Elder Rafael E. Pino

Ena Vitusagavulu

Ena vukui Elder Rafael Eduardo Pino, na qaqaco ni nona ivakadinadina kei na kaukauwa ni nona vakadeitaka ni ko Jisu sa Karisito e lesu tale ki na rua na ka bibi a yaco. E dua vei rau o ya na nona a wilika na iVola i Momani ena imatai ni gauna ni se qai yabaki 17.

“Erau a kerei au na daukaulotu meu wilika e vica na tikina,” a kaya o koya, “ia au sa sega ni tarova rawa na noqu wilika tiko. Au sa kauta voli tikoga ena veivanua au lako kina. Ena veigauna kece au wilika kina, au vakila na yalo vata ga o ya ni reki kei na vakacegu. Au sa ivakadinadina bula ni sa mana dina na ituvatuva sa tauyavutaka na Kalou me vakadinadinataki kina ni sa dina na iVola i Momani, me vaka e tukuni tiko ena Moronai wase 10. Au a ciqoma e dua na ivakadinadina mai na kaukauwa ni Yalo Tabu ni sa dina na iVola i Momani.”

Na ikarua ni ka bibi a yaco vei Elder Pino o ya na nona laki kaulotu ki na Tabana ni Kaulotu e Venezuela Maracaibo. E dina ga ni a veiqaravi talega vakalevu o Elder Pino ena vica na ilesilesi ni Lotu ni bera ni mai tokoni ki na iMatai ni Kuoramu ni Vitusagavulu, oka kina na bisopi, lewe ni matabose e cake, peresitedi ni iteki, peresitedi ni kaulotu, kei na Vitusagavulu ni iWasewase, e dau maqusa sara me vakamatatataka na bibi ni nona laki veiqaravi ena kaulotu. “Na veikacivi yadua ena vakarautaki iko ki na nomu veiqaravi sa tu mai liu,” a kaya o koya, “ia na veika era sa ka bibi dina vei au e tiko na wakadra ena buturara ni kaulotu. Au se ciqoma tikoga oqo na veivakalougatataki ni noqu a laki kaulotu o ya.”

E a sucu o Elder Pino e Valencia, Venezuela, ena ika 27 ni Okotova, 1955, kivei rau o Arturo Pino kei Josefina Gimenez de Pino. A taura na nona sitivikiti ni veiqaravi vakailiuliu mai Caracas, Venezuela. E vuqa na ilesilesi vaka-Lotu sa veiqaravi oti mai kina o Elder Pino vakatekivu mai na 1980. O koya kei Patricia Monica Villa Dassler, na watina, erau a vauci vata ena Valetabu e Washington D.C. ena ika 31 ni Maji, 1981. Erau sa itubutubu tiko ni tolu na gone.