Kena Rawati e dua na iVakadinadina ni Kalou na Tamana; na Luvena, o Jisu Karisito; kei na Yalo Tabu
Na veika sa tukuni kivei au … sa rawa me tukuna vei kemuni na Yalo Tabu … vakatau ena nomuni talairawarawa ka gadreva dina.
O au, me vakataki kemuni, au taleitaka na vakaitavi ena soqoni bibi. Ia au nanuma meu na solia e dua na idusidusi ni vunau kei na veivuke. Ni da laveta cake na ligada imatau ena soqoni bibi, e sega ni dua walega na digidigi eda solia kina na noda vakaitavitaki keda vakaikeda ka vakatamata, e dua sara ga na veiyalayalati, noda tokona ka rokova na veilawa, cakacakatabu, veivakaro, kei na parofita ni Kalou, o Peresitedi Thomas S. Monson. Au taleitaka kina na vakaitavi vata kei kemuni kei na noqu laveta cake ki na sukuwea na ligaqu imatau.
Kemuni na taciqu kei na ganequ, ena vica na vula sa oti au a sotava kina e dua na ka e vakayalomalumalumutaki au ka sa gauna donu meu raica kina vakavoleka ena yalo e vakavinavinakataka na isolisoli ni bula. Ena sotavi ni ka oqo, au sa vakasamataka vakabibi tikoga na noqu ivakadinadina ni Kalou na Tamada Vakalomalagi Tawamudu kei na Luvena ulumatua, na noda iVakabula ka Dauveivueti, o Jisu Karisito, kei na sala au a rawata kina na noqu ivakadinadina ni Tamada kei na Luvena.
Na lewei vuravura taucoko, ni veivakabauta kei na veicikevi, era vakasaqara ka saga me ra kila, O cei na Kalou? E veiwekani vakacava kei Jisu Karisito? Ka cava beka na noda veiwekani kei Rau?
Au sa kila deivaki ni rau bula tiko o Tamada Vakalomalagi kei Jisu Karisito. E ka dina na Veisorovaki. Na Kalou na Tamana kei Jisu Karisito erau tamata dina, duidui, ka tawa mate rawa. Erau kilai keda yadua, ka Rau dau rogoca ka sauma mai na noda masu ena yalodina. E a vakaraitaka na iVakabula kivei ira na vakatawana na Vuravura Vou: “Au sa tukuni Tamaqu, ka sa tukuni au ko Tamaqu, ia na Yalo Tabu sa tukuni au kei Tamaqu.”1 Na Yalo Tabu sa tukuna vei au ni sa dina na ka oqo.
E a tekivu meu rawata na noqu ivakadinadina niu se itabagone niu vakadeuca na 13 na itukutuku vakaparofita e vakatokai na Yavu ni Vakabauta, ka a vola o Josefa Simici. Sa ikoya ena gauna ni Lalai eda dau cavuqaqataka. Era vakamacalataka na yavu ni vakabauta ni kosipeli vakalesuimai i Jisu Karisito. Na imatai ni veitukutuku oqori e vakaoqo: “Keimami vakabauta na Kalou na Tamada Tawamudu, kei na Luvena ko Jisu Karisito kei na Yalo Tabu.”2
Sa kila vinaka o Josefa Simici na kedratou ituvaki na Lewetolu Vakalou ena nona a sotava vakaidina. Me vaka ni dua na gonetagane yabaki 14 a vinakata o koya me kila se o cei vei ira na vuqa na veimatalotu Vakarisito me lewena. Ena iVolatabu, ena ivola i Jemesa ena Veiyalayalati Vou, a wilika kina o koya, “Kevaka sa lailai na vuku vua e dua vei kemudou, me kerea vua na Kalou.”3 Ena talairawarawa a tekiduru ena masu ka a rairai mai na Kalou na Tamana kei na Luvena, o Jisu Karisito. E a vakamacalataka ni Rau sa “rua na Tamata, ia na kedrau i serau kei na i ukuuku sa sega ni vakamacalataki rawa, raica erau sa tucake tu ena maliwa lala donuya na [matai Josefa ]. A sa [Kalou na Tamada] kacivi [koya], e dua vei rau, dusi [koya] na kena ikarua ka kaya—Oqo na noqu Gone ni Toko. Mo rogoci Koya!”4
Vakatekivu mai na gauna ni noqu gonetagane, sa noqu idusidusi tiko mai na ka e a sotava o Josefa Simici—ka sa rawa me noda kece sara. E a vulica na parofita gone oqo na dina me baleta na Tamada Vakalomalagi kei na Luvena, o Jisu Karisito, baleta ni a laki vakasaqara ena ivolanikalou na inaki nei Tamana Vakalomalagi ka yalodina sara me talairawarawa kina.
Na ituvatuva oqo e a vakarautaki ka vakaraitaki vakamatata sara mai vua na iVakabula me vaka e tukuni tiko ena iVolatabu. Ena gauna se qai gonetagane yabaki 12 tiko kina o Jisu Karisito, erau a kunei koya o Meri, na tinana, kei Josefa, na tamana e vuravura, ni a vunau tiko ena loma ni valetabu. A tarogi rau o Jisu, “Drau sa sega beka ni kila ni sa kilikili kei au meu tiko ena vale nei Tamaqu?”5 Ia a sega ni tukuna tiko o Jisu na veika e baleti Josefa. E a tukuna tiko o koya na veika sa baleta na Tamana dina ka Tawamudu mai Lomalagi.
E a ka bibi dina na ivakarau e a vakamacalataka kina na Luvena na Kalou na Tamana ena vica na gauna: “Ia ko Jisu ni sa papitaisotaki, sa cabe sara mai na wai … Ka raica sa dua na domo mai lomalagi, sa kaya, O koya oqo na noqu Gone ni toko, au sa dauvinakata vakalevu.”6 E a yaco tale, ena Ulunivanua ni Mataliataki, “a sa rogo e dua na vosa mai na o, ka kaya, Oqo na noqu Gone ni toko: dou rogoci koya.”7
Ena gauna a rairai kina o Jisu ena vanua o Amerika, o Tamana e a vakatakilaitaki Koya talega vaka o ya: “Raica oqo na Noqu Gone ni toko, kau sa dauvinakata vakalevu, sai Koya sa vakacaucautaki kina na yacaqu—mo dou rogoci Koya.”8 Ni qai oti e rua na udolu na yabaki, e a cavuti tale vua na cauravou o Josefa Simici na vosa vata ga o ya: “Oqo na noqu Gone ni Toko, Rogoci Koya!”9
Sa dau bibi ka vakaibalebale ni gauna ga e dau vinakata kina na Tamana me vakatakilaitaki Luvena kivei keda, e vakaroti keda o Koya me da vakarorogo—me da “rogoca” na vosa i Jisu.
O cei mada o Jisu? E a vakaitavi vata kei Tamana ena kena Buli na vuravura ka sa nona ilesilesi, ena ruku ni veidusimaki nei Tamana, me bulia na veika kecega ena dela i vuravura oqo. “Raica au sa bulia e vuqa na vuravura; ka sa sega ni wili rawa; ia sa tu na inaki ni noqu buli ira; a sa buli ira na Luvequ e Duabauga ena vukuqu.”10 Ko Jisu Karisito sa iKoya na Luvena Duabau na Tamana ena yago. Sa ikoya na noda Dautataro vata kei Tamana. Sai Koya na iVakabula sa solia na Nona bula ena vukuda ka sa vakamamasu vei Tamana ena vukuda. O koya gona, eda sa masu vua na Tamada Vakalomalagi ena yaca ni Luvena, o Jisu Karisito. Ko Jisu, na Luvena, e sega ni o koya na tamata vata ga e Tamana tiko, ia sa vakataki Tamana ga o Koya. O Koya talega sa dua na tamata e sa vakalagilagi ena kaukauwa ka tu vua na lewa.
E sa vakararamataka vakalevu ka tara na yaloqu na noqu raica na ivakarau ni nona vosa o Jisu vua na Tamana. Ena Nona masu cecere ni Vakacacabo, ka tiko ena iVolatabu ena ivola i Joni, sa matata sara ga kina ni sa vakaraitaka kina o Jisu ni o Koya na Luvena. Me da rogoca mada na Nona vosa ni sa cauraka tiko kivei Tamana mai Lomalagi na kena sa mai vakacavari na Nona cakacaka e vuravura:
“Au sa vakarokorotaki kemuni e vuravura: niu sa vakaotia na cakacaka ko ni a solia mai vei au meu kitaka… .
“Niu sa solia vei ira [na tisaipeli] na vosa ko ni a solia mai vei au … , ka ra sa vakadinata ni kemuni a talai au mai… .
“Me vaka ko ni a talai au ki vuravura, au sa talai ira talega vakakina ki vuravura… .
“Ia na vakarokoroko ko ni a solia mai vei au kau sa solia vei ira, me ra dua bau, me vaka e daru sa dua bau.”11
Ena gauna ni nona cakacaka vakalotu na iVakabula, era a duabau dina kina na tisaipeli, ia e sega ena veika vakayago. Era sa duabau ena inaki kei na loloma. Sai koya oqo na nodrau duabau na Kalou na Tamana kei na Luvena, o Jisu Karisito, ka tukuni tiko ena ivolanikalou. Oi rau talega erau sa tamata duidui ia erau sa duabau ena inaki, ena Nodrau loloma kivei keda, kei na cakacaka Rau cakava tiko me baleti keda.
E a masu talega na iVakabula:
“Ia oqo, Tamaqu ni vakarokorokotaki au … ena vakarokoroko sa tu vei au ni daru a tiko vata ni sa sega ni caka ko vuravura… .
“… Ia me kila kina ko vuravura ni kemuni sa talai au mai, ka ni kemuni sa lomani ira, me vaka ko ni sa lomani au.
“… Ni kemuni a lomani au ni sa sega ni tekivu ko vuravura.”12
Io, sa vinakata sara vakalevu o Jisu me da kilai Tamana me vakataki Koya. A masu o Koya:
“I Tamaqu yalododonu, sa sega ni kilai kemuni ko vuravura: ia kau sa kilai kemuni, a ra sa kila ko ira oqo [na tisaipeli] ni kemuni sa talai au mai.
“Ia kau sa vakatakila vei ira na yacamuni, ia kau na vakatakila tiko: me tu vei ira na loloma ko ni a lomani au kina, meu tiko talega kei ira.”13
Sa mai vakaraitaka o Jisu na cecere ni Nona loloma kivei ira era sa digitaka me ra muri Koya ni sa mai masulaka me ra taqomaki: “Au sa sega ni masu mo ni kauti ira tani e vuravura, mo ni maroroi ira ga mai na vu ni ca.”14 Kemuni na taciqu kei na ganequ, e a masulaki keda tiko o Koya.
Sa oti sa qai vakamamasu na noda iVakabula, vakaibalebaletaki vei keda, me ra sa na laki tiko vata tale kei Koya: “I Tamaqu, au sa vinakata me ra tiko talega kei au, ena vanua kau sa tiko kina, ko ira ko ni sa solia vei au.”15
Ena vakavakarau tiko ki na solibula ni veisorovaki, a masu kina o Jisu vei Tamana mai na Were ko Kecisemani ni sa vakataqara ki Vua na ivalavala ca, rarawa, kei na leqa ni kai vuravura. Ena nona tiko taudua o ya, a vakamatatataka kina o Koya ni sa sega ni cakava tiko na Nona cakacaka. A masu kina, “I Tamaqu, kevaka e rawarawa, me lako tani mada vei au na bilo oqo: ia, me kakua ga ni vaka na noqu lewa, me vaka ga na nomu lewa.”16 Sa gauna bibi sara vei Koya kei keda kece oqo, e a sega ni vosa tiko o Koya ena vukuna se vakararavi ki na Nona kaukauwa. A masu tiko vei Tamana, na Kalou sa Tawamudu, me tokoni Koya ka vakadonui Koya me vakayacora na lewa nei Tamana; sa qai tala mai o Tamana e dua na agilosi “mai lomalagi, a sa mai vakaukauwataki koya.”17 Au sa lomana na loloma nei Tamana me baleta na Luvena ka vakakina kivei keda kece sara.
Mai na gauna ni se bera ni tauyavu ko vuravura me yacova sara na iotioti ni auwa ena kauveilatai, sa dau cakava tikoga na iVakabula na cakacaka nei Tamana. A mai vakacavara na cakacaka a talai mai kina me vakayacora. O koya gona, eda sega kina ni kurabui ni a vosa tiko vua e dua, ni rube tu ena kauveilatai, “sa kaya, Sa oti,”18 ka “kaci ena domolevu, … Tamaqu, au sa solia na yaloqu ki na ligamuni: ia ni sa vosa oti vakakoya, sa qai ciba.”19 Eda kila ni a masu tiko o Koya vei Tamana Vakalomalagi.
Au sa vakadinadinataka ni sa bula tiko na noda iVakabula. Sai Koya ga na Luvena Duabau na Tamana, ka na lesu tale mai me mai veiliutaki ena vuravura oqo. Sai Jisu Karisito, na Yalosavasava ni Isireli, “sa sinai ena loloma, kei na dina… . Ia ena lako mai me bokoca na nodra ivalavala ca na kai vuravura, io ko ira sa vakabauta vakaidina na yacana.”20 Sai koya na Luvena dina na Kalou, ka a tucake tale mai na mate ena ikatolu ni siga ka sa na qai yaco vakaidina kina na tucake tale kivei ira kecega era tadu mai ki vuravura. Au vakadinadinataka talega ni bula tiko na Kalou na Tamada Tawamudu ka sa lomani keda vakayadua, me baleta ni da sa Luvena. Sa ka cecere sara na Nona loloma ni a tala mai kina na Luvena e Duabauga ki na vuravura oqo, “me kakua ni rusa ko ira yadua era sa vakabauti koya, me ra rawata ga na bula tawamudu.”21
Me vaka e dua na iApositolo ni Turaga o Jisu Karisito, au sa vakadinadinataka na dina ni veika era sa tiko ena ivolanikalou kei na veika sa tukuni kivei au sa rawa me tukuna vei kemuni na Yalo Tabu. Ena vakatakilai mai vakatau ena nomuni talairawarawa ka gadreva dina. E vakavulica vei keda na Turaga ena gauna ni Nona cakacaka vakalotu e vuravura na dina cecere oqo e sa baleti keda kece sara: “Ia na ka kecega sa dodonu dou sa kerea vei Tamaqu ena yacaqu, ka vakabauta ni dou na rawata, raica ena solia vei kemudou ko Koya.”22 Au vakadinadinataka niu sa kila na veika oqo, kau sa kila ka vakadeitaka ni veika au tukuna tiko, era sa ka dina sara. Ka sa rawa mo ni vakasaqara na kena veivakadeitaki vata ga oqo ka sa noqu masu ena yaca i Jisu Karisito, emeni.