Era Milioni Era a Tokoni Ira na iLiuliu Vou ni Lotu Ena iVavakoso Vakalou

Era a soqoni vata yani na lewe ni Lotu e vuravura taucoko ena veivalenilotu kei na veitikotiko ena kakaburaki ena setilaiti, televiseni, retio, se Initaneti me ra tokona ena ivavakoso vakalou na Peresitedi kei na Mataveiliutaki Taumada vou ni Lotu i Jisu Karisito ni Yalododonu Edaidai ena ika 5 ni Epereli, 2008.

Ena ika 4 ni Feperueri, 2008 eratou a kacivaki kina o Peresitedi Thomas S. Monson kei rau na nona Daunivakasala ena Mataveiliutaki Taumada, o Peresitedi Henry B. Eyring kei Peresitedi Dieter F. Uchtdorf, ni oti toka ga na nona sa mai takali o Peresitedi Gordon B. Hinckley ena ika 27 ni Janueri. Ia, na ika 178 ni Koniferedi Raraba Vakayabaki ni Lotu ka a vakayacori ena ika 5 kei na 6 ni Epereli, 2008 sa isevu kina ni gauna vei ira vaka-lewe ni Lotu taucoko me ra tokoni iratou kina na nodra iliuliu vou oqo.

Eratou a tokoni talega na lewe ni Kuoramu ni iApositolo Le Tinikarua ena ivavakoso vakalou o ya ka a vakayacori ena Vale ni Koniferedi e Salt Lake City. A tokoni kina o Elder D. Todd Christofferson na lewe vou ni kuoramu o ya. Era a tokoni talega mai vei ira na lewenilotu na Vakaitutu Raraba kei ira na iliuliu ni mataveiliutaki raraba ni veimataisoqosoqo ni Lotu.

Mai na veikacivi nei Elder Christofferson sa mai kacivi kina o Elder L. Whitney Clayton ena iMatai ni Kuoramu ni Vitusagavulu me vakatawana na itutu sa mai lala toka ena Mataveiliutaki ni Vitusagavulu.

E tinikalima na turaga era tokoni me ra lewe vou ni iMatai kei na iKarua ni Kuoramu ni Vitusagavulu, ka ratou a tokoni talega kina na mataveiliutaki raraba vou ni Goneyalewa. (Raica na ilavelave ni itukutuku ni bula) E rua na lewe ni iKarua ni Kuoramu ni Vitusagavulu, o Elders Craig C. Christensen kei Elder William R. Walker, erau a tokoni ki na iMatai ni Kuoramu ni Vitusagavulu. Era a kacivi e 38 tale na lewe vou ni Vitusagavulu ni iWasewase me ra veiqaravi ena nodra dui iwasewase ena Lotu. (Raica na tabana 4–7 me baleta na yacadra taucoko era sa kacivi ka vakacegui ena koniferedi raraba.)

Sa isevu tiko ni Peresitedi ni Lotu o Peresitedi Monson me tokoni ena dua na ivavakoso vakalou a vakayacori ena Vale ni Koniferedi. E kaya o Elder Marlin K. Jensen ena Vitusagavulu, ni o daunitukutuku makawa ka vunivola ni Lotu, na Parofita o Josefa Simici kei na nona mataveiliutaki eratou a tokoni ena dua na ivavakoso vakalou ka a vakayacori ena Valetabu e Kirtland ena ika 27 ni Maji, 1836. Eratou a tokoni taumada o Brigham Young kei na nona mataveiliutaki ena ika 27 ni Tiseba, 1847, ena Valecavu e Kanesville mai Council Bluffs, Iowa. Vakatekivu mai vei Peresitedi John Taylor ena ika 10 ni Okotova, 1880, o ira kece na Peresitedi me yaco sara mai vei Peresitedi Monson era a tokoni ena dua na ivavakoso vakalou ka a vakayacori ena Valecavu e Salt Lake.

“E liu o ira na lewe ni Lotu era laki soqoni vaka-ivavakoso vakalou ena Valecavu,” e kaya o Elder Jensen, “ena veiyabaki oqo era sa vakarorogo na lewe ni ivavakoso e vuravura taucoko ena kakaburaki ena setilaiti, ka ra veiliutaki tiko na mataveiliutaki ni iteki ena vakayacori ni veitokoni mai vei ira na ivavakoso. Vakatekivu mai na 1945, era sa kerei tiko mai kina na lewe ni Lotu era vakarorogo tiko ki na soqoni ni koniferedi mai na nodra veivale me ra tokoni koya na Peresitedi vou ena veivanua cava ga era tiko kina.”

E vola na Veiyalayalati Makawa na imatai ni gauna a vakasalataki ira kina na Isireli na Turaga me ra tauyavutaka e dua na ivavakoso vakalou ena Kanavata ni Lako Sivia (raica Lako Yani 23:14–17; iVakarua 16:8, 16) kei na So Levu ni Vale ni Taba ni Kau, e vakatokai talega me So Levu ni Veivale ni Taba ni Kau, na So Levu ni Vakasokomuni, se Sukoci (raica na Vunau ni Soro 23:33–36; Niemaia 8:18).

“Me baleti ira na lewe ni Lotu, na nodra tokoni ira na vakailesilesi ni Lotu e sega ni ka ni veimurimuri na laveliga,” e kaya o Elder Jensen. “Na veitokoni ena loma ni dua na ivavakoso vakalou e vakaraitaka tiko e dua na yalo lomasoli ni vakabauta, masumasu, kei na veitokoni vei koya na Peresitedi vou ni Lotu.”

E vakamatatataka o Elder Jensen ni gauna vaka-ivavakoso vakalou o ya e sega walega ni gauna era kerei kina na lewenilotu me ra tokoni ira kina na iliuliu ni Lotu. Na veitokoni ena laveliga sa tiki tiko ni koniferedi raraba, koniferedi ni iteki, kei na koniferedi ni tabanalevu kei na tabana.

“Mai na nodra veitokoni tiko na lewenilotu vei ira na veiliutaki tiko ena Lotu, sa nodra madigi kina me ra vakavouya kina na nodra yalayala era a vakayacora ena gauna ni ivavakoso vakalou oqo,” e kaya o Elder Jensen.

E sivia e 100,000 na tamata era a tiko rawa ena soqoni ena Vale ni Koniferedi, kei na milioni era a sarava se vakarorogo ena televiseni, retio, setilaiti, kei na kakaburaki ena Initaneti.

E vuqa na soqoni ni koniferedi raraba ni Epereli era a vakadewataki ka kaburaki ena 92 na veimataqali vosa, ka sivia toka na isausau ni veikoniferedi sa ra oti yani.

Era sa vakarautaki tu ena LDS.org na itukutuku ni koniferedi ena kedra e volai, rogoci, kei na vidio.