Na Kaukauwa ni Rarama kei na Dina
Kevaka me da na bula sautu ena gauna oqo, sa dodonu me waqa tiko e lomada na rarama vakayalo.
Niu se gonetagane lailai au a raica na kaukauwa ena dua na cina livaliva lailai. Niu waqaca ena bogi, au raica e dua na rarama levu ena vanua au dusia kina. E tubu cake na noqu kurabui niu cinava yani e dua na vale ni yaya duka levu. E curu basikata na maliwalala e dua na rarama momoto. Ia na ka veivakakurabuitaki duadua ga au qai raica ena noqu tabaka na matanicina e ligaqu. E waqa mai ena butobuto na ligaqu. E tu ga vei au na rarama! E rawa ni veivakurabuitaki ni da dikeva na veika e basika kina na rarama vakayago, ia ena veivakurabuitaki sara ni da raica ka kila na veika e tarai cake mai kina na rarama vakayalo.
Eda bula donumaka na veigauna e veivakurabuitaki, ia ena dua talega na gauna e a kau tani kina mai vuravura na vakacegu.1 Kevaka me da na bula sautu ena gauna oqo, sa dodonu me waqa tiko e lomada na rarama vakayalo. Na sala cava me da rawata kina na rarama vakayalo oqo ka vakadeitaka me vakasinaita na yaloda ena dina ni kosipeli i Jisu Karisito? Au gadreva meu vakatura e tolu na sala: (1) vulica na ivakavuvuli dina (2) rawata na ivakadinadina savasava, ka (3) bulataka na kosipeli ena yaloqaqa.
Taumada, vulica na ivakavuvuli dina. A raica rawa ko Alama ni “na vunautaki ni vosa e tiko kina e dua na veivakauqeti cecere me vakavuna na nodra cakava na tamata na veika e dodonu—io, e—kaukauwa cake na kena cakacaka ena nodra vakasama na tamata mai na iseleiwau, se dua tale na ka, sa yaco vei ira—o koya sa nanuma kina ko Alama me ra tovolea mada na savasava ni vosa ni Kalou.”2 E kaya kina o Peresitedi Henry B. Eyring: “Na vosa ni Kalou sa ivakavuvuli e vakavuvulitaka o Jisu Karisito kei ira na Nona parofita. E kila o Alama ni tu na kaukauwa levu ena vosa ni ivakavuvuli. E rawa ni dolava na nodra vakasama na tamata me ra raica na veika vakayalo ka sega ni rawa ni raica na mata vakayago. Ka rawa ni ra dolava na yalo me ra vakila na loloma ni Kalou ka lomana na dina.”3
Ena 1832 a vakatakila kina na Turaga vua na parofita o Josefa Simici e dua na ivakavuvuli dina ka kaukauwa me baleta na rarama vakayalo, na Rarama i Karisito:
“Na rarama ka lako mai na nona iserau na Kalou me vakasinaita na maliwalala vakaitamera—
“Na rarama ka sa tu ena ka kecega, sa solia na bula ki na ka kecega, sai koya na lawa sa lewai kina na ka kecega, io na kaukauwa ni Kalou o koya sa dabe tiko ena nona idabedabe vakaturaga.”4
E vaqaqacotaka na dina oqo o Peresitedi Boyd K. Packer ena nona kaya: “Na Rarama i Karisito sa vakamacalataki talega ena ivolanikalou me ‘na Yalo i Jisu Karisito.’ Na Yalo i Karisito e rawa ni vakararamataki koya e dau raica na veika vovou, dau vakadidike, na daudroini, na dauceuceu, na daubulisere, na dauvakatasuasua, na daudroinitaki vale, na dauvolaivola me vola na veika cecere, io na veika e vakauqeti kina me baleta na nodra kalougata kei na nodra vinaka na kawatamata.”5
Na nodra vakasama na dauvakadidike me baleta na veitiki bibi ni rarama e veivakurabuitaki dina. Nikua era sa vakamacalataka na rarama o ira na dauvakadidike me “dauveiusa,”6 se “italai,”7 se “dautataro.”8 Sa dua na ka na kedra cecere na ivakavuvuli ni Turaga!
iKarua, rawata na ivakadinadina savasava. Na ivakadinadina oqo sa vakadeitaka kina na Yalo Tabu ni sa Tamada na Kalou ka Karisito ko Jisu.9 Na rarama kei na dina eda raica ena ka kecega sa vakauqeti keda me da rawata na kila ka ena vuli kei na vakabauta, ka dau liu qai muria mai na veivakadeitaki ni Yalotabu.10 E rawa ni da vulica e levu na nona cakacaka na Kalou kei na nona vinaka ena wakilakila ni yagoda. Ia e dua na ivakadinadina titobu cake ena vakatakilai ni da vakasaqara vakayalo na dina “ena inaki dina.”11 E kaya kina o Peresitedi Spencer W. Kimball: “Na veika talei ni kila ka vakayago kei na kena vakayalo era ka vuni —ia e vunitaki ga vei ira era sega ni vakasaqara vakavinaka ka segata me ra kunea… . Na kila ka vakayalo e sega ni rawati walega ena vakatataro; na masu wale mada ga e sega ni rauta. E gadrevi kina na gugumatua kei na yalodina ena nona bula e dua.”12
Sa vaqaqacotaki na noda ivakadinadina ni da dikeva ena vakarokoroko na vuravura cecere sa bulia na Kalou vei keda. Sa vakarota vei Inoke na Kalou, “Na veika kecega sa buli sa tukuni au”13 A wasea e dua na ivakadinadina vata vakaoqo ko Alama vei Korio, na mecai-Karisito: “Na veika kecega sa tukuna ni dua tiko na Kalou; io, kei na veivuravura kecega era sa veitosoyaki ena kedra dui ituvaki era sa vakadinadinataka ni tiko e dua na Dauniveibuli Cecere.”14
Na veimulomulo a sotava o Inosi ni bera ni qai vakaraitaka vua na Turaga na kaukauwa ni ivakadinadina nei tamana. E kaya kina ko Inosi, “Sa votu sara mai vei au na ivakavuvuli ni bula tawamudu kei na nodra reki na yalododonu.”15 E kaya ko Elder M. Russell Ballard: “Na kena vunautaki vakamatata na dina ena vakayacora na veisau ena nodra bula na tamata. Sa ikoya oqori e veisautaka na yalo.”16
Keirau a tiko vata kei na watiqu ena dua na soqoni ni sakaramede volekati Recife, e Brazil. A lako cake ki na itutu ni vunau e dua na cauravou lailai, rauta ni yabaki 9 se 10, ka daramaka tiko na nona sutu karakarawa vou ena dua na siga katakata qai raici ira yani vakamalua na ivavakoso. E kaya, “Keitou vulica tiko ena neitou matavuvale na galala ni digidigi.” E qai wilika vakaoqo, “A ra sa sereki na tamata ena bula vakayago… . era sa sereki me ra digitaka na galala kei na bula tawamudu ena vukui Koya na Dauveisorovaki ni tamata kecega, se me digitaka na tiko vakabobula kei na mate me vaka na nona veivakabobulataki kei na nona inaki na tevoro.”17 Sa qai kaya na gonetagane, “Eso na noqu itokani qase era digia tiko me ra vakatavako ka vakayagataka na waigaga, ia me da na dui ciqoma ga na isau ni noda ivalavala.” A tinia ena nona ivakadinadina ka kaya, “Au rawa ni raica ni dina oqo.” Na ivakadinadina mai vua e dua na tamata gone vakaoqo e kaukauwa sara ka tara vakatitobu na yaloi keimami.
iKatolu, sa dodonu me da bula ena yaloqaqa me vaka na rarama kei na ivakadinadina eda sa ciqoma. Sa yalataki vei keda, “Ko koya sa kunea na rarama ka tudei tikoga vua na Kalou, ena vakararamataki vakalevu; ia ena tubu cake tikoga na nona rarama me yacova na siga lagilagi ko ya.”18 Sa ka ni sasaga kei na solibula dina sara me da bulataka ena yaloqaqa na kosipeli. Ena vuqa na yabaki sa sivi na sokalou ena valetabu vei ira na Yalododonu ka ra bula volekati Manaus, e Brazil, e kena ibalebale na vodo waqa siga rua ena dua na waqa sinai vutucoqa ena Uciwai na Amazon, ka qai muria na vodo basi siga rua ena loma ni siga katakata ki na valetabu e Recife. Ni ra yaco yani ena oca levu era sisili, vakaisulu rakorako, ka tekivu sara na nodra sokalou ena valetabu. Ni oti e vica na siga ni veiqaravi vua na Turaga era na lesuva tale na ilakolako balavu ka dredre ki vale. Na veimalanivosa “ia koi au kei ira na noqu lewe ni vale, keitou na qaravi Jiova”19 a vakavoqataki sara vakavinaka ena nodra ivalavala ni solibula.
Me da kune vakacegu ena veigauna vakasakiti ka dredre oqo, sa dodonu me da vulica na ivakavuvuli dina, rawata na ivakadinadina savasava, ka bulataka ena yaloqaqa na dina e tu ena kosipeli. Ni bula me sala vata kei na rarama kei na dina e vakavuvulitaka o Jisu Karisito kei ira na Nona parofita, eda na raica vakamatata cake na noda icavacava tawamudu. Au vakadinadinataka ena yaca i Jisu Karisito, emeni.