Taimi o Fetufaaiga

O Le Meaalofa Silisili

Saunia e Elizabeth Ricks

“O Iesu lena, ua aveina ae nai ia te outou i le lagi, e faapea ona toe afio mai o ia, pei o lona afio atu i le lagi” (Galuega 1:11).

E te fiafia e maua ni meaalofa? Tatou te fiafia uma lava. O meaalofa e faailoa mai ai ia i tatou o loo i ai se tasi e manatu alofa mai ia i tatou. O le iloaina o loo i ai se tasi o loo manatu alofa mai ia i tatou e faafiafiaina ai i tatou. A tatou alolofa atu i tagata, tatou te mananao e tuuina atu ia i latou ni meaalofa.

O a ituaiga meaalofa e te manao e tuuina atu i tagata e te alofa i ai? O meaalofa e te tuuina atu e le manaomia ina ia manaia lona teuteuina pe taugata foi. O lau meaalofa e mafai ona avatu e ala i le faitauina o se tala i se tamaitiiti e laitiiti, fesoasoani i lou tina po o lou tama i le saunia o le meaai, po o le faia o se upu agalelei.

Ona e alofa lo tatou Tama Faalelagi ia i tatou, ua Ia tuuina mai ai ia i tatou le tele o meaalofa. I le Ioane 3:16, tatou te faitau ai e uiga i se meaalofa silisili ona taua: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”

Na sau Iesu i le lalolagi o se pepe na fanau i Peteleema. O Lona soifuaga o se faataitaiga lea mo i tatou. Na Ia togisala foi mo a tatou agasala ma tuuina mai ia i tatou le avanoa e toe foi atu ai e toe nonofo faatasi ma lo tatou Tama Faalelagi. Afai tatou te mulimuli ia Iesu Keriso i le faamaoni, e mafai ona tatou toe maua se isi meaalofa matagofie: “Afai e te faia mea lelei, ioe, ma tumau i le faamaoni e oo i le iuga, o le a faaolaina oe i le malo o le Atua, o le mea foai fua aupito sili lea i meaalofa uma a le Atua” (MFF 6:13).

A o tatou mulimuli ia Iesu Keriso i le faamaoni, tatou te tulimatai i le taimi lea o le a toe afio mai ai o Ia i le lalolagi. Tatou te iloa o le a toe afio mai o Ia ma o le a i ai se aso o le a tatou maua ai le meaalofa aupito silisili i lo meaalofa uma a le Atua—o le ola e faavavau.

Gaoioiga

O mea teuteu taitasi o loo i le itulau faafeagai o se faatusa o Iesu Keriso. Ia faitau le mau ina ia iloa ai pe o faapefea ona avea mea teuteu ma faatusa. Valivali mea teuteu. Ia faapipii i luga o se pepa malo, ona ooti ese lea. Ooti ese mau. Ia faapipii i se kelu po o se mea faapipii i tua o le mea teuteu sao ina ia faamanatu ai ia oe o le mea teuteu o se faatusa o Keriso. Ia tui se lipine i le pito i luga o le mea teuteu, ma tautau i se nofoaga e mafai ona fiafia ai le tou aiga.

Manatu mo Taimi o Fetufaaiga

1. 1. Faaali atu se fu’a, o se fatu, ma se foliga ataata. Fesili atu i tamaiti pe o a mea o loo faatusa i ai nei mea (atunuu, alofa, fiafia). Ia faamatala atu o nei mea taitasi o ni faatusa. O perofeta o anamua na latou tau atu i tagata o le a afio mai Iesu Keriso i le lalolagi. O nisi o perofeta na latou faaaogaina faatusa e aoao atu ai e uiga ia Keriso. Ia faaali atu se ata o se tamai mamoe (tagai i le tusi lesona a le Peraimeri 2, 123). Ia faamatala atu o le tamai mamoe o se faatusa lea o Iesu Keriso. Ia talanoaina ni auala ua faatusa ai Iesu Keriso e pei o se tamai mamoe. Tufatufa atu mau nei: Kenese 22:3–8; Esoto 12:21–28; Isaia 53:7; Ioane 1:29; 1 Nifae 12:6. Faitau mau, ma talanoaina pe o a mea o loo faamatalaina mai e nei mau taitasi e uiga ia Keriso. Faamatala atu afai o le a tatou malamalama i faatusa, ona tatou iloa lea o perofeta o aso anamua na latou valoia le afio mai o Keriso i le lalolagi. Ia molimau atu e pei lava ona e iloa ua latalata mai le aso Kerisimasi, na faapena foi ona iloa e perofeta o le a fanau mai Keriso.

2. 2. Ia valaaulia ni tamaiti se toalua la te uuina i luga ata mai le Pusa Ata o le Talalelei 238 (O Le Afio Mai Faalua) ma le 239 (O Le Iesu Keriso Toetu). Tuu atu i tamaiti e faasino mai po o a mea e tutusa ai ma mea e eseese ai. Fai atu i tamaiti o loo uuina ata e faitau mai ulutala o ata ma otootoga o loo i ai i pito i tua o ata. Faamatala atu o le tasi ata o se ata lea atonu o le a foliga ai Iesu pe a toe afio mai o Ia ma o le isi ata o le ata lea o Ona foliga atonu na foliga ai o Ia ina ua toetu mai o Ia. Tau atu i tamaiti e i ai se mafuaaga ua ala ai ona i ai se foliga tutusa i ata. Fai atu i tamaiti uma ia sue le Galuega 1:11. Faaali atu se faafanua lapotopoto o le lalolagi. A o e faitauina le mau, ia tuutuuese mai le kelope le ata o le Iesu toetu a o e faitau, “… ua aveina ae nai ia te outou i le lagi.” Tuutuu mai faalatalata i le kelope le ata o le Toe Afio Mai Faalua a o e faitauina, “… e faapea ona toe afio mai o ia.” A o lumanai le Peraimeri i le isi vaiaso, valaaulia nisi o tamaiti ina ia saunia e fetufaai mai ni mea ua latou aoaoina i lenei tausaga lea o le a fesoasoani ia i latou e saunia ai mo le Afio Mai Faalua. Usu ni pese e tovā ai tautalaga, o ni pese na tou aoaoina i lenei tausaga ma toe faamanatu mataupu faavae o loo aoao mai i pese. Molimau atu a o tatou mulimuli ia Iesu ma le faamaoni, e mafai ona tatou olioli i le ola faavavau.