Monokolia Laasaga o le Faatuatua
O le talalelei e fou lava i totonu o Monokolia, ae a o suia e tagata o le Ekalesia i latou lava e ala i le faatuatua ia Iesu Keriso, ua faapena foi ona latou suia le lalolagi o loo siomia ai i latou.
O loo vaneina i autafa o le mauga i fafo atu lava o Ulaanbaatar, le faatusa o Genghis Khan ma e faafeagai lelei lava ma le laumua o Monokola i lo latou nuu. O le faatusa tele o le khan tautaua o se faamanatu lea e faapea na ia pulea se malo e aofia ai le tele o le vaega o Asia, o Sasae Tutotonu, ma ni vaega o Europa i Sasae. “I totonu o le luasefululima tausaga, e sili atu eleele ma tagata na pulea e le vaegaau a Monokolia nai lo nuu ma tagata na pulea e Roma i totonu o le faselau tausaga… . E sili atu ma le faaluaina le tele o nuu ma laueleele na pulea e Genghis Khan nai lo se isi lava tagata i le talafaasolopito.”1 O suli o le khan ma lo latou aafiaga o le a avea ma ni vaega malolosi i le talafaasolopito mo le tele o seneturi o le a sau.
Ia Iulai 2006, na faamanatuina ai e Monokolia le 800 tausaga talu ona faavaeina le malo o tagata Monokola. I aso nei, atonu o le a taua e nisi lenei atunuu o se “atunuu tau atiae,” ae peitai e tatau ona faaaogaina lena faaupuga i sona uiga lelei. O tagata Monokolia sogasoga ma le malolosi ua latou faanatinati le atiina ae e le gata i lo latou atunuu ae faapea foi o latou lava tagata.
Mo nisi tagata, o lenei mea e aofia ai le atiina ae o le faatuatua ia Iesu Keriso. E afua mai i le vaitaimi o le 1920 e oo mai i le 1990, e aunoa ma se tapuaiga na aloaia faaletulafono i totonu o Monokolia. Na taunuu i ai faifeautalai o le Au Paia o Aso e Gata Ai i le 1993. O le taimi nei ua lua itu ma paranesi e 20 i totonu o Monokolia, faatasi ai ma le silia i le 6,000 ona tagata auai. Na iloa e faifeautalai o le tele lava o tagata Monokolia ua saunia e talia le talalelei.
O nisi nei o a latou tala.
Purevsuren
Na amata iloa e Sh. Purevsuren le Atua ma tala mai i le Tusi Paia ao aoga o ia i se iunivesite i Rusia. (E masani lava ona faaaogaina e tagata Monokolia o latou igoa muamua, ae pito i luma i o latou igoa muamua mataitusi muamua o o latou faaiu ona o ni faamoemoega faalemalo.) Na faatauina mai e ia se Tusi Paia mai se isi alii aoga aua o le tusi e tusia faaRusia i le isi itulau ae o le itulau e faafeagai ai e faaPeretania. Na faitauina faalilolilo e Purevsuren i lena po ina ia aoao ai lana Igilisi; o lona faitauina i se nofoaga faitele o le a avea lena ma mea e faatea ai o ia.
Na aoao o ia e lona tama i aoaoga faavae a le tapuaiga Puta o le mamalu ma le sa’o, ma sa taumafai lava e le aunoa Purevsuren e ola i na aoaoga. O lona faanaunauga faaleagaga i le Tusi Paia na maua ina ua faatoa toe foi lava i Monokolia, faaipoipoina, ma avea o se polofesa o le iunivesite. Na ia asiasi atu i Initia ona o lana galuega. O se tagata Kerisiano na ia feiloai i ai iina na tuuina atu ia te ia se Tusi Paia ma faasoa atu ai lagona e uiga i le paia o Iesu Keriso. Na manatua e Purevsuren aoaoga a lona tama e uiga i se olaga e mulimuli mai pe a mavae lenei. “E i ai sou talitonuga faavae e uiga i le Atua mai lo’u tama,” na ia faapea mai ai, ma na amata ona manatunatu pe faapefea ona manao le Atua ia te ia ia saunia mo le isi olaga.
I le avea ai o ia o se faauluuluga o se faalapotopotoga o faiaoga a Monokolia, na valaaulia ai o ia e asiasi atu i le Iunaite Setete, lea na ia faatoa vaai ai lava mo le taimi muamua i le Tusi a Mamona. I totonu o Iuta, na tuu atu ai e se tagata o le Ekalesia o lē sa talimalo i le latou aumalaga se kopi o le tusi. Na faitauina e Purevsuren mo sina taimi puupuu ona ia tuueseina lea.
Ia Setema 2000, na feiloai ai lona aiga ma faifeautalai o le Au Paia o Aso e Gata Ai i totonu o Monokolia ma faalogologo i lesona a faifeautalai. O le taimi lea na ia faitauina ai le Tusi a Mamona i ni mata fou ma maua ai le upumoni na ia tau sailia. Na papatisoina ma faamauina o ia ma lona faletua i le masina lava lena o Novema. I le na o se vaiaso pe lua mulimuli ane, na valaauina ai o ia o se peresitene o se paranesi.
Sa le’i fiafia le la fanau i le taimi muamua i lenei lotu fou. O lo la atalii, sa aoga i le aoga maualuga i le taimi lena, na matuai malosi lava lona faatautee, ae peitai, o le agaga usiusitai na ia malie ai e talia le talosaga a lona tama ina ia faalogologo i faifeautalai. Na iu lava ina papatisoina ma faamauina lenei fanau e toalua. Na auauna atu lona atalii i se misiona i Idaho.
I le taimi nei o Purevsuren ua matuai aafia lava i le aoaoina o tagata talavou a o avea ai o ia o se taitai faamaopoopo i le Ofisa o Aoga a le Ekalesia mo Monokolia, o se tofiga na tuuina atu ia te ia i le 2001.
O loo i ai nei e tusa ma le 600 tamaiti aoga o le inisititiuti i totonu o Monokolia ma nisi e 700 i le seminare. O na fuainumera ua faatupulaia nei e tusa ma le 300 pasene talu mai le 2001, e ui lava o tamaiti aoga e maualuga le feagai ai ma feteenaiga mai tagata o o latou aiga, ma le tau o le auai atu i ai, o le taimi foi ma le feoaiga.
O le a le vaega e pito i sili ona tauia o lana galuega? “O le mea aupito sili lava, i lo’u lava manatu, o lo’u vaai atu lea i le toatele o tamaiti o auai i le Ekalesia e ala i le seminare” a o faapena ona o mai tamaiti aoga ma aumai a latou uo.
Soyolmaa
“Na avea a’u o se teineitiiti faigata,” o le tala lea U. Soyolmaa, a o ia toe tepa i tua i le vaitaimi a o i ai o ia i le aoga maualuga ina ua maliliu ona matua. Na aafia Soyolmaa i le inu ava malosi ma alu i pati a o i ai o ia i le iunivesite i Rusia. Ina ua toe foi o ia i Monokolia, na faateia o ia ina ua valaaulia o ia e se tasi o ana uo sa latou pati i aso ua tea ina ia la asiasi atu i se lotu. Na foliga mai na matuai suia lava lana uo.
O Soyolmaa e le faapea e le masani o ia i aoaoga Kerisiano, ae o le taimi muamua na teena ai e ia le valaaulia a lana uo. Ina ua ioe mulimuli ane o ia i le valaaulia, na ia lagona le fiafia ae na te le iloa pe aisea. I sauniga a le Ekalesia, na matuai pueina o ia i lagona o le filemu i le taimi lava lena, e i ai sona faasinomaga, o le iloa lea o le mea e agai i ai lona olaga. Na auai Soyolmaa i le lotu a lana uo, ma i le 1995, o i laua lava uluai faifeautalai na valaauina mai Monokolia. O Soyolmaa na auauna atu o ia i Iutā.
I le taimi nei o loo avea o ia ma faatonu o le Pulega o Meatotino a le Ekalesia i totonu o Monokolia. O loo avea foi o ia ma faatonu o le va i fafo mo le atunuu, o se fesoasoani i le au peresitene o le Aualofa a le itu, ma o ia foi o se faiaoga o Aoaoga Faavae o le Talalelei i lana paranesi.
“O se faamanuiaga le avea ai ma se tagata o le Ekalesia,” na ia saunoa ai. “Talu ai ona o loo o’u i ai i totonu o le Ekalesia, o loo faaauau pea ona alualu i luma lo’u olaga.”
E le lauiloa le Ekalesia i totonu o Monokolia, ma e sili atu le tele o faamatalaga taufaaleaga e uiga i le Au Paia o Aso e Gata Ai nai lo faamatalaga lelei. E tatau ona i ai pea lava taumafaiga e faasalalau atu le upumoni.
O tagata o le Ekalesia o i latou na o ni amepasa sili mo le Ekalesia. E tulaga ese i latou, o lana faamatalaga lea, ona o “lena malamalama, lena fiafiaga” e vaaia i o latou foliga. Latou te maua se lagona maumaututu, se olioli e ala i le talalelei lea e anoanoai isi tagata latou te le o maua.
E pei lava o tagata o le Au Paia o Aso e Gata Ai i soo se mea, o lana tala mai lea, o tagata o le Ekalesia i totonu o Monokolia “e tutusa lava o latou talitonuga, o le mea lea o i tatou o loo i totonu o le talalelei o i tatou o se aiga tele e tasi.”
Odgerel
Ina ua valaaulia o ia e lona tina e asiasi atu i se lotu Kerisiano i le 1995, sa le’i iloa e le tamaitai o O. Odgerel ua leva ona avea o ia o se tagata o le Ekalesia. I lona faigaluega ai i se faletusi mo tagata lautele, o ia e nafa ma le faauneina atu o le faaaogaina o le potu fono o le faletusi. I le tosina atu i pese na ia faalogo atu o sau mai lena potu i se tasi aso, na valaaulia ai o ia e faatasi atu i le fonotaga. Mulimuli ane, sa ia faalogologo i lesona a faifeautalai ma papatisoina ma faamauina ai.
Na fanau Odgerel i totonu o Rusia a o avea ona matua o ni tagata aooga iina ma na aoaoina i laua i aoaoga faakomunisi a Rusia: toeitiiti lava avea ma ana ekalesia. Ae ina ua malepe le faiga faakomunisi, o mea uma na ia talitonu i ai ua mou atu. Na liliu o ia i le inu ava malosi ma le alu i pati, ma lona manatu e pau lava le faamoemoega o le olaga o le faafiafiaina lea o lou tagata ae e te le’i oti. Ae peitai, e le’i umi ae ia iloaina o lenei ituaiga olaga e leai se taunuuga lelei ma ua tatau ona ia tuua mea ua ia iloa e afaina ai o ia.
E pei lava o le tele o isi tagata Monokolia, na iloa le faigofie ona talia le Tusi a Mamona ina ua ia faitau i ai. “O tagata Monokolia atonu e vave ona latou mauaina le talalelei aua e faigofie ona latou iloa atu mea lelei o i ai,” o le tala lea a Odgerel. Latou te “tatala atu i ai o latou loto ma le faamaoni.” E faapena foi o ia. Na ia lagona o loo i ai se Tagata Silisili Ese. O le talalelei, na ia maua ai se Atua ma se ituaiga o olaga e mafai ona ia talitonu i ai. “O le taimi sili lena na ou fiafia ai,” ua ia faapea mai ai.
E mafai ona faamanuiaina tagata Monokolia mai le toe faafouga lea e aumaia e le talalelei i olaga o tagata, na ia saunoa ai. O le inu ava malosi o se faafitauli; e faapena foi le ola le mama. I totonu o Monokolia, ua na o faataitaiga faalelalolagi o i ai, ma ua matuai faamalosia i le taimi nei e ala i le televise, ina ia suia ai le amio. E leai ma se tu ma se aga faalelotu malosi o i ai nei e tetee atu i ai. Ae e ala i le talalelei a Iesu Keriso, ua fai mai ai Odgerel, ua maua ai e tagata se auala amiotonu e taitaiina ai o latou olaga.
O Odgerel o le peresitene o le Itu a Ulaanbaatar Monokolia, lea e 11 paranesi o i ai ma le 3,700 tagata auai. E tusa ma le 70 pasene o tagata auai e nofo fua.
Ankhbayar
Na auauna atu E. Ankhbayar i le Misiona a le Aai o Sate Leki Iutā i Saute mai le 2001 e oo i le 2003. I le taimi lenei ua silia i le 20 ona tausaga, o ia o le taitai o le autalavou matutua nofofua i le itu a Ulaanbaatar.
E leai ma se Igilisi e mafai ona tautala ai o ia ina ua maua lona valaauga faamisiona; e toalua ni faifeautalai Amerika na laua lauina atu ia te ia le tusi. O le taimi nei o loo pulea e ia le faletusi tutotonu e na o le tasi le potu i ofisa o le Ekalesia i Ulaanbaatar, i lona fesoasoani lea i tagata o le Ekalesia ina latou maua mea e faaaogaina i le talalelei gagana Monokolia ma mea e faaaogaina o loo maua i le faaPeretania mo i latou o e mafai ona faaaogaina. Na ia faapea mai i le avea ai ma se faifeautalai, na ia fesoasoani ai i tagata ina ia aoao e uiga i le talalelei, ma o loo ia faia lena lava mea e tasi.
Na oo mai Ankhbayar i totonu o le Ekalesia i le 1998 faatasi ai ma isi tagata o lona aiga—o ona matua ma lona uso laitiiti. A o auai atu lona aiga i se sauniga a le Ekalesia, e lua ni ana miti na aafia o ia. I ia miti e lua o loo ia sola ese ai mai ni faatamaiga ina ua faasaoina o ia e se tagata e susulu ma pupula malosi. Na tau atu e matua o Ankhbayar ia te ia i se taimi mulimuli ane o lena tagata pupula malosi e le masalosalo i ai o le Faaola lea ma valaaulia o ia ina ia tatalo e uiga i lana miti. O le tali na ia maua na taitaiina atu ai o ia e faalogo i le talalelei.
Ae latou te le’i auai i le Ekalesia, “sa le fealofani lo matou aiga,” na ia fai mai ai. O le taimi nei “ua matou fetalatalanoaai o le tasi i le isi. Ua mafai ona ou lagona le alofa o lo’u tina ma lo’u tama.” I totonu o le misiona, na maua ai e Ankhbayar se lagona o tagata o le Ekalesia o se aiga. O loo galue nei o ia e faasoa atu le talalelei i uo ina ia mafai foi e i latou ona olioli i lenei faalogona.
O se tasi o tagata ua ia faasoa atu i ai le talalelei o lana uo tamaitai lea, o lē ua uma ona papatiso ma faamauina. Afai e tatau ona faaipoipo i laua, o le a feagai i laua ma se faaiuga faigata lea e toatele ulugalii talavou Monokolia o loo latou tauivi: o le mea e nonofo ai. E seāseā ona maua ni fale, ma e matua taugata lava mo le tele o ulugalii talavou. E iu ina nonofo faatasi ma matua i se fale mautotogi laitiiti po o le nonofo faatasi i se faleie faalapotopoto e tasi le potu faaleaganuu a tagata faimalaga Monokolia e taua o le ger.
Majigsuren
Talu ai ona o faifeautalai i totonu o Monokolia e le faatagaina le talai feoai, o tagata latou te aoaoina e maua mai lea e ala i fesili mai i ai po o tagata e faafesootai mai e tagata o le Ekalesia i faifeautalai. A maua e tagata Monokolia le talalelei, o tagata muamua latou te tuuina atu i faifeautalai e masani lava o tagata ia e pele ia i latou, o lea e masani lava i le tele o paranesi e aofia ai tagata o aiga lautele.
O Z. Majigsuren e nofo o ia i se tamai potu mautotogi i le nuu o Darkhan, i Monokolia, faatasi ma lana tane, afafine talavou e toalua, ma nisi o tagata o lona aiga lautele: O lana tama teine ma lona toalua ma le la tama teine laitiiti e nonofo ai foi iina. E faapena foi so la’ua atalii ma lona toalua ma le la pepe. O le toalua o le tama teine a Majigsuren o A. Soronzonbold, o le peresitene o le itu o Darkhan. O lona atalii o Kh. Sergelen, o le fesoasoani muamua lea i le au peresitene o le Paranesi Lua a Darkhan. Ma o Majigsuren e fesoasoani muamua i le au peresitene o le Aualofa a le paranesi.
Na muamua o mai faifeautalai i Darkhan i le 1996, ma sa papatiso ma faamauina o ia i le 1997, o ia o se tasi o paionia i totonu o le aai.
“Ou te faafetai tele ona o la’u fanau uma o ni tagata o le Ekalesia,” o lana tala lea. E manatua e Majigsuren le fua o le laau o le ola lea na vaai i ai Liae i le faaaliga (tagai i le 1 Nifae 8). “Ou te manao ou te ai i le fua o lena laau ma toe foi atu i lo’u Tama Faalelagi.” E manao foi o ia i lana fanau ina ia aai i le fua o le laau o le ola. E faafetai foi o ia ona e toalua i latou ua uma ona faamauina i o laua taitoalua i le Malumalu o Hong Kong i Saina: o lana tama teine o K. Selenge, o le ua faaipoipo atu ia Soronzonbold, ma Sergelen faatasi ma lona faletua o T. Altantuya.
Na faapea mai Majigsuren, o tagata o le Ekalesia, “e manaomia ona o mai i le lotu, latou te manaomia ona tatalo, ma latou te manaomia ina ia tumau i le faatuatua. O le mea sili ona taua o le faatuatua,” aua a aunoa ma lena, latou te le mafai ona faia isi mea.
O lana tama o Sergelen, na amata ona fiafia o ia i le Ekalesia aua na mafai ona ia iloa le auala na suia ai lona tina ma lona tuafafine ona ua avea ma ni tagata o le Ekalesia. Na faalogologo o ia a o aoaoina atu e se ulugalii faifeautalai matutua le tala ia Liae i lona tina, ma na ia iloa ai foi o loo taumafai lona tina ina ia taitaiina lana fanau ina ia faia le mea sao.
E pei lava o le toatele o tagata o le Ekalesia i Monokolia, o le tala lea a Sergelen, “ou te fiafia e faitau le Tusi a Mamona aua o taimi uma lava ou te faitauina ai ou te iloa ai ni mea fou.” O le tala i le Taitai Au o Moronae o se tasi lea o tala sili ona fiafia i ai. E faagaeetia foi o ia i le tala i le Iakopo 6:11–12, o loo valaau i tagata uma ina “ia outou salamo, ma ia ulu atu i le faitotoa moni.”
“Ou te faafetai lava ona sa ou maua le avanoa e auauna ai i se misiona i Rusia,” o le tala lea a Sergelen. E le toatele ni tagata na ia papatisoina ae na ia talitonu e tele ni fatu na totoina, ia o le a fuga mai i le lumanai. Talu mai le 1993, e silia i le 530 tagata talavou mai Monokolia ua maea ni misiona. E silia ma le 300 na auauna atu i totonu o le Iunaite Setete, ma se aofaiga tele foi na faia ni misiona i totonu o Rusia.
O le uso faaletulafono o Sergelen, o Soronzonbold, na avea mai lava o ia o se tagata o le Ekalesia ina ua 18 ona tausaga, ma o le taimi nei, i lona 20 ma ona tupu tausaga, o loo auauna atu o se peresitene o le itu a Darkhan, e lima ona paranesi. O ia o se tagata aoga o se iunivesite. “Ou te faafetai mo lo’u valaauga i le Ekalesia aua ua ou aoaoina ai le tele o mea,” o lana tala lea.
Na faamatala mai e Soronzonbold, e maofa tagata Monokolia, aua o tagata o le Ekalesia e galulue i totonu o le Ekalesia e aunoa ma ni totogi.
“A o le’i avea a’u o se tagata o le Ekalesia, sa ou manatu faapito,” ua faapea mai ai o ia. O le taimi nei o loo i ai ia te ia se sini o le aoao lea i mea uma na te mafaia e uiga i le talalelei. “O la tatou lui o le aoao ma tufa atu.”
Munkhsaihan
Ae na te le’i maua le talalelei, sa vaai atu A. Munkhsaihan i le lalolagi o se nofoaga pogisa e laitiiti se faamoemoega o i ai. O le mauaina o le faatuatua ma le faamoemoe e ala i le talalelei na suia ai le lalolagi mo ia.
I tausaga a o le’i oo i le 1990, na ia aoao atu ai le faaRusia. Ae ina ua oo mai le vaitau o le suia o mea faapolokiki ma tu masani a Monokolia, na ia iloa ai e manaomia e ia ona aoaoina le Igilisi ina ia mafai ai ona ia aoao atu le Igilisi. Na suesue e Munkhsaihan le gagana Igilisi mo se tausaga faatasi ma faifeautalai o le Au Paia o Aso e Gata Ai. A o le’i faalogologo o ia i lesona a faifeautalai, na tonu ai ia te ia o le a ia iloiloina muamua ma le faaeteete lo latou faatuatuaga. Na ia iloa ai o la latou tapuaiga e sili atu nai lo na o le faatuatua e faavae i mataupu faavae moni—ae o se ituaiga olaga e ola ai. Na papatiso ma faamauina o ia o se tagata o le Ekalesia ia Iuni 2000, ma o le isi vaega uma o lona aiga na papatisoina i le Ekalesia i le masina mulimuli ane. O le taimi nei ua ia vaaia le lalolagi o se nofoaga e sili atu ona matagofie mo ia, o lana fanau, ma fanau a lana fanau. O le taimi nei o loo galue o ia o le peresitene o le Aualofa a le itu o Ulaanbaatar.
Ina ua mavae ona suia lona lava olaga e le talalelei, na manatunatu le tamaitai o Munkhsaihan pe faamata o le a se mea a tupu pe afai na te faaaogaina aoaoga faavae o le talalelei i lana galuega i le avea ai o ia ma se faiaoga. Na ia taumafai ma le loto i ai ia alofa i ana tamaiti aoga uma lava—ma o se mea faigata lena mea i nisi. Na amata ona ia tatalo mo ana tamaiti aoga. O le mea na ofo ai, na ia iloa ua suia o ia; na ia atiina ae se malosiaga tele e alofa atu ai ia i latou. E ui lava e le’i iloa e tamaiti o loo ia tatalo mo i latou, ae na suia foi o latou uiga ia te ia.
“A o tatou faatinoina le faatuatua i totonu o le talalelei, tatou te mafai lava ona suia i tatou,” na ia saunoa ai.
Ma o le auala lenei, e pei ona fautuaina mai e le mea na oo ia te ia, e mafai ai e le talalelei ona suia Monokolia. A o suia e tagata o le Ekalesia i latou lava e ala i le faatuatua ia Iesu Keriso, o le a latou suia foi le lalolagi o loo siomia ai i latou.