Lesona mai le Tusi a Mamona
Oo i se Suiga o le Loto
I ni tausaga ua tuanai i Europa i Sasae, sa ou faalogo ai a o tulai se alii faifeautalai talavou i luma o ona uso a faifeautalai i se konafesi faalesone ma faasoa atu se aafiaga na suia ai lona olaga. Na la maua ma aoaoina ma lana soa se tamā faamatua tagata e igoa ia Aiveni (ua suia le igoa) i se nuu maotua. O le la tagata sailiili sa faigata lona olaga, ma sa iloa lava i ona lavalava ua tuai, ma lana soesa e le seleina, ma ona uiga le mautonu. Sa faigata ma lē lelei le olaga ia te ia.
Ona sa leai sona malamalama i mea faalelotu, o lea sa tele ai ni mea sa tatau ona faatoilalo e Aiveni. O amioga e le tusa ai ma le talalelei toefuataiina na tatau ona lafoai. Sa manaomia ona taliaina ni mataupu faavae fou ma ola ai. Sa manao Aiveni e aoao, ma sa ia saunia o ia lava ma le filiga mo lona papatisoga ma le faamauga. Sa tumau pea le tuai o ona lavalava ma lana soesa veuveua, ae peitai ua ia laasia faasitepu muamua. E lei leva ona papatisoina ia Aiveni ae siitia ese le faifeautalai. Sa faamoemoe o ia ia la toe fetaui ma Aiveni.
E ono masina mulimuli ane, ae toe tofi e le peresitene o le misiona le alii faifeautalai talavou i le paranesi sa i ai muamua. I le faateia ai ma le naunau e toe foi atu, sa vave o atu ai le alii faifeautalai ma lana soa fou, i le lotu faamanatuga i lona Aso Sa muamua na toe foi atu ai i le paranesi. Sa fiafia tagata o le paranesi ina ua toe vaai i le faifeautalai. Sa latou fetaomi atu ma laufofoga fiafia ma le agaga mafanafana o faafeiloaiga.
Na toetoe o tagata uma o le faapotopotoga toagaogao na iloa e le faifeautalai. Ae peitai, sa ia sueina ae lei maua i le faapotopotoga le alii na la aoaoina ma papatisoina ma lana soa i le ono masina ua te’a. Na oso ae i le faifeautalai se lagona o le le fiafia ma le faanoanoa. Pe ua toe foi Aiveni i ona uiga le lelei? Pe ua le ola i ana feagaiga o le papatisoga? Pe ua ia le maua faamanuiaga folafolaina e ala i lona salamo?
Na faasalaveia atugaluga ma manatu o le faifeautalai i le taunuu atu o se alii e le masani ai o le sa faanatinati atu ma fusi o ia. Sa i ai i le alii foliga mama se ataata mautinoa ma na iloa lelei lava lona amiolelei i le susulu o ona foliga. Sa faia sona ofutino paepae ma se fusiua na seleina lelei, na alu atu o ia e tapena le faamanatuga mo le faapotopotoga toagaogao i lena taeao o le Sapati. Ana le tautala lava le alii e le iloa o ia e le faifeautalai. O Aiveni fou lea ae le o le Aiveni tuai lea sa laua aoaoina ma papatisoina! Sa vaaia e le alii faifeautalai le tino mai i lana uo o le vavega o le faatuatua, salamo, ma le faamagaloina; sa ia vaaia le moni aiai o le Togiola.
Sa tau atu e le faifeautalai i ana aumea na auai i le konafesi faalesone e faapea, na suia Aiveni ma alualu i luma i soo se itu i masina na toesea ai le alii faifeautalai mai le paranesi. Ua opomau e Aiveni le talalelei, ma na susulu mai ia te ia. Na oo ia te ia le “liliu o le loto” (Alema 5:26) na lava lea ina ia papatisoina ai o ia ma fetaomi atu i luma i le faagasologa faifai pea o le liuaina. Sa saunia o ia mo le mauaina o le perisitua maualuga ma sauniga o le malumalu. E moni lava na toe fanaufouina Aiveni (Alema 7:14).
Ao faaiuina le tautalaga a le faifeautalai, sa fesili leotele o ia ia te ia lava, “O le a le tele o se ‘liliuga o le loto’ ua ou oo i ai i le 6 masina ua tuanai? Sa faaauau lana lava iloiloga, i le fesili leotele, “Pe ua ou toe fanaufouina ea?” O fesili nei e lua e tatau ia i tatou taitoatasi ona manatunatu loloto i ai i taimi uma.
I tausaga na mulimuli ane, sa ou tomanatu ai i upu a le faifeautalai talavou ma amioga a Aiveni. Sa ou mafaufau loloto i le matafaioi a le “faaliliuina tele” (Alema 5:12) o o tatou loto ma le fanauina ‘faaleagaga … i le Atua” (Alema 5:14) e faia i le faagasologa o le taliaina o le talalelei toefuataiina. O lau faaiuga e faapea, o nei vaega e mautinoa lava o ni vaega taua o aoaoga faavae a le Alii, e le na o se aafiaga e faatasi ona tupu i le olaga nei. O ni avanoa faifai pea, ua faamoemoe e faamautuina ai le faagasologa o le liuaina ma le faamamaina o le tagata lava ia. E saunia atoatoa ai i tatou mo le ola e faavavau.
O Luitau o le Toe Fanaufouina Faaleagaga
O luitau o le toe fanaufouina ma le oo i le liliuga tele o le loto o ni lui ia e tatau lava ona tatou manatunatu i ai. O nisi tagata i atunuu Kerisiano e talitonu e mafai ona latou toe fanaufouina e ala i le na ona faailoa atu o Keriso o le Faaola o le lalolagi, e tutoatasi i soo se amioga patino na i ai muamua pe na faia mulimuli ane. O nisi e talitonu o le iloaina o le matafaioi a Keriso, ma le faailoaina e le tagata lava ia o le talitonu ia Keriso, ua lava lea e aumaia uma ai i tatou i le afioaga o le Tama ma le Alo. Ae po o le a lava le lelei o lenei tulaga, ua le sa’o lea.
O le Feagaiga Fou o loo aumaia ai le anoanoai o mau e uiga i le mataupu o le toe fanaufouina peitai, o le faaliliuina e le o matua faamatalaina ai pe faapefea ona ausiaina. Mo se faataitaiga, o le Faaola (tagai Ioane 3:5–7), Ioane le Papatiso (tagai Mataio 3:11), ma Paulo (tagai Roma 6:2–6); 2 Korinito 5:17; Kalatia 4:29; Efeso 4:24) o loo folafola mai ai le mataupu faavae, ae e le o faamanino mai ai lona uiga.
Nai lo lena, o le Tusi a Mamona o se punaoa matagofie e malamalama lelei ai i le faagasologa o le oo i se liliuga tele o le loto, ma le toe fanauina. O loo tuuina mai ai e ona perofeta se folafolaga atoatoa faaleaoaoga faavae o le faagasologa. O fasi fuaiupu uma e lua na suesueina atoa e Alema le Itiiti, o le na tuuina mai ni fesili se tolu i tagata o le Ekalesia: “Ou te fai atu ia te outou, ou uso i le Ekalesia, po ua fanauina ea outou faaleagaga i la le Atua? Po ua outou maua ea lona foliga i o outou mata? Po ua outou lagona ea lenei liliu tele i o outou loto? (Alema 5:14)
Ua tatou iloa mai tusitusiga faavae e faapea, o le papatisoga i le faatofuina e mafai ai ona avea i tatou ma tagata o le Ekalesia, peitai, o lena sauniga e tasi e le maua ai le toe fanauina faaleagaga, lea e mafai ai ona tatou toe foi atu i le afioaga o le Tama Faalelagi. E faapena foi, pe a faamauina i tatou pe a uma ona papatisoina, ua tatou maua le aia tatau i le mafutaga faifai pea ma le Agaga Paia. Ae peitai, sei iloga tatou te salamo moni—ma faapea ona maua moni le Agaga Paia—ona mafai lea ona faapaiaina i tatou ma toe fanauina faaleagaga. O le mea lea, e aoga ai fesili faigata ae taua a Alema ia i tatou taitoatasi i le olaga atoa.
Na aoao mai Peresitene Polika Iaga (1801–77) e uiga i le “toe fanaufouina” e faapea: “E i ai le mea ua ta’ua o le fanau i le Agaga a o tatou ola ai i le tino.—Ma a tatou malamalama lelei i la tatou faalapotopotoga tutoatasi, ua faapea ona aumai e le Atua ia i tatou ma le lalolagi o agaga, ma mataupu faavae ma mana e galulue i lenei tagata, o le a tatou iloaina ai, e mafai e se tagata ona tuuto atoatoa atu i le Agaga o le upumoni ma le Atua, ma matuai gauai atoa atu i lena Agaga lea e mafai ona ta’ua ai ma le alagatatau o se toe fanaufouina.”1
I se saunoaga faagaeetia a le Tupu o Peniamina i lona nuu, i le fautuaina o i latou e faatatau i ala e tatau ona latou ola ai i mataupu faavae o le talalelei (tagai Mosaea 2–4). Sa ia fesili atu ma le to’a ia i latou pe latou te talitonu i ana upu. O la latou tali faaootia loto, ua aumaia ai se faataitaiga mamana: “Ma ua latou alalaga ma le leo e tasi ua faapea mai: Ioe, ua matou talitonu i upu ua e fetalai mai ai ia te i matou, ma lea foi, ua matou iloa ua moni ma ua tonu lava ona o le Agaga o le Atua pule aoao, na ia faaliliuina a matou amio ma o matou loto, ua le toe ai so matou manatu e fai amio leaga, ae fia fai pea lava le amio lelei” (Mosaea 5:2).
Ua latou fai mai foi, “Ua matou fia osi le feagaiga ma lo matou Atua e fai lona finagalo ma usiusitai i ana poloaiga, i mea uma na te poloaiina ai i matou i o matou aso uma ua totoe” (Mosaea 5:5 ua faatusilima mea e faamamafa).
Ona faamalamalama atu lea e le Tupu o Peniamina ia i latou le mea na tupu ma le taunuuga, ma tuuina atu se faauigaga lelei lava o le toe fanauina.
“Ua outou fai mai upu sa ou manao i ai; o le feagaiga foi ua outou osia, o le feagaiga tonu lea.
“O lenei, ona o le feagaiga ua outou faia e taua outou o le fanau a Keriso, o ona atalii ma ona afafine; aua faauta, o le aso nei ua fanaua ai outou e ia i le faaleagaga; aua ua outou fai mai ua liua o outou loto ona o le faatuatua i lona suafa; o le mea lea ua fanauina ai outou ia te ia, ma ua avea ai outou mona atalii ma ona afafine” (Mosaea 5:6–7).
O nei tagata na mulimuli atu i le Tupu [o] Peniamina na mautinoa lava le oo i se liliuga tele o le loto faapena, ma sa le toe i ai se loto e fai le amioleaga; ma le isi sa manino le toe fanauina o i latou i le faaleagaga po o le toe fanaufouina.
Manatua e le faapea o le toe fanauina e aveesea ai le manatua o agasala ua tuanai, ae e aumaia ai le filemu o le mafaufau ma aveesea ai le tiga o le solitulafono (tagai Mosaea 27:29; Alema 36:19).
Faamanuiaga o le Toe Fanaufouina
Ua faamanatu mai ia i tatou e Elder Bruce R. McConkie (1915–85) o le Korama a Aposetolo e Toasefululua e faapea, “o na tagata o le Ekalesia ua toe fanauina moni ua i ai i se tulaga faamanuiaina ma faafiafiaina. Ua latou maua lo latou tulaga, e le ona ua auai i le Ekalesia, ae ona o le faatuatua (1 Ioane 5:1), amiotonu (1 Ioane 2:29), alofa (1 Ioane 4:7), ma ua manumalo i le lalolagi (1 Ioane 5:4.)”2
O Alema le Itiiti sa patino ona aafiaga o le liuaina mai le avea ma fili i le Atua i le avea ma se tagata fou, o se tagata na liua ma, o le mea lea na naunau ai i le fausiaina o le malo:
“Aua ua ia fai atu, ua ou salamo i au agasala, ma ua togiolaina au e le Atua; faauta, ua fanauina au i la le Agaga.
“Na fetalai mai foi le Atua ia te au; Aua e te ofo, aua e ao ina toe fanauina tagata uma lava, ioe, o tane atoa ma fafine, o atunuu uma, ituaiga, ma gagana eseese, ma nuu, ioe, ia fanauina i la le Atua, ma ia liua mai le faaletino ma le pau i le amiotonu, ona ua togiolaina e le Atua, ma avea mona atalii ma afafine.
“Ua faapea foi ona avea i latou ma tagata fou; a latou le faia lenei mea, e le mafai ona fai mo latou tofi le malo o le Atua” (Mosaea 27:24–26; ua faatusilima mea e faamamafa).
Afai e tatau i tagata uma ona toe fanauina ma maua se liua o le loto, e le afaina pe na tatou fananau i totonu o le Ekalesia pe na liliu mai i se taimi mulimuli a o talavou po o se tagata matua. E tatau lava ona i ai se taimi tatou te oo uma ai i lena liua o le loto ma lena toe fanauina i le Agaga a o tatou faaauau ai pea i le faagasologa o le liuaina. O le faagasologa o le toe fanauina ma le liua o le loto ua fuafuaina ina ia atoatoa, ia maua e atunuu uma, ma faapea ona oo atu i tagata taitoatasi.
Ua tuuina mai i tusitusiga paia tala i tagata o e na toe fanauina i se tulaga maoae, e pei o Paulo (tagai Galuega 9:1–20) ma Alema le Itiiti (tagai Mosaea 27:8–37). Ae peitai, o le toatele o tagata o le vaitaimi o le tusi paia ma le Tusi a Mamona, e faapea foi ma aso nei, o lenei liuaina o le loto e le o se mea na tupu i se taimi e tasi, ae o se faagasologa patino ma faifai malie.
Na tuuina atu e Elder McConkie, i sana saunoaga i se Konafesi a le Siteki a le Iunivesite o Polika Iaga Muamua, ia upu faamafanafana ma faamalosiau nei: “O le toatele o tagata, o le [toe fanauina faaleagaga lea e o faatasi ma le faamagaloina o agasala] o se faagasologa; ma e alu o lea laasaga i lea laasaga, tikeri i le tikeri, tulaga i le tulaga, mai le tulaga maulalo i se tulaga maualuga, mai le alofa tunoa i le alofa tunoa, seia oo ina liliu atu atoa le tagata i le pogai o le amiotonu. O lenei, o lona uiga e manumalo se tagata i se agasala se tasi i le asō ma se isi agasala a taeao. Na te faaatoatoaina lona olaga i se tasi vaega i le aso, ma i le isi vaega mulimuli ane. Ma o le faagasologa o le liuaina e alualu pea seia oo ina faamaeaina, seia ona ina avea i tatou, i se tulaga moni, e pei ona fai mai le Tusi a Mamona, o le au paia a le Atua nai lo tagata o le lalolagi.”3
E le afaina pe afai o lo tatou toe fanauina i la le agaga e vave, po o le mea masani, o le faifai malie. Atonu o le faagasologa e eseese, ae o le a tutusa lava taunuuga. E leai se eseesega i le tulaga lelei o le liuaina. Mo tagata taitoatasi, o le oo i se liliuga tele o le loto e faaali mai i lagona o le olioli ma le alofa, o ia mea e lua e aveesea ai tiga na i ai muamua o le le usiusitai (Alema 35:20–21) E maeu le agalelei o lo latou Tama Faalelagi! Maeu le maoae o le Togiola a Lona Alo!
O le tumau i nei aoaoga faavae moni, e pei o le faifeautalai i Europa i Sasae ma lana tagata sailiili, e mafai ona avea oe ma au ma tagata e mauaina se liliuga tele o le loto ma le toe fanauina i la le agaga, ma faapea ona [tatou] seleseleina ai faamanuiaga ua folafola mai o le filemu, alofa, fiafia moni ma se tautinoga o le faia pea o le lelei.