Elaine S. Dalton

Peresitedi Raraba ni Goneyalewa

Ni se goneyalewa lailai, a dau taleitaka sara o Elaine Schwartz Dalton na danisi. Ia ni sa mai dua na tina gone ni ono na luvena, sa raica o koya ni sa na dredre na danisi, ka sa tekivu me dau cici me taleitaka kina na vakayavalati ni yago ena veisiga. Ena itekivu e a dau ciciva e tini naikalawa ka taubale me tini na ikalawa me yacova ni sa rawa ni ciciva e dua na maile. Vakatekivu mai na siga totoka o ya sa ciciva rawa kina o koya e 18 na veitau ni cici balavu.

“Na cici e solia vei au e dua na gauna me vakanomodi kina na noqu vakasama ka vakananuma na bula,” e kaya o Sisita Dalton. E dau dua na auwa ni dau vakasamataka o koya na ivolanikalou sa dau wilika oti.

E a sucu o Sisita Dalton e Ogden, Utah e Amerika, ena ika 1 ni Noveba, 1946, kivei rau o Melvin Leo Schwartz kei Emma Martin Schwartz. A vakamautaki Stephen Eugene Dalton ena ika 13 ni Sepiteba, 1968, ena Valetabu e Salt Lake. A taura o koya na nona diqiri ni bejala ni vosa Vakavalagi mai na Brigham Young Univesiti. Sa veiqaravi oti o koya ena matabose raraba ni Goneyalewa ka imatai ka ikarua ni daunivakasala ena mataveiliutaki raraba ni Goneyalewa. Sa veiqaravi oti talega o koya ena itutu vaka-peresitedi ni Goneyalewa ena iteki, daunivakasala ni iSakisaki, daunivakasala ki na dua na iSoqosoqo ni Veivukei ni itabagone qase cake, ka qasenivuli ni iSoqosoqo ni Veivukei.

Me vaka ni sa peresitedi vou raraba ni Goneyalewa, e kaya kina o Sisita Dalton, “Na iusutu ni noqu itukutuku kivei ira na goneyalewa ena Lotu sai koya na kena era dau rogoca mai vei ira na nodra itubutubu ena veigauna kece era dau biuta yani na katuba e vale: ‘Mo nanuma tiko o cei o iko.’”

Sa nuitaka tiko o koya me tukuna kivei ira na goneyalewa ni sai ira na luvena yalewa na Tamada Vakalomalagi, e lomani ira vakalevu. “Era dau cavuta vakalevu o ira ena itoko ni Goneyalewa ena veimacawa, ia e vuqa sara vei ira na goneyalewa, e se bera sara ni vakauqeta na yalodra,” e kaya o Sisita Dalton. “Ena gauna ga sa kila rawa kina e dua na goneyalewa ni o koya sa luvena yalewa na Kalou, ena yaco me na matata sara vakaoti vua na veivanua e sema tiko kina.”

E dau vakayaloqaqataki ira me ra bula savasava tiko. “E dua vei ira na cakacaka bibi me ra na vakayacora o ya na cakacaka ni valetabu,” e kaya o koya. “Sa rauta me sa cudru tiko o Setani, ka vagolei ira vakatani tiko na goneyalewa me ra kakua ni bula kilikili. Mo ni bula savasava mada. Na kaukauwa e tiko ena bula savasava.”