Vakamamacataki na Mawe ni Vakacaca ni Veivakalolomataki
Na kaukauwa ni veivakabulai sa tiki ni Veisorovaki i Jisu Karisito.
Au wasea na noqu ivakadinadina bibi ena titobu ni noqu lomana na noda parofita, daurairai, ka dauvakatakila vou, o Peresitedi Thomas S. Monson—e titobu na noqu nuitaki koya, kau sa tu vakarau meu vakayacora na ka kecega e kerea vei au.
Eso na ka era sa rui ka bibi ka ra baleta na tamata yadua, e rawa ni vakayavalata na yalo ka ra sega kina ni dau cavuti tu e matanalevu. Ia kevaka era laurai vakamalua kei na yalololoma ena rarama ni dina, ena rawa ni vakavuna na veiciqomi ka kauta laivi na mosi na kena veivosakitaki na veika oqo, ka vakakina na kena rawa ni levei na leqa lelevu e rawa ni yaco.
Ena gagadre titobu me dusi e dua na sala ni vakacegu au vosa kina vei kemuni ka vakaimawe tu ena nomuni bula na vakacaca ni veivakalolomataki ni vakasama, vakavosa, vakayago, ka vakabibi ena ivalavala ni veiyacovi. Au vosa tale tikoga vei kemuni o ni vakavuna. Au na goleva toka mada ga na veivakalolomataki ena ivalavala ni veiyacovi, ia na ivakasala ena soli, e dodonu me na vukei ira talega o ira era vakaleqai ena veivakalolomataki tale eso. Na noqu inaki meu vaka na iloilo me cilavi yani kina na o butobuto ni kena rarawataki na veika e vu mai na nodra ivalavala tawadodonu eso, na rarama veivakabulai vakalou o ya. Au kerea meu vukei me rawa niu ciqomi ena noqu vosa meu veivuke, ka meu kakua ni vakacacana vakalevu e dua na bula sa vakacacani rawa tu. Ena rawa talega ni ra vukei eso vei keda me ra veivuke, me ra tarova, se me ra kidava na leqa ena kauta mai na veivakalolomataki vei ira eso tale.
E se sega beka ni tara sara ga na nomu bula na wasoma ni ivalavala ca levu oqo. Ia sa yaco tiko vakavuqa e vuravura ka rawa ni sa yaco vua e dua o dau lomana. Sa dau veivakararawataki vakavuqa—oqori e rawa ni wali—au via vosa kina ena sala me rawa kina na veivakabulai. Ena vakayacori ena vakarokoroko, ni noqu inaki meu veivuke ena kena vakamamacataki ka sega niu vakabula tale na kena vakanananu mosimosi.
Galala
Na galala ni digidigi sa tiki bibi sara ni nona ituvatuva ni marau na Tamada mai Lomalagi. Sa kila tu ko Koya ni so na Luvena vakayalo era na vakayagataka vakatawadodonu na galala ko ya, ka na vakavuna eso na leqa lelevu vei ira na tani. Eso era na voroka na veivakabauti bibi, me vaka na tama, se dua tale na lewe ni matavuvale me vakalolomataka e dua na gonelailai. Me vaka ni sa rui dodonu sara vakaoti na Tamada Vakalomalagi, sa dodonu me dua na sala me wali kina na imawe rerevaki ni kena vakayagataki vakaoqo na galala vei ira era vakalolomataki kei ira era veivakalolomataki. Na veivakabulai vakadeitaki oqori e yaco mai ena kaukauwa ni Veisorovaki ni Luvena Lomani, ko Jisu Karisito me vakadodonutaki kina na veika e sega ni dodonu. Na vakabauti Jisu Karisito kei na Nona kaukauwa me ia kina na veivakabulai sa rawa kina vei koya e vakalolomataki me ulabaleta na revurevu rerevaki ni nona ivalavala tawadodonu e dua tale. Ni umani vata kei na veivutuni e taucoko, sa vakarautaka talega kina na Veisorovaki vua e veivakalolomataki e dua na sala me levea rawa kina na itotogi bibi sa virikotora tu na Turaga me baleta na ivalavala vakaoqo.
Vei Koya e Vakalolomataki
Au vakadinadinataka niu kila eso era a vakalolomataki ena veivakalolomataki bibi eso ka ra sa lakova na gaunisala dredre ni veivakabulai e taucoko ena kaukauwa ni Veisorovaki. Ni sa wali oti na nona lomaleqa ena nona vakabauta na kaukauwa veivakabulai ni Veisorovaki, a kerea e dua na goneyalewa ka a vakalolomataki sara vakaca mai vei tamana me keirau dabe vata tale ena dua na veivakatarogi. A lesu mai kei rau e dua na veiwatini qase. Au rawa ni vakila ni lomani rau sara vakalevu na lewe rua oqo. E laurai e matana na marau. E kaya,“Elder Scott, oqo na tamaqu. Au lomani koya. E leqataka tiko o koya eso na ka a yaco ena noqu gauna ni gone. Era sa sega tale ni vakaleqai au tiko. E rawa beka ni o vukei koya?” Sa dua na ivakaraitaki kaukauwa ni Nona rawa ni veivakabulai na iVakabula! Sa sega tale ni vakararawataki tu ena imawe ni veivakalolomataki baleta ni sa veirauti na nona kila na Nona Veisorovaki, sa veirauti na nona vakabauta, ka sa talairawarawa ki na Nona lawa. Ni ko vulica na Veisorovaki mai vu ni yalomu ka cakacakataka na nomu vakabauta ni tu vei Jisu Karisito na kaukauwa me veivakabulai, o na rawata talega na veivakacegui veivakalougatataki vata o ya. Ena nomu ilakolako ni vakabulabula, ciqoma na Nona veisureti me colata vata kei iko na nomu icolacola me yacova na gauna ko sa bula vinaka kina.
Me da kunea na vakacegu mai na revurevu ni veivakalolomataki, ena veivuke kevaka o kila na vanua e vu mai kina. O Setani e vakavuna na veika dau veivakarusai kece sara e basika mai na veivakalolomataki. E tu vua na kaukauwa matalia eso me tuberi keda ki na sala butobuto, ka na sega ni rawa ni kunei kina na iwali ni leqa dredre. Na nona sasaga me tawasea tani na yalo sa vakararawataki tu mai na veivakabulai ena rawati mai vua na Tamada Vakalomalagi yalololoma kei na Dauveivueti dauloloma.
Kevaka o a sa vakalolomataki oti, ena segata ko Setani me vakadeitaka vei iko ni sega na kena iwali. Ia, e kila vakavinaka sara tu ga ni tiko. E kila tu o Setani ni veivakabulai e yaco mai ena nona loloma sega ni dau veivukiyaki na Tamada Vakalomalagi me baleti ira yadua na Luvena. E kila talega ni kaukauwa ni veivakabulai sa koto ena nona Veisorovaki o Jisu Karisito. O koya, sa nona sasaga kina me kitaka na veika kece sara e rawata me tawasei iko tani kina mai vei Tamamu kei na Luvena. Kakua ni vakatara vei Setani me vakadeitaka vei iko ni ko sa sega ni rawa ni vukei.
Ena vakayagataka ko Setani na nomu vakalolomataki me vakalailaitaki kina na nomu vakabauti iko vakataki iko, vakarusa na nomu vakabauta na kaukauwa, vakavuna na nuiqawaqawa, ka vakavurea na yalo druka. Na veivakalolomataki ena vakacacana na nomu rawa ni tauyavutaka na veiwekani bulabula vakatamata. Sa dodonu mo vakabauta ni rawa ni wali na revurevu ca oqo: kevaka e sega era na vakavuna na kena sega ni taucoko na nomu vakabulai. E dina ni kaukauwa na kena cakacaka ena nomu bula na veika oqo, era na sega ni rawa ni vakavotuya mai na kemu ituvaki dina.
Ko Setani ena vakavulagitaki iko mai vei Tamamu mai Lomalagi ena vakanananu ni kevaka e lomani iko dina ena tarova o Koya na leqa o ya. Me kakua ni vakalatia vei iko na sala ki na ivurevure dina ni veivakabulai na nona ivadi qaseqase na tui ni ca kei na nona lasu torosobu. Mo kila tiko ni kevaka o nanuma ni sega ni lomani iko na Tamamu mai Lomalagi, sa vakauqeti iko tiko o Setani. Ena gauna sara mada ga sa rui dredre kina na masu, tekiduru ka kerea na Tamamu mai Lomalagi me vakatara vei iko mo vakabauti Koya ka mo vakila na Nona lomani iko. Kerea me yaco mo kila ni rawa ni vakabulai iko na Luvena ena Nona Veisorovaki loloma.
A nona vakatutu ko Setani me da vakasaurarataki na luvena na Tamada me da talairawarawa, me kua na galala ni digidigi, sa na sega talega kina na tubu yadua. Me maroroi na galala ni digidigi, sa sega kina ni tarovi ira na tamata na Turaga ena nodra vakayagataka vakatawadodonu na galala o ya. Ia, ena totogitaki ira me baleta na ivalavala vakaoqori vakavo kevaka sa taucoko na veivutuni. Ena vuku ni Yalo Tabu, sa dau veivakauqeti kina ena veivakasalataki vei koya e veivakalolomataki, ia e vakavuqa ni sa rui dau kaukauwa na gagano torosobu ni tamata yadua sa dau sogota laivi na veidusimaki vakayalo. Oqori na vuna sa vakarautaka kina na Tamada e dua na sala me vakabulai kina na imawe ni ivalavala ca, ena veivakasaurarataki, vakayagataki cala ni kaukauwa, se na kena rerevaki e dua tale, sa na rawa ni kauta tani ena dua na gauna na nona galala o koya e vakalolomataki.
Na itekivu ni veivakabulai ena gadrevi kina na vakabauta vakagone ena dina sega ni veisautaki rawa ni lomani iko na Tamada mai Lomalagi ka sa vakarautaka tu e dua na sala ni veivakabulai. Na Luvena Lomani, ko Jisu Karisito a solia na Nona bula me vakarautaki ki na veivakabulai. Ia e sega na iwali e lako mai ena mana, e sega ni dua na wainimate me vakarautaki kina na veivakabulai, ka sega talega ni dua na sala rawarawa ki na iwali e taucoko. Na iwali e gadrevi kina na vakabauti Jisu Karisito dina sara kei na Nona rawata me veivakabulai. Sa kelei koto ena noda kila na ivunau kei na noda lewa ka vakadeitaka me da muria.
Na veivakabulai e rawa ni tekivu mai vua e dua na bisopi dau veinanumi se peresitedi ni iteki se dua na kenadau yalomatua. Kevaka e ramusu na yavamu o na sega ni via tovolea mo semata ga vakataki iko. Na veivakalolomataki bibi ena rawa talega ni vukei mai na nodra veivuke na kenadau. E levu tu na sala me tekivu kina na veivakabulai, ia nanuma tiko ni veivakabulai taucoko e yaco ga mai vua na iVakabula, na Turaga ko Jisu Karisito, na noda iVakavuvuli ka Dauveivueti. Vakabauta ni salavata kei na sasaga ena rawa ni vakabulai iko mai na nomu vakararawataki tu ena imawe ni veivakalolomataki na Nona Veisorovaki uasivi, tawamudu ka bibi.
Ena dredre sara toka beka vei iko na kena irairai ena gauna oqo, ena yaco mai na gauna, ena veivakabulai e rawa ni o ciqoma mai vua na iVakabula me na rawa kina vei iko mo vosoti koya dina sara a vakalolomataki iko, ka na rawa sara ni ko lomani koya. Ena gauna sa rawa kina mo vosota na cala sa na laveti tani vei iko na mosi kei na mosiniyalo ka vinakata ko Setani me yaco ki na nomu bula ena nona vakayaloqaqataki iko mo cati koya a vakalolomataki iko. Ena basika kina vei iko na vakacegu e cecere cake. E dua na tiki bibi ni veivakabulai, kevaka ena vakavuna vakalevu tale vei iko na mosi na nomu vakasamataka na veivosoti, biuta toka vakatikitiki na ikalawa ko ya me yacova ni ko sa vakila eso tale na kaukauwa ni nona veivakabulai na iVakabula ena nomu bula.1
Kevaka o vakalolomataki tiko ena gauna oqo se ena gauna e liu, vakayaloqaqataki iko ena nomu vakasaqara na veivuke. O sa vakarerei beka se caka vei iko e dua na ka ni veivakarerei mo kakua kina ni tukuna na veivakalolomataki. Yaloqaqa ka cakava e dua na ka ena gauna oqo. Vakasaqara na nona veitokoni e dua e rawa ni o vakabauta. E rawa ni rau vakasalataki iko vakavinaka sara na nomu bisopi kei na peresitedi ni iteki ka vukei iko vei ira na vakaitutu vakamatanitu. Vakamacalataka na ivakarau ko vakalolomataki kina ka tukuni koya e cakava vei iko. Kerea na veitaqomaki. Na veika o cakava ena rawa ni vukei ira na tani mai na nodra coko ena veika era sega ni namaka me ra qai laki sotava tu na kena rarawa. Vaqara na veivuke ena gauna oqo. Kakua ni rere—ni rere e nona iyaragi ko Setani me vakararawataki iko tikoga kina. Ena vukei iko na Turaga, ia mo vakasaqara na veivuke oqori.
Kakua ni yalolailai kevaka e via vakataratutu o bisopi ena imatai ni gauna o vakatakilai koya kina a veivakalolomataki. Nanuma tiko ni ra dau maqosa sara o ira na dauveivakacacani ena nodra cakava e dua na ka me vakamatavulotaki tu kina na nodra ivalavala veivakalolomataki. Masu mo dusimaki ena nomu sasaga mo vukei. Ena yaco mai na veitokoni o ya. Me dei tiko vei iko ni o koya na Turaganilewa Uasivi, ko Jisu na Karisito, e kila vakavinaka tu na veika matailalai, ena tarogi ira kece sara na dau veivakalolomataki ena veivalavala tawadodonu kece sara. Ena kena gauna, ena vakayagataka o koya na veika kece sara e gadreva na lewa dodonu vakavo kevaka e sa taucoko na veivutuni. Na nomu segata me saumi lesu vakatotolo ena lewa dodonu na veika e vakayacori ena vakaberaberataka ga na nomu vakabulai ka rawa kina vua e veivakalolomataki me tomana tikoga na nona ivalavala voravora O koya sa dodonu kina mo laiva na veitotogitaki me baleta na ivalavala vakatevoro ni veivakalolomataki vei ira na vakailesilesi vakamatanitu kei na Lotu.
Vei Koya e Veivakalolomataki
Ia oqo, ki vua na dauveivakalolomataki ka sa vorolaka na nona bula e dua tale ena veivakalolomataki: mo kila ni o gadreva mo vukei ena ivalavala o sa vakabobulataki tu kina de na vakarusai iko. O na sega ni rawa ni vakamalumalumutaka ga vakataki iko. O na gadreva na veivuke mai vei ira na kenadau. Au sa kerei iko mo segata mo vakabulai ena gauna sara ga oqo. O sa rairai vakacalai iko tiko beka ena veitaqomaki lasutaki ka sega ni tudei o vunitaki iko tu kina ena gauna oqo mai vei ira na vakailesilesi ni matanitu se na Lotu. Ia, mo kila ni kila vakavinaka tiko na nomu ivalavala ca na Turaga o Jisu Karisito. Sa veivakasalataki o koya: “Kevaka e dua sa vakacala e dua vei ira na lalai oqo… . sa vinaka vua kevaka e vakarubeci e domona e dua na vatu iqaqi levu, ka vakadromutaki ena wasaliwa titobu.”2 Mo kila tiko kevaka sara mada ga ena sega ni cakava kina e dua na ka o koya o vakalolomataka, ena vakavotui mai e matanalevu na nomu ivalavala ni veivakalolomataki, ni na vakavotui iko mai o Setani, ka qai laivi iko duadua tu.
Vakarawarawataka na nomu bula ena nomu cavu ikalawa ena gauna oqo mo savata na yalomu mai na ivalavala ca vakaoqo ka walia na itotogi era vakavuna. Vakaraitaka na nomu gagadre mo vakabula na rarawa ko sa vakavuna vei ira na tani. Drau veitalanoa kei na nomu bisopi se peresitedi ni iteki. Na bibi ni nomu ivalavala ena gadrevi kina mo tu ena dua na veivakadodonutaki vakamatanitu se vaka-Lotu. Ia na veivutuni e taucoko ena kauta mai na vakacegu kamikamica ni veivosoti, na vakacegu ni lomada, kei na dua na bula vakavoui. Ena kauta talega mai na vakacegu vei ira era vakalolomataki kei na nodra matavuvale. O na galala mai na bibi ni yaluma kei na vakanananu ka beitaki iko voli ena veika o sa vakavuna ena rarawa kei na mosi ki na nona bula e dua tale. Mo kila ni rawarawa vakalevu cake sara mo veivutuni ena bula oqo, mai na kena sa bera mai, veivutuni oqo. Ko na vukei ni ko sa nanuma mo sereki mai na nomu vakabobulataki ena veivutuni kei na nodra veitokoni na tani. Mo vakavinavinaka ni ko a sega ni bula ena gauna makawa ka ra dau vakaviriki kina ena vatu me yacova ni ra sa mate ko ira na dauveivakalolomataki ka sega ni soli vei ira na gauna ni veivutuni.3
Vei Kemuni na iTubutubu
Kemuni na itubutubu, ena veisala kilikili ka rarama eso, vakavulici ira na luvemuni ena veika rerevaki e rawa ni yaco ena veivakalolomataki kei na sala me da levea kina. Dau kidava na kena ivakatakilakila, me vaka na veisau vakasauri ni nona itovo e dua na gone ka rawa ni tukuna tiko na leqa sa tiko. Mo vakila na nona veilecayaki e dua na gone ka vaqaqa na vuna.
Vei Kemuni na Turaganilewa e Isireli
Vei kemuni ka tu vei kemuni na idola ni vakatulewa e Isireli, gumatua ka qaqarauni ena nomu vakadeitaka ni sa soli na veivuke e ganita vei ira yadua era sotava tu na rarawa ena vuku ni veivakalolomataki. Na ivoladusidusi ni Lotu kei na talevoni ni veivuke e koto kina era sa ivurevure yaga sara me ra dusimaki iko ena nomu veiqaravi vakalotu kei na laurai ni valenivolavola vakamatanitu.4 Liutaka vakamatau na nona vakaitavi e dua ka sa cala oti ena veigauna e liu. Mo ni kila ni na sega sara ga ni via vakatusa na nona ivalavala sega ni vinaka o koya e veivakalolomataki. Vakasaqara na veidusimaki ni Yalotabu ni o vakila ni dua na ka e cala tiko. Nanuma na nodra veivuke na veiliutaki ena tabanalevu kei na iteki me levei kina na leqa e rawa ni yaco.
Sa noqu masu, mo na cakacaka ena gauna oqo o iko o vakalolomataki se o koya e vakavuna mo soli iko ki na kaukauwa veivakabulai ni nona Veisorovaki o Jisu Karisito. Au vakadinadinataka ni nomu vakabauta kei na talairawarawa ena vakadeitaka na Nona veivuke. Ena yacai Jisu Karisito, emeni.