“Dau Taleitaka na Yaloqu na Veika ni Turaga”
Me da dau taleitaka na veika ni Turaga … . ni na “laveta” na yaloda ka vakavuna noda “reki”
Ena i Vola i Momani, e vosa vakalevu kina o Nifai me baleta na veika taleitaki. E taleitaka “na veika ni Turaga,” “ena ivolanikalou,” ka vakakina “ena ituvatuva cecere ka tawamudu” ni Tamada mai Lomalagi (raica 2 Nifai 4:15–16; 11:2–8). Vakabibi, na nona dau nanuma vakawasoma o Nifai na ivurevure ni veika e dau taleitaka ena maliwa ni veika rarawa, ka dau tovolea me laveta ka vakanamata na yalona ena veivakalougatataki tawamudu.
Oi keda talega e dodonu me da dau taleitaka na veika ni Turaga ni na “laveta” na yaloda ka vakavuna noda “reki” (2 Nifai 11:8). Meu tukuna mada e vica na ka au dau taleitaka.
Au taleitaka na noda iVakabula, o Jisu Karisito. Me vakataki Nifai, “Au sa vakacaucautaki Jisu” (2 Nifai 33:6), ena Nona itavi ni dau veiqaravi kei na veivakabulai e vuravura. E vakarautaka na rarama kei na inuinui ka sa solia tu vei keda na Yalo Tabu me kuria na noda tuberi ka vakacegui ena gaunisala eda muria. Ena vukuna duadua ga sa na rawa me da lesu kina vei Tamada. “Sa sega tale ni dua na yaca se na sala se ivakarau sa soli me ra bula rawa kina na luve ni tamata, na yaca duadua ga i Karisito” (Mosaia 3:17).
Au taleitaka na kosipeli vakalesuimai i Jisu Karisito ka tara ena yavu vakaiapositolo kei na parofita o ira kau sa vakalougatataki vakaidina kina ena noqu veiqaravi vata kei ira. Au vakadinadinataka ni sa parofita ni Turaga e vuravura nikua o Peresitedi Thomas S. Monson. Au taleitaka ni sa ikoya na italatala dina Vakarisito kivei koya e dolele tiko yani ena veikauwaitaki kei na loloma ki vei ira na tamata yadudua.
Au taleitaka na veidola ni matabete kei na veivaletabu ka ra sa roboti vuravura tu, ka sa rawa kina vei keda vakayadudua me da vakayacora na veicakacakatabu vakalotu kei na veiyalayalati tawamudu. Eso vei ira na noqu veisiga vakasilesitieti vinaka duadua, wale tikoga oqo, sai koya na nodra siga ni vakamau ena valetabu na luvequ, ka vakaitavi tiko o tamaqu ena cakacakatabu vakalotu oqo.
Au dau taleitaka na nodra guta na itabagone na dau osota yani na veivaletabu me ra laki papitaiso ena vukudra na mate. Au taleitaka na kilikili ni nodra talairawarawa ki na veivakatagedegede e veimuataki ki na valetabu kei na nodra vakavakarau me ra daukaulotu yalodina ka vakakina me ra tina ka tama yalododonu.
Au taleitaka niu dua na luvena yalewa na Tamada Vakalomalagi, ka lomani au. Au a vulica na veika vakalou me baleti au ena noqu veiyabaki taumada ni bula e yasai tinaqu. Wale tikoga oqo au raici makubuqu yalewa yabaki tolu tiko ena gauna o ya ni vulica tale tikoga mai vei tinana na veika me baleti koya. E a moce vata kei na nona yalolailai o Eliza. Ena qai rawa ga me kune vakacegu kevaka me tukuna tale vei Eliza o tinana na nona italanoa dina ka taleitaki vua me baleta na bogi bibi o ya ka a vakasolokakana kina vakavinaka ka vakamatata e yaloi tinana o Tamada Vakalomalagi ni sa dua na yalo vakamareqeti o Eliza ka sa tu vata kei na dua na ilesilesi vakaturaga.
Au dau taleitaka sara vakalevu na noqu itavi vakadauniveisusu, ka dau vukei au ena noqu vakaraitaka na noqu ilesilesi dina vakamarama. Au dau taleitaka sara meu raici ira na marama, goneyalewa, se o ira sara mada ga na goneyalewa lalai, ena nodra dau vakaraitaka na nodra yalomatua ka taleitaka na veisusu. E sega walega ni dua na nodra itavi taumada na tina, ia sa tiki talega ni noda “bula vakayago e vuravura me vakarautaki kina ena inaki sa virikotori tu me baleti koya.” (“Raica Na Matavuvale: Ai Vakaro ki Vuravura Raraba),” Liaona Okot. 2004, 49). Na veisusu sai koya me da veivakavulici, me susugi na veivakatorocaketaki, vakatara na tubu, veivakani ka veivakamamautaki. O cei ena sega ni kaila ena reki ena kena lesi vua e dua na itavi kalougata vaka o ya?
E vakayagataki walega vakarua na vosa susuga ena ivolanikalou, ena gauna ruarua oqori e tukuni kina na nodra itavi na itubutubu ena nodra susugi ira cake na luvedra ena “vunau kei na ivakavuvuli ni Turaga (Efeso 6:4; Inosi 1:1).
E veivakasalataki talega vei rau ruarua na turaga kei na marama o Peresitedi Hinckley me rau dauniveisusu. E a kaya: “Ena vakaevei li na totoka … na vanua eda vakaitikotiko kina kevaka me o ira na tama … vakakina o ira na tina me ra … raici ira na luvedra … me vaka ni ra sa isolisoli mai vua na Kalou mai lomalagi, … ka susugi ira cake mai ena vuku kei na ivakasala ni Turaga?” (“These, Our Little Ones,” Ensign, Tis. 2007, 7).
Au dau taleitaki ira na veimatavuvale. Wale tikoga oqo au a marautaka na nona sucu vou mai ki na dua na matavuvale e dua na makubudratou ka ratou vakabauta ni sa itavi dokai vei rau na itubutubu me rau susugi ira cake na luvedrau ena loloma kei na buladodonu. Eratou a vakatataro na qase cake ena nona tadu mai ki vuravura oqo na tacidratou yalewa lailai. Na kedra imatai ni veilesoni me baleta na iulutaga vakalou oqo era a vakavulici mai vei rau na itubutubu dauloloma ena dua na itikotiko tabu vakamatavuvale, ena dua na draki vakasilesitieli ka salavata mai na nona sucu vou mai e dua na yalo ki na bula oqo ena lomanibai ni nona ituvatuva cecere tawamudu na Tamada. Me kena veibasai, ena siga ka tarava, ni suka mai na vuli na makubui keirau, a mai tukuna na ka a vulica ena siga o ya, “e dua na vosa levu vou, na vakatanitaki ni veiyacovi.” Au kauwai vakalevu ena nodra sa vakamataraitaki, ena vuku ni tataqomaki, o ira na gone ena yabaki ni bula oqo, na veibasai ni iulutaga ka ratou se qai veitalanoataka sara ga vakamatau ena bogi. Au se sega vakadua ni donumaka me dua na matavuvale gone vakaoqo me yavutaki tiko ena ivakavuvuli i Jisu Karisito.
E vakatavulica vakaoqo o Jekope ni dau taleitaka “na nodra savasava na yalewa” (Jekope 2:28). Au taleitaka na nodra tiko savasava kei na nodra maroroi ira tu na yalewa kei na tagane. Sa vakacava na kena dau vakararawataki koya na Turaga na vakaveitaliataki ni bula dodonu kei na vakasewasewani ni ivakarau vinaka ena veiyasai vuravura kecega ni veivakacacani oqo. Ena nodratou vuli tiko na makubuqu, sa vakarautaka tu na Turaga vei ira na Luvena na reki e levu sara ena vuku ni veikilai, kei na loloma ni veitokani. Au rekitaka na matata ni ivakaro ki Vuravura Raraba me baleta na Matavuvale ka vakasalataki kina ni “ko ira era vakatanitaka na veiyalayalati ni bula savasava, ka ra dau vakaveitaliataki ira na watidra se luvedra, se era sega ni vakayacora vinaka na nodra itavi ena matavuvale era na tu me ra lewai kina ena mata ni Kalou ena dua na siga.”
Au taleitaka na nodra ivakaraitaki o ira era dau lako voli ena vakabauta ena ivolanikalou, ena uca kei na rarama ni siga ena nodra ilakolako ena vuravura oqo. Ena gauna yadua niu salavata yani kei Eparaama vata kei Aisake ena salatu ki na Ulunivanua o Moraia, au tagi, baleta niu kila ni sega ni kila tiko o Eparaama ni sa na tu mai ena icavacava ni ilakolako e dua na agilosi kei na sipi. Eda sa dui tu oqo ena lomadonu ni noda salatu vakavuravura, ia eda sa sega tu ni kila na vo ni keda italanoa. Ia o keda, me vakataki Eparaama ga, eda sa vakalougatataki ena veicakamana e vuqa.
Au taleitaka na nona loloma veivueti kei na cakamana (raica “Bless Our Fast, We Pray,” Serenilotu naba 138). Au kila ni ra dina na Nona loloma veivueti malumalumu kei na Nona cakamana, levu ka lalai. Era dau yaco mai ena Nona sala ka vakakina ena Nona gauna ga vakaikoya. Ena so na gauna ena yacova sara yani na noda iyalayala. O iratou na tisaipeli nei Jisu eratou a sa oca ena voce ena bogi taucoko ni bera ni a qai yaco yani o Jisu me vakacegui iratou. E a sega mada ni lako yani, me yacova na “ikava ni wase ni bogi,” kena ibalebale ni sa voleka na mataka caca. Ia e a yaco dina yani. (Raica Marika 6:45–51.) Sa noqu ivakadinadina ni na dau yaco dina mai na cakamana, dina ga ni ena so na gauna, ena via yacova sara nai kava ni iwase ni bogi.
Ena gauna oqo au sa vakayagataka tiko na noqu vakabauta kei na masumasu ka wanonova toka na veicakacaka mana ena vukudra na noqu daulomani era tauvimate tiko vakayago, guce tiko, kei ira era sa lako sese tu vakayalo. Au taleitaka na nona lomani ira vakayadua na Luvena na Turaga kei na Nona vuku ena nona vakatara vei keda yadua na veivakatovolei vakavuravura.
Meu tinia, au sega ni tukuna rawa na levu ni noqu taleitaka, na loloma tawamudu kei na veivuke tawayalani nei watiqu vakakina na nodra masu kei na veitokoni na luvequ kei rau na noqu itubutubu ena dela ni noqu gauna oqo ni veiqaravi vaka-peresitedi raraba ni Goneyalewa.
“Raica au sa dautaleitaka na veika ni Turaga” (2 Nifai 4:16)—Na Nona lawa, Nona bula, Nona loloma. Na taleitaki Koya sai koya na noda vakaraitaka na cakacaka ni Ligana ena noda bula. Sa noda itavi ena kosipeli me da vakayacora na ka dodonu ka me da lomana ka taleitaka na veika dina. Ena gauna eda taleitaka kina na qaravi Koya, sa dau taleitaka vakakina na Tamada mai Lomalagi me vakalougatataki keda. “Koi Au, na Turaga au sa marau meu vakalagilagi ira era sa qaravi au ena yalo sa dina ka dodonu, me yacova na i vakataotioti” (V&V 76:5). Au sa gadreva vakaidina meu kilikili kaya tikoga na Nona marau. “Au lomana na Turaga, Ka sa marau na yaloqu Vua,” (“I Love the Lord,” Jackman Music Corporation.). Ena yaca i Jisu Karisito, emeni.