O La’u Meaalofa Aupito Sili Ona Taua
A o ou mafaufau e uiga i meaalofa ma kata o faamanuiaga ia o le a matou tuuina atu i le isi foi vaitau o le Kerisimasi, na faafuasei lava ona oo mai se fesili i lo’u mafaufau. O meaalofa uma na ou maua i Kerisimasi ua tuanai, pe na i ai ea se tasi o na meaalofa na iloga ona aafia ai lo’u olaga? Ona ou manatua ai lea o le masina o Tesema o le 1963.
Sa na o a’u i lo matou aiga aua sa i ai se mea na o i ai o’u matua. Na avea a’u o se faiaoga talavou i lena taimi. Ua tuua vasega, ma sa ave o’u aso malolo, ma vave foi le tau lalata mai le Kerisimasi. Na ou vaavaai solo i se mea e faitau, ae ua uma ona ou faitauina mea uma o loo i le fata tusi a lo matou aiga. Na tonu ia te a’u ou te alu e vaai se tasi o o matou tuaoi e i ai ni ana tusi mananaia ma e masani lava ona ia faauneina mai ia te a’u ana tusi. O le taimi la lea na ia tuuina mai ai se tusi na tuu atu e ni alii talavou se toalua—o ni alii e o mai i se isi atunuu—ia te ia.
“Ou te fia iloa po o le a sou manatu i lena tusi,” na ia fai mai ai. “E uiga ese foi mea o loo tusia ai.”
Ona toe faapea mai lea o ia o alii talavou nei e toalua o ni faifeautalai. Faifeautalai? Na vave lava ona mou lo’u manao i le tusi. O le taimi lena sa ou le fiafia lava i soo se mea tau lotu, ae ui lava i lena ae na ou alu lava ma ave le tusi.
A o o’u faatofa atu, ae toe faaopoopo mai lo’u tuaoi, “I totonu o le tusi o le a e maua ai se tamai faaupuga na la tusia, o loo fautuaina mai ai a o le’i faitauina le tusi, e tatau ona e faia muamua se tatalo i le Atua.”
Sa leai sa’u fuafuaga i lena Aso Toonai timuga, na tonu ia te a’u o le a ou faitauina lena tusi “uiga ese.“ Na ou susueina le tusi ma ou maua ai le faaupuga na tusia e faifeautalai. Na ou tago tuu le tusi i luga o lo’u moega, o’u tootuli, ma mo le taimi muamua i lo’u olaga, ua ou faia ai se tatalo i le Atua i a’u lava upu.
A o amata ona ou faitauina, na faafiafiaina a’u i le tala. Na faapefea ona faatinoina e le talavou o Nifae lea ituaiga faatuatua e le maluelue? Na ou manatunatu pe faamata ou te mafaia ona faia se mea faapena. A o ou faitauina le tusi a Mosaea, na ou maua le malosi mai upu a le Tupu o Peniamina. I lea taimi sa leai so’u manatu o loo o’u faitauina se tusi o le a avea ma tusi e sili atu ona ou fiafia i ai mo le silia i le 40 tausaga.
I le faagasologa o na tausaga, o itulau o lenei tusi na ou maua mai ai le tele o le lagolago, faamafanafanaga, ma le malosiaga, ma na ou faatoa mauaina ai foi le tele o aoaoga ia na ou faasoaina atu i lauga ma lesona i le paranesi laitiiti a Tucumán i totonu o Atenitina, le mea na ou papatiso ma faamauina ai. I le lua tausaga mulimuli ane, a o o’u auauna atu i se misiona talai, na ou tusia foi ni nai faamatalaga pupuu i ni tamai fasi pepa, e fautuaina ai tagata sailiili ina ia latou tatalo muamua a o le’i faitauina le kopi o le Tusi a Mamona ua ma tuuina atu ma la’u soa i o latou lima.
Ua tele tausaga ua mavae atu talu lena mea. Ae faapefea ona ou faagaloina le meaalofa o le Kerisimasi sili ona taua na ou maua ma le tuaoi na tuuina mai ia te a’u? Ua ou tau le manatuaina ona foliga, ma ou te tau le manatua foi lona igoa—Marina. Faafetai atu ia toe, tuaoi. Ou te tuuina atu ia te oe lo’u agaga faafetai e faavavau.