O Se Tagata Asiasi Mai i le Kerisimasi
“Ua faatumuina a’u i le mafanafana, ou te matua olioli tele lava” (2 Korinito 7:4).
E faavae i se tala moni
“Faamolemole, Tina, e mafai ona tatou toe valaaulia tasi lava Tuafafine Fuhriman?“ na augani mai ai Keleti. O foliga naunautai o ona uso laiti ifo ua tau fai falō mai tua o Keleti i se laina e tasi e pei o ni pine tautau lavalava i luga o le fata e tautau ai peleue.
“O le a oo mai le Aso a o Lumanai le Kerisimasi, ma e le tatau ona nofo na o ia,” o le fai mai lea a Laine. Na lue mai ulu o Sikoti ma Simi.
“Ua outou iloa ua faafia ona tatou taumafai e valaaulia Tuafafine Fuhriman i lo tatou fale,” o le fai mai lea a Tina. “E seāseā lava alu o ia i se mea. Ae e mafai ona outou valaaulia o ia mo le Aso a o Lumanai le Kerisimasi pe afai tou te mananao ai.”
Na fiafia le aualii ma osooso solo i fafo.
E le’i umi ae toe matala mai le faitotoa. “O se vavega, Tina!” o le valaau lea a Keleti. “Fai mai lana tala e fiafia o ia e sau. O se mea manaia tele, a ea?”
O le aso na sosoo ai na amata ona toulu ai le kiona. Na iloa e Keleti e le manao Tuafafine Fuhriman e alu i fafo i le taimi leaga o le tau, e oo lava i le alu i le pusa meli. “E te manatu o le a sau pea o ia taeao?” o le fesili lea a Keleti. Sa le mautinoa e Tina.
I le afiafi o le Kerisimasi, na taunuu mai ai le uso o lo’u tina o Karolaine ma lana fanau e toatolu ae uma loa le faamamaina e Laine o le umukuka ina ua uma le matou meaai o le afiafi. “E mafai ona matou o loa nei e aami Tuafafine Fuhriman?” na fesili atu ai Laine.
“Ia ua lelei,” o le fai mai lea a Tama. “Ia tautuana e fesoasoani ia te ia pe a outou savavali mai i le auala. Ua maseesee fafo.”
“Ia ua lelei, Tama,” o le fai atu lea a Sikoti.
“Ma afai e toe sui lona mafaufau e le fia sau, aua lua te faia se mea e maua ai e ia se lagona faanoanoa ona ua le sau,” o le fai atu lea a Tama.
“Ua lelei, Tama,” na faapea atu ai Keleti. Na laa atu i fafo tama i le fanua ua ufitia atoa i le kiona. Ua le o toe toulu le kiona, ma o loo i ai lava sina malamalama o le aso latou te iloa ai le auala.
O le alii e valu tausaga le matua o Atamu sa fesoasoani ia Peka ma Tia e faamaulu a la teuga mo le faaaliga a le aiga o le Kerisimasi ae maulu mai loa tama i le faitotoa—o loo fesoasoani ia Tuafafine Fuhriman e sau i totonu! Na ataata fiafia o ia, o ona alafau ua mumu uma i le malulu. Na taumafai le aiga ina ia aua nei soona faailoaina atu so latou tulaga faateia tele ona ua taunuu moni lava ona sau la latou malo faaaloalogia.
Na faafeiloai aloaia e Tama ia Tuafafine Fuhriman ina ia maua e ia le lagona fiafia ma fesoasoani atu ia te ia e filifilia lona nofoa e faanofo ai i tafatafa o Tina. Na tatala ese le ofu talaloa o Keleti ma nofo loa i le piano. Ina ua uma le tatalo amata, ona tata lemu ai lea o viiga o le Kerisimasi. Na faitau e Sikoti le Tusi Paia a o faatino mai e tamaiti laiti taga o le tala o le Kerisimasi muamua lava. A o ia faia se ofu taele talaloa, na faatino ai ma le migao e le tamaitai tolu tausaga le matua o Peka le vaega a Maria ae fai e Tanu le vaega a Iosefa. Na faia e Tia le vaega a le agelu ma se pale auro o fugalaau ua faapine i lona lauulu. O tausoga na fai e i latou le vaega a leoleo mamoe ma le Au Makoi, na o atu uma lava e ifo i le Tupu pepe meamea.
E le’i umi ae mou atu le tatagi a le “Po Filemu,” a ua tuu avanoa foi le migao sa i ai i le taimi o le tala paia sa faatino i fusifusiga, foliga fiafia, ma le faamalo i le fale atoa. I le faamaeaina o le po, na latou fiafia ai i pani taaiai na saunia e Tina. E le’i umi lava ae maea le afiafi.
Na toe faamaulu ofu talaloa mafanafana o tama, pulou, ma totini lima e toe o atu e momoli Tuafafine Fuhriman i le isi itu o le auala. O le malamalama o le susulu o le moli o le polotito na suluia ai le auala i le pogisa, ua manaia ai la latou savaliga i le isi itu o le auala ua ufitia uma e le kiona e ui ina malulu.
“Manuia le po, Tuafafine Fuhriman,” o le valaau atu lea a Keleti a o faliu o ia ma ona uso e toe foi e agai atu i lo latou fale.
“Manuia le Kerisimasi,” o le valaau mai lea a Tuafafine Fuhriman. “Ma faafetai tele lava.”
Na faasepasepa mata atu Keleti i lona tauau ae le’i laa atu o ia i totonu o le fale. O la e tu mai lava Tuafafine Fuhriman i lona polotito, ma vaavaai mai. Na ia talotalo mai.
* * *
Na tuanai ni nai masina, ma na siitia le nofoaga o le aiga i se isi taulaga. I le masina o Tesema na sosoo ai, na sau ai Keleti i totonu o le fale ma aumai se teutusi. “Ua maua se tatou tusi mai ia Tuafafine Fuhriman,” o lana valaau lea. Na ia tatalaina ma faitau:
“O le a ou misia le tou aiga i lenei Kerisimasi. Ou te talitonu ou te le’i tauina atu lo’u fiafia tele e fai afiafi o le Kerisimasi ma lo outou aiga. E tatau ona ou ta’uina atu nei mea ou te le’i tauina atu muamua i lena taimi.
“I nisi o tausaga ae tou te le’i malaga mai e nonofo i le fale o loo faafesagai ma a’u i le isi itu o le auala, na ou faia ai se miti. Na ou vaaia le tou fale ua mumu uma moli ma ua malamalama lava. Ina ua ou ala a’e mai lena miti, na ou maua se lagona sili ona matagofie, fiafia, ma le toafilemu— o se mea e le tupu soo talu ona maliu lo’u toalua.
“Ua tuanai atu masina, ma ua galo ia te a’u la’u miti. Ona maua mai lea o la outou valaaulia mo le Aso a o Lumanai le Kerisimasi. Na ou maua se taimi manaia tele lava i le fetufaai ai lea ma outou i le taimi o a outou faafiafiaga faaleaiga.
“Ina ua uma ona toe momoli mai a’u e tamaiti i lo’u fale, na ou tutu i lo’u polotito ina ia mautinoa ua toe foi saogalemu atu i latou i le fale. O le taimi lena na ou matauina ai lo outou fale ua malamalama lava. O le ata lava lena e tasi na ou vaaia i la’u miti i tausaga ua leva, ma na ou maua foi lena lava lagona e tasi o le toafilemu. Ou te manao ia outou iloa lou faafetaia o outou.”
A o faitauina e Keleti upu a Tuafafine Fuhriman, na ia manatua le mafanafana na ia lagona i lena po. Na ia lagona le faafetai ina ua fetufaai lona aiga ma Tuafafine Fuhriman i a latou faafiafiaga, ua aumaia ai ia te ia le mafanafana ma le olioli o le Kerisimasi.
“O le Kerisimasi e sili atu nai lo na o laau ma moli emoemo… . O le filemu.”
Peresitene Gordon B. Hinckley, “O se Vaitau Mo le Faafetai,” Liahona, Tes. 1997, 6.