O Fea O Le A Ou Maua ai Se Isi Tusi a Mamona?
Na faatoa uma lava so ma aso umi ma le le faamanuiaina ma lau soa, o le tuitui i faitotoa i Buenos Aires, Atenitina. A o ma nonofo e faatalitali le pasi, sa amata ona ou sioa ma mafaufau popole alofa ia te au lava ia. Ua tolu masina o o’u tala’i i le eria peitai e lei faamanuiaina lava. Na ou lagonaina na pei ua ou tuuina i lalo le Alii.
O le taimi tonu lena na ou matauina ai se tamaloa o vili faatopetope mai lana uila e agai mai ia i maua. Sa tuu alaga ma talotalo mai. Ma le faamoemoe ina ia ma aloese mai le tamaloa na foliga mai o loo toatamai, na ma savavali teleai atu ai i le pasi na latalata mai. Sa amata ona pogisa, ma sa ma i ai foi i se vaega e sili ona matautia o le eria. Sa ma faamoemoe ia ma oo i le pasi a o lei oo mai le tagata taufaafefe ia i maua.
“E i ai lau fesili mo oulua,” na tau manuo mai ai le tamaloa. Na taunuu mai le pasi ae na toeitiiti lava oo mai le tamaloa, ma ma tulioso ai loa i luga. Ona ou lagona atu lea o lana fesili: “O le a le mea na tupu i papatusi auro ina ua uma ona faaliliuina e Iosefa Samita?” Sa faateia au i lana fesili. Sa ou fia oso ese mai le pasi ao alu ese atu.” Nai lo lena sa ou valaau atu, “O fea e te nofo ai?” ma faatopetope ona tusia i lalo lona tuatusi.
Na ma afe i le fale o le tamaloa i le aso na sosoo ai. O lona igoa o Favio. Na fai mai o ia, o le masina ua tea na avatu ai e lana uo ia te ia se kopi o le Tusi a Mamona.
“Sa ou fiafia lava ia Iesu Keriso, ae ou te lei faalogo lava i se isi molimau i Lona soifuaga,” na fai mai ai Favio. “Na pau le mea na ou iloaina o le Tusi Paia ma galuega a Keriso i Sasae. E leai se isi na tauina mai ia te au e faapea na sau Iesu i Amerika! Na ou fiafia ai lava e aoao atili”.
O ni vaiaso mulimuli ane na toe faafoi ai e Favio le tusi. “Ou te le iloa po o fea a ou toe maua ai se isi kopi,” o lana tala mai lea. E leai se isi mea sili na ou manao i ai nai lo le fia iloa pe moni le tusi. Sa ou tootuli ma tatalo atu mo le fesoasoani a le Tama Faalelagi. Sa ou faapea atu, “Le Tama e, afai e moni le Tusi a Mamona, faamolemole ia aumai se isi kopi i ou lima e faaauau ai ona ou suesueina.”
I se tasi aso sa i ai Favio i le nofoaga o nofoaafi. Na iloa atu i ona siu mata se mea e pei o se tusi lanumoana na taatia i le ala savali. A o latalata atu i ai, sa na iloaina atu mataitusi auro. O le tali lea a le Tama Faalelagi.
I vaiaso mai le taimi na ia maua ai le Tusi a Mamona, na vaai ai Favio ia i maua i le fale faatali pasi. I lena taimi na ia iloa ai e moni le tusi. I isi vaiaso na sosoo ai sa ma aoaoina ai Favio i mataupu faavae autu o le talalelei ma faamalosiau atu ia te ia e faaauau pea ona faitauina. O taimi uma ma te fesiligia ai o ia pe o le a tautino e ola i se mataupu faavae fou o le talalelei, o lana tali mai, “Ou te fefe pe a ou le faia.” Mulimuli ane i se taimi e lei mamao, ae ui ifo loa o ia i le vai o le papatisoga.
O le taimi nei, soo se taimi lava e i ai so’u aso faigata, nai lo le alofa popole mo a’u lava, ou te manatua ai Favio—o lana fesili mo ni faifeautalai loto vaivai se toalua ma lana tautinoga i le Alii ina ua ia mauaina se tali.