O Se Kerisimasi e Manatuaina
E le’i atoa se lua tausaga talu ona ma faaipoipo ma lo’u toalua; na ma tausia se pepe fou faatoa fanau mai; ma, e pei lava o ulugalii a tamaiti aooga e tauivi lava, sa tau totogi a matou pili i sina seleni faatauvaa sa maua.
O le faauu mai le aoga faatoa fai i ni nai tausaga i le lumanai, ma sa matou taumafai ina ia maua se vaitau sili o le Kerisimasi. Na i ai isi a’u galuega le tumau, ma o lo’u toalua o Lisa e galue o ia o se failautusi. E le tele ni a matou tupe faasili, ae na matou maua lava le fiafia.
I ni nai masina a o lumanai le Kerisimasi, sa ou taufaamasani lava i aiga e le’i leva nei ona tofia a’u e fai ma o latou faiaoga o aiga. O le tasi o aiga na faapitoa lava lo latou tulaga ese ona o se faigata e le’i leva atu ona feagai ma i latou. E toalua se la fanau na maliliu i se faalavelave faafuasei lea foi na faataotolia ai le tama ae le’i malosi lelei, ma o le tina o loo mafatia o ia i se mai pipili ma ua faaletonu ai lona tino. E ui lava i nei luitau, ae sa tulagaese lava le lelei o lenei aiga, ma sa latou faia se faataitaiga e ala i le auala latou te mulimuli ai i poloaiga.
I le taimi o lau asiasiga faafaiaoga o aiga i le masina o Tesema, na ou matauina ai e leai sa latou laau Kerisimasi. Na momomo lo’u loto ona ou te iloa o le a faanoanoa le la fanau. I lo’u iloaina o o latou tauiviga faaletino, faaleagaga, ma faaletupe, na tonu ai ia i ma’ua ma lo’u toalua e faia se mea mo i latou.
Na lava le ma tupe na teu e faatau ai se laau Kerisimasi, o lea na tonu ai ma te o i le Aso a o Lumanai le Kerisimasi, e faatau le laau aupito i tele e mafai ona gafatia e le ma tupe o loo i ai, afifi faameaalofa, ma tuu ai i le fale o le aiga lenei e aunoa ma lo latou iloaina po o ai na avatu ai. O le mea e lelei ai, e leai ma se isi na i ai i lo latou fale i le taimi na ma tuuina ai le laau. Ina ua ma toe foi atu i lo matou aiga ina ua mavae lena, na ma tulimataia le olioli o le a mafai ona latou lagona pe a latou toe foi atu i le fale ma maua ai se laau Kerisimasi o loo faatalitali mai mo i latou. O lea tamai osigataulaga laitiiti na faaopoopoina mai ai se agaga o le filemu ma le olioli ou te le’i lagonaina muamua i o maua aso malolo o le Kerisimasi.
Ina ua ma taunuu i lo ma fale o loo ma mautotogi ai, na i ai foi se meaalofa na faateia ai foi i maua o loo faatalitali mai i fafo o le faitotoa: o se laau Kerisimasi ua matagofie lona teuteuina lelei! Na tagi lo’u toalua a o ia vaavaai atu i lena meaalofa o le alofa ua foai mai mo i maua e le iloa po o ai na aumai ai i le taimi o le le lava o le faasoa i mea tau tupe.
Na ma iloa mulimuli ane o lenei meaalofa na tuuina mai ia i maua e le aiga lava lea e tasi na ma faameaalofa i ai le ma laau. E ui lava i o latou taimi faigata, ae na saili lava lenei aiga ina ia faamanuiaina isi. Na faatumulia o ma loto i le agaga moni o le Kerisimasi i lena tausaga. O se Kerisimasi o le a ma le faagaloina lava.