O SE VALAAU IA TUPUTUPU AE
Na ou fanau i Pasila i se aiga lelei e toafa tama ma se tina ma se tama lelei. Ina ua ou fanau mai, sa le’i auai o’u matua i le Ekalesia. Na faatoa auai i laua i le Ekalesia a o ou laitiiti, ma sa papatiso ma faamauina au ina ua valu ou tausaga.
Ina ua atoa le 12 o ou tausaga, na valaauina au e lou epikopo mo se faatalanoaga. I lea faatalanoaga sa ia faamalamalama mai ai ia te au le uiga o le Perisitua Arona. Sa ia faamalamalama mai ou tiutetauave i le umia ai o le perisitua. Sa vaetofia au o se peresitene o le korama a tiakono, peitai sa na o au lava le tagata o lea korama sa toaga i le lotu. I lena taimi, sa aoaoina ai au e lou epikopo maoae i se lesona taua e uiga i le auauna atu i le Ekalesia.
O Se Valaaulia Faatauvaa
I se tasi Aso Sa sa matou i ai i le falelotu mo le lotu perisitua, sa faliu mai o ia ma fesili mai, “O fea isi tama? O fea tiakono o lau korama?”
Na ou fai atu, “O au lea. Na o a’u lava ou te iloa.”
“O le a sau mea o fai ina ia e iloa ai tagata o lau korama?” na fesili mai ai.
Na ou fai atu, “Ou te le iloa po o le a se mea e fai.“
Ona fai mai lea o ia i se leo malu, “O le a ou tauina atu le mea e te faia.”
Ona ma o lea i le taimi lava na tuua ai le lotu, ma savavali faataamilo i le vaiaai, e asia alii talavou taitoatasi o loo i le lisi o le korama ma valaaulia i latou ia toe o mai. O nisi o i latou na toe o mai ina ua maea ni asiasiga. O nisi na o atu i ni misiona, maua ni aiga lelei, ma avea o ni epikopo ma peresitene o siteki. O nei mea uma na amata ona o se ma asiasiga faatauvaa ma lo’u epikopo. Sa mataala o ia i lena manaoga faapitoa i la matou uarota toagaogao, ma ou te matua faafetai lava ona sa ou aoaoina se lesona, o loo faapea ona tumau pea ia te au.
I lo’u olaga atoa, ua ou aoaoina ai, ua saunia tagata e toe valaaulia ia toe foi mai. E ao ona outou o atu ma valaaulia i latou. E oo lava i se tama e pei o au, e leai se poto masani i le perisitua, e mafai ona faia ni mea se tele e fesoasoani ai ia tupuolaola le malo.
O lena aafiaga o se peresitene o le korama a tiakono na fesoasoani ia te a’u. O lena epikopo sa matua atamai lava. Sa ia silasila mamao i le lumanai. Sa ia faamatuu mai lena tofiga ia te au aua sa ia iloaina o a’u o se tama talavou sa manaomia se faiaoga. Ma sa tonu ia te ia e fai o ia ma [ou] faiaoga, o lea sa faaalu ai lona taimi e fesoasoani ma lagolago ai a’u e ala i lo ma o faatasi. Na fesoasoani ia ou malamalama i le manaia o le auauna atu i le Ekalesia, ia faia se mea i la’u molimau. Sa matua ofoofogia. E faavavau ona ou faafetaia o ia.
O Se Lesona i le Molimau
Ina ua latalata i le 16 o ou tausaga, na tofia au e lea lava epikopo e sui mo se vaitaimi i se faiaoga o le autalavou laiti i le Aoga Sa. Ina ua ia tuuina mai lena tofiga sa ou fefe ma le mautonu. Sa ou lagona e lei lava lou iloa e aoao atu ai. Na ou mafaufau, “E faapefea ona ou faiaoga i lena vasega? E pei o le a taitai e le isi tauaso le isi tauaso.
Ou te manatua se tasi lesona patino, sa tatau ai ona ou talanoa e uiga i le molimau ia Iesu Keriso. Sa matou suesueina le Tusi a Mamona ma pe faapefea ona tatou maua se molimau o le talalelei. Na ou lagona i lou loto ua ou iloa e moni le Ekalesia, o Iesu o le Keriso. Peitai ou te lei tatalo lava e uiga i ia mea. Na ou manatu “O le a faapefea ona ou aoao atu i nei talavou e tatau ona latou tatalo ma maua ai se tali, pe afai ou te lei tatalo lava mo se tali?”
Talu ona ou fanau mai, sa aoaoina au e uiga i le faatuatua ia Iesu Keriso. Ma ina ua avea a’u ma tagata o le Ekalesia, sa i ai pea lena lagona mafanafana i lou loto e uiga ia Iesu Keriso, e uiga i lou Tama Faalelagi, ma e uiga i le Ekalesia. E lei faapopoleina lava au i se manatu e faapea pe o le Ekalesia moni lenei a Iesu Keriso. Ou te lei tatalo mo lenei mea aua sa matua malosi ia lagona ia te a’u. Ae peitai, i tapenaga mo lena vasega i lena vaiaso, na tonu ai e tatau ona ou tatalo ia ou maua se faamaoniga e moni le talalelei.
Sa ou tootuli ifo i lou potu, ua tonu ou te tatalo ma lou malosi uma ia faamaonia i lou loto o le Ekalesia moni lenei a Iesu Keriso. Ou te lei faamoemoe i se faaaliga maoae po o se agelu po o se isi mea. Ou te lei iloa pe o le a se mea na ou faamoemoe i ai e avea ma tali.
Ina ua ou tootuli ifo ma fesili atu i le Alii pe moni le talalelei, na oo mai i lou loto se lagona toafilemu, o se leo itiiti sa faamautinoa mai ia te au e moni le talalelei ma e ao ona ou faaauau ai pea. Sa matua malosi ma o lea e le mafai ai ona ou fai atu ou te lei iloa. E le mafai ona ou le amanaiaina lea tali. E ui ona sa na o se leo itiiti, ae o se lagona matua malosi i lou loto.
Sa alu lena aso atoa o ou lagonaina le fiafia tele, na faapea ona le mafai ai ona ou mafaufau i se mea leaga. Pe a fai e tamaiti i le aoga ni tala le lelei, ou te le faalogo atu i ai. Pei lava na ou i ai i le lagi, i le manatunatu loloto i lena lagona matagofie i lou loto.
O le Aso Sa na sosoo ai, ina ua ou tu i luma o le vasega a le autalavou, sa mafai ona faasoa atu lau molimau ma tau atu ia i latou e tali mai le Tama Faalelagi ia latou tatalo pe a latou maua le faatuatua. Sa ou faitauina le Iakopo 1:5, o le mau foi lea na faitau i ai Iosefa Samita e uiga i le ole i le Atua mo le poto. Peitai fai mai le fuaiupu e sosoo ai, “aua o le masalosalo e tusa ia ma le peau o le sami ua sousou i le matagi ma felafolafoaiina” (Iakopo 1:6). O loo faapea mai foi e le mafai ona faamoemoe se tagata na te maua se tali pe afai e masalosalo lona loto a o tatalo. Ma sa ou faapea ifo ia te au lava ma lau vasega toaitiiti, e ao ona matou ole atu ma le faatuatua moni, saili mo se tali, ona tali mai ai lea o le Alii.
Mai lena taimi o lau molimau na aumaia ai le tautinoga malosi sa ou manaomia e fai ai faaiuga lelei, ae maise i taimi ou te feagai ai ma luitau. E fetaiai tatou uma ma luitau i le tausia o tulaga faatauaina o le talalelei, ae maise o i latou e pei o a’u, e na o i latou tagata o le Ekalesia i a latou a’oga. Peitai, o lau molimau na fesoasoani ia te au e manatua ai, e ui lava ina taaina au e uo ia fai mea sese, sa ou iloa i lou loto sa ou mulimuli i le talalelei moni a Iesu Keriso. Ina ua uma lena aafiaga, sa le mafai ona ou teena lena molimau.
O lena aso na faia ai se suiga tele i lou olaga. Mulimuli ane na faaauau au tapenaga mo se misiona faatasi ma le fesoasoani a lou epikopo lelei, ma lou aiga. Na ou auauna faamisiona, ma ina ua ou foi mai, na ou alu i le aoga ia maua sou faailoga. Sa ou faaipoipo ma amata se aiga. Ma, o ia mea uma na tutupu ona o lena tatalo a o faatoa 16 ou tausaga.
O Le Tuputupu Ae i le Olaga Atoa.
E pei ona ou fai atu, sa ou iloaina lava e moni le talalelei, peitai sa tatau lava ona ou fesili ona faasoa atu lea o ou lava aafiaga i isi tagata. Sa fesoasoani foi lena tulaga i lau misiona, aua a ou valaaulia tagata e tatalo, sa mafai ona ou faamatala ia i latou le mea na oo foi ia te au, ma faailoa atu ia i latou, sa ou faia foi lena mea. Sa ou molimau atu e mafai ona latou maua se tali pe a latou tatalo ma le faatuatua.
Na ou maua faamanuiaga sili ona sa tuuina mai le avanoa e aoao ma auauna atu ma tuputupu ae ai e ala i valaauga ma tofiga i le Ekalesia. Ou te tatalo pe a oo mai ia avanoa ia te outou, o le a outou faaaogaina. E mafai ona latou faia se suiga atoa i lou olaga.