O Le Togiola a Iesu Keriso

SAUNIA E ELDER JEFFREY R. HOLLAND

O Le Korama a Aposetolo e Toasefululua

I le Faatoaga i Ketesemane

Ao avea ma se faifeautalai faamisiona tala- vou, sa maua e Elder Orson F. Whitney (1855–1931) lea na tautua mulimuli ane i le Korama a Aposetolo e Toasefululua se miti uiga ese lona malosi lea na suia ai lona olaga e faavavau. Sa ia tusia mulimuli ane:

“O se tasi po na fai ai sau miti … e faapea sa ou i ai i le Faatoaga i Ketesemane, o se molimau i puapuaga o le Faaola… . Sa ou tutu i tua o se laau lata ane… . O Iesu faatasi ma Peteru, Iakopo ma Ioane, na o mai mai se faitotoa i lou itu taumatau. Sa ia tuua aposetolo e toatolu, ina ua uma ona fai atu ia te i latou e tootutuli ma tatalo, ma Ia maliu atu i le isi itu, lea sa ia tootuli ai foi ma tatalo … : ‘Lou Tama e, afai e mafai, ia aveese lenei ipu ia te au; ae aua le faia lou loto ao lou finagalo.’

“Ao tatalo o Ia, na tafe ifo loimata mai ona fofoga, lea na faasaga agai mai ia te au. Sa matuai ou ootia lava i lea vaaiga o lea na ou tagi ai foi, ona o le faanoanoa moni ona o Ona tiga e tele. Sa loloto lou alofa ia te Ia. Sa ou alofa ia te Ia ma lou loto atoa ma ou manao ai ia ma faatasi ma Ia, aua sa leai se isi mea sa sili ona ou manao i ai.

“O le taimi lea, na tulai ai o Ia ma maliu atu i le mea na tootutuli ai le Au-Aposetolo—ua momoe gapepe lava! Sa ia fagufagu malie i latou, ona feala ai lea, mai se leo malie o le aoaiga, e aunoa ma se foliga ita pe ote, ma fesili atu ia te i latou pe le mafai ona latou feala faatasi ma Ia i sina itula itiiti… .

“Na toe maliu atu o Ia i lona nofoaga, ma toe tatalo ai, ma ina ua toe foi atu sa ia toe maua foi i latou ua momoe. Sa faapea ona Ia toe fafagua i latou, apoapoai atu ia i latou, ma toe foi atu ma tatalo e pei ona faia muamua. E faatolu ona tupu lenei mea, seia oo ina ou matua’i masani i Ona foliga —foliga, fuaitino, ma gaioiga. O Ia o se tagata taua ma aloaia ma ona fofoga mamalu … o le Atua moni lava i tagata, ae agamalu ma loto maualalo e pei o se tamaitiiti laitiiti.

“Na vave lava ona pei ua suia le tulaga… . E nai lo le taimi muamua, ua oo i le taimi ua mavae le Faasatauroga, ma o le Faaola faatasi ma na Aposetolo e toatolu, sa tutu faatasi i se vaega i lou itu agavale. Sa foliga mai ua sauni e malaga ma afifio atu i le lagi. Sa le mafai ona ou toe faatali. Sa ou momoe mai tua o le laau, faapau i Ona aao, ma fusi mai Ona aao, ma augani atu ia te Ia ina ia alu ma ave au.

“E le mafai ona ou faagaloina Ona uiga agalelei ma le tauagafau, sa Ia punou ifo ai ma faatu au i luga ma fusi ia te au. Sa matuai manino lava, matuai moni, ma faapea ona ou lagonaina ai le mafanafana o lona fatafata lea na ou faalagolago i ai. Ona Ia fetalai mai lea: ‘Leai, lou atalii; o le vaega lea ua maea a latou galuega, ma e tatau ona matou o faatasi, ae e tatau ona e nofo e faauma au galuega.’ Ae sa ou pipii atu pea ia te Ia. Ma vaai atu i luga i ona fofoga—aua e umi o Ia ia te au—ma sa ou aioi atu ia te Ia ma le faatauanau: ‘Ia tautino mai ou te alu atu ia te Oe pe a uma.’ Sa soisoi o Ia ma le alofa ma tali mai: ‘E faalagolago lena mea ia te oe lava.’ Sa ou ala ae ma le tagi, a ua ao.”¹

Ua i ai i se a le Togiola?

O se vaaiga malu lenei faaletagata i le alofa foaifua a le Faaola o se faatomuaga talafeagai i le uiga ese o le Togiola a Iesu Keriso. E moni lava o le Togiola a le Alo Pele e Toatasi o le Atua i la le tino o se faavae taua tele o loo ua faalagolago i ai aoaoga faavae faa-kerisiano ma le faailoaga silisili o le alofa paia ua tuuina mai i lenei lalolagi. O lona taua tele i le Ekalesia a Iesu Keriso o le Au Paia o Aso E Gata Ai e le mafai ona lava lona faamatalaina. O isi uma mataupu faavae, poloaiga ma uiga lelei o le talalelei toefuataina e mauaina lona taua mai mea tutotonu ma le taua.²

O le Togiola na uluai faauuina i le muai olaga ae o se galuega ofo fua a le Alo Pele e Toatasi o le Atua, lea na Ia foaiina ai Lona soifua ma ona puapuaga faale-agaga e fai ma totogi faaola mo le aafiaga o le pau a Atamu i luga o tagata uma ma mo agasala faale-tagata a e ua salamo.

O le uiga sao o le upu faa-Peretania Atonement (Togiola) e malamalama gofie: at-one-ment, o le aumaia faatasi o ni mea sa tuu eseeseina pe vaevaeina. O le Togiola a Iesu Keriso sa matua manaomia ma taua ona o le tuu eseeseina e le agasala, po o le Pau, o Atamu, lea na oo mai ai ituaiga oti e lua i le lalolagi ina ua ’ai e Atamu ma Eva le fua o le laau e iloa ai le lelei ma le leaga.³ O le oti faale-tino na oo mai ai le tuu eseeseina o le agaga ma le tino, ma o le oti faale-agaga na oo mai ai le vavaeeseina mai o le agaga ma le tino mai le Atua. O le iuga o le Pau, o tagata uma e fananau i le olaga faitino o le a mafatia i nei ituaiga oti e lua. Ae peitai e tatau ona manatua o le Pau o se vaega manaomia o le ata paia a le Tama faalelagi. Ana leai lena, e leai ni fanau faaletino e fananau ia Atamu ma Eva, ma o le a leai se aiga tagata e lagonaina le tuu faafeagai o mea ma le ola tuputupu ae, saolotoga lelei, ma le olioli i le toetutu, faaolataga, ma le ola e faavavau.⁴

O le manaomia o lenei Pau ma se togiola ina ia totogiina ai, sa faamatalaina i le Fono i le Lagi i le muai olaga, lea na auai uma ai agaga o le aiga tagata ma sa pulefaamalumalu ai le Atua le Tama. I lena tulaga i le muai olaga sa ofo atu ai Keriso e faamamaluina le saolotoga lelei o tagata uma, ae Ona tauaveina uma a latou agasala. I le faatinoina, o le a Ia faafoi i le Tama le mamalu uma mo lena alofa faaola.⁵

O le Togiola le gata mai a Keriso na mafai ona taunuu ona (1) Ua na o Ia le tagata ua ola i le lalolagi e leai sana agasala ma o le mea lea na le mafai ai ona oo le oti faale-agaga, o le iuga o le agasala, ia te Ia, (2) Ua na o Ia le Alo Pele o le Atua ma o lea na i ai ia te Ia uiga faa-atua na mafai ai ona Ia maua le mana e manumalo ai i le oti faale-tino,⁶ ma (3) e foliga mai ua na o Ia ua atoatoa lona loto maualalo ma loto i ai i le fono tele i le muai olaga e muai faauuina i lena auaunaga.⁷

O Meaalofa o le Togiola a Keriso

O nisi meaalofa mai le Togiola, e laugatasia ai, e leai sona gataaga, ma e le faatuaoia. O ia mea e aofia ai Lona totogiina o le solitulafono muamua a Atamu ina ia leai se isi o le aiga tagata e fasalaina ona o lena agasala.⁸ O le isi meaalofa lautele o le Toetutu mai le oti o tane uma, fafine, ma tamaiti o loo feola, sa feola, poo o le a feola i luga o le fogaeleele.

O isi vaega o le meaalofa togiola a Keriso e i ai ona tuutuuga. E faalagolago i le maelega o le tagata i le tausia o poloaiga a le Atua. Mo se faataitaiga, e ui ina maua saoloto e tagata uma o le aiga tagata le faamagaloga mai le agasala a Atamu e aunoa ma se taumafaiga a i latou, e lei tuuina atu i ai se faamagaloga o a latou lava agasala sei vagana ua latou tautino atu lo latou faatuatua ia Keriso, salamo i na agasala, ma papatisoina i Lona suafa, talia le meaalofa o le Agaga Paia ma le faamauina i totonu o le Ekalesia a Keriso, ma agai i luma i le faatuatua faaauauina i taimi totoe o le malaga o le olaga. O lenei luitau faale-tagata, na fetalai ai Keriso e faapea,

“Aua faauta, o au, le Atua, na puapuagatia i nei mea mo tagata uma, ina ia latou le puapuagatia pe afai latou te salamo;

“Ae peitai afai latou te le salamo, e ao ina latou tiga e pei o au.”⁹

I le ma le isi, e ui o le O le Toetu o le tino faale-tino o se meaalofa lautele ma maua fua, na maua i le manumalo o le Faaola mai le oti, o le natura o le tino toetu (poo “vaega o mamalu” ua tuuina mai), a faapena ma le taimi o le Toetu o le tagata, e aafia sao i le faatuatua o le tagata i lenei olaga. Na faamanino mai e le Aposetolo o Paulo e faapea, mo se faataitaiga, o i latou uma ua tuuina atu atoatoa ia Keriso o le a “muamua foi ona toe tutu mai”¹⁰ i le Toetutu. Ua faamanino mai e faaaliga i ona po nei faatulagaga eseese o tino toetutu,¹¹ folafolaga o le vaega maualuga o le mamalu mo na o i latou na tausisia mataupu faavae ma sauniga o le talalelei a Iesu Keriso.¹²

E moni e le mafai ona avanoa faamanuiaga le faatuaoiina po o faamanuiaga e i ai ona tuutuuga o le Togiola sei vagana le alofa tunoa o Keriso. E foliga mai o faamanuiaga le faatuaoiina o le Toetu maua fua, ae o faamanuiaga e i ai ona tuutuuga e le o mauaina atoatoa sei vagana ua usiusitai. I le ola ai ma le faatuatua ma tausia poloaiga a le Atua, o le a maua ai e le tagata avanoa lelei faaopoopo; ae peitai o loo saoloto lona tuuina atu, ae lei aloaia lona mauaina. Ua faailoa maumaututu mai e le Tusi a Mamona e faapea “e le mafai ona nonofo tagata faatasi ma le Atua, sei iloga ona o le taui ma le alofa mutimutivale ma le alofa tunoa o le Mesia Paia.”¹³

I lena lava alofa tunoa e tasi, ua saunia ai e le Atua le faaolataga mo tamaiti laiti, i latou e le atoatoa le malosi o le mafaufau, i latou na soifua ae lei maua le avanoa e faalogologo ai i le talalelei a Iesu Keriso, ma isi mea faapena: o ia mea e faaolaina i le mana lautele o le Faaolataga a Keriso ma o le a maua le avanoa e maua ai le atoatoaga o le talalelei pe a mavae le oti, i le lalolagi o agaga, i le nofoaga o agaga e faatali ai le Toetutu.¹⁴

Puapuaga ma le Manumalo

Ina ia amata ona faataunuuina mea e manaomia o le Togiola, na maliu atu Keriso o le e leai sana agasala i le Faatoaga o Ketesemane, e pei ona vaaia e Elder Whitney i lana miti, o iina sa ia tauaveina ai ona tiga o le agaga na mafai ona Ia tauaveina. Sa Ia “amata ona oo i se tiga uiga ese ma sa matua mamafatu,” sa ia fetalai atu ia Peteru, Iakopo ma Ioane, “Ua matua tiga lava lou loto e oo i le oti.”¹⁵ Aisea? Ona ua Ia puapuagatia “i tiga o tagata uma, e moni, o tiga o tagata uma, o tane ma fafine atoa ma le fanau, le aiga o Atamu.”¹⁶ Ua ia silafia “tofotofoga ma le tigaina o le tino, o le matelaina, ma le fia inu, ma le lailoa, e sili i mea e mafai ona onosai ai tagata, vagana ona ua oo i le oti; Aua faauta, e sau le toto ai mea uma e afu ai, e faapea ona tele lona puapuaga.”¹⁷

E ala mai i lenei puapuaga, na faaolaina ai e Iesu agaga o tane uma, fafine ma tamaiti, “ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu e tusa ma o latou vaivai.”¹⁸ I le faia o lena mea, o Keriso “e pei foi ona alu ifo o ia i lalo o mea uma” —e aofia ituaiga mai uma eseese, vaivaiga, ma ituaiga mea faigata uma na oo i tagata ola uma—ina ia mafai ona Ia “malamalama i mea uma, ina ia fai o Ia ma malamalama o le upu moni i mea uma.”¹⁹

I le tuua toatasi ma tiga matuitui matautia o le Togiola na amata mai i Ketesemane na oo atu i ona o’oo’oga maualuga, ae ina ua uma sauaga le mafaamatalaina i lima o fitafita Roma ma isi, na tutulu ai o Ia mai le satauro, “Eli, Eli, lama sapatani? O lona uiga lenei, Lou Atua e, Lou Atua e, se a ua e tuulafoai mai ai au?”²⁰ I le loloto o na tiga, e oo lava i le natura sa matua luluina. “Ona pogisa uma ai lea o le nuu… . Ua faapouliuligia le la.”²¹ “Faauta foi, ua saeluaina le ie puipui o le malumalu, ua amata ifo i luga ua oo i lalo, ua luluina foi le eleele, ua mavaevae papa,”²² ma mafua ai ona alalaga tagata, “Ua tigaina le Atua o le lalolagi.”²³ Mulimuli ane, ina ua uma ona tauaveina puapuaga ia na foliga mai e le mafai ona lavatia, ona fetalai mai lea o Iesu, “Ua taunuu.”²⁴ “LouTama e, ou te tuuina atu lou nei agaga i ou aao.”²⁵ I se aso, i se nofoaga, o le a matala laulaufaiva uma ma valaau atu e tautino e pei ona faia e le Roma lea sa molimauina nei mea uma, “E moni o le Alo lava lena o le Atua.”²⁶

Mo se fafine ma tane mafaufau, “o se fesili i tua atu o manatunatuga”²⁷ o se taulaga ofofuaina atu ma le alofa a se tagata e toatasi e faamalieina ai le anoanoai o manaoga faavavau o le faamasinoga tonu, tauave agasala ma faaletonu o tagata uma, ma le auala lea ua uunaia ai le aiga tagata i aao mafola o Lona alofa ofaofatai. Ma e moni lava.

Ou te fia siiina mai le saunoaga a Peresitene Ioane Teila (1808–87): “I se tulaga e faigata ona tatou malamalama i ai ma le mafaamatalaina foi, ina ia tauaveina ai le mamafatu o agasala a le lalolagi atoa; ua le na o Atamu, ae faapea foi ana fanau; ma o le faia o lea tulaga, ua tatalaina ai le malo o le lagi, ua le gata i tagata uma e talitonu ma i latou e usitai i le tulafono a le Atua, ae faapea foi i le silia i le afa o le fanauga a tagata o e ua maliliu ae lei avea ma tagata matutua, faapea foi [i latou] o e … [maliliu] e aunoa ma [le] tulafono.”²⁸

E pei ona lagonaina e Elder Whitney e uiga i lenei meaalofa faatamalii atoa ai ma le na foaiina mai, e tatau foi ona tatou lagona: “Sa matuai ootia au i le [meaalofa] o lea na ou tagi ai … i lou lava lagona mama. Sa alu atu atoa lou loto ia te Ia. Ou te alofa ia te Ia ma lou loto atoa ma ou manao ou te fia faatasi ma Ia ae le o se isi lava mea.” O lona ofoina mai o le Togiola mo i tatou uma, o le faatinoina lena o Lana vaega ina ia taunuu ai lena manao. O isi mea o le a faalagolago lena ia i tatou lava.