Ofu Lelei mo Aso Sa i Pasila
“Ia e tausi le aso sapati ina ia faapaiaina” (Teuteronome 5:12)
I Minas Gerais, Pasila, e leai se tau malulu. Na pau lava le tau, o le tau matutu ma le tau susū. E mafai ona avea ma se nofoaga vevela tele ma susu! Ua iloa e tamaiti o le Peraimeri o le Paranesi a Conselheiro Lafaiete ia faamanuiaga e oo mai i le ofuina o lavalava e sili ona lelei o le Aso Sa, e tusa lava pe matuā vevela.
Sa galue Tuafafine Patrícia da Costa o se peresitene o le Peraimeri, ma na amata ona atugalu o ia i tulaga o lavalava i totonu o lana Peraimeri. “E faigata i tamaiti ona fai ni ofu lelei o le Aso Sa ona o le vevela tele,” o lana tala lea. “Ma le isi, e leai se tasi sa manatu tele i lona taua.” E ui o le fai faalelei o lavalava i le Aso Sa e le foliga mai o se mea tele, ae na iloa e Tuafafine da Costa o le a fesoasoani ai i tamaiti o le Peraimeri e faaalia le migao mo le Tama Faalelagi. O le a fausia ai
e tamaiti ni amioga lelei mo le lumanai.
Sa faatutu e le Peraimeri ni sini. Na maua e aiga ni lavalava lelei mo Aso Sa mo tamaiti sa leai ni lavalava. Sa latou faia foi se “savali’ i le Peraimeri e faaali ai lavalava e talafeagai mo le Aso Sa.
Sa lei faigofie peitai na taunuu a latou sini. “I le aso o le polokalama a le Peraimeri i le lotu faamanatuga, sa lavalava lelei tagata uma,” o le tala lea a Tuafafine da Costa. “Sa matua matagofie lava!”
E toatele tagata o le paranesi na matauina le eseesega. Ua sili atu le faaaloalo o tamaiti, ma ua latou manatu e fai e i latou lava o latou lavalava i le Aso Sa e aunoa ma le tau fai atu i ai o o latou matua. Ma sa i ai se isi faamanuiaga e lei mafaufauina: na toe amata ona o mai matua sa le toaaga i le lotu, faafetai i faataitaiga a a latou fanau.