Elder Kent D. Watson

Ena Vitusagavulu

Ni raicilesu na nona bula, sa dau vakila tu ga o Elder Kent Dee Watson ni dua na tamata vakabauta o koya ka sa dau tu ga na nona ivakadinadina, ia e a sotava e dua na ka, ka a vakayavalati koya sara vakalevu.

“Na noqu vakatulewa vakacauravou meu gole ki kaulotu e veisautaka sara ga na kequ ituvaki kece ni bula,” a kaya o Elder Watson, ka se qai kacivi walega oqo ki na iKarua ni Kuoramu ni Vitusagavulu.

A ciqoma e dua na ilesilesi ki na Tabana ni Kaulotu ena Southern Far East ka laki kaulotu ki Taiwan. “Ena vuku ga ni noqu a laki kaulotu au a veisau kina mai na dua na gonevuli torosobu ki na dua na gonevuli vinaka,” a tomana o koya. “Ena vuku ga ni noqu a laki kaulotu au a sotava kina na watiqu. Au a vakatakilaitaki vua mai vua e dua na itokani ni kaulotu e liu. Ena vuku ga ni noqu kaulotu au vulica rawa kina na vosa vaka-Jaina. Ena vuku ga ni noqu kaulotu au a mai marautaka tu kina e dua na cakacaka kau gugumatua sara kina. Ena vuku ga ni noqu kaulotu eratou sa mai sotava kina na noqu matavuvale na veimadigi eso ni vakaitikotiko ena veisiti eso.”

E a taura o Elder Watson na nona diqiri ni bejala kei na masta mai na Brigham Young Univesiti ka cakacaka tudei tu vaka-dauniakaude raraba vakaivola, ka yaco sara me jeameni ka iliuliu levu (CEO) ni dua na kabani ni veika vaka-akaude ni veimatanitu.

E a rawa talega vei Elder Watson me taleva lesu vata kei watina na vanua a laki kaulotu kina me laki peresitedi ni Tabana ni Kaulotu e Taiwan Taichung ka peresitedi vakatawa ni Tabana ni Kaulotu e Taiwan Kaohsiung. Na nona a cakacaka vata vakalevu kei ira na daukaulotu gone e solia vua e dua na yalo e nuitaka tiko na nodra kaukauwa na itabagone ena Lotu.

E sa veiqaravi oti mai o Elder Watson ena vuqa na veikacivi ni Lotu, oka kina na bisopi ka daunivakasala ena mataveiliutaki ni iteki.

E a sucu o Elder Watson e Cedar City, Utah e Amerika, kivei rau o Lorenzo Dee Watson kei Joyce Watson ena ika 8 ni Me, 1943. A vakamautaki Connie Lingmann ena 23 ni Okosita, 1967, ena Valetabu e Salt Lake, ka rau itubutubu ni lima na gone.