Ua Amataina Galuega o Malumalu, i Tuluiga o le Lalolagi Atoa
Ua fuafuaina le malumalu o Nukualofa Toga e toe tatalaina ina ua maea ni galuega toe faaleleia, ua suatia le eleele mo Malumalu o Kiev Iukureine, Tegucigalpa Honduras, ma Vancouver British Columbia, ma se malumalu fou ua faasilasilaina i Manaus, Pasila. Ua i ai nei ni malumalu se 124 o loo faagaoioia i le lalolagi, faatasi ai ma le isi 12 o loo fausia pe ua faasilasilaina mai.
Malumalu o Nukualofa Toga
O le Malumalu o Nukualofa Toga lea ua toe faafouina sa toe faapaiaina ia Novema, ina ua mavae ni masina o galuega sauniuni.
Sa amataina le fale tatala i le aso 29 o Setema, 2007, ma faaauau ai lava seia oo i le aso 20 o Oketopa, e le aofia ai Aso Sa. Ina ua mavae le fale tatala, sa faataunuuina sauniga e lua o le toe faapaiaina i le aso 4 o Novema, 2007, ina ia ofi ai le Au Paia o Aso e Gata Ai i le eria o e o le a tautuaina e le malumalu. Sa faia se faafiafiaga faaleaganuu i le aso 3 o Novema, 2007.
O le Malumalu o Nukualofa Toga, na uluai faapaiaina ia Aokuso 1983 e Peresitene Gordon B. Hinckley, o loo tautuaina ai le Au Paia o Aso e Gata Ai i Toga atoa ma Atumotu o Laina i le Vasa Pasefika. Ua 52,400 tagata o le Ekalesia o loo i ai nei i Toga.
Malumalu o Kiev Iukureini
O sauniga o le suatiaina o le eleele mo le Malumalu o Kiev Iukureini sa faatautaia i le Aso Toonai, 23 o Iuni, 2007.
Sa pulefaamalumalu i le sauniga ia Elder Paul B. Pieper, o le Peresitene o le Eria a Europa i Sasae. O Elder Aleksandr N. Manzhos, o le Fitugafulu Eria o Europa i Sasae, sa taitaia le sauniga.
O le uluai malumalu lea ua fausia i Iukureini, sa uluai faasilasilaina ia Iulai o le 1998. Talu mai le 1992, sa faimalaga le Au Paia o Aso e Gata Ai i Iukureini i le 30 itula ina ia auai atu i le malumalu sili ona lata ane. Ua silia ma le 9,900 tagata o le Ekalesia i Iukureini i le siteki e tasi ma itu e lima.
Malumalu o Tegucigalpa Honduras
O Elder Spencer V. Jones, a o avea lena ma Peresitene o le Eria o Amerika Tutotonu, sa pulefaamalumalu a o suatia e taitai o le Ekalesia le eleele mo le Malumalu o Tegucigalpa Honduras i le aso 9 o Iuni, 2007.
O le taimi nei, e tatau ona malaga tagata o le Ekalesia i totonu o Honduras mo le 12 itula ina ia auai atu i le Malumalu o Kuatemala Aai o Kuatemala. Ua silia nei ma le 116,400 tagata o le Ekalesia o loo i ai i Honduras.
O le uluai malumalu lea i Honduras ma o le a avea ma malumalu lona fa ua faagaoioia i Amerika Tutotonu e sosoo atu i Malumalu o Kuatemala Aai o Kuatemala, Panama Aai o Panama, ma San Jose Costa Rica. O le malumalu o Aai o Panama ua lata ona maea. Ua faasilasilaina mai foi se malumalu i Quetzaltenango, Kuatemala.
Malumalu o Vancouver British Columbia
Sa faatautaia e le Ekalesia se sauniga o le suatiaina o le eleele mo le Malumalu o Vancouver British Columbia i le Aso Toonai, 4 Aokuso, 2007. O Elder Ronald A. Rasband o le Au Peresitene o Fitugafulu sa pulefaamalumalu i sauniga.
Sa faasilasilaina i le aso 2 o Iuni, 2006, o le a avea ma malumalu muamua i totonu o British Columbia. O British Columbia e silia ma le 28,400 tagata o le Ekalesia i siteki e 8 ma le itu e 1. A tuufaatasi, e silia ma le 166,000 tagata o le Ekalesia i Kanata faapea ma malumalu e 6— o Malumalu o Cardston Alberta, Edmonton Alberta, Halifax Nova Scotia, Montreal Quebec, Regina Saskatchewan, ma Toronto Ontario.