tagħkom lejn Missierna fis-Smewwiet hija l-aktar influwenza importanti f’ħajjitkom, ħafna deċiżjonijiet isiru aktar faċli.”⁴

L-imħabba tagħna għal Alla u r-relazzjoni mill-viċin tagħna miegħu jagħtuna l-qawwa li neħtieġu biex nittrasformaw qalbna u b’mod aktar faċli negħlbu l-isfidi tagħna.

It-tieni, il-ġebla tal- fidi tiegħi fis-Salvatur tagħna, Ġesù Kristu. Meta Ġesù Kristu ġie fid-dinja, Huwa bata għal dnubietna,⁵ u ħa fuqu nnifsu n-niket tagħna, l-uġigħ tagħna, id-dgħufijiet tagħna, u l-mard fiżiku u mentali tagħna. Għalhekk jaf kif għandu jgħinna. Li jkollna l-fidi f’Ġesù Kristu jfisser li nafdaw kompletament fl-għerf tiegħu, fl-orarju tiegħu, fl-imħabba tiegħu, u fil-qawwa tiegħu li jpatti għal dnubietna. Il-ġebla tal-fidi f’Ġesù Kristu tasal biex tegħleb kull “ġgant” f’ħajjitna.⁶ Aħna nistgħu negħlbu lil din id-dinja mitlufa għaliex Huwa għelibha qabilna.⁷

Numru tlieta, il-ġebla tal- għarfien tal-vera identità tiegħi. Il-maħbub profeta tagħna, il-President Russell M. Nelson, għallimna li l-aktar identitajiet importanti tagħna huma li aħna wlied Alla, ulied il-patt, u dixxipli ta’ Ġesù Kristu.⁸

Kollox jieħu tifsira differenti meta jiena nkun naf min jien verament.⁹ Meta jien niddubita l-abbiltajiet tiegħi, jien spiss intenni f’moħħi jew b’leħen għoli, Jiena bint Alla, jiena bint Alla,” kemm ikun hemm bżonn possibli sakemm nerġa’ nħossni kunfidenti li nkompli għaddejja.

Ir-raba, il-ġebla tal- indiema tiegħi ta’ kuljum. Fil-gwida Għas-Sodizza taż-Żgħażagħ naqraw: “L-indiema mhijiex kastig għad-dnub; hija l-mod kif is-Salvatur jeħlisna mid-dnub. Li nindmu jfisser li ninbidlu―li nitbiegħdu mid-dnub u nersqu viċin Alla. Ifisser li ninbidlu għall-aħjar u nirċievu l-maħfra. Din it-tip ta’ bidla mhijiex xi avveniment ta’ darba; hija proċess kontinwu.”¹⁰

M’hemm xejn li jista’ jeħlisna aktar milli nħossu l-maħfra ta’ Alla u li nkunu nafu li aħna nodfa u rrekonċiljati miegħu. Il-maħfra hi possibbli għal kulħadd.

Il-ħames ġebla hija l-ġebla tal- aċċess tiegħi għall-qawwa ta’ Alla. Il-patti li nagħmlu ma’ Alla, bħal dawk li nagħmlu fl-ordinanza tal-magħmudija, jagħtuna aċċess għall-qawwa tad-divinità.¹¹ Il-qawwa ta’ Alla hija qawwa reali li tgħinna niffaċċjaw l-isfidi, nieħdu deċiżjonijiet tajbin, u nkabbru l-kapaċità tagħna li nikkumbattu sitwazzjonijiet diffiċli. Hija qawwa li permezz tagħha nistgħu nikbru f’abbiltajiet speċifiċi li neħtieġu.¹²

Il-gwida Għas-Sodizza taż-Żgħażagħ tispjega: “II-patti jorbtukom ma’ Missierkom fis-Smewwiet u mas-Salvatur. Huma jkabbru l-qawwa ta’ Alla f’ħajjitkom.”¹³

Ejjew nitkellmu dwar ir-rabta. Tiftakru meta Kristu għallem dwar id-differenza bejn dar mibnija fuq il-blat u oħra fuq ir-ramel?¹⁴ Il-Presbiteru Dieter F. Uchtdorf spjega: “Dar ma tiġġarrafx filmaltemp għax id-dar hija b’saħħitha. Lanqas ma tiġġarraf għax sempliċiment il-blat huwa b’saħħtu. Id-dar ma tiġġarrafx fil-maltemp għax hijamqiegħda sew f’dak il-blat b’saħħtu. Hija l-qawwa tar- rabta mal-blat li hija importanti.”¹⁵

Ir-rabta personali tagħna ma’ Ġesù Kristu tagħtina l-kuraġġ u l-kunfidenza biex nimxu ’l quddiem minkejja n-nies li ma jirrispettawx it-twemmin tagħna jew li jgħadduna biż-żmien. Kristu jistedinna biex inżommuh fi ħsibijietna l-ħin kollu; Huwa jgħidilna, “Ħarsu lejja f’kull ħsieb.”¹⁶ Li naħsbu dwar is-Salvatur jagħtina ċarezza fil-moħħ biex nieħdu deċiżjonijiet u naġixxu bla biża’, u ngħidu le għal dak li huwa kontra t-tagħlim ta’ Alla.¹⁷ Meta l-jum ikun diffiċli u nħossni li ma niflaħx aktar, li naħseb fi Kristu jġibli l-paċi u jagħtini t-tama.

Kif nistgħu ngawdu minn din il-qawwa ta’ Ġesù Kristu? Importanti ħafna li nobdu l-patti tagħna u nkabbru l-fidi tagħna f’Ġesù Kristu.

Fil-fatt nixtieq li David kellu ġebla oħra; dik kienet tkun il-ġebla tat- testimonjanza tiegħi. It-testimonjanza tagħna tinbena permezz ta’ esperjenzi spiritwali personali li fihom nagħrfu l-influwenza divina f’ħajjitna.¹⁸ Ħadd ma jista’ joħdilna dak l-għarfien. Li nafu dak li nafu għax għexna l-esperjenzi spiritwali hija ħaġa imprezzabbli. Li nkunu leali lejn dak l-għarfien jagħtina l-ħelsien. Jagħtina l-hena! Jekk aħna nħobbu l-verità, aħna nfittxuha, u ladarba nsibuha, niddefenduha.¹⁹

Stedina

L-istess kif jiena għażilt ġebla numru sitta, nistedinkom biex tiltaqgħu mal-klassi, mal-kworum, jew mal-familja tagħkom, u taħsbu ftit dwar qawwiet oħra li teħtieġu li tiksbu biex tibqgħu fidili lejn Alla u, għalhekk, tegħlbu d-dinja.

Wegħda

Għeżież ħbieb tiegħi, Kristu jinsab ħerqan biex jakkumpanjakom fil-vjaġġ ta’ ħajjitkom. Inwegħidkom, hekk kif iżżommu sod mal-bastun tal-ħadid, intom timxu id f’id ma’ Ġesù Kristu.²⁰ Hu jkun qed jiggwidakom, u Hu jkun qed jgħallimkom.²¹ Bil-qawwa ta’ idu intom tkunu tistgħu tegħlbu lil kull Gulija li jidher f’ħajjitkom.

Testimonjanza

Nixhed li aħna nesperjenzaw l-hena meta nitolbu kull jum, meta naqraw il-Ktieb ta’ Mormon, meta nieħdu sehem fis-sagrament kull nhar ta’ Ħadd, u meta nattendu s-seminarju—anke daqstant kmieni filgħodu! Nesperjenzaw l-hena meta nagħmlu t-tajjeb.

Nesperjenzaw l-hena meta nkunu fidili lejn l-Alla tal-univers, is-Salvatur tad-dinja, is-Sultan tas-slaten. Nesperjenzaw l-hena meta nkunu dixxipli ta’ Ġesù Kristu.

Alla huwa Missierna. Huwa jaf ix-xewqat ta’ qalbkom u l-possibbiltajiet tagħkom, u Hu jafdakom.

Għeżież żgħażagħ, Ġesù Kristu żgur jgħinkom tibqgħu fidili sat-tmiem. Dwar dawn il-veritajiet jiena nixhed f’isem Ġesu Kristu, ammen.