MANATU MO AFIAFI FAALEAIGA

O nei fautuaga faaleaoaoga e mafai ona faaaoga i potuaoga faapea foi i le aiga. E mafai ona e fetuunaia nei manatu ina ia fetaui i lou aiga po o lau vasega.

“Sailia o le Faatuatua i le Alii o Iesu Keriso,” i. 12: Faitau nisi o mau na sii mai e Elder Robert D. Hales i lenei tusiga. Ia tuu atu foi i tagata taitoatasi o le aiga e mafaufau i se pese o le Kerisimasi lea e fesoasoani e faamalosia ai le faatuatua ia Iesu Keriso. Ia usu faatasi e le aiga se pese. Tuu atu i tagata o le aiga e fetufaai aoaoga o loo tuuina mai i nei mau ma pese e uiga i le Faaola.

“O Tusi o Talaaga a Iosefa Samita,” i. 32: Valaaulia tagata o le aiga ia talatalanoa pe fetufaai e uiga i se mea manaia na tupu i le vaiaso ua tuanai. Pe na latou tusia lena mea na tupu i a latou tusi o talaaga? Ina ia faamalamalama atu le taua o le tusia o tusi o talaaga, ia faitau le parakalafa lona lua mai le tusiga. Ia talanoaina mea eseese e mafai ona tusi i totonu o tusi o talaaga. Ia faamatala atu o a tatou tusi o talaaga e taua tele ia i tatou, o o tatou aiga, ma augatupulaga o le lumanai.

“O Se Perofeta i le Lalolagi,” i. 38: Faaali atu se ata o Peresitene Gordon B. Hinckley. Ia talanoaina pe aisea e taua ai le i ai o se perofeta i aso nei. A uma ona e faamatalaina atu le tala e uiga i le tamā o Jade, ona fetufaai lea ma tagata uma taitoatasi ia auala e mafai ai e le faatuatua i perofeta soifua ona faamalosia a tatou molimau o le talalelei.

“O Se Tagata Asiasi Mai i le Kerisimasi,” i. U10: Faitau le tala, ona fai atu lea i le aiga ina ia taitoatasi le tagata ma mafaufau i se tasi latou te lagona o loo manaomia se alofa faaopoopo. Mafaufau i auala e faaali atu ai lou manatu alofa ia i latou. Mo se faataitaiga, e mafai ona valaaulia i latou i se afiafi faaleaiga po o le saunia o se kata faapitoa mo i latou. Ia faatu faatasi se sini e le aiga ina ia aapa atu i se tasi o nei tagata i lenei vaiaso.

“O Le Sasi i le Koko Vevela,” i. U14: Amata i le faamatala atu e uiga i le faaiuga faigata na feagai ma Nikola. Tuu atu i tagata o le aiga ina ia mafaufau i ni mea faapea e ono feagai ma i latou. Ia auauai e faia ni tala faatino e faataitai ai le auala e taulima ai tulaga taitasi. E mafai ona faaiu i le iloiloina lea o folafolaga o le Upu o le Poto (tagai i le MFF 89:18–21).