Elder Allan F. Packer

Ena Vitusagavulu

iVakatakilakila

E nanuma lesu o Elder Allan Forrest Packer na gauna a se gonetagane yabaki 10 se 12 tiko kina, sa vakila o koya ni sa sega soti ni dau saumi mai na nona masu. Ena dua na siga ni a cakacaka vata tiko kei Boyd K. Packer na tamana, na Peresitedi ni Kuoramu ni iApositolo Le Tinikarua ena gauna oqo, a tukuna kina vei tamana na gone o Allan na nona lomaleqa.

A vakavulici koya o tamana ena vosa vakatautauvata, ka kaya ni o ira na pailate ni waqavuka era sega ni dau vakayagataka na nodra parasute ena veigauna kece era vuka kina, ia era se vakamatautaki ira tikoga me ra daramaka tiko. A vakayaloqaqataki luvena tagane o Peresitedi Packer me na masu tikoga, me na vosota tiko, ka me vakabauta tiko na kena yaco mai na isau ni masu, ena qai yaco dina mai.

“Na ivakavuvuli o ya a vukei au ena veiyabaki ni itekitekivu ni kena vakatoroicaketaki tiko na noqu ivakadinadina,” e kaya o Elder Packer, ka se qai kacivi walega oqo ki na iMatai ni Kuoramu ni Vitusagavulu.

E a sucu o Elder Packer e Brigham City, Utah e Amerika, ena ika 7 ni Julai, 1948, kivei rau o Boyd Kenneth Packer kei Donna Smith Packer. E dina ga ni o koya kei Terri Bennett Packer, na marama watina, erau taukei dina kei Utah, erau a sota mai Boston, Massachusetts e Amerika, na vanua erau a vuli torocake mai kina. Ni oti na kaulotu nei Elder Packer ki na Tabana ni Kaulotu ena Andes kei na Tabana ni Kaulotu e Colombia-Venezuela, a vakamau vata kei Terri ena Valetabu e Salt Lake ena 1 ni June, 1970. Erau sa itubutubu tiko ni 8 na gone kei na 17 na makubudrau.

E a taura o Elder Packer na nona diqiri ni bejala ena tekinolaji ni idinia ni veika vakalivaliva mai na Brigham Young Univesiti. E a cakacaka tu mai vaka-bisinisi ka a veiqaravi vaka-peresitedi ena vica na kabani.

E a veiqaravi talega o Elder Packer ena vuqa na veikacivi ena Lotu, oka kina na bisopi, iLiuliu ni Skaut, daunivakasala ena mataveiliutaki ni iteki, peresitedi ni Tabana ni Kaulotu e Spain Málaga, ka lewe ni matabose raraba ni Cauravou.

“Au kila ni dina na cakacaka oqo,” e kaya o Elder Packer. “Na iVakabula sa noda Dauveivueti. Sa dolava tu o Koya na katuba ka solia vei keda na madigi me da lesu tale vei Tamada. Au doka vakalevu na noqu rawa ni mai vukei Koya ena Nona cakacaka.”