O Le Isumu o le Kerisimasi a Lo’u Tina
A o o’u laitiiti i le vaitau o le 1950 ma le 1960, o a matou tu masani i le Kerisimasi e le sasālua—sei vagana ai totini. Ona o i matou o tamaiti matou te fiafia tele i a matou totini o le Kerisimasi, na matou faaauauina ai le tu masani lea ina ua matou faaipoipo ma fai a matou lava fanau. Ae peitai, o le faatauina o ni meaalofa faalilolilo ma le faavasegaina o le tele o totini o le Kerisimasi, e le’i umi ae avea o se galuega tele mo o’u matua ua matutua, aemaise lava lo’u tina, o lē sa maua i se ma’i tigaina o le gugu lea na tuuitiitia ai lana gaoioi ma lona malosi.
Na iu lava ina ua ou ofo atu e faaauauina lea galuega. O le afiafi faaleaiga faaletausaga a lo matou aiga lautele, lea na matou faatinoina ai le tala o le kerisimasi ma tatala a matou totini, na ou matuai lelavā ai lava mai le tele o mea e tatau ona faia e se tina e i ai ni ana fanau iti ma le tau faavasegaina o mea e fai i se olaga o le tele o le mau mea e fai. A o ou matamata atu i tagata uma o sasaa i fafo a latou meaalofa laiti mai totini o le Kerisimasi na ou saunia ma le faaeteete, sa ou maua se lagona faanoanoa mo a’u lava ia.
E pei ona faamoemoeina, o la’u totini sa gaogao sei vagana ai se lole masani e foliga o se tootoo ma se moli ‘aina Sapani na ou tago tuu i ai muamua. A o o’u luluina na mea i fafo, na ou matauina ai se isumu e faia i fua o le lama. O le isi taliga e tele atu nai lo le isi, ma le ava a le isumu e supasupa. O le siusiu ua puupuu tele lona otiina, ae o le manoa e tautau ai i luga o le laau e le o tu tonu i le ogatotonu. Na ou le mautonu. Pe o se galuega ea lea a se tamaitiiti o loo aoga i se aoga faataitai lea ua oo mai i totonu o lau totini?
Na ou tepa a’e i luga ma ou vaai atu o loo tilotilo mai lo’u tina ia te a’u mai lona nofoa faataavalevale i le isi itu o le potu. Sa ia talo mai ia te a’u i lona tamatamai lima taupatupatu ma le pio.
“Na ou manao e faia se mea e tuu i totonu o totini o le Kerisimasi,” na fai mai ai o ia. “Na latou faia nei tamai isumu i le Aualofa, ma o le mananaia ia.”
Na toetoe lava maligi ona loimata, ma sa tetete lona leo malu a o ia faaauau.
“Ua le mafai ona faagaoioia lelei o’u tamatamai lima, o lea e na o le tasi le mea na ou faia. E le’i lelei lona faiga, ae ou te iloa o le a le afaina lena ia te oe.”
Na ou toe tilotilo i le tamai isumu lea o loo i lo’u lima. E sa’o o ia. E le’i afaina lea ia te au. Ma o le mea moni, o lana tamai isumu na avea ma mea taua sili ona faapelepeleina i lena Kerisimasi atoa.
I le silia i le 20 tausaga, ou te aveeseina ai fasi pepa solo ma le faaeteete na afifi ai le tamai isumu ua sapasapa ona foliga na gaosia e tamatamai lima sapasapa ma tautauina ma le faaeteete i luga o se lala o le laau. Ua tele tausaga talu ona maliu lo’u tina, ae o lana isumu o le Kerisimasi ua faamanatu mai ai ia te a’u ni upumoni loloto se lua.
Muamua o le faamamaluina lea o a’u e lo’u tina e ala i lona talitonuina e mafai ona ou le amanaiaina le piopio o taliga o le isumu ae lagona le alofa ma le osigataulaga na tuuina atu i lona gaosiga. Lona lua, afai o a’u o se tagata ola e le atoatoa, e mafai ona ou iloa le matagofie i le tamai isumu faatauvaa, o le a se isi maualuga e mafai ai e lo tatou Tama Faalelagi ona Ia silasila ai i tua atu o a tatou taumafaiga le atoatoa ma malamalama i o tatou faamoemoega mama.
Ou te iloa afai tatou te faia le mea sili e tuuina atu ai se mea i isi tagata ma Ia, ua le lava le lelei o la tatou meaalofa—o lona taua e le mafuatiaina.