Elder Tad R. Callister
Ena Vitusagavulu
Ena nona dau talairawarawa ki na vanua cava ga e talai koya kina na Turaga, sa vakadinadinataka kina o Elder Tad Richards Callister ni nona qarava na Turaga sa kauta mai vua e vuqa na veivakalougatataki.
“Ena vukei kemuni na Turaga ena gauna mada ko ni malumalumu tu kina,” ea kaya o Elder Callister. “Na veikacivi yadua e uabaleta na tamata o ya, ka sa na vukei koya kina na Turaga. E dina ga ni Nona veidusimaki e rogo malua ka malumu, e sega ni biuti kemuni tu mo ni tu taudua.”
E a sucu o Elder Callister kivei Reed Callister kei Norinne Callister ena ika 17 ni Tiseba, 1945, mai Glendale, California e Amerika. E a veiqaravi oti vaka-daukaulotu ki na Tabana ni Kaulotu e Eastern Atlantic States, bisopi, peresitedi ni iteki, mata ni iwasewase levu, Vitusagavulu ni iWasewase, ka a peresitedi tiko ni Tabana ni Kaulotu e Canada Toronto East ena gauna a ciqoma kina na nona veikacivi me ki na iKarua ni Kuoramu ni Vitusagavulu.
Na nona a veiqaravi tiko vaka- peresitedi ni kaulotu e a dua dina na gauna e sega ni vakamacalataki rawa kivei Elder Callister, e dua e dau taleitaka vakalevu na nona gauna vata kei nona matavuvale.
“Ko ni na vulica mo ni lomani ira na daukaulotu me vaka sara ga ni ra luvemuni tagane se luvemuni yalewa dina,” a kaya o koya. “Era na dau bulataka na ivakatagedegede ko ni dau namaka tiko vei ira, ka vaka me ra sa solegi tu ena kila ka tawayalani rawa.”
Ni oti na nona taura na nona diqiri ni bejala ena veika vakaakaude mai na Brigham Young Univesiti, e dua na diqiri ni lawa mai UCLA, kei na dua na diqiri ni masta ni lawa ni ivakacavacava mai New York Univesiti, e a mai cakacaka tu ena veika vakalawa o Elder Callister me 34 na yabaki ena dua na kabani ni lawa ni matavuvale e Los Angeles ena yasana o California.
Ena nona bulataka voli na ivakavuvuli a vulica mai ena vanua vakacakacaka kei na veika e sotava, e kaya o Elder Callister, “Na cakacaka vaka-lawa sa dua dina na bula vakaivakarau meda vulica kina na kena vakacakulei e dua na leqa, kila rawa me da kakua ni dau vakatulewa vakatotolo, ka kila vakavinaka meda taura taucoko mada na veika dina ni bera ni da vakayacora e dua na vakatulewa. Sa vakakina, ni’u vakabauta ni Turaga ena namaki kemuni tiko mo ni vakayacora na nomuni yavu vakacakacaka ena inaki ni noda vakasaqara na ivakatakila kivei keda yadua.”
E a sotava o Elder Callister na watina, o Kathryn Louise Saporiti, ni rau vuli tiko e BYU ka rau a vakamau ena Valetabu e Los Angeles California ena ika 20 ni Tiseba, 1968. E rau itubutubu ni ono na gone.