Ua Auina Atu le Tamaitusi E Alofa le Atua i Ana Fanau

Ua auina atu e le Au Peresitene Sili se tamaitusi fou, ua faaulutalaina E Alofa le Atua i Ana Fanau, ua faamoemoe e fesoasoani ai ia i latou o e o loo tauivi ma le tosina atu i le itupa tutusa ma tagata o o latou aiga.

“Matou te fautuaina taitai uma ina ia aapa atu ma le alofa ma le malamalama ia i latou o ē e aafia i le tosina atu i le kenera po o tagata o a latou lava itupa,” na saunoa ai le Au Peresitene Sili. “Pe a outou faia, faamolemole ia manatua e aoao atu aoaoga faavae tonu, e pei ona faamatala atu … i le tamaitusi, ma ia faufautua atu i se agaga o le mafanafana ma le alofa.”

O le tamaitusi o loo talanoaina ai le natura o le faasinomaga o tagata taitoatasi ma le malosiaga, o le fuafuaga o le fiafia, pulea o le tagata lava ia, faatumuina o se olaga i mea lelei, ma le agai i luma i le olaga.

O le a maua le tamaitusi i gagana e 27 ma o le a tufatufaina atu e auala atu i taitai o siteki, paranesi, ma misiona. O gagana e aofia ai le: ASL, Sepuano, Saina, Tanisi, Take, Igilisi, Igilisi i le Gagana Tusi a Tauaso, Fiti, Finelani, Farani, Siamani, Hanekeri, Initonesia, Italia, Iapani, Korea, Nouei, Potukale, Rusia, Samoa, Sipaniolo, Suetena, Takaloka, Tahiti, Tai, Toga, ma le Iukureini.

E maua kopi faaopoopo o le tamaitusi mai faletusi o le Ekalesia. O le a maua foi le tamaitusi i luga o le Uepi saite a le Ekalesia i gagana nei.