Fesili & Tali

“E mafai faapefea ona faamalosia la’u molimau ina ia mautinoa ai e tumau lo’u malosi i totonu o le talalelei?”

Ia i ai se tautinoga moni lava e suesue ma manatunatu loloto i tusitusiga paia.
Ia e mautinoa o loo e agavaa ina ia mafuta le Agaga faatasi ma oe i taimi uma.
Ia mautinoa ua e salamo ma le lotomaualalo e oo lava i tamai agasala laiti.
Mafaufau po o le a le mea o loo faavae ai i luga lau molimau.
Ia faailoa soo atu lau molimau.

Liahona

Olau molimau o le a faamalosia pe a tautino atu e le Agaga Paia ia te oe upumoni faaleagaga. O nisi nei o nai auala e valaaulia ai le Agaga i lou olaga:

Muamua, ia suesue faalelei i tusitusiga paia i aso taitasi. Nai lo le faamalosia o mata e ala mo le 15 minute ina ia faanatinati le faitauina o tusitusiga paia i le po, ia matuai aoao faalelei i afioga a Keriso. A o e suesue ma manatunatu loloto i ai, o le a faalolotoina lou malamalamaaga, ma o le a e lagonaina le Agaga Paia, lea o le a faamalosia ai lau molimau.

Ia e mautinoa o loo e agavaa ina ia mafuta le Agaga faatasi ma oe. O le avea ma sē agavaa e faatagaina ai le Agaga e uunaia oe e te faia amioga e fiafia i ai le Tama Faalelagi. O le a mafai foi ona e lagona le Agaga o faamafanafana atu ia te oe ma faamautuina atu ia te oe e moni le talalelei ma o le Tama Faalelagi ma Iesu Keriso e alolofa ia te oe. O le ‘ai ma inu ma le agavaa i le faamanatuga i vaiaso taitasi o le a fesoasoani ia te oe ina ia maua le Agaga e faatasi ma oe.

‘Aua ne’i e le iloaina au agasala, e oo lava i nai agasala laiti. Mo se faataitaiga, aua le pepelo; taumafai ina ia aua e te faitioina tagata; faatoese atu i lou uso po o lou tuafafine ona o lou avaavau ma lou ee atu i ai. O le agasala e tosoeseina ai oe mai le Agaga o le Alii. Ia fai ma au masani lou manatunatu e uiga i ou mafaufauga ma amioga ma, pe afai e manaomia, salamo ma le faamaoni.

Faaavanoa sou taimi e iloilo ai lau molimau. Pe o i ai sau lava molimau maumaututu i le Faaola, Iosefa Samita, ma le Tusi a Mamona? Pe o e alu i le lotu ona e maua ai iina au uo? Ia manatua o le misiona a le Ekalesia o le aumaia lea o agaga ia Iesu Keriso. Ia atinae lau molimau i luga o le papa o Keriso, “o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou” (Helamana 5:12).

O le mea mulimuli, ia faamautuina ia te oe lava ia mea ua e iloa e ala i lou faasoa atu o ou talitonuga i se isi tagata. E pei ona uunaia ai oe e le Agaga, ia tuuina atu lau molimau, i le taimi o le sauniga molimau, i au uo po o le aiga, po o ni tagata foi e te feiloai atu i ai. A o faapea ona e faia, o le a faamalosia lau molimau, ma o le a e naunau moni lava e te tumau malosi i totonu o le talalelei. E oo lava i molimau sili ona malolosi o le a faavaivaiina pe a le faaaogaina.

Ae peitai, ia manatua o le na o le i ai o se molimau ua le lava lena e taofia ai oe mai le se ese. Ina ua mavae ona maua e Sa Lamanā se molimau ma ua faaliliuina i le Alii “ua le toe liliu ese lava” (Alema 23:6). Ua faamanatu mai e tusitusiga paia ia i tatou ina ia tatalo e le aunoa ma ia faaeteete ia aua le pa’ū atu i faaosoosoga (tagai i le MFF 20:32–34). Aua le loto vaivai pe afai e le vave le faagasologa o le atinaeina o lau molimau ma le faamalosia o lou liua. A o e faalagolago i le mana o le Agaga Paia, o le a oo mai se talitonuga maumaututu.

Au faitau

Na maua la’u molimau e ala i le suesue i tusitusiga paia ma le tatalo e le aunoa. Ae le’i gata ai i le faia o na mea. Na ou faaauau pea ona suesue ma tatalo ma anapogi. O le faia o na mea na ou maua ai se malamalamaaga fou o le talalelei ma faatumauina ai a’u i le ala sao ma le vaapiapi. Ou te talitonu i lena mea o le maua o se malamalamaaga fou e maua ai se talitonuga malosi e sili atu. O lou malamalama atili i le talalelei, o le atili foi lena ona e usiusitai i poloaiga a le Atua ma tumau moni i le talalelei.

Beatrice C., 21, Zimbabwe

Ou te manatu e leai se isi auala e sili atu e faamalosia ai lau molimau nai lo lou iloaina muamua e te manaomia le talalelei i lou olaga. O faataitaiga a isi tagata o le Ekalesia o e latou te tautino mai e moni le Ekalesia e fesoasoani tele foi. Ae le gata i lena, e mafai ona e talanoa faatasi ma au uo mai lau paranesi po o le uarota e uiga i le talalelei ma lona taua ia i latou. Pe a e faia tau lava o nei mea ma ole atu i le Tama Faalelagi i au tatalo i aso taitasi faatasi ai ma le naunautaiga moni ia faateleina lou faatuatua, o le a Ia tali mai ia te oe. O le a Ia foai mai ia te oe le loto mautinoa ma le olioli lea e maua e ala i le taliaina o le talalelei e avea o se punaoa e faavavau o le poto ma le fiafia.

Maxim K., 22, Ukraine

O le faia o le Tiute i le Atua po o le Alualu i Luma o le Tagata Lava Ia o se tasi lea o auala e faamalosia ai lau molimau. Auai e le aunoa i sauniga o le Ekalesia ma le Mutuale, ma tuuina atu lau molimau i taimi uma. Faalogo i ou matua ma taitai o le Ekalesia. Ona e lagona ai lea o le Agaga ma iloa ai o loo e i ai i le auala sao.

Earlson N., 20, Luzon, Filipaina

A o e maua se molimau ma o le taimi lava foi e te mauaina ai, ia tausia sau tusitalafaamaumau o tusitusiga paia. Faamaumau ai mea faaleagaga na oo pe na tutupu ia te oe. Faamaumau ai lesona po o ni lagona na e maua mai ni lauga i le lotu. Faamaumau soo se mea lava e faapitoa ia te oe lona tulaga faaleagaga, e tusa lava pe foliga mai i lena taimi e faaletaua. Afai e te le o mautonu po o e i ai i se tulaga lotovaivai faaleagaga, o mea uma na tutupu na e tusia i lalo o le a fesoasoani ia te oe e toe tosoina a’e oe i luga i le tulaga e te manao e te i ai ma fesoasoani ia te oe ia maua le Agaga e taialaina oe.

Meagen J., 17, Virginia, ISA

E mafai ona ou faamalosia la’u molimau ma faamalosia e faasagatau atu i le fili e ala i le tatalo, faitauina o tusitusiga paia i aso taitasi, tausia poloaiga a le Atua, ma ia maua i le agaga faafetai i taimi uma ia te Ia. A ou tausia poloaiga, ou te maua le lagona malosi e faasagatau atu ai i le fili, ma ou manatuaina mea lelei uma lava na oo ia te a’u i totonu o le talalelei. O lea la, e faateleina ai la’u molimau ma e le mafai ona maluelueina a’u e le tiapolo ma lē mafaia ai ona ou alu ese mai lenei talalelei moni a Keriso. E tatau ona tatou manatua i taimi uma e faafailele lo tatou faatuatua e pei o se tamai laau toto, lea a tausia ma le faapelepele, e ola a’e ma malosi.

Bárbara M., 16, Sāo Paulo, Pasila

O lau molimau o le a oo ina malosi atili e ala i mea na oo ia te oe. E seāseā ona maua ni molimau a tagata i se taimi puupuu. O lau molimau o le a tupu a o e naunau e auauna atu i totonu o le Ekalesia, tausia poloaiga, tatalo, anapogi, suesue i tusitusiga paia, auai i sauniga o le Ekalesia, ma faalogo atu i isi o tuuina mai a latou molimau. Afai e te faia lenei mea, o le a faamanuiaina oe i ni taimi o musumusuga ia o le a faamalosia ai lau lava molimau. Ae le gata foi i lena, aua e te musu e faasoa atu lau foi molimau i isi tagata.

Elder Alberto Aquino, 21, Misiona a Kuatemala Aai o Kuatemala i Saute

E i ai taimi na ou masalosalo ai, ae faafetai i le mana o le tatalo ma le mana o le Agaga Paia, ua ou faamalosia la’u molimau o i tatou moni lava o fanau uma a le Atua. O le a galue malosi Satani ina ia e masalosalo i lau molimau. Ia tatalo ma lou loto atoa ina ia faatoilaloina na mafaufauga ma ia fesoasoani ia te oe ia manatua le taimi na fesoasoani ai ia te oe muamua. E i ai lava o ia i taimi uma e faafofoga ma fesoasoani mai.

Saryn S., 17, Iuta, ISA

O tali o loo faamoemoe o se fesoasoani ma ni manatu ae le o se faasilasilaina atu o ni aoaoga faavae o le Ekalesia.

“Soo se mea lava e lē faalatalata atu ai i tatou i le Atua, e aveese ai i tatou mai ia te Ia. E le mafai ona tatou tuvaelua, e leai se mea faalēmanino e mafai ai ona tatou fai se agasala laitiiti e aunoa ma le aveesea ai o lo tatou malosi faaleagaga. O le pogai lena e tatau ai ona tatou salamo, ma o mai ia Keriso i aso taitasi i tulivae lotomaulalo, ina ia mafai ona tatou puipuia a tatou afi o le molimau mai le pē i a tatou agasala.”

Elder Joseph B. Wirthlin o le Korama a Aposetolo e Toasefululua, “Afi Tetele Faaleagaga o le Molimau” Liahona, Ianuari 1993, 44.