Fetufaai i le Kerisimasi
Na matou iloa o le matou Kerisimasi muamua lava talu ona avea i matou o ni tagata o le Au Paia o Aso e Gata Ai o le a ese mai nai lo isi lava Kerisimasi. Ae o le fetufaai atu o le mea lena na sili atu ai ona tulaga ese.
I le 17 o o’u tausaga, sa faigaluega suisui lo’u tina i se fale e gaosi ai meataalo pepe. E faigaluega mai lava o ia i le matou fale, ae e alu o ia i le fale gaosi meataalo pepe e toe aumai nisi ana galuega ae faafoi isi ua maea ona faia. O le tamaloa e alu atu lo’u tina ma tuu i ai ana galuega ua maea, e i ai lava se mea faapitoa e uiga ia te ia.
A o faagasolo ona masani lelei lo’u tina ia te ia, na ia iloa ai na i ai se mea na tupu na mafua ai ona faanoanoa lenei alii. Na valaaulia o ia e lo’u tina ina ia sau e asiasi mai ia i matou, ma na oo mai i lo matou aiga i lena lava aso ma matou mafuta ai mo ni nai itula. Na matou iloa ai na ia tuua Pasila ae malaga mai i Atenitina i le sailia o se galuega ma e le’i toe foi lava i lona aiga talu ona sau, e pei ona ia manao ai.
E i ai le tu ma le masani a lo matou aiga o le valaaulia lea o se isi e sau matou te fai Kerisimasi faatasi, ma o Tesema na matou amataina ai, e pei ona matou faia i tausaga uma taitasi, ona talanoaina po o ai matou te valaaulia e fai ma a matou malo faaaloalogia. Ae peitai, o lenei Kerisimasi e ese mai lava mo se mafuaaga faapitoa; o se Kerisimasi muamua lea ua matou mafuta ai o ni tagata o le Ekalesia a Iesu Keriso o le Au Paia o Aso e Gata Ai. Na ou mafaufau i le alii lea e faigaluega faatasi ma lo’u tina i le taimi lava lena ae e le’i faia ma sa’u tala. I se taimi mulimuli ane na ta’ua ai e lo’u tina na ia manao e valaaulia lena alii.
O le isi taimi na sosoo ai na alu atu ai lo’u tina e faafoi ana galuega suisui ua maea, na fesili i ai lo’u tina po o ai e alu e fai aso malolo i ai, ma na ia tali ane e na te le iloa. Na fai atu i ai lo’u tina ai se manaia ae alu atu i lo matou aiga matou te fai Kerisimasi, ae na ia tali ane i lo’u tina o le a ia faailoa atu i se taimi pe alu atu.
Na oo atu se tasi i lo matou fale i le leva o le afiafi o le aso a o lumanai le Kerisimasi. Ina ua tatala atu le faitotoa, o loo tu mai ai le alii lea e faigaluega faatasi ma lo’u tina ma lona atalii e tolu tausaga le matua. O se mea manaia le feiloai atu i lenei alii laitiiti ma mafuta ma ia i lena afiafi. Sa ia te ia se agaga lelei o lona tama. Na lagona e lo matou aiga e pei o i ai ni logo tagitagi i o matou fatu a o matou faalogologo atu i pese malie a lenei alii laitiiti i le afiafi o le Kerisimasi.
Ou te faafetai mo le talalelei, lea na faaopoopo i le agaga o la matou Kerisimasi na afua mai i lena tausaga ma faateleina ai le tautinoga a lo matou aiga ia “manatua le … alofa faauso, agaalofa [ma le] alofa” (MFF 4:6).