Tasi Miliona Faifeautalai, Sefulutolu Miliona Tagata o le Ekalesia

E pei lava faifeautalai o se faailoga o le Ekalesia e pei o le Malumalu o Sate Leki ma le Aufaipese a le Tapeneko—e mama a latou teuga ma foliga, laei lelei alii ma tamaitai pe a tietie i uila po o le savavali foi e o atu i lea fale ma lea fale ma se savali o le talalelei. Ua faasalalauina faifeautalai Mamona i le kelope talu mai popofou o le Ekalesia, ma i le faagasologa ua ausia ai se tulaga maualuga sili ona taua.

“Ua matuai maoae le alualu i luma ua tatou faia i la tatou galuega faafaifeautalai i tausaga e lei mamao atu,” na saunoa ai Peresitene Gordon B. Hinckley i le Nofoaga Autu e Aoao ai Faifeautalai i Provo i le Semina Faaleaoaoga a Peresitene Fou o Misiona na faia lata mai nei. “Ua toatele atu a tatou faifeautalai—ma o faifeautalai sili ona mataalia. Ua fuafuaina pe tusa ma le miliona faifeautalai ua auauna atu talu mai le faavaeina o le Ekalesia.”

“E le mafai ona iloatonu po o ai le faifeautalai lona miliona,” na saunoa i ai Elder M. Russell Ballard o le Korama a Aposetolo e Toasefululua i se feiloaiga ma talafou a o i ai i sauniga faamasani ma peresitene fou e 118 o misiona. “Matou te iloa o alii ma tamaitai talavou, o tuafafine matutua, ma ulugalii ua ofo e auauna atu i le totogiina e i latou lava po o o latou aiga ia tupe e faaaluina i le faasalalauina atu o lenei savali i atunuu ma teritori e 145.”

O le faamamafaina o le taua o le malamalama i le tuufaatasiga o nei faifeautalai o loo faatusa i ai lenei tulaga maualuga, na saunoa ai Elder Ballard i le tulagaese o uiga lea ua faapitoa ai nei faifeautalai e miliona.

“Sa faavela e se tuafafine talavou Peru ia hemupeka i se taavale toso i magaala e faatupe ai lana misiona i lona lava atunuu,” na ia saunoa ai. “O se alii faifeautalai talavou mai Initia sa auauna atu i Toronto, Kanata, ma se ulugalii ua litaea na tuua le fanau ma fanau a le la fanau ina ia fesoasoani e eliina ni vaieli mama i Aferika i Saute. E auauna atu faifeautalai i mea e tofia i ai, e aunoa ma se muai iloa po o gafea o le lalolagi e i ai.”

O le mea moni, o le galuega e faatinoina e nei faifeautalai volenitia e matuai eseese lava e pei lava o nei faifeautalai. I se aso atofaina e galulue ai faifeautalai i mea uma lava, mai le fesoasoani i ni galuega fesoasoani alofa ma le fesoasoani atu i isi e sailia o latou gafa e oo i le fesoasoani i taumafaiga a le va i fafo ma le aoaoina atu o le talalelei toefuataiina a Iesu Keriso.

“Mai o’u lava aafiaga e mafai ona ou ta’uina atu latou te suesue, latou te tatalo, latou te matuai popole lava i fanau taitoatasi a le Atua aemaise lava o agaga o i latou o e e mafai ona latou aoaoina,” na saunoa ai Elder Ballard. “Latou te feagai ma le teenaina ma o nisi taimi o upu taufaamata’u. Ae latou te tutumausali pea. Latou te auauna atu, latou te fesoasoani i isi, ma latou te faia mea e sili atu nai lo mea e talosagaina ai i latou ina ia siitia ma faamanuiaina ai tagata i tulaga uma i le lalolagi ma soo se ituaiga tagata.”

I le feiloaiga ma le au tusitala, sa tulai ai Elder Ballard faatasi ma faifeautalai sa ia saunoa o loo fai ma sui o le agaga faafaifeautalai. Sa aofia ai se ulugalii Aferika moni mai Kenya na valaauina e pulefaamalumalu i se misiona i Nigeria; o se soa faifeautalai tamaitai, e toatasi mai Korea i Saute ma le isi mai Mekisiko, e galulue i le Lotoa o le Malumalu i le Aai o Sate Leki; o se ulugalii matutua mai Iuta o loo auauna i se misiona o fesoasoaniga alofa lea e aveina atu ai i laua i le lalolagi atoa e fesoasoani i le tuuina atu o vaiinu mama i le tele o afioaga; ma se soa o alii talavou, e toatasi mai Pasila ma le isi mai Idaho, o e le’i leva ona ulufale i le Nofoaga Autu e Aoaoina ai Faifeautalai e sauniuni ai e tautua i Iapani.

O alii talavou, o Samuel Pelaquim ma Brandon Soelberg, ua taufai tolopo uma a la aoga i le kolisi ina ia faaalu le isi lua tausaga o o la olaga e aunoa ma se televise, tafaoga faamasani, ma isi gaoioiga faaletalavou ina ia talai atu le talalelei. “Ua manatu nisi tagata ua tele mea ua ou tuueseina ina ia auauna atu ai i se misiona,” na saunoa ai Elder Soelberg. “Ae o le mea moni ou te lagonaina e tele ni mea e ao ona ou tuuina atu. Ua leva ona ou iloa lo’u manao e auauna atu i se misiona, o lea la ou te le o lagonaina o se osigataulaga ia te au. Ou te moomia ona faia lenei mea; ou te manao e fai.”

Na ioe foi i ai Elder Pelaquim. “O se avanoa matagofie le auauna atu,” o lana tala lea. “Talu mai lo’u laitiiti sa ou matauina lava se eseesega i lo matou va ma a’u uo. Sa i ai ni o latou faafitauli lea sa ou le popole i ai, ma sa ou iloaina lava o le talalelei na mafua ai lea eseesega.”

O le eseesega lena na aumaia ai matua o Unbyul Cho i le Ekalesia, e tusa ai ma le faamatalaga a lea tamaitai e 22 tausaga le matua mai Seoul, Korea i Saute. “Sa ou manatunatu pea lava pe o le a se mea e tupu i lo’u aiga ma au pe ana le galulue auauna faifeautalai i Korea,” o lana tala lea. “Sa ou manao ou te auauna atu i se misiona ina ia fesoasoani i isi ia maua faamanuiaga lava ia e tasi o loo olioli ai lo’u aiga.”

E faapena foi le vaaia e Gazelem Munoz o le toatele o tagata o le aiga ua auai i le Ekalesia i lona nuu moni o Mekisiko. “Ua suia ai lo’u aiga. Ua suia ai lo’u olaga, ma e faamoemoe o le a fesoasoani e suia ai i le lelei ia olaga o isi tagata a o o’u [aoaoina] i latou i le avea ai ma se faifeautalai.”

O le feiloaiga ma le au tusitala sa faia i talaane o le faatagata apamemea o Samuelu Samita, le uluai faifeautalai a le Ekalesia. O le 1830, le tausaga na faavaeina ai e le Perofeta o Iosefa Samita le Ekalesia, sa na o le 16 faifeautalai sa valaauina. O le taimi nei, i le 177 tausaga mulimuli ane, e tusa ma le 53,000 faifeautalai—alii talavou, tamaitai talavou, tuafafine matutua, ma ulugalii matutua—o loo auauna atu nei i le lata i le 350 misiona i le lalolagi atoa.

Ma o le latou galuega ua o’o atu i le toatele. Na faasilasilaina foi e Peresitene Hinckley e faapea, ua ausia nei le 13 miliona o le faitau aofai o tagata o le Ekalesia i le lalolagi atoa. O loo faaauau pea ona toatele atu tagata o le Ekalesia i fafo atu o le Iunaite Setete nai lo totonu, ua atagia ai le loloto ma le lautele o tagata auai o le Ekalesia.