O Vai Mama o le Faamoemoega Autu lea o le Polokalama a Fesoasoaniga Alofa

I le nuu maugā ma maotua o Navunimono, i Fiti, sa masani ona sau sa’o le vaiinu mai le vaitafe lea e tafe atu i le nuu. O lafupovi i luga atu o le vaitafe, o timuga mamafa, ma isi vaega faalesiosiomaga ua avea ma auala ua le saogalemu ai le vai mai le vaitafe mo le taumafaina, na moomia ai le faatutuina talu ai nei o ni tane vai se tolu.

O tane vai, sa faatutuina i lalo o le lagolagosua a le Auaunaga o Fesoasoaniga Alofa a le Ekalesia, ma o loo aofia ai i le silia ma le 50 isi tane vai faapea sa faatutuina e le Ekalesia i Fiti atoa.

Na matauina e Tomujani Boginivalu, le taitai o le nuu o Navunimono, “O lea ua mama nei le matou vai ma ua faigofie ona maua mo le nuu atoa.”

“Ina ia umiaina e le nuu lava ia,” sa faamalamalama mai ai e Leo Wright, le faifeau faamisiona mo fesoasoaniga alofa mo le Ekalesia i Fiti, “ua tauave ai e tagata o le nuu le tiutetauave mo le tausia ma le faaleleia o tane vai. Sa latou fausiaina, i a latou lava tupe faapea ma le galueaiina, ia piliki ma le faavae sima mo tane vai. E le gata i lea, ua tofia foi se tagata o le nuu e avea ma tagata e tausia pea ia tane vai. O le auala lenei o le a maua ai se sao o le nuu i le galuega ma o le a sili atu ai ona malamalama i lona aoga tele.”

Na matauina e se tasi o le nuu, o Joseva Vitinavulagi ia suiga ina ua mavae le fausiaina o tane vai. “O le ele o loo fai ai le faavae o le faatanoa vai o loo tautuaina le nuu e palapala aua e leai se nofoaga e faamama ai le suavai. Ae i le fausiaina o tane vai fou, ua ou matauina ai le suiga i pa’u o tamaiti ma tagata matutua i le nuu. Ou te fiafia e faapea atu ua o nei tamaiti aoga i le aoga ma ni fagupa’u o vai mama.”

O le mauaina o vai mama o se tasi lea o taumafaiga autu mo fesoasoaniga alofa a le Ekalesia. I le 2006 e 34 ni atunuu eseese sa faamaeaina ai ni galuega mo vai mama.

O le popolega mo punavai mama, e matuai taua lava i le lalolagi atoa, e tusa ai ma se faamatalaga a le Faalapotopotoga o le Soifua Maloloina i le Lalolagi. E silia ma le piliona tagata e le o mafai ona mauaina se punaoa o vai mama; o le toatele o nei tagata o loo mafatia mai faamai e mafua mai i vai e pei o le kolela, manava tātā, ma le taifoi. O le ivasefulu pasene o faamai pipisi i atunuu tau atiae e mafua mai i vai e le mama.

E fuafua i manaoga i le lotoifale ma tulaga manaomia, ae ua saunia e le polokalama a le Ekalesia ia sapalai o vai e auala atu i metotia eseese, e aofia ai vaieli, vaipuna, tane vai, ma faiga e faamama ai le vai.

“O le faamoemoe o la matou polokalama,” na faamalamalama ai e Brett Bass, le pule faatonu o galuega o Fesoasoaniga Alofa a le Ekalesia, “ina ia lagolago i tagata i le lotoifale ma faalapotopotoga a o latou sailia ni fofo talafeagai mo o latou manaoga tau suavai. I le tulaga i Fiti, ua tutu faatasi tagata ina ia mauaina se fofo talafeagai ona fai lea o se taumafaiga ina ia mafai ai ona tino mai.”