O Meaalofa Silisili o le Kerisimasi

… o meaalofa ia e sau mai le loto ma atiina ae ai lo tatou faatuatua.

O le taimi o le Kerisimasi o se vaitau lea o le foai atu o meaalofa, e faamanatu ai meaalofa na tuuina atu e le Au Makoi ia Keriso le pepe meamea ma le meaalofa na tuuina mai e Keriso ia i tatou e ala i le Togiola.

E lagonaina le fiafia a o tatou tulimatai atu i le foai atu ma le taliaina o meaalofa. E eseese uma lava meaalofa i o latou lapopoa ma foliga, ae foliga mai o meaalofa sili o meaalofa ia e le mafai ona afifi: o meaalofa o le auauna atu, aiga, faatuatua, ma le molimau.

Ia maua le fiafia i mea nei e manatuaina pea mai le tatou au faitau e faatatau i meaalofa na foai atu ma meaalofa na taliaina.

Nai faamanatu faigofie. O le meaalofa sili lava na ou maua na foai mai lea e lo’u tinamatua ma e aofia ai ni mea se lua: o se taga aluga ma se asoa o loo tautau ai se lote. E ui lava o ni mea faatauvaa, ae e matua taua tele ia te au. O lo’u igoa o loo lolomi ai i luga o le taga aluga i ni mataitusi e susulu i le pogisa, ma o lalo ifo o lo’u igoa o loo lolomi ai le fesili faapenei, “Pe na faia sau tatalo?” Soo se taimi lava ou te oso ai i lo’u moega ae le’i faia sa’u tatalo, e faamanatu mai lava e upu nei e susulu i le pogisa ia te a’u ina ia ou tootuli ma tatalo.

O le lote o loo i ai ni ata se lua: o lo’u ata ma le ata o le Faaola. E faamanatu mai e le taga aluga ia te a’u ina ia ou tatalo i le fale, ae faamanatu mai e le lote ia te a’u ina ia ou faapei o le Faaola i le aoga ma isi nofoaga ou te alu i ai.

Paige I., Iuta, ISA

Sauniga Lotu a le Au Peresitene Sili. O se tasi o mea sili ona ou fiafia i ai i le Kerisimasi na tupu lea ina ua tasi ma le afa tausaga talu ona avea a’u o se tasi o le Ekalesia. Sa ou faalogologo ai i le sauniga lotu o le Kerisimasi a le Au Peresitene Sili. O se mea matagofie lava i taimi uma le faalogologo i le perofeta, ae o le vaitaimi o le Kerisimasi e faapitoa lava lona matagofie.

A o matou nonofo i le falesa ma faalogologo atu i upu a le perofeta, sa matuai malosi lava lo matou lagonaina o le agaga. O ana saunoaga e loloto, ma sa mafai ona sili atu ona ou malamalama lelei i le agaga moni o le Kerisimasi ma le taua o le alofa atu i o tatou tuaoi ma tuuina atu auaunaga. Ae sili ai ona taua, na faamalosi atili ai la’u molimau e uiga ia Iesu Keriso i lena lava aso.

A o o’u laitiiti, ou te maua lava i taimi uma meaalofa na ou manao i ai i le taimi o le Kerisimasi, ae ou te le’i maua lava se meaalofa e sili atu ona manaia nai lo le faalogologo i se perofeta o saunoa mai o loo soifua Iesu Keriso ma o Lana Ekalesia moni lenei.

Alvaro M., Uruguay

O le kata na gaosia lava i le fale. E le tele ni tupe ou te maua, o lea ou te gaosia ai meaalofa ou te tuuina atu i tagata. O le meaalofa o le Kerisimasi sili ua ou tuuina atu o se kata lea na ou faia i o’u lava lima. O se mea manaia ia te a’u aua ou te iloa sa ou faia mo se tasi ou te alofa i ai. Ou te faaaogaina soo se mea e maua i le fale, e pei o filo, o nila, o ie, ma kata.

Cassie W., Uosigitone, ISA

Fetu pepa. O a’u e afa Tailani toe afa Amerika. E tolu tausaga o o’u nofo i totonu o Laos, e sosoo ma Tailani. Mo le lua tausaga muamua na ma i ai i totonu o Laos, na faafaigaluegaina ai e o’u matua se pileang, se tausitama, e igoa ia Roiana, o le na tausia faalelei au. Ona o ia o se tamaitai e auai i le tapuaiga Puta, na ou le manatu ai e maua sa’u meaalofa o le Kerisimasi mai ia te ia.

I le taeao o le aso Kerisimasi na ou maua ai se fagu ua faatumuina e le itiiti ifo ma le selau ni tamai fetu pepa, ua gaugauina ina ia maua ai se foliga faatafatolu. O nei fetu pepa e lanumoana ma lanupiniki ma e ilaila. O Roiana e leai sana tupe e faatau ai se mea mo au, o lea na ia faaaluina ai le tele o itula e gaugauina ai nei fetu pepa mo se tamaitiiti e le o sana tama.

O se meaalofa matagofie o le Kerisimasi, o se meaalofa na faaaluina ai le tele o taimi ma taumafaiga.

Faye H., Virginia, ISA

Kerisimasi o se aiga. Ae ou te le’i auai i le Ekalesia, na ou manatu lava o le Kerisimasi ua na o se taimi lea e ofuina ai e tagata ofu fou ma seevae fou ma o le taimi foi lea o moli felanulanuai ma feemoemoai. Ae i se tasi Tesema ina ua ou auai i le Ekalesia, na ou maua ai se tusi ma se faamanuiaga mai le faifeautalai na papatisoina au. I le tele o ana upu, na tulaga ese lava upu nei ia te au: “O le Kerisimasi o se aso lea e mafai ai ona tatou faatasi ma o tatou aiga ma faia se taumafataga matagofie o le afiafi ma aai faatasi.” O se fuaiupu puupuu, ae sa tele sona taua ia te au.

I lena aso na ou valaau atu ai i tagata uma o lo’u aiga e vaai pe mafai ona latou o mai uma mo se taumafataga tele o le Kerisimasi i le afiafi. E toatele na faateia aua matou te le’i faamanatuina muamua lava o se aiga ia le Kerisimasi, ae na latou taliaina uma lava le valaaulia. Sa matou galulue malolosi ma o’u uso ina ia lelei mea uma mo le matou uluai taumafataga o le afiafi faatasi o se aiga. O mea uma lava sa faigofie, ae sa matua fiafia lava lo’u tina, ma na faagaeetia tagata uma ina ua faatasitasia.

O lena Kerisimasi o le Kerisimasi sili lea ona fiafia na ou maua, ae na mafua ona tupu ona o se faamanuiaga ma se tusi faatauvaa na faamanatuina mai ia te a’u o le Kerisimasi o se taimi e faamanatuina ai faatasi ma o tatou aiga le soifua mai o le Faaola. Talu mai lava lena taimi, ua matou faamanatuina ai lava o se aiga ia le Kerisimasi.

Gedalva S., Pasila

O se Kata Faamanuia Ola o le Kerisimasi. Ao ou auauna o se faifeautalai i totonu o Pasila, e leai ma se ma feiloaiga tuupoina i le po o le Kerisimasi na taunuu, o lea na ou fautua atu ai loa i la’u soa, “Ta o e fai i taua ma kata faamanuia ola o le Kerisimasi ma asi o ta tuaoi!” O le mea na ou ofo ai, ona sa talia lelei i maua i fale taitasi uma lava. A o ma lagiina viiga matagofie o le Kerisimasi ma faitauina mau e faatatau i na viiga, na ou maua se faalogona uiga ese ma le loloto. Na ou malamalama atili ai i le alofa o le Faaola, ma na mafai ona ou iloa atu loimata i mata o o ma tuaoi o e na masalosalo ia i maua i le taimi muamua. Ina ua ma toe foi atu i le fale ma fai le ma meaai, na ou tusia ai le faamatalaga lenei i la’u tusi o talaaga: “O le po nei na matou faamanatuina faatasi ai ma o matou tuaoi le soifua mai o le Tupu o Tupu. O le Agaga na faamalamalamaina i matou ma faalotogatasia i matou mo le faavavau.”

Nivaldo P., Pasila

Kerisimasi ese mai le aiga. O la’u meaalofa e sili ona ou fiafia i ai o le Kerisimasi muamua lea na ou fai Kerisimasi ese ai mai lo’u aiga, ina ua matou o ma o’u matua, o lo’u uso, ma a’u, e asiasi i lo’u tuagane ma lona aiga.

Ua matou masani lava i le fai Kerisimasi i lo matou fale, ae o le tausaga lenei na o ai isi o’u tei i se isi mea, ae na matou filifili e asiasi atu i lo’u tuagane o Josh ma lona aiga aua e le mafai ona o mai i lo matou aiga. Na ou le mautinoa po o le a se mea o le a oo i ai, ma na ou manatu ai afai matou te le nonofo i le fale i le Kerisimasi, o le a le manaia lena. Na foliga mai o le Kerisimasi o le a le tutusa lava. Ua uma ona talai a matou meaalofa, o a’u, o’u matua, ma lo’u uso ae matou te le’i tuua lo matou aiga.

Ina ua sau lou tuagane e avatu matou mai le malaevaalele, sa amata ona usuusu e le afafine o lo’u tuagane e fa tausaga lona matua, o Kialey, ia pese Kerisimasi, ma na amata ona ou maua ai se lagona lelei. I le taeao o le Kerisimasi na ou fiafia e vaavaai atu i foliga o fanau a lo’u tuagane ua faatumulia i le fiafia a o latou tatalaina a latou meaalofa. O se mea manaia le vaai atu i isi o talai a latou meaalofa ma lagonaina lo latou fiafia, nai lo le taulai atu po o le a se mea ua ou maua i la’u meaalofa.

Hannah S., Montana, ISA

Meaalofa o le papatisoga. Sa ma aoaoina ma la’u soa se teineitiiti e 14 tausaga le matua e igoa ia Mafa, ma ua latalata lava ona saunia o ia mo le papatisoga ma le faamauga. E le toe tele lava ni lesona ma te aoaoina atu, ma sa manaomia ona tuu lona toe faigaluega i Aso Sa ina ia mafai ai ona sau o ia i le lotu. Na fiafia o ia i mea ua ia aoaoina ma talitonu i ai, ae peitai e faigaluega o ia mo le uso o lona tina ma ua laitiiti tele o ia mo se isi lava galuega. Na tauivi Mafa ma lea filifiliga, o lea na ma aoaoina atu ai ia te ia faamanuiaga o le Aso Sapati ma uunaia o ia e tatalo.

O le Afiafi a o Lumanai le Kerisimasi o se aso timu tele, ma ina ua toeitiiti lava oo i le taimi e malaga ai i le fale, na ma lagona ai e tatau ona ma afe atu e faatalofa ia Mafa. E tau tuitui atu le faitotoa, ae tamoe mai o ia i fafo ma fusi i ma’ua, ma oso i luga ma faapau ifo ma le fiafia. Na faapea mai, “Ou te le toe faigaluega i Aso Sa! O le a ou alu atu i le lotu! O a’u o le a ou papatiso!” E oo lava i le timu ua foliga mai o se mea matagofie ina ua mavae lena feiloaiga. E foliga mai o le Afiafi a o Lumanai le Kerisimasi o le taimi sili lea e vaai atu ai i se tasi ua faia se faaiuga e tuuina atu lona ola ia Keriso. O i ma’ua o ni faifeautalai e toalua sa sili ona fiafia ua outou vaai i ai.

Erin B., Iuta, ISA

Aiga. O le meaalofa sili o le Kerisimasi na ou mauaina o le taimi lea ina ua toe faatasitasia uma i matou ma o’u uso, tuagane, ma lo’u tama mo le taimi muamua ina ua tuanai le tele o tausaga. O lo’u aiga e sili ona ou alofa i ai nai lo se isi lava mea i le lalolagi, ma na matua faafiafiaina ai lo’u tama, lea foi na faafiafiaina ai a’u.

Heather R., Iuta, ISA

Meaalofa o le ola maloloina. Ia Oketopa na matou faalogoina ai se tala na faateia ai i matou e faapea o le matou peresitene faapelepeleina o le siteki o loo mafatia o ia ina ua oso lona fatu ma ua koma ai o ia. Ua mavae atu le tele o vaiaso, sa tatalo faatauanau tagata o le matou siteki mo ia. Sa matua popole lava fomai, ae peitai ane na toe te’i mai o ia mai le koma ma sa matuai tele sona suiga manuia na i ai. E nofo o ia i la’u uarota, ma i se tasi o Aso Sa a o le’i oo i le Kerisimasi na ou savali atu ai i totonu o le falesa ma na faateia a’u ina ua ou vaai atu o nofo mai o ia i luga o le tulaga. Ina ua maea lauga a le au failauga, sa tulai le peresitene o le siteki i le pulelaa ma tau mai ia i matou e faapea sa ia lagonaina lava le mana o a matou tatalo. A o o’u vaavaai atu ia te ia, na tafe ifo o’u loimata i o’u alafau, na ou iloa ai o le toe faafoisia o lona ola maloloina o se meaalofa sili lea o le Kerisimasi mo i matou uma lava.

Katie B., Uosigitone, ISA

“O le agaga o le Kerisimasi o le agaga lea o le alofa atoa ma le agalelei ma le amiolelei. E faapupulaina ai mata faaleagaga, ma vaavaai atu ai i le olaga vevesi o le lalolagi ma sili atu ai ona naunau i tagata nai lo mea faaletino.”

Peresitene Thomas S. Monson, Fesoasoani Muamua i le Au Peresitene Sili, “O Le Meaalofa Silisili,” Sauniga Lotu o le Kerisimasi a le Au Peresitene Sili, Tesema 3, 2006.