Na Veika Bibi e Sotavi
Na noda ilakolako yadua ena bula oqo ena vakarautaka vei keda e vuqa na veika bibi meda na sotava ka ra na yaco me yavu ni vakabauta kei na ivakadinadina.
Au gadreva meu kuria ena noqu ivakadinadina ena siga taleitaki oqo niu kila ni ko Peresitedi Thomas S. Monson e parofita ni Turaga ena vuravura oqo. Au vakavinavinaka ni soli vei au na galala meu vosa ena koniferedi raraba.
Au sa vakavinavinaka vakakina, vakataki kemuni, ni veika eda mai sotava ni vakaitavi ena koniferedi vakairogorogo oqo ni da mai tokona, ena dua na ivakarau maqosa ka tudei na noda parofita vou, Mataveiliutaki Taumada, kei ira na iliuliu tale eso ena Lotu.
Na mataqali veika e sotavi vakaoqo e vaqaqacotaka na noda ivakadinadina ka vakatubura na noda vakabauta ni da sa kila vakaidina tiko ni sai koya sara ga oqo, na nona Lotu dina ka bula tiko na Turaga.
Na noda ilakolako yadua ena bula oqo ena vakarautaka vei keda e vuqa na veika bibi meda na sotava ka ra na yaco me yavu ni vakabauta kei na ivakadinadina. Na veika e sotavi oqo era yaco mai vei keda ena veimataqali sala ena veigauna sega ni dau namaki. Era na gauna cecere ni veivaqaqacotaki vakayalo se veigauna eso ni veivakararamataki. Eso na veika e sotavi oqo era yaco mai me bolebole ka rawa ni veivakaleqai, ka veivakatovolei dredre sara me ra na vakatovolea na noda gumatua me da na rawa ni sotava. Na veika kece eda na sotava, era na solia vei keda na galala me da vakatorocaketaki yadudua, vakavukui cake, ka vuqa na gauna, meda na qaravi ira na tani ena yalovinaka kei na loloma e levu cake. Me vaka e kaya na Turaga vei Josefa Simici na Parofita, ena dua na sala ni veivakadeitaki ena dua vei ira na gauna dredre ni nona vakatovolei ena Liberty Jail, “Ni ko na kalougata vakalevu, kevaka ko sa vosota rawa na veika kece oqo” (V & V 122:7).
Ni dau kumukumuni vata mai na veika eda sotava ena noda bula, era na veivaqaqacotaki ka veitokoni vakai ira. Me vaka ga na kena tarai cake na yavu ni noda vuvale e dau tokona na vo ni gacagaca kece sara ni vuvale, sa vakakina ki na veika eda sotava yadua ena bula oqo sa yaco me yavu ni kena tarai cake na noda ivakadinadina ka me vakalevutaki kina na noda vakabauta na Turaga o Jisu Karisito.
Na soqoni ni koniferedi sara ga oqo sa vakaraitaka tiko na bibi ni bula ka sa sinai tu ena veika e sotavi. Ni da vakamuria na nodra veivakasalataki vuku na noda iliuliu, ka qoroya na nodra ivakavuvuli kei na ituvaki ni yalodra, ena veivakurabuitaki beka na nona digitaka na Turaga na Nona iApositolo iliuliu, ni oti na veiyabaki ni vakavakarau, me sa Nona parofita digitaki?
Na noqu veivakalougatataki vakapeteriaki e tukuna ni na yaco meu sotava na veika bibi me na vaqaqacotaka na noqu ivakadinadina. Kemuni na taciqu kei na ganequ, mo ni vakasamataka mada na veika bibi ko ni sa sotava ka ko ni sa vakalougatataki kina ena nomuni bula ka sa solia vei kemuni na yalonuidei kei na reki ni lomamuni. Nanuma tiko beka na imatai ni gauna ko ni sa kila kina ni ko Josefa Simici sa nona parofita ni Veivakalesuimai na Kalou? Nanuma tiko beka na nomu sa ciqoma na bolebole nei Moronai ka ko sa kila kina ni iVola i Momani sa dua tale ga na ivakadinadina kei Jisu Karisito? Nanuma tiko beka na nomu a ciqoma e dua na isau ni masu ena yalodina ka ko sa qai kila kina ni Tamada Vakalomalagi sa kilai iko ka lomani iko? Ni ko vakasamataka na veika bibi sa sotavi oqo, era sega beka ni solia vei iko e dua na yalo ni vakavinavinaka, ka vakadeitaka mo ni toso ga ki liu ena vakabauta kei na gugumatua e vakavoui?
Ena dua na gauna lekaleka sa oti, keirau a sotava kei Sisita Rasband e dua na ka keirau na sega sara ga ni guilecava. Au a lesi meu laki dabe vakatulewa ena rua na koniferedi ni iteki e Peru. Mai kea, keirau a gole ki na siti o Puno, ka tiko sara e cake ena Veiulunivanua na Andes ena Drano o Titicaca. Ni toka ena 12,000 na fute (3,660 na mita) e dela ni waitui, keirau qoroya vakalevu na siti vinaka ka totoka oqo, ena dela ni drano ena Andes. Keirau a sotavi ira na veiperesitedi ni iteki ena iwasewase o ya ka tiko ena dua na yasanibuka totoka ni itabagone ka ra tiko kina e drau vakadrau na itabagone mai na iwasewase o Puno.
Ena dua na mataka, keirau a sureti me keirau laki sikovi ira e dua na ilawalawa lailai ni lewenilotu era vakaitikotiko ena veiyanuyanu ni veikuta ciri ena Drano o Titicaca. O ira na lewenivanua e kea era vakatokai na Uros Idia ni Bolivia kei Peru.
E a tukuni vei keirau ni vica ga na matavuvale ni Yalododonu Edaidai era a duavata ka tara ga vakai ira e dua na nodra yanuyanu lailai vou ciri. Ena yalo maqusa, keirau a vodo ena dua na waqa ki na yanuyanu ka keirau kidavaki mai ena marau mai vei ira na lewenilotu totoka oqo.
Keirau a roqoti ira na luvedra era oloni vinaka tu ena nodra tutuvi totoka, dui rokaroka, ka culaligataki. Keirau a kania na ika era a rawata mai na drano ena siga tikoga o ya, ka ra vakarautaki vakavinaka tu ka mai veidovitaki ena yalololoma. Keirau a raica talega na nodra iyaya volitaki kei na cakacaka ni liga era veisautaki vaka iloloma.
Ni keirau sa veisiko tiko, keirau kila kina ni o ira na nodra gone era voce yani ka voce mai ena bavelo me 45 na miniti ki Puno me baleta na semineri kei na vuli ena veisiga. Keirau a marautaka talega ni o ira na lewenilotu oqo era kila vakavinaka tu na ivolanikalou, kila na kedra ibalebale, ka taleitaka sara. Era maqusa me ra vakaraitaka vei keirau na nodra ivolatara ni valetabu ka se dodonu tiko na kena tikinisiga, ka ra sa vakaedaumeni ka vauci ena Valetabu e Cochabamba Bolivia.
Ni keirau sa vakarau lesu mai, a kerea sara e dua vei ira na marama tina ke rawa me keirau tekiduru vata kei ira ena dua na masu vakamatavuvale. Au se nanuma vinaka tikoga oqo ena noqu tekiduru vata kei ira na Yalododonu yalodina oqo ena kuta dakoba vinaka. Ni keimami sa tekiduru, a kerea o koya meu na cabora na masu, kau a vakayagataka kina na Matabete i Melikiseteki, ka vakatabuya na nodra yanuyanu ka itikotiko vou o ya.
E a luvuci au na yalomalumalumu, ni ra kerei au na matavuvale ni Yalododonu Edaidai yalodina e kea, ni veiyanuyanu ciri ni Drano o Titicaca, meu masulaka na yanuyanu lailai o Apu Inti (Ah-pooh-E-n-tea) ka kerea na Turaga me vakalougatatataka na nodra itikotiko kei na veimatavuvale na Lujanos kei na Jallahuis.
Niu vakasamataka voli na veika bibi e sotavi oqo sa mai vakalougatataki keirau kina na Turaga, au sa kila kina ni sa mai vakuri e dua na yavu vou ni noqu vale ni vakabauta. Au dau vakasamataka vakawasoma na ka au sotava o ya mai Puno ni dua tale na kena vakataucokotaki na noqu veivakalougatataki vakapeteriaki.
Mai na ulu ni ivakamacala ni Vunau kei na Veiyalayalati, ka a volai ena 1831, ka parofisaitaki kina na kena toso na cakacaka ni Turaga ena noda gauna oqo, a vakaraitaka kina vakaoqo na Turaga:
“Ia me ra vunau ko ira ena yaca ni Turaga na Kalou, na nodra i Vakabula na kai vuravura:
“Io me ra vakabauta kina na kai vuravura talega;
“Io me vakataudeitaki na noqu veiyalayalati tawamudu;
“Ia era na vunautaka yani na uto ni noqu i vakavuvuli dina ko ira sa malumalumu kei ira na tamata wale; io me ra vunautaka yani ki vuravura taucoko” (V&V 1:20–23).
Kemuni na taciqu kei na ganequ, o ira na malumalumu kei ira na tamata wale lewe ni Lotu, me vakataki iko kei au, eda sa kauta tiko yani na kosipeli ki vuravura taucoko, ki Puno, Peru, kei na veivanua vakayawa tale eso. Sa tubu cake tikoga na vakabauta ena kedra maliwa na tamata ni veiyalayalati ni Kalou, kau vakabauta ni lako mai ena veika eda sotava vakayauyau yadua ni tubu cake tiko ni vakabauta sa rawa me yaco vei keda yadua.
E kaya o Peresitedi Monson: “Sa veivunauci na Turaga. Ia o ira era na vakarorogo Vua, se ra vuku se tamata wale, ena vakatakilai Koya mai ena veicakacaka, ena veika dredre, na veivakararawataki era na bula curuma ena gauna ni Nona veitokani, ka … era na vulica kina ena veika era dui sotava, se O cei o Koya” (Ena “The Way of the Master,” Liaona, Janu. 2003, 7; cavuti kina o Albert Schweitzer, The Quest of the Historical Jesus [1948], 401; sa vakaikuritaki).
Ena loma ni gauna oqo ni veivakasaurarataki ni veika vakavuravura ki na noda bula, ena gauna sa vaka me solegi keda na veivakatovolei kei na veika dredre, me da nanuma tikoga na veika bibi eda dui sotava vakayalo. Na veiyavu oqo ni vakabauta ena kauta mai vei keda na yalonuidei kei na veivakadeitaki ni dua na Tamada Vakalomalagi dauloloma, na noda Turaga ka iVakabula, o Jisu Karisito, kei na Nodrau Lotu dina ka bula sa vakalesuimai. Au sa vakadinadinataka ena yaca i Jisu Karisito, emeni.