O Se Perofeta i le Lalolagi
Ou te talitonu i taimi uma o Iesu o le Keriso, o le Mesia na folafolaina, na afio mai i le lalolagi i le 2,000 tausaga ua tuanai ma o loo ia i tatou se perofeta soifua a le Atua i luga o le fogaeleele i aso nei. Ae o lo’u tama, o Roy Swartzberg, o lē na ola ae o ia o se Iutaia, na te le’i iloa i taimi uma.
I le ola ae i se aiga Iutaia i Aferika i Saute, na iloa e lo’u tama ia perofeta o le Feagaiga Tuai, e pei o Mose ma Elia, ma na ia iloa foi vavega na latou faia. Ina ua ia faalogo i le vaeluaina e Mose o le Sami Ulaula po o Elia i lona aumaia o le afi mai le lagi, na ofo ai i mea e mafai ona faia e nei alii mo tagata ma ia manatunatu ai pe aisea ua leai ai ni perofeta i luga o le fogaeleele i nei ona aso.
I se taimi puupuu lava ina ua uma le sauniga faaIutaia a lo’u tama e siitia mai lona talavou e avea o se tagata matua na ia faalogo muamua ai e uiga i le Perofeta o Iosefa Samita. I le taimi lena o loo nofo i matua Iutaia o lona tina. O lona tina ua maliu, ae o lona tama ua toe faaipoipo atu ma ua auai i le Ekalesia.
I se tasi aoauli na sau ai le uso matua o lo’u tama, o Mark, ma la nofonofo ma tau atu ia te ia o ia ua auai i le Ekalesia a Iesu Keriso o le Au Paia o Aso e Gata Ai. Ona ia faamatala atu lea i lo’u tama e uiga ia Iosefa Samita, o le Uluai Faaaliga, ma le Toefuataiina o le talalelei ma perofeta i luga o le fogaeleele. Fai mai lo’u tama na ia faalogoina se lagona sa’o a o ia faalogologo atu i lona uso matua o tuuina mai lana molimau, ma ua leva ona i ai le faatuatua o lo’u tama i le Tama Faalelagi ma perofeta. Ia te ia, o se talafou mamalu lenei! Sa i ai perofeta i luga o le fogaeleele, ma ua toe mafai ona talanoa tagata ma le Atua. Na ia lagonaina se lagona moomoo ia moni le talafou ua ia maua.
Ina ua uma ona faasoa atu lana molimau i lo’u tama, na valaaulia o ia e Mark ina ia tatalo e uiga i ai. Ae i le avea ai o ia o se tamaitiiti Iutaia, sa na o le tatalo faaIutaia sa mafai ona ia faia, o le tu lea i luga ma faasaga atu i le itu o loo i ai Ierusalema, le Aai Paia. Na faamatala atu i ai e Mark le auala e tatalo ai tagata o le Au Paia o Aso e Gata Ai: tootuli, ma piilima e faailoa atu ai le migao. O se mea fou lena ia te ia. Na ia tootuli e tuuina atu lana lava uluai tatalo i le Tama Faalelagi.
E ui lava o le tala fou na maua e uiga i perofeta e tonu i le lagona o lo’u tama ma sa ia maua foi se lagona lelei ina ua uma ona ia tatalo, ae na tonu ia te ia e le faalogo i lesona a faifeautalai i le taimi lava lena.
E le’i umi ae auina atu loa o ia ma lona uso e nonofo faatasi ma matua o le toalua lona lua o le la tama, o ni tagata o le Ekalesia. E auai atu le aiga i le Aso Sa i sauniga o le Sapati, ae sa faaauau pea ona alu lo’u tama i le sunako o tagata Iutaia i po uma o Aso Faraile ma taeao uma lava o Aso Toonai e faamamalu le Sapati a Iutaia.
Ae peitai, e ui i lena, ae na amata ona auai atu o ia i gaoioiga o le Mutuale faatasi ma lona uso, ma ina ua amataina le polokalama o le seminare i Aferika i Saute, na ia auai atu foi i ai. O iina na ia aoao ai i le Tusi a Mamona. O le mau muamua lava na ia taulotoina i se isi gagana e ese mai le faaEperu o le 1 Nifae 3:7: “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou.”
Sa maelega faifeautalai e asiasi mai ia te ia e faatasi i le vaiaso, ma ina ua mavae sina taimi ona amata lea ona auai atu o ia i sauniga faamanatuga ae alu lava foi i ana sauniga faaIutaia. Mulimuli ane, na ia maua se molimau ia Iesu Keriso o le Mesia, na tonu ai loa e faalogologo i lesona a faifeautalai. Na papatisoina lo’u tama i le Aso Kerisimasi o le 1973—o le taimi muamua lea ua ia faamanatuina ai le aso soifua o le Faaola.
O le tala e uiga i le faigamalaga a lo’u tama e agai atu i le upumoni ua ou maua ai se vaaiga mamao sili atu, ma o lana molimau e uiga i perofeta ua avea o se vaega o la’u lava molimau. O aso nei o loo ou asoaina ai se tamai filifili o le Fetu a Tavita o se faailoga lea e fesootai atu ai a’u i lo’u tupuaga Iutaia, lea ou te mitamita ai ae faapena foi ona avea o se faailoga o le faatuatua. Aua o lo’u tama sa faatuatua o ia i perofeta talu mai lona talavou ma ua faamanuiaina a’u i lea lava faatuatuaga e tasi.
Ou te iloa o Peresitene Gordon B. Hinckley o se perofeta o aso nei e pei lava o Mose o anamua, ma ou te matua faafetai lava mo lena mea moni! E moni lava ua avanoa le lagi, ma e ala i faaaliga, o fesootaiga ma lo tatou Tama Faalelagi ua faaauauina pea i aso nei e pei o aso anamua.