Tolu me Veiliutaki ena Bete Levu
Eda na vakavukui ka vaqaqacotaki ni da vakanamata ki na Mataveiliutaki Taumada me ratou ivakaraitaki ni ivakarau ni veiliutaki.
Sa dua na ka, kalougata ka taleitaki vei keda ni da tokoni Peresitedi Thomas S. Monson, Peresitedi Henry B. Eyring kei Peresitedi Dieter F. Uchtdorf me ratou Mataveiliutaki Taumada vou ena Lotu ni Turaga.
Au a vulica taumada na bibi ni Mataveiliutaki Taumada ena noqu a se gonetagane ka tubu cake tiko mai na Ra kei Kenada. Ena noqu dau lako ki na nodrau vale na Walker oi rau na Tukaqu kei Buqu, ena imatai ni noqu curu yani ki vale au dau kidavaki mai na dua na itaba vakawaqa ni Mataveiliutaki Taumada ni Lotu. Au se nanuma vinaka tu. Na kena irairai e vaka me ratou tucake tu na dauyadra, ka kidavaki ira kece era curu yani.
Na itaba rairai vinaka ko ya sa itaba kei Peresitedi George Albert Smith, vata kei rau na nona daunivakasala o J. Reuben Clark Jr. kei David O. McKay. Na itaba e vakaraitaka nodratou tucake vata tu ena dua na itaba levu kei vuravura raraba. Au taleitaka na iyaloyalo. Eratou sa bau turaga rairai totoka dina ka dokai; au kila ni ratou parofita ni Kalou ka nona daunivakasala.
Na iyaloyalo o ya ka rube toka ena imatai ni rumu eda curuma yani ena nodrau vale na tukaqu kei na buqu e a tara sara vakabibi na noqu bula. Au a bula e Raymond na tauni lailai ka buca veico ka rau vakaitikotiko kina o tukaqu kei buqu. E rawa meu taubale ga ki na nodrau vale, kau dau sikova wasoma. Au nanuma tiko noqu dau tucake taudua tu vakawasoma ena vakadirorogo ena imatai ni rumu eda curuma yani ka sarava tu ena vakarokoroko na iyaloyalo ni Mataveiliutaki Taumada o ya. Au nanuma noqu dau vakasamataka se baleta na cava e rau vakasamataka kina o tukaqu kei buqu na kena bibi ni rokovi na Mataveiliutaki Taumada ka mai vakaraitaki sara tu kina na iyaloyalo kilai tani o ya ena nodrau vale. O ira kece era curu yani era na raica. E rairai na kena e bibi duadua, me baleti ira na luvedrau kei na makubudrau sa ikoya me vakavotuya wasoma na titobu ni kena bibi e yalodrau kei na nodrau bula o Tukaqu kei Buqu.
Ni oti e vica vata na yabaki au sa mai tinia ni kena vakaraitaki na iyaloyalo ni Mataveiliutaki Taumada e tautauvata kei na ivakamacala totoka nei Josua: “Mo ni digitaki koya edaidai kemuni na qarava. Ia koi au kei na noqu lewe-ni-vale, keitou na qaravi Jiova” (Josua 24:15).
O ira kece era curuma na vale nei James kei Fannye Walker era kila ni sa ceuti tu ki lomadra na vosa oqo: “Ia koi keimami kei ira na lewe-ni-vale, keitou na qaravi Jiova.” Me vaka niu makubudrau, au kila tu kau na sega ni guilecava rawa.
Niu se gonetagane au sega ni kila vakavinaka na kena ibalebale ni tiko eratou lewe tolu ena Mataveiliutaki Taumada ka sega ni dua ga na Peresitedi. Au sa kila, vakaidina kina, ni o Jisu a digitaki Pita, Jemesa kei Joni, sega ni o Pita walega. Au kila ni o tamaqu e a dua vei iratou na turaga lewe tolu ena matabisopi, ka veiqaravi tiko me daunivakasala vei Bisopi J. O. Hicken. Au kila ni o tukaqu e a peresitedi ni iteki ka ni a rua na nona daunivakasala ka rau tu e yasana (Peresitedi John Allen kei Peresitedi Leslie Palmer).
Sa kena ivakarau—dua na mataveiliutaki—e sega ni dua ga na turaga me iliuliu ia eratou lewe tolu ka ratou veiliutaki vata. Ena Lalai au a vulica kina na Yavu ni Vakabauta kau a taleitaka dina sara. Na Yavu ni Vakabauta e solia vei ira na noda itabagone na veivakacegui kei na yalonuidei ni ra vulica kina na veivunau bibi ni Lotu. Au sa qai kila mai kina ni sa “Lesia na tamata na Kalou ena parofisai, kei na veitabaki ni liga, me soli kina vua na kaukauwa me vunautaka na itukutuku vinaka ka vakayacora na veicakacaka tabu vakalotu” (Na Yavu Ni Vakabauta 1:5).
Ena 1835 e a vakatakila na Turaga vua na Parofita o Josefa Simici na ituvatuva dina ni mataveiliutaki ena Lotu:
“Ia sa kilikili me ra lesi na peresitedi, se na iliuliu ni matabete …
“Ena Matabete i Melikiseteki, e tolu na Mataveiliutaki ni Bete Levu, digitaki mai na Kuoramu ni iApositolo Le Tinikarua, digitaki ka tabaki ena itutu o ya, ka tauri ena yalodei, vakabauta kei na masumasu ni lotu, [era] lewena e dua na kuoramu ni Mataveliutaki ni Lotu” (V&V 107:21–22).
“E dua na kuoramu ni tolu na peresitedi” (V&V 107:29)—e sega ni dua na peresitedi ka rua na ivukevuke ni peresitedi—ia e tolu na mataveiliutaki ni bete levu. E dua na kuoramu ni tolu na peresitedi—na Mataveilutaki Taumada ni Lotu ni Turaga.
Na vuravura e sega ni tuvai koya ena sala oqo, ia oqo na ituvatuva ni Turaga ka tara cake kina na Nona Lotu.
E kauta lesu mai vei au na ivolanikalou:
“Ni sa dua tani na noqu vakanananu ka dua tani na nomudou vakanananu, ka sa dua tani na noqu ivalavala ka dua tani na nomudou ivalavala, sa kaya ko Jiova.
“Me vaka na kena cecere cake na lomalagi ki vuravura, sa cecere cake vakakina na noqu ivalavala ki na nomudou ivalavala, kei na noqu vakanananu” (Aisea 55:8–9).
Ni rauta toka na ikavitu ni noqu siganisucu, au vulica vakalailai me baleta na taucoko ni Mataveiliutaki ena gauna e mai takali kina o Peresitedi George Albert Smith. E dua tale na gauna e muri, na iyaloyalo ena imatai ni rumu eda curuma yani vei rau o Tukaqu kei Buqu e sa sosomitaki ena dua na iyaloyalo rairai vinaka kei Peresitedi David O. McKay kei rau na nona daunivakasala Stephen L. Richards kei J. Reuben Clark, Jr.
Me vaka e dua na gonetagane au a sega sara ga ni kila vakaidina na titobu ni kena kilai tani se na ivakarau ni veisosomitaki ena Mataveiliutaki—ia au kila ni a mate na parofita ka da sa liutaki mai vua na parofita vou ni Kalou, vata kei na rua na daunivakasala ka rau tu e yasana.
Niu sa yabaki 13, au a kacivi yani ena valenivolavola nei Bisopi Murray Holt ka lesi au meu peresitedi ni kuoramu ni dikoni. E kaya vei au ni gadrevi meu lako ki vale ka masulaka se o cei e dodonu me rau noqu daunivakasala. E vakatavulici au ni Turaga ena vukea noqu vakatulewa. E a vakayacora dina. Au a qai vulica e kea me baleti ira na daunivakasala ka sa tekivu meu raica na vuna e liutaka kina na Nona Lotu na Turaga mai vei iratou na mataveiliutaki, ka sega ni peresitedi walega. Au lomani rau na noqu daunivakasala ena kuoramu ni dikoni ka keitou masumasu ka cakacaka vakaukauwa me vukei ira na gonetagane ena neitou kuoramu. E vakatavulica vei au o Bisopi Holt na ivakarau ni mataveiliutaki ka vakatavulici au na kena cakacakataki kei na kena icakacaka ni dua na mataveiliutaki ena Lotu ni Turaga.
Ena noqu veiqaravi e muri vaka-Peresitedi ni veikuoramu tale eso, au sa kila oti tu na kedra bibi o ira na daunivakasala kau kila ni Turaga ena vukea na noqu digitaki ira—me vaka ga e a vakatavulici au kina na noqu bisopi.
Me vaka e dua na peresitedi ni kuoramu ni dikoni ka qai bisopi e muri ka peresitedi ni iteki, au kila ni vuku cava ga, na kila se na levu ni ka e tu vei au, ena vakalevutaki cake sara ena gauna au okati rau kina na noqu daunivakasala ena vakatulewa cava ga e gadrevi me vakayacori. Au vulica na yaga ni cakacaka vata ena dua na mataveiliutaki ni ka e totoka vakaoti ka veivakalevulevui.
Au a qai kila na vuna e lesia kina na Turaga na Nona Lotu me liutaki mai na tolu na bete levu iliuliu kei na vuna sa mai vakayacori kina na mataqali veiliutaki vakaoqo ena vuqa na tabana ni Lotu.
E kaya na Turaga: “Raica au na solia talega vei kemudou na ivakarau ni ka kecega mo dou kakua kina ni vakacalai” (V&V 52:14). Ia sa solia vei keda na ivakarau ni veiliutaki. Vakavo walega na Kuoramu ni Le Tinikarua kei na Vitusagavulu, na veikuoramu kece ni veimataisoqosoqo ni Lotu era liutaki mai na dua na peresitedi kei na rua na daunivakasala Me kena ikuri na veimataisoqosoqo, ena kena itagede kece sara era liutaki mai na dua na peresitedi kei na rua na daunivakasala. Na veivakalougatataki kece kei na yaga ni cakacaka vata me dua na mataveiliutaki e vakayagataki ki na veimataisoqosoqo, vaka talega kina ena veikuoramu ni matabete.
Oi keda vakayadua ka da veiqaravi ena mataveiliutaki cava ga ena Lotu e dodonu meda rai ki na Mataveiliutaki Taumada me ivakaraitaki ni ivakarau eda vakasaqara meda muria ena noda veiqaravi tiko. E dodonu meda tovolea meda tautauvata kei ira meda cakacaka vata ena veilomani kei na duavata me vaka era dau cakava.
E dau tukuna wasoma o Peresitedi Gordon B. Hinckley na bibi ni daunivakasala: E a kaya: “Na Turaga sa biuti ira na [daunivakasala] e kea ena dua na inaki” (Teachings of Gordon B. Hinckley, 94).
E tosoya tale na nona vakatavulici keda o Peresitedi Gordon B. Hinckley: “Ena veimataka kece vakavo ga ena Moniti, era bose na Mataveiliutaki Taumada ni keimami tiko ena tauni. Au qiriti Peresitedi Faust me vakaraitaka nona cakacaka vakalotu ka keitou veivosakitaka ka vakatulewa kina. Oti au qiriti Peresitedi Monson me vakaraitaka nona cakacaka vakalotu ka keitou veivosakitaka ka vakatulewa kina. Oti au vakaraitaka na veika au gadreva meu vakaraitaka ka keitou veivosakitaka ka vakatulewa kina. Keitou cakacaka vata. E sega ni rawa mo dua-ga na tamata cakacaka ena mataveiliutaki. Daunivakasala—sa dua na ka e vakurabui o ira na daunivakasala. Era taqomaki iko mai na nomu cakava na veika cala, era vukei iko mo cakava na veika dodonu” (Teachings of Gordon B. Hinckley, 95; raica talega “In… . Counselors There is Safety,” Ensign, Nov. 1990,48–51)
E dua na daunivakasala vei Peresitedi Joseph F. Smith e a vakamacalataka na vakatulewa ni Mataveiliutaki Taumada: “Ni dau lako mai e dua na kisi kivei iratou (Na Peresitedi ni Lotu) me ratou vakatulewa kina, o koya kei rau na nona daunivakasala eratou na veivosakitaka ka solia kina na nodratou vakasama maqosa me yacova ni ratou sa dua vata ga ena kena itinitini” (Anthon H. Lund) ena Conference Report, June 1919,19; vakamatatataki).
Oqori e dodonu me noda ivakarau ena mataveiliutaki.
Na ivakatakila e vakatavulici keda ena noda dau vakatulewa ena veikuoramu kei na mataveiliutaki “me ia ena yalododonu; na yalosavasava; na yalomalumalumu; na yalomalua kei na vosota vakadede; io ena vakabauta kei na ivalavala vinaka; na vuku kei na ivalavala malua; na vosota kei na ivalavala vakalotu; io me ia ena veilomani vakaveitacini kei na yalololoma” (V&V 107:30).
Sa solia vei keda na Turaga na ivakarau.
Eda sa tokona edaidai na Mataveiliutaki Taumada vou ena Lotu. Era na vakatavulici keda ka vakaraitaka vei keda na ivakarau e dodonu meda muria. Eda na vakavukui ka vaqaqacotaki ni da vakanamata ki na Mataveiliutaki Taumada ni ratou ivakaraitaki ni ivakarau ni veiliutaki.
Na veivakalougatataki cecere ena lako mai ki na noda matavuvale ena noda vakatavulici ira na luveda kei ira na makubuda me ra lomana ka tokona na iliuliu ni Lotu. Me vaka ga e dua na gonetagane ka tucake tu ena nodrau vale o tukaqu kei buqu, au kila ni da liutaki tiko mai vei ira na tamata ni Kalou, ka biuti ira e kea na Turaga me ra dusimaki keda.
Kau kila ena gauna oqo. Au wasea na ivakadinadina ni oqo na cakacaka ni Turaga, o Jisu Karisito; ka da liutaki mai vei ira na Nona iapositolo kei ira na parofita. Au wasea na ivakadinadina ni apositolo qase cake, o Peresitedi Thomas S. Monson ka kacivi mai vua na Kalou kei rau na nona daunivakasala vakaturaga erau tu e yasana, eratou na liutaki keda me vaka na vakasama kei na lewa ni Turaga, ni sa nona Lotu oqo. Ena yaca tabu i Jisu Karisito, emeni.