O Faatusa o le Fanau Mai o Iesu ma Mea Moni

Saunia e Pat Graham

O lenei taaloga o le faafetauia o faatusa ma mea moni e maua ai ni manatu mananaia e uiga i faatusa o le Fanau mai o Iesu. O le tele lava o faamatalaga o loo maua i tusitusiga paia. E mafai ona e aoaoina se mea fou a o tou fiafia e taaalo ai i lenei taaloga ma lou aiga ma uo.

Faatonuga: Faakelu fasi pepa faatafafa i luga o se pepa tau mafiafia, ona oti ese lea. Amata i le fola solo faafaō lea o fasi pepa faatafafa nei. O le tagata taalo muamua na te susueina ni fasi pepa faatafafa e lua. Afai e le fetaui le faatusa ma le mea moni, ona toe faafaō lea o fasi pepa faatafafa i lalo, ona tuu lea o le avanoa i le isi tagata e sosoo ai. Afai e fetaui le faatusa ma le mea moni, ona faitau leotele lea e le tagata taalo le mea moni, taofi e ia fasi pepa e fetaui, ona toe faaauau lea ona taalo o ia. Taaalo seiloga ua fetaui uma lava fasi pepa faatafafa. O le tagata taalo e tele ana fasi pepa e fetaui o ia lena ua manumalo.

Fetu o Peteleema

O faailoga faalelagi o le soifua mai o Iesu na valoia e perofeta i totonu o Isaraelu ma Amerika. O le Au Makoi i le itu i sasae na latou iloa le uiga o le fetu (tagai i le Mataio 2:1–2, 7, 9).

Iesu

E tele igoa o loo faatatau ia Iesu i tusitusiga paia: Mesia, Togiola, Faaola, Ieova, Ulumatua, Leoleo Mamoe Lelei, Tamai Mamoe a le Atua, Malamalama o le Lalolagi, Alo Pele e Toatasi na Fanaua, ma le Alo o le Atua. Pe mafai ona e tau maia nisi igoa? (Tagai i le Topical Guide, “Jesus Christ,” 240; Guide to the Scriptures, “Jesus Christ,” 127.)

Maria

E ui lava o le tamā o Iesu o le Tama Faalelagi, o le soifua mai o Iesu na faataunuuina ai valoaga o Iesu o le a tupuga mai i le Tupu o Tavita, ona o Maria e tupuga mai i le Tupu o Tavita.¹

Agelu

Na faaali agelu ia Maria ma Iosefa ma leoleo mamoe (tagai i le Mataio1:20; Luka 1:26–27; 2:8–9).

Fale o Manu

I le taimi lea, o fale talimalo e faatafafa ma se lotoa i totonu mo manu. Ona ua faatumulia uma potu ia o loo faataamilomilo i le lotoa o loo i totonu, atonu o Iosefa na tausia Maria i le taimi na fanau ai i lena lotoa i totonu.²

Faatanoa Vao

Na tuu e Iosefa ma Maria le pepe o Iesu i se faatanoa masalo sa tumu i ni vaovao (tagai i le Luka 2:7). O le tele lava o tagata tusiata ua latou faaalia o le faatanoa o le Kerisimasi o se faatanoa e faia i se ogalaau. Ae atonu foi na vaneina mai i se papa maa.³

Leoleo Mamoe

O le galuega a leoleo mamoe o le taitaiina lea o mamoe i le mea e maua ai meaai ma puipui i latou. E masani lava e moe le leoleo mamoe i le faitotoa o le pa maa o loo puipuia ai mamoe.⁴ O i latou o e fesoasoani i le galuega a le Alii e pei o ni leoleo mamoe. Na talosaga atu Iesu ia i latou e fafaga Ana mamoe ma tamai mamoe (tagai i le Ioane 21:15–17; MFF 112:14).

Iosefa

O Iosefa, le tane a Maria, o se alii tamalii ma le agalelei. O ia o se kamuta. E i ai le manatu na maliu o ia a o le’i amataina le galuega a Iesu.⁵

Au Makoi

Na o mai le Au Makoi e ifo i le Faaola. Latou te le’i o i le fale o manu ae o se isi fale i se taimi ina ua uma ona fanau Iesu.⁶ Na latou maua se faaaliga ia aua nei o latou faailoa atu ia Herota le mea o i ai le tamaitiiti ae toe foi i latou i lo latou atunuu (tagai i le Mataio 2:12).