O Le a I ai se Tala Tusia Faamaumau e Tausia e Outou

O Elder Marlin K. Jensen o le Au Fitugafulu, o le tausi talafaasolopito ma le tusitalafaamaumau o le Ekalesia o loo i ai nei, sa talatalanoa talu ai nei lava ma le vaega o Mekasini a le Ekalesia e uiga i le taimi ua tuanai, taimi nei, ma le lumanai o lenei ofisa taua.

Aisea ua aoaoina ai le Au Paia o Aso e Gata Ai e taua le tausia o talafaamaumau ma faaputuputu ma faasaoina talafaasolopito o le Ekalesia?

Elder Marlin K. Jensen: O tusitusiga paia, aemaise lava le Tusi a Mamona, o loo faamanino mai ai o le “manatuaina” o se mataupu faavae taua ma le faaola lea o le talalelei. Tatou te tausia talafaamaumau ina ia fesoasoani ia i tatou ina ia manatua. O le manatuaina o le taimi ua tuanai tatou te maua ai le vaaiga mamao e manaomia i le avea ai ma ni fanau a le Atua ina ia maua le faatuatua mo lo tatou taunuuga atofaina i le lumanai ma saga ola faatuatua atili ai i le taimi nei.

I le aso 6 o Aperila, 1830, o le aso lea na faavaeina ai le Ekalesia na poloaiina ai e le Alii le perofeta o Iosefa Samita, “Faauta, o le a i ai se tala tusia faamaumau e tausia e outou” (MFF 21:1). O le faaaliga lenei o loo faavaeina ai le tofiga o le tausi talafaasolopito ma faamaumauga a le Ekalesia.

I lena aso, na iloa ai e le Perofeta le taua tele i le Alii mo se talafaasolopito o le Ekalesia ina ia tausia, ma e le’i umi ae ona valaauina ia Oliva Kaotui e avea ma uluai tagata tausi talafaasolopito ma tusitalafaamaumau a le Ekalesia. I le amataga na faamaumauina ai e Oliva minute o fonotaga, faamanuiaga faapeteriaka, faamatalaga o tagata auai, ma tusi faamaonia o pule o le perisitua. Na ia amataina foi ona tusia se tala atonu e mafai ona taua o le tala o le talafaasolopito o le Ekalesia.

O le tausia o tala faamaumau na amata mai i se poloaiga a le Atua ma ua faaauauina mai ai i aso nei.

O a mea e aofia ai i le valaauga o le tausi talafaasolopito ma le tusitalafaamaumau a le Ekalesia?

Elder Jensen: O le galuega a le tausi talafaasolopito ma le tusitalafaamaumau a le Ekalesia o le tele lava o le tausia lea o talafaamaumau. E aofia ai le faaputuputuina ma le faasaoina o punaoa o talafaasolopito o le Ekalesia, o le faamaumauina o sauniga, ma le aoina mai o minute po o taualumaga o fonotaga. O loo fautua mai foi tusitusiga paia o loo i ai se tiutetauave ina ia mautinoa ai o loo faaaogaina faamaumauga “mo le lelei o le ekalesia, ma tupulaga tutupu a’e” (MFF 69:8). O matafaioi a le tausi talafaasolopito ma le tusitalafaamaumau e feāiāa’i ma o nisi o taimi e toetoe lava a leai se eseesega. Ou te manatu o le pogai lena, i aso tau amata o le Ekalesia, o nisi o taimi e tofia ai se tusitalafaamaumau ae o nisi taimi o se tausi talafaasolopito atoa ma le mafuaaga na tuufaatasia ai valaauga ia i se valaauga e tasi i taimi e le’i leva atu.

O le a le faamoemoe o le faamaumauina ma le aoaoina atu o le talafaasolopito o le Ekalesia?

Elder Jensen: O le faamoemoega autu o le talafaasolopito o le Ekalesia o le fesoasoani lea i tagata o le Ekalesia ia atiina ae le faatuatua ia Iesu Keriso ma tausia a latou feagaiga paia. I le faataunuuina o lena faamoemoega, ua taialaina ai i matou i manatu autu nei e tolu:

Muamua, matou te saili ia molimau atu ma puipuia upumoni faavae o le Toefuataiga.

Lua, matou te mananao e fesoasoani atu i tagata o le Ekalesia ia manatua mea silisili ua faia e le Atua mo Lana fanau.

Tolu, ua i ai ia i matou se galuega faatusitusiga paia ia fesoasoani e faasaoina le faatulagaga ua faaalia mai o le malo o le Atua. E aofia ai faaaliga, pepa o faamatalaga, ala faatonuina, faagaoioiga, ma faatulagaga e maua ai le maopoopo ma le faaauauina o le faaaogaina o ki o le perisitua, o le faagaoioiga tonu o korama a le perisitua, o le faia o sauniga, ma isi—o mea na e taua i le faaolataga.

O le a se isi auala e faamanuiaina ai le Ekalesia mai le ofisa o le tausi talafaasolopito ma le tusitalafaamaumau a le Ekalesia?

Elder Jensen: O le tausi talafaasolopito ma le tusitalafaamaumau a le Ekalesia e mafai ona tali e fai ma sui o le Ekalesia e tali atu ai i mataupu tau i le talafaasolopito. E i ai lava e le aunoa fesili e faatatau i le talafaasolopito, ma o nisi o taimi e i ai ni feteenaiga e uiga i talafaasolopito. E fesoasoani tele le i ai o se ofisa e mafai ona fesili atu i ai tagata mo ni tali sao.

O le tausi talafaasolopito a le Ekalesia e taitaia le Komiti o Nofoaga Tautaua, lea e puleaina nofoaga tautaua ma lauiloa o le Ekalesia. E auauna atu foi o ia o se taitaifono o le Komiti e Pulea Talafaamaumau po o Faamaumauga a le Ekalesia. O le komiti lenei latou te vaaia le fatuina, pulea, ma le faasoasoaina mulimuli o talafaamaumau uma lava a le Ekalesia—talafaamaumau faalelotu ma faalefaalapotopotoga—i le lalolagi atoa.

E aofia ai i talafaamaumau sili ona taua ma le paia o faamaoniga ia o loo faatinoina o sauniga o le malumalu. Ou te lagona ua faamaumauina o se vaega o lena tusi “o i ai tala tusia faamauina” (MFF 128:24). E mafai e tagata ona maua se lagona maumaututu e faapea o talafaamaumau uma lava, e aofia ai ma o latou sauniga o le malumalu, o loo saogalemu.

O faapefea ona faaaogaina e le Ekalesia faiga faatekinolosi e tauaveina ai i luma le galuega a le ofisa o le tausi talafaasolopito a le Ekalesia?

Elder Jensen: Matou te galulue faatasi ma le Matagaluega o Talafaasolopito o le Aiga ma le Ekalesia, lea e aoina ma faasaoina mea taua e faaaoga i le talafaasolopito o le Ekalesia. O loo matou atiina ae nei se faiga faatekinolosi mo i matou e sili atu ai ona lelei le aoina mai, faasaoina, ma mafai ai ona avanoa ia talafaasolopito o le Ekalesia mo se Ekalesia ua i ai tagata i le lalolagi atoa. E mautinoa lava o le Initoneti o le a faatupulaia pea le tele o sona taua i le galuega o loo matou faatinoina.

O tusi, faamatalaga tusitusia, mea faitino, o nofoaga taua i le talafaasolopito, ma ata ua matou aoina mai i le tele o tausaga ua faavaeina ai se lagona o “measina ia” o le talafaasolopito o le Ekalesia. Matou te lagonaina se tiutetauave o ia i matou o le fetufaai atu lea o nei mea o le talafaasolopito i se auala faamaonia ma talafeagai ma tagata o le Ekalesia i soo se mea lava. O le matamata i se itulau mai uluai itulau na lolomiina o le Tusi a Mamona i luga o le initoneti po o le faia o se matamataga moni i le potu i le fogafalealuga o le fale ogalaau o le aiga o Samita lea na faaali atu ai Moronae i le taulealea o Iosefa Samita o ni mea ia o le a faafesootaia tagata o le Ekalesia i lo tatou tuanai i ni auala e siitia ai le faatuatua.

O le a sili atu foi ona lelei ona mafaia e faiga faatekinolosi ona matou aoaoina ma fesoasoani atu i taitai o alalafaga lava ia ma failautusi, ma isi tagata o loo nafa ma le faaputuputuina o talafaasolopito faaletausaga mo siteki, uarota, ma misiona. Faatasi ai ma le fesoasoani mai o faiga faatekinolosi, o le a sili atu ona faigofie ona maua mai faamatalaga o talafaasolopito ma tuuina atu mai le laumua o le Ekalesia.

E mafai faapefea e le talafaasolopito o le Ekalesia ona avea o se tupuaga mo i tatou uma lava, e tusa lava pe o i tatou o ni tagata fou o le Ekalesia pe ua leva foi ona i ai i totonu o le Ekalesia mo le tele o augatupulaga?

Elder Jensen: Na fai mai le tala a se tasi tagata i se tasi taimi e faapea, e le mafai ona sili atu tagata nai lo o latou tala. O le talafaasolopito o le Ekalesia o loo amataina i le tala e uiga ia Iosefa Samita ma lana sailiga mo le Ekalesia moni. Afai tatou te talitonu i le tala e uiga ia Iosefa, ua avea i tatou ma se vaega o se tino tele o e ua talitonu ma o latou olaga ua suia e ala i lo latou sapasapaia o le talalelei toefuataiina. O lenei mea na tupu ua avea o se vaega taua o lo tatou tupuaga ua tatou tofusia ai o ni tagata o le Au Paia o Aso e Gata Ai. E faapena foi ona fesoasoani e faamalamalamaina ai le pogai e matua ogaoga ai le taua o le talafaasolopito o le Ekalesia i lona amataga mai i le Ekalesia ma lona ola ai ma lona tuputupu ae faifai pea ma lona taua.

O loo i ai isi tala maoae i lo tatou talafaasolopito e agavaa ina ia faalauiloaina ma aoaoina atu i totonu o le lotu ma aiga. O lesona na maua mai Katelani, o tofotofoga na oo i Misuri, o tulaga na faaeaina ai ma oo ai ina ua tuliesea le Au Paia mai Navu, ma malaga a le au paionia i le itu i sisifo o ni tala ia e musuia ai le Au Paia o Aso e Gata Ai i atunuu ma gagana uma. Ae o loo i ai foi tala e matua tutusa lelei lo latou faagaeetia e uiga i le oo mai ma le alualu i luma o le Ekalesia ma le aafiaga o le talalelei i olaga o tagata lautele o le Ekalesia i malo uma ua oo atu i ai le talalelei toefuataiina. O nei tala uma e manaomia foi ina ia faamaumauina ma faasaoina.

O le faiā foi i le va o le talafaasolopito o le Ekalesia ma le aiga e agavaa foi mo le manatunatu i ai e faamaumau ma faasaoina. O le mea masani lava o le suesueina o le talafaasolopito o le isi o le a taitaiina atu i le suesueina o le talafaasolopito o le isi. O le tele o tala maoae o le Ekalesia o loo maua lea i talafaasolopito faaletagata lava ia ma le aiga, ma nisi nei o vaega o le tupuaga o le tagata lava ia ma le aiga.

Ma le vaega mulimuli, e tatau ona tatou manatua o le mauaina o se tupuaga o le talafaasolopito o le Ekalesia e manaomia ai ina ia faia e sili atu nai lo le na o le faitauina o se tusi o le talafaasolopito. E aofia ai le asiasi atu i se nofoaga o le talafaasolopito, o le asiasi atu i se falemataaga e matamata i mea faitino o le talafaasolopito, auai i se faatasiga faaleaiga, po o le tusia ma le tausia o se tusi faamaumau a le tagata lava ia. O le ki e mo tagata uma lava taitoatasi ina ia aofia ai le tagata lava ia i se aafiaga ua mavae o le talafaasolopito.

O le a sou manatu o le a le mea aupito sili ona taua ia te oe lava ia e uiga i le auauna atu ai o se tausi talafaasolopito ma se tusitalafaamaumau a le Ekalesia?

Elder Jensen: Ua ou iloa o tusitusiga paia o loo i ai talafaasolopito paia. Afai e tusi mai perofeta ia i tatou, latou te faaaofiaina ai i totonu o a latou lauga ma aoaoga latou te tuuina mai tala e faatatau i o latou talafaasolopito. Mo se faataitaiga, o le Tusi a Mamona o loo amataina i se tala e uiga ia Liae ma lona aiga. O se tusitusiga paia, ae o se talafaasolopito foi. O le Tusi a Mamona o se faataitaiga sili lea o se ituaiga o tusitusiga faatalafaasolopito ua tatou maua. O le faataitaiga sili atu foi lea o le fesootaiga o i le va o le talafaasolopito ma mataupu faavae. Ua ou malamalama ai ma talisapaia le mana o tusitusiga paia ma le talafaasolopito o loo galulue vaavaalua.

Ua ou maua se molimau o mea uma lava o loo i ai i luma o le silafaga a le Atua—o le taimi ua tuanai, o le taimi nei, ma le lumanai. E o gatasi lelei lena ma le faauigaga faatusipaia o le upumoni, o le “malamalama foi lea o mea e pei ona i ai nei, e pei o na sa i ai, ma e pei ona o le a oo mai” (MFF 93:24). O loo tatou ola i le taimi nei. E le mafai ona tatou iloa atu le lumanai, ae o loo avanoa le tuanai mo i tatou e vaai atu i ai—pe a fai ua faasaosaoina. O lo tatou tuanai e mafai ona tatou maua ai se vaaiga tonu ma se faavae lea e le mafai ona tatou maua mai i se isi lava auala. E tusa pe o le talafaasolopito o lo tatou tamamatua po o le talafaasolopito o le perofeta o Iosefa Samita, o le talafaasolopito o tofotofoga na feagai ma paionia o le Au Paia o Aso e Gata Ai i pōpōfou o le Ekalesia po o le talafaasolopito o alii fitafita o le Au Paia o Aso e Gata Ai na auauna i vaegaau a le malo i le Taua Lona II o le Lalolagi—o lesona ma aoaoga mai le taimi ua tuanai e fesoasoani ia i tatou e taulimaina ai lo tatou taimi nei ma tatou te maua ai le faamoemoe mo lo tatou lumanai.

Ua ou maua le agaga faafetai ma le talisapaia o le perofeta o Iosefa Samita e sili atu nai lo le taimi muamua ona o mea silisili ona taua ua ia faataunuuina i le avea ai o ia o le perofeta na amataina lenei tisipenisione.

I mea uma ou te faatauaina, ou te manatu o le mea aupito sili ona taua o le talitonuga maumaututu lea afai tatou te faamaoni i o tatou loto ma faanaunauga ia iloa le Atua, e mafai ona tatou iloa moni o ia ma lagonaina tatou te tali atu ia te Ia. Ua tatou maua faataitaiga e uiga i le perofeta o Iosefa Samita e tatou te faafetai ai mo lena. Na ia faatinoina, na ia aoaoina atu, ma na ia taofimau i le folafolaga e mafai ona tatou iloa foi Keriso. O se mea e leai lava sona tau, ia te a’u lava ia.

AOAO ATILI E UIGA I LE TALAFAASOLOPITO O LE EKALESIA

O le Initoneti ua sili ona faigofie ona maua ai le talafaasolopito o le Ekalesia i le taimi nei nai lo se isi lava vaitaimi. O nisi nei o mea e maua mai ai le fesoasoani o loo maua i le gagana Peretania i le Uepi saite a le Ekalesia o le www.lds.org/churchhistory:

Uepi saite a Iosefa Samita, lea o loo toe faamanatu mai ai le olaga ma le misiona a le Perofeta. O loo maua ai ata faatalafaasolopito ma faamatalaga tusitusia.
Mormon Pioneer Overland Travel (1847–1868), o se upega o faamatalaga e mafai ona sailia e uiga i malaga a tagata taitoatasi ma aumalaga na malaga atu i sisifo i Iuta.
O Nofoaga o le Talafaasolopito, lea o loo faaalia mai ai mea loo i ai, o ata, ma talafaasolopito pupuu o nofoaga autu o talafaasolopito o le Ekalesia.
Fale Mataaga o Talafaasolopito ma Faatufugaga a le Ekalesia, lea o loo faaalia mai ai ata ma mea faitino lea e faamatalaina mai ai le talafaasolo pito o le Ekalesia ma ona tagata.

O SE GALUEGA O LOO FAIA I LE TAIMI NEI E FAAOSOFIA AI LE NAUNAU

Pepa a Iosefa Samita

Elder Jensen: Ou te manatu o le galuega sili ona tulagaese o loo matou galulue ai nei o le Galuega o Pepa a Iosefa Samita. O se taumafaiga aupito taua lea i tausaga e tele ina ia aoina mai faamatalaga na tusitusia e le Perofeta o Iosefa Samita, mafuaaga na tusia ai, pe na mauaina, atoa ai ma lauga na ia tuuina atu, o tusi na oo atu ia te ia, o mataupu faaletulafono na aafia ai o ia, atoa ai ma faaaliga na ia maua. O loo matou fuafua e lolomi ma faasalalauina na pepa i se faasologa o voluma.